Sudyalar malakasini oshirish va sud-huquq sohasida tajriba almashinuvi boʻyicha hamkorlik toʻgʻrisida

18.04.2007

Oʻzbekiston Respublikasi Hukumati bilan Misr Arab Respublikasi Hukumati oʻrtasida

Bitim

Oʻzbekiston Respublikasi Hukumati va Misr Arab Respublikasi Hukumati, bundan keyin “Tomonlar” deb ataluvchilar,

ikki mamlakat oʻrtasida sud-huquq sohasida hamkorlikni chuqurlashtirishga intilib,

ikki mamlakat oʻrtasida sud-huquq sohasida hamkorlikni mustahkamlash va ushbu sohada tajriba almashishning muhimligiga ishongan holda,

quyidagilar toʻgʻrisida kelishib oldilar:

I-qism Tashriflar va tajriba almashish

1-modda

Misr sud tizimi bilan tanishish, huquqiy masalalarni oʻrganish boʻyicha tadqiqotlar oʻtkazish hamda sudlarda ish yuritishni takomillashtirish, shuningdek, ushbu sohada tadqiqotlarni rivojlantirish maqsadida Misr Arab Respublikasi Adliya vazirligi Oʻzbekiston Respublikasidan sudyalarning tashrifini tashkil qiladi.

2-modda

Misr Arab Respublikasi Adliya vazirligi mazkur Bitimning 1-moddasida nazarda tutilgan oʻzaro tashriflar Dasturini belgilaydi.

3-modda

Misr tomoni, sudlarda ish yuritishning texnikaviy qismini rivojlantirish uchun texnikaviy va yuridik yordamni taqdim etadi, shuningdek bu sohada toʻplangan tajribalarni almashadi.

4-modda

Mazkur Bitim maqsadlarini amalga oshiruvchi vakolatli organlar:

Oʻzbekiston Respublikasi Hukumati nomidan — Adliya vazirligi;

Misr Arab Respublikasi Hukumati nomidan — Adliya vazirligi.

II-qism Hujjatlar va axborotlar almashish

5-modda

Tomonlar quyidagilarni almashadilar:

1. Davriy matbaa nashrlari va risolalar, jurnallar, huquqiy tadqiqotlar hamda huquqiy taʼlim;

2. Sudyalarning malaka oshirish kurslari va dasturlari.

III-bob Anjuman va seminarlar tashkil qilish

6-modda

Tomonlar huquq fanining maxsus masalalari va sudlarda ish yuritishni tashkil etish boʻyicha oʻtkaziladigan seminar, uchrashuv va anjumanlar dasturlarini hamda sudlarda ish yuritish sohasida oʻzaro hamkorlik mavzuini birgalikda belgilaydilar.

7-modda

Tomonlar ikkala davlat adliya vazirliklari vakillaridan iborat boʻlgan hamda quyidagi maqsadlarni amalga oshirishga qaratilgan qoʻshma qoʻmitani tashkil etadilar:

1. Ushbu Bitim qoidalarini amalga oshirish va har ikkala Tomonning xarajatlarini aniqlash.

2. Ushbu Bitim qoidalarini bajarishga toʻsiq boʻladigan barcha muammolarni bartaraf qilish.

3. Sudyalar malakasini oshirish va sud-huquq sohasida tajriba almashinuvi sohasida hamkorlik istiqbollarini kengaytirish va munosabatlarni yanada rivojlantirishga qaratilgan aloqalarni mustahkamlash yuzasidan tegishli takliflarni taqdim qilish.

8-modda

Bitimga har qanday oʻzgartirishlar tomonlarning oʻzaro roziligi asosida kiritilishi mumkin.

Ushbu Bitim qoidalarini qoʻllashda va talqin qilishda yuzaga keladigan nizo va kelishmovchiliklar Tomonlar oʻrtasida ikki tomonlama muzokaralar orqali hal etiladi.

9-modda

Ushbu Bitim Tomonlar uning kuchga kirishi uchun zarur boʻlgan davlat ichki protseduralarini bajarganliklari toʻgʻrisida diplomatik kanallar orqali oxirgi yozma xabarnoma olingan sanadan boshlab oʻttizinchi kuni kuchga kiradi.

Ushbu Bitim bir yil davomida amal qiladi va Tomonlardan biri uning amal qilishini toʻxtatish niyati toʻgʻrisida navbatdagi muddat tugashidan kamida olti oy ilgari diplomatik kanallar orqali yozma ravishda xabardor qilmasa, u keyingi bir yillik muddatlarga oʻz-oʻzidan uzayaveradi.

Qohira shahrida 2007-yil 18-aprelda ikki asl nusxada, har biri oʻzbek, arab va ingliz tillarida tuzildi, bunda barcha matnlar bir xil kuchga ega.

Ushbu Bitimni talqin qilishda kelishmovchiliklar yuzaga kelgan holda ingliz tilidagi matn ustuvor hisoblanadi.

(imzolar)