Oʻzbekiston Respublikasi Bilan Turkmaniston bojxona chegaralari orqali tovarlar va transport vositalarini oʻtishi haqida axborotlar almashishni tashkil etish toʻgʻrisida

18.10.2007

Oʻzbekiston Respublikasi Davlat bojxona qoʻmitasi bilan Turkmaniston Davlat bojxona Xizmati oʻrtasida

Protokol

Oʻzbekiston Respublikasi Davlat bojxona qoʻmitasi bilan Turkmaniston Davlat bojxona xizmati (bundan keyin — Tomonlar),

Oʻzbekiston Respublikasi bilan Turkmaniston bojxona chegaralari orqali tovarlar va transport vositalarini oʻtishi haqida axborotlar almashishni tashkil etish hamda kelgusida rivojlantirish maqsadida,

quyidagilar toʻgʻrisida kelishib oldilar:

1-modda

Tomonlar, bir Tomon davlati hududidan olib chiqib ketilayotgan, yaʼni boshqa Tomon davlati hududiga eksport qilinayotgan yoki undan tranzit yoʻnalishida oʻtayotgan tovarlar va transport vositalari bojxona rasmiylashtiruvi boʻyicha axborot almashishini tashkil etadilar va amalga oshiradilar.

Axborot almashish Tomonlarning oʻz vakolatlari doirasida va davlatlari milliy qonunlariga muvofiq amalga oshiriladi.

2-modda

Tomonlar oʻz davlatlari bojxona hududlaridan oʻtayotgan tovarlar va transport vositalari haqidagi axborotlarni yigʻish, umumlashtirish va uzatilishini taʼminlaydilar. Tomonlar axborotlarni xavf koʻrsatgichlari va ularni aniqlash mezonlarini belgilash maqsadida foydalanadilar.

3-modda

Mazkur Protokolga muvofiq olingan axborotlar maxfiy hisoblanadi va taqdim etgan Tomonning yozma roziligisiz uchinchi tomonga berilmaydi, Tomonlar davlatlari milliy qonunchiligiga muvofiq davlat organlariga axborotlar berish bundan istisno.

4-modda

Tomonlar axborotlar almashish natijasida olingan xabarlarning nomuvofiqligi aniqlangan holatlar toʻgʻrisida bir-birlariga maʼlum qiladilar.

5-modda

Tomonlar bir-birlarini quyidagi vazifalarni bajaradigan bojxona organi mansabdor shaxsining tayinlanishi toʻgʻrisida xabar beradilar:

axborotlarni yigʻish, umumlashtirish, tahlil qilish va axborot taqdim etish;

axborotlarni almashish boʻyicha texnik shartlar, qayta ishlovchi texnologiyalari va axborotlarni himoya qilish boʻyicha talablarni ishlab chiqish va kelishish;

axborotlar almashish boʻyicha xabarlar tarkibini aniqlash, shuningdek zarur klassifikatorlarni ishlab chiqish va kelishish;

mazkur Protokol qoidalarini amalga oshirish bilan bogʻliq masalalarni hal qilish.

6-modda

Mazkur Protokolning 1-moddasini amalga oshirish maqsadida, Tomonlar oldindan axborot almashish boʻyicha eksperiment tashkil etadilar va amalga oshiradilar hamda quyidagilarni kelishadilar:

taqdim etish uchun moʻljallangan axborotlar shakli va zarur maʼlumotlar:

axborot berish tartibi:

Tomonlarning eksperimentda ishtirok etuvchi bojxona organlari roʻyxati:

eksperimentning boshlanish vaqti va zarur tadbirlarni amalga oshirish muddatlari.

Mazkur moddada koʻrsatilgan masalalar kelishilgandan soʻng, Tomonlar zarur tashkiliy tadbirlarni amalga oshiradilar va eksperimentni boshlashga tayyorligi toʻgʻrisida bir-birlarini yozma xabardor etadilar.

Bojxona chegarasidan tovar va transport vositalarini oʻtishi toʻgʻrisida axborotlar almashish boʻyicha eksperiment olti oy mobaynida amalga oshiriladi. Tomonlarning oʻzaro yozma kelishuviga koʻra eksperiment oʻtkazish muddati uzaytirilishi mumkin.

7-modda

Oʻtkazilgan eksperiment natijalari asosida Tomonlar har oyda axborotlar almashishni tashkil etish toʻgʻrisida qaror qabul qiladilar.

Tomonlar doimiy ravishda axborotlar almashishni boshlash muddati toʻgʻrisida bir-birlarini yozma xabardor qiladilar.

Axborotlar almashinuvi Tomonlar oʻrtasida bevosita rus tilida amalga oshiriladi.

8-modda

Mazkur Protokol talablarini amalga oshirish maqsadida, Tomonlar muzokaralar oʻtkazadilar va axborot almashishda tatbiq etiladigan axborot-maʼlumot materiallarni begʻaraz taqdim etadilar.

9-modda

Tomonlarning oʻzaro kelishuviga koʻra, mazkur Protokolning ajralmas qismi hisoblanadigan alohida protokollar bilan rasmiylashtiriladigan oʻzgartirish va qoʻshimchalar kiritilishi mumkin.

10-modda

Mazkur Protokol qoidalari har bir Tomonning davlati ishtirokchi boʻlgan boshqa xalqaro shartnomalar boʻyicha huquq va majburiyatlariga daxl qilmaydi.

11-modda

Mazkur Protokolni talqin qilishdan va qoʻllashdan yuzaga keladigan nizolar va kelishmovchiliklar Tomonlar oʻrtasida maslahatlashuv va muzokaralar oʻtkazish yoʻli bilan hal etiladi.

12-modda

Mazkur Protokol 5 yillik muddatga tuzildi va imzolangan sanadan 30 kun oʻtgandan soʻng kuchga kiradi.

Har bir Tomon boshqa Tomonga yozma xabarnoma yuborish bilan mazkur Protokolni amal qilishini tugatishi mumkin.

Mazkur Protokolning amal qilishi boshqa Tomonning xabarnomasi olinganidan uch oy oʻtganidan soʻng tugatiladi.

Ashxobod shahrida 2007-yil 18-oktabrda (Garashsizlik) ikki asl nusxada, har biri oʻzbek, turkman va rus tillarida tuzildi, bunda barcha matnlar bir xil kuchga ega.

Mazkur Protokol qoidalarini talqin qilishda rus tilidagi matn ustuvor hisoblanadi.

(imzolar)