Umumiy oʻrta taʼlim maktablarining 9-sinf bitiruvchilarini akademik litsey va kasb-hunar kollejlarida oʻqishga qamrab olish tartibi toʻgʻrisida vaqtinchalik nizomni tasdiqlash haqida (1779-son)

26.03.2008

OʻZBEKISTON RESPUBLIKASI XALQ TAʼLIMI VAZIRLIGI OʻZBEKISTON RESPUBLIKASI OLIY VA OʻRTA MAXSUS TAʼLIM VAZIRLIGI OʻRTA MAXSUS, KASB-HUNAR TAʼLIMI MARKAZINING

QARORI

[Oʻzbekiston Respublikasi Adliya vazirligi tomonidan 2008-yil 26-martda 1779-son bilan davlat roʻyxatidan oʻtkazildi]

Oʻzbekiston Respublikasi “Taʼlim toʻgʻrisida” va “Kadrlar tayyorlash milliy dasturi toʻgʻrisida”gi qonunlari, Oʻzbekiston Respublikasi Vazirlar Mahkamasining 2003-yil 29-oktabrdagi “Umumiy oʻrta va oʻrta maxsus, kasb-hunar taʼlimiga izchil oʻtishini taʼminlashga doir qoʻshimcha chora-tadbirlari toʻgʻrisida” 473-son qaroriga muvofiq Oʻzbekiston Respublikasi Xalq taʼlimi vazirligi, Oliy va oʻrta maxsus taʼlim vazirligi va Oʻrta maxsus, kasb-hunar taʼlimi markazi qaror qiladi:

1. Ilova qilinayotgan Umumiy oʻrta taʼlim maktablarining 9-sinf bitiruvchilarini akademik litsey va kasb-hunar kollejlarida oʻqishga qamrab olish tartibi toʻgʻrisida vaqtinchalik nizom tasdiqlansin.

2. Ushbu qaror Oʻzbekiston Respublikasi Adliya vazirligida davlat roʻyxatidan oʻtkazilganidan keyin oʻn kundan soʻng kuchga kiradi.

Xalq taʼlimi vaziri T. JOʻRAYEV

Toshkent sh.,

2008-yil 4-mart,

6-son

Oliy va oʻrta maxsus taʼlim vaziri A. PARPIYEV

Toshkent sh.,

2008-yil 4-mart,

56/1-son

Oʻrta maxsus, kasb-hunar taʼlimi markazi direktori Z. SATTOROV

Toshkent sh.,

2008-yil 4-mart,

09/QQ-son

Xalq taʼlim vazirligi, Oliy va oʻrta maxsus taʼlim vazirligi, Oʻrta maxsus, kasb-hunar taʼlimi markazining 2008-yil 4-martdagi 6, 56/1, 09/QQ-son qarori bilan TASDIQLANGAN

Umumiy oʻrta taʼlim maktablarining 9-sinf bitiruvchilarini akademik litsey va kasb-hunar kollejlariga oʻqishga qamrab olish tartibi toʻgʻrisida

VAQTINChALIK NIZOM

Mazkur Vaqtinchalik nizom Oʻzbekiston Respublikasi Vazirlar Mahkamasining 2003-yil 29-oktabridagi “Umumiy oʻrta va oʻrta maxsus, kasb-hunar taʼlimiga izchil oʻtishni taʼminlashga doir qoʻshimcha chora-tadbirlar toʻgʻrisida” 473-son qaroriga (Oʻzbekiston Respublikasi qonun hujjatlari toʻplami 2003-yil 20-son, 199-modda) muvofiq, umumiy oʻrta taʼlim maktablari 9-sinf bitiruvchilarini (bundan keyingi oʻrinlarda bitiruvchilar deb yuritiladi) ularning oʻzlari va ota-onalari (yoki ularning oʻrnini bosuvchi shaxslar) tomonidan ixtiyoriy ravishda tanlangan taʼlim yoʻnalishi (mutaxassisligi) boʻyicha akademik litsey va kasb-hunar kollejlariga qamrab olish tartibini belgilaydi.

Bitiruvchilarni akademik litsey va kasb-hunar kollejlariga qabul qilish ushbu Nizom va boshqa qonun hujjatlariga muvofiq amalga oshiriladi.

I. Bitiruvchilarning hujjatlarini akademik litsey va kasb-hunar kollejlariga topshirish hamda qabul qilishni tashkil etish

1. Xalq taʼlimi tizimida oʻtkazilgan tashxis natijalariga muvofiq, bitiruvchilarning oʻzlari va ota-onalari (yoki ularning oʻrnini bosuvchi shaxslar) tomonidan tanlangan taʼlim yoʻnalishi (mutaxassislik) boʻyicha akademik litsey va kasb-hunar kollejlarida oʻqishni davom ettirishlari toʻgʻrisidagi arizalari asosida umumiy oʻrta taʼlim maktablari direktorlari tomonidan hujjatlar yigʻma jildi shakllantiriladi.

2. Joylarda oʻn ikki yillik majburiy taʼlim tizimiga toʻliq oʻtish masalalarini hal etish, bitiruvchilar va ota-onalar (yoki ularning oʻrnini bosuvchi shaxslar)ning oʻrta maxsus, kasb-hunar taʼlimi muassasalari va mehnat bozorida talab etilayotgan mutaxassisliklar (kasblar) toʻgʻrisida aniq maʼlumotga ega boʻlishlarini taʼminlash hamda ular uchun barcha qulayliklar yaratish maqsadida har bir tuman (shahar) hokimligi qoshida doimiy faoliyat koʻrsatuvchi maslahat markazi (shtabi) tashkil etiladi. Ushbu maslahat markazlariga joylardagi manfaatdor idora va jamoat tashkilotlari vakillari jalb etiladi.

3. Umumiy oʻrta taʼlim maktablari direktorlari bitiruvchilarning toʻliq hujjatlar yigʻma jildini bitiruvchi hamda ota-onalar (yoki ularning oʻrnini bosuvchi shaxslar)ning bevosita ishtirokida tegishli akademik litsey va kasb-hunar kollejlari direktorlariga topshiradilar. Umumiy oʻrta taʼlim maktabi va oʻrta maxsus, kasb-hunar taʼlimi muassasalari direktorlari oʻrtasida topshirish-qabul qilish dalolatnomasi tuziladi va toʻrt nusxada rasmiylashtiriladi.

4. Dalolatnomaning nusxalari oʻrta maxsus, kasb-hunar taʼlimi va xalq taʼlimi boshqarmalarida, umumiy oʻrta taʼlim maktabi, akademik litsey yoki kasb-hunar kollejlari direktorlarida saqlanadi. Hujjatlar yigʻma jildini bitiruvchi yoki uning ota-onasiga berib yuborish man etiladi.

5. Akademik litsey va kasb-hunar kollejlarining oʻz hududlaridagi bitiruvchilarni muayyan taʼlim yoʻnalishlari (mutaxassisliklar) boʻyicha qamrab olish imkoniyatlari doirasida oʻqish istagini bildirgan bitiruvchilar arizalariga koʻra akademik litsey va kasb-hunar kollejlari oʻquvchilari safiga toʻgʻridan toʻgʻri qamrab olinadi.

6. Xalqaro, Oʻzbekiston Respublikasi, Qoraqalpogʻiston Respublikasi, Toshkent shahar va viloyatlar bosqichidagi fan olimpiadalari, tanlov va musobaqa gʻoliblari (yoʻnalishlariga koʻra), aʼlo darajadagi umumiy oʻrta taʼlim toʻgʻrisidagi shahodatnomaga ega boʻlgan, I va II-guruh nogironlari, ota-onasining qarovisiz qolgan va chin yetim bitiruvchilar taʼlim muassasasi imkoniyatlari doirasida imtiyozli ravishda qamrab olinadi.

7. Akademik litsey va kasb-hunar kollejlarining qamrab olish imkoniyatidan ortiq bitiruvchilar oʻqish istagini bildirgan holatlar quyidagicha tartibga solinadi:

a) shahodatnomaning oʻrtacha bali boʻyicha, ushbu ballar teng boʻlib qolgan hollarda tanlagan akademik litsey va kasb-hunar kolleji taʼlim yoʻnalishlari (mutaxassisliklari) boʻyicha bitiruvchining tegishli fanlardan (mazkur bandning “b” kichik bandida belgilangan fanlardan) olgan ballar yigʻindisi boʻyicha;

b) taʼlim muassasalarining taʼlim yoʻnalishlari (mutaxassisliklari) boʻyicha quyidagi fanlardan toʻplagan ballar yigʻindisi hisobga olinadi:

akademik litseylarning — aniq fanlar, kasb-hunar kollejlarining — taʼlim, fan hamda muhandislik, ishlov berish va qurilish tarmoqlari: matematika, fizika, ona tili va adabiyot (oʻzbek tili va adabiyoti, rus tili va adabiyoti, qoraqalpoq tili va adabiyoti), tarix;

akademik litseylarning — ijtimoiy gumanitar fanlar hamda madaniyat va sanʼat, kasb-hunar kollejlarining — ijtimoiy fanlar, biznes va huquq hamda gumanitar fanlar va sanʼat: tarix, ona tili va adabiyot (oʻzbek tili va adabiyoti, rus tili va adabiyoti, qoraqalpoq tili va adabiyoti), matematika;

akademik litseylarning — tabiiy fanlar, kasb-hunar kollejlarining — qishloq va suv xoʻjaligi hamda sogʻliqni saqlash va ijtimoiy taʼminot: kimyo, biologiya, ona tili va adabiyot (oʻzbek tili va adabiyoti, rus tili va adabiyoti, qoraqalpoq tili va adabiyoti), tarix, matematika;

akademik litseylarning — xorijiy filologiya, kasb-hunar kollejlarining — xizmatlar: umumiy oʻrta taʼlim maktabida oʻqigan chet tili, ona tili va adabiyot (oʻzbek tili va adabiyoti, rus tili va adabiyoti, qoraqalpoq tili va adabiyoti), matematika, tarix.

Oʻzbekiston Respublikasi Madaniyat va sport ishlari vazirligi, Oʻzbekiston Badiiy akademiyasi tasarrufidagi akademik litsey va kasb-hunar kollejlarining tegishli taʼlim yoʻnalishlari (mutaxassisliklari) boʻyicha shu yoʻnalishdagi boshlangʻich maxsus maʼlumotga ega boʻlganlar ustunlikka ega boʻladilar.

8. Imkoniyatlari cheklangan bitiruvchilar Oʻzbekiston Respublikasining ixtisoslashtirilgan kasb-hunar kollejlariga taʼlim oluvchi imkoniyatlari cheklangan shaxslar uchun mutaxassisliklar va kasblar roʻyxatiga muvofiq Qoraqalpogʻiston Respublikasi Xalq taʼlimi vazirligi, viloyatlar va Toshkent shahar xalq taʼlimi boshqarmalari qoshidagi tibbiy-psixologik-pedagogik komissiyaning xulosa va tavsiyasi hamda mehnat va aholini ijtimoiy muhofaza qilish boshqarmalarining, tuman (shahar) ijtimoiy taʼminot boʻlimlarining yoʻllanmalari asosida qamrab olinadi.

9. Oʻrta maxsus, kasb-hunar taʼlimi markazi tomonidan taqdim etilgan maʼlumotlar asosida Oʻzbekiston Respublikasi taʼlim muassasalariga qabul qilish boʻyicha Davlat komissiyasi tomonidan quyidagi hollarda masalalar koʻrib chiqilib, tegishli qaror qabul qilinadi:

a) taʼlim muassasasiga bitiruvchilar va ularning ota-onalari (yoki ularni oʻrnini bosuvchi shaxslar)dan kelib tushgan arizalar soni taʼlim muassasasining qamrab olish imkoniyatlaridan ortiq boʻlganda;

b) oʻquvchilar turar joyi boʻlmagan taʼlim muassasasiga boshqa hududlardan bitiruvchilar kelganda, shuningdek, ularning soni taʼlim muassasasining oʻquvchilar turar joyidagi oʻrinlar sonidan koʻp boʻlganda;

v) bitiruvchilarni akademik litsey va kasb-hunar kollejlariga qamrab olish jarayonida oʻrta maxsus, kasb-hunar taʼlimi muassasalarida nizoli hollar vujudga kelganda.

10. Ushbu Nizomning 7-bandida keltirilgan holatlar boʻyicha qamrab olinmagan bitiruvchilarning hujjatlari, ularning oʻzlari va ota-onalari (yoki ularning oʻrnini bosuvchi shaxslar)ning bevosita ishtirokida hududiy Oʻrta maxsus, kasb-hunar taʼlimi boshqarmasi tomonidan qamrab olish imkoniyati mavjud boʻlgan boshqa oʻrta maxsus, kasb-hunar taʼlim muassasalariga oʻtkaziladi.

Bu borada oʻrta maxsus, kasb-hunar taʼlim muassasalari direktorlari tomonidan hujjatlarni topshirish-qabul qilish dalolatnomasi tuziladi va toʻrt nusxada rasmiylashtiriladi. Nusxalari oʻrta maxsus, kasb-hunar taʼlimi hamda xalq taʼlimi hududiy boshqarmalariga taqdim etiladi.

11. Hududiy oʻrta maxsus, kasb-hunar taʼlimi hamda xalq taʼlimi boshqarmalari boshliqlari barcha maʼlumotlarni umumlashtirib, Oʻzbekiston Respublikasi Xalq taʼlimi vazirligi va Oʻrta maxsus, kasb-hunar taʼlimi markaziga yozma axborot beradi.

Oʻzbekiston Respublikasi Xalq taʼlimi vazirligi hamda Oʻrta maxsus, kasb-hunar taʼlimi markazi bitiruvchilar akademik litsey va kasb-hunar kollejlariga qamrab olinganligi toʻgʻrisida Oʻzbekiston Respublikasi taʼlim muassasalariga qabul qilish boʻyicha Davlat komissiyasiga hisobot beradi.

12. Bitiruvchilarning akademik litsey va kasb-hunar kollejlariga qamrab olish jarayoni Oʻzbekiston Respublikasi Xalq taʼlimi vazirligi va Oʻrta maxsus, kasb-hunar taʼlimi markazi tomonidan nazorat qilinadi.

13. Bitiruvchilarning hujjatlari akademik litsey va kasb-hunar kollejlariga toʻliq va oʻz vaqtida topshirilishiga umumiy oʻrta taʼlim maktablari va oʻrta maxsus, kasb-hunar taʼlimi muassasalari direktorlari shaxsan javobgardir.

II. Bitiruvchilarni akademik litsey va kasb-hunar kollejlariga qamrab olishni rasmiylashtirish

14. Bitiruvchilarni akademik litsey va kasb-hunar kollejlariga qamrab olish yakuniga koʻra 10 kun muddatda ularni oʻquvchilar safiga rasmiylashtirish oʻrta maxsus, kasb-hunar taʼlimi muassasalari direktorlari tomonidan belgilangan tartibda amalga oshiriladi.

15. Chet el fuqarolari va fuqaroligi boʻlmagan shaxslarni oʻrta maxsus, kasb-hunar taʼlimi muassasalariga qabul qilish qonun hujjatlariga muvofiq amalga oshiriladi.

III. Bitiruvchilarni akademik litsey va kasb-hunar kollejlarida oʻqitish bilan qamrab olishni nazorat qilish

16. Majburiy oʻqishni davom ettirish uchun bitiruvchilarga toʻsqinlik qilayotgan umumiy oʻrta taʼlim maktablari, akademik litsey va kasb-hunar kollejlarining mansabdor shaxslari, shuningdek oʻquvchilarning ota-onalari yoki ularning qonuniy vakillari Oʻzbekiston Respublikasining qonun hujjatlariga muvofiq javob beradilar.

IV. Yakuniy qoidalar

17. Mazkur Nizom Oʻzbekiston Respublikasi Madaniyat va sport ishlari vazirligi va Oʻzbekiston Badiiy akademiyasi bilan kelishilgan.

Oʻzbekiston Respublikasi taʼlim muassasalariga qabul qilish boʻyicha Davlat komissiyasining 2008-yil 7-martdagi majlisi 1-son bayoni bilan maʼqullangan.

18. Mazkur Vaqtinchalik nizom 2010-yil 1-yanvargacha amal qilinadi.

Madaniyat va sport ishlari vaziri R. QURBONOV

Toshkent sh.,

2008-yil 3-mart