Jinoiy ishlar boʻyicha oʻzaro huquqiy yordam toʻgʻrisida

12.02.2003

Oʻzbekiston Respublikasi bilan Koreya Respublikasi oʻrtasida

Shartnoma

Oʻzbekiston Respublikasi bilan Koreya Respublikasi (bundan keyin “Tomonlar” deb ataluvchilar),

jinoiy ishlar boʻyicha hamkorlik va oʻzaro yordam koʻrsatish orqali jinoyatlarni ogohlantirish, tergov olib borish, jinoiy taʼqib qilish hamda oldini olishda ikki mamlakatning samaradorligini oshirishga intilib,

quyidagilar toʻgʻrisida ahdlashib oldilar:

1-modda Qoʻllash sohasi

1. Tomonlar ushbu Shartnomaning qoidalariga muvofiq jinoiy ishlar boʻyicha tergov olib borish, jinoiy taʼqib qilish yoki jinoiy ishlar boʻyicha sud jarayonini amalga oshirishda bir-birlariga yordam beradilar.

2. Ushbu Shartnoma maqsadlarida jinoiy ishlar har qanday jazolanadigan va soʻrayotgan Tomon vakolatli maʼmurlarining yurisdiksiyasiga tushadigan huquqbuzarlikka taalluqli tergovni, jinoiy taʼqib yoki sud jarayonini anglatib, aynan shu huquqbuzarlik borasida yordam soʻraladi.

3. Jinoiy ishlar, shuningdek soliq toʻlash, bojxona majburiyatlari, valyuta nazorati yoki boshqa moliyaviy masalalar sohasidagi qonun huquqbuzarligi bilan bogʻliq ishlarni kiritadi, shuningdek ular bilan bogʻliq boʻlmagan nojinoiy taʼqib bilan bogʻliq boʻlmaydi.

4. Yordamga quyidagilar kiradi:

(a) shaxslardan dalillar yoki arizalarni olish;

(b) maʼlumotlar, hujjatlar, yozuvlar va guvohlik koʻrsatmalarini taqdim etish;

(c) shaxslar yoki predmetlarni aniqlash yoxud identifikatsiyalash;

(d) hujjatlarni topshirish;

(e) mulkni qidirish va xatga olish boʻyicha soʻrovlarni bajarish;

(f) soʻralayotgan Tomonda koʻrsatmalar berishga qodir yoki tergovni olib borish, jinoiy taʼqib yoxud sud jarayonini amalga oshirishga koʻmak beruvchi shaxslarni belgilashga qaratilgan choralarni koʻrish;

(g) jinoiy faoliyatdan olingan daromadlarni kuzatish, ushlab qolish, olib qoʻyish va musodara qilish; hamda

(h) soʻralayotgan Tomonning qonunchiligi bilan taqiqlamagan, ushbu Shartnoma maqsadlariga muvofiq keladigan boshqa turdagi yordam.

5. Ushbu Shartnomaga asosan taqdim etilgan yordam quyidagilarni oʻz ichiga olmaydi:

(a) har qanday shaxsni shu maqsadda ekstraditsiya qilish yoki hibsga olish yoxud ushlab qolish;

(b) soʻrayotgan Tomonda chiqarilgan sud qarorlarini soʻralayotgan Tomonda ijro etish, soʻralayotgan Tomonning qonunchiligi va ushbu Shartnomaga koʻra yoʻl qoʻyilgandagi holatlar bunga kirmaydi;

(c) sudlanganlarni jazoni oʻtash uchun topshirish;

(d) jinoiy ishlar boʻyicha sud ishini topshirish.

2-modda Boshqa turdagi yordam

Ushbu Shartnoma Tomonlar oʻrtasida boshqa shartnomalar, ahdlashuvlar yoki boshqalaridan kelib chiqadigan mavjud majburiyatlarga daxl qilmaydi va boshqa shartnomalar, ahdlashuvlar yoki boshqalariga muvofiq Tomonlar bir-birlariga yordam berishlariga toʻsqinlik qilmaydi.

3-modda Markaziy organlar

1. Har bir Tomon ushbu Shartnoma maqsadlarida soʻrovlar yoʻllangan yoki olingan holda Markaziy organ hisoblanadigan shaxs yoki maʼmurni doimiy asosda tayinlaydi.

2. Ushbu Shartnoma maqsadlarida quyidagi shaxslar yoki maʼmurlar Markaziy organlar etib tayinlanadilar:

(a) Oʻzbekiston Respublikasi uchun Bosh prokuror yoki Bosh prokurorning rasmiy vakili Markaziy organ hisoblanadi;

(b) Koreya Respublikasi uchun Adliya vaziri yoki bunday vazirning rasmiy vakili Markaziy organ hisoblanadi.

3. Har bir Tomon oʻzining Markaziy organlarini har qanday oʻzgarishlari toʻgʻrisida boshqa Tomonni xabardor qiladi.

4. Markaziy organlar, asosan bir-birlari bilan bevosita aloqada boʻladilar, lekin ularning ixtiyorlariga koʻra diplomatik kanallar orqali ham aloqada boʻlishlari mumkin.

4-modda Soʻrovlar mazmuni

1. Yordam toʻgʻrisidagi soʻrovlar quyidagilardan iborat boʻlishi lozim:

(a) soʻrovning maqsadini ifodalash va soʻralayotgan yordamning mohiyati;

(b) soʻrovning tashabbuskori boʻlgan shaxsning ism-sharifi, agentlik yoki organning nomlanishi;

(c) jumladan jinoiy ish predmetini tavsiflash, tegishli faktlar va qonunchilik hamda qoʻllanishi mumkin boʻlgan jazoning tavsifi;

(d) jumladan tergov yoki sud jarayonining ayni bosqichini bayon etish;

(e) soʻrovlarning amalga oshirilishi maqsadga muvofiq boʻlgan zarur muddatlarni belgilash.

2. Qayerda va qay darajada zarur boʻlgan bu yordam toʻgʻrisidagi soʻrov shu bilan birga quyidagilarni oʻz ichiga olishi lozim:

(a) unga nisbatan jinoiy ish olib borilayotgan yoki jinoiy ishga aloqador axborotga ega shaxs yoxud shaxslarning shaxsiyati, fuqaroligi va joylashgan joyi toʻgʻrisida maʼlumotlar;

(b) 10-moddaga muvofiq yordam koʻrsatish toʻgʻrisidagi soʻrovlar boʻyicha;

(i) Zarur holda soʻrayotgan Tomon bu shaxslardan soʻrashni istagan har qanday savollarni qamrab olgan, shaxslar soʻroq qilinishi lozim boʻlgan savollar roʻyxati;

(ii) koʻrsatilishi lozim boʻlgan boshqa hujjatlar, yozuvlar yoki guvohlik koʻrsatmalarining tavsifi va zarur holda ularni tanishtirish uchun soʻrab olish muhim boʻlgan tegishli shaxsning tavsifi;

(c) 11- yoki 12-moddalarga muvofiq yordam koʻrsatish toʻgʻrisidagi soʻrovga koʻra soʻrayotgan Tomonga borganda shaxs ega boʻladigan sutkalik xarajatlar va boshqa xarajatlar toʻgʻrisida axborot;

(d) 15- yoki 16-moddalarga muvofiq yordam koʻrsatish toʻgʻrisidagi soʻrovga koʻra qidirilayotgan materiallarning tavsifi va zarur hollarda ularning taxminiy joylashuvi;

(e) 16-moddaga muvofiq yordam koʻrsatish toʻgʻrisidagi soʻrovga koʻra:

(i) soʻrayotgan Tomonning jinoyatni tergov qilish uning yurisdiksiyasida boʻlishi mumkinligi toʻgʻrisidagi ishonchlari asosining batafsil tavsifi, va

(ii) bajarilishi lozim boʻlgan sud qarori va agar mavjud boʻlsa, ushbu qarorning darajasiga taalluqli bayonot;

(f) jinoyatni aniqlashga yoki uni tergov qilinishining tiklanishiga olib kelsa, yordam koʻrsatish toʻgʻrisidagi soʻrovga koʻra 16-moddaning 4-bandiga asosan maxsus holatni olib borish zaruriyati toʻgʻrisida bayon etiladi;

(g) soʻrovni bajarishda rioya etilishi uchun soʻrayotgan Tomon ega boʻlishi mumkin yoki istagi boʻlgan har qanday maxsus talab yoki protseduraning batafsil tavsifi, bunga taqdim etilishi lozim boʻlgan xohlagan bir axborot, isbot, hujjat yoki predmetning usul va shakllarining qismlari ham kiradi;

(h) agar bundaylari boʻlsa, soʻrayotgan Tomon soʻrovining maxfiyligi va bunday xohishlarining sabablarining xohishlarini belgilab beruvchi bayonot;

(i) soʻrayotgan Tomonning mansabdor shaxsi soʻrov bilan bogʻliq masala yuzasidan soʻralayotgan Tomonga borishni rejalashtirayotgan boʻlsa, bunday shaxs tashrifining maqsadi, taxminiy vaqti hamda safar tashkili toʻgʻrisida axborot;

(j) soʻralayotgan Tomon soʻrovni bajarishi uchun muhim yoki yordam berishi mumkin boʻlgan xohlagan boshqa yordamchi axborot, isbot yoki hujjat.

3. Ushbu Shartnomaga muvofiq olib borilgan soʻrov, yordamchi hujjatlashtirish va istalgan aloqalar soʻrayotgan Tomonning tilida va soʻralayotgan Tomonning tiliga yoki ingliz tiliga tarjima qilingan holda yuborilishi lozim.

4. Agar soʻralayotgan Tomon soʻrovdagi axborot ushbu Shartnomaga muvofiq soʻrovni bajarishga yetarli emas deb topsa, u qoʻshimcha axborotni soʻrab olishi mumkin.

5. Soʻrov yozma ravishda tuzilgan boʻlishi lozim, faqat holatlar, yaʼni kutilmagan vaziyatda soʻralayotgan Tomon soʻrovni boshqa shaklda qabul qilishi mumkin. Bunday vaziyatda, agar soʻralayotgan Tomon boshqacha rozi boʻlmasa, soʻrov 20 kun ichida yozma ravishda tasdiqlanib berilishi lozim.

5-modda Yordam berishni rad etish

1. Soʻralayotgan Tomonning fikri quyidagicha boʻlsa, yordam berish rad etilishi mumkin:

(a) agar soʻrov soʻrayotgan Tomon tarafidan siyosiy xaraktyerga ega yoki oddiy jinoiy huquqbuzarlik boʻlmagan harbiy huquqbuzarlik sifatida koʻriladigan huquqbuzarliklar bilan bogʻliq boʻlsa;

(b) soʻrov huquqbuzarlik uchun jinoiy taʼqib qilinayotgan shaxs va shunga binoan u soʻralayotgan Tomonda hukm etilgan, oqlangan yoki afv etilgan holat bilan bogʻliq boʻlsa;

(c) agar ushbu yordam shaxsning irqi, jinsi, dini, fuqaroligi yoki siyosiy qarashlari bilan bogʻliq holda unga nisbatan jinoiy taʼqib yoki jazo belgilash uchun soʻralganligiga aniq asoslar boʻlsa yoki yordam toʻgʻrisidagi soʻrov bu shaxsga qarshi yolgʻon guvohlik berish va shunga oʻxshash boshqa maqsadlarda soʻralgan boʻlsa; yoki

(d) agar koʻrib chiqilishida har qanday shaxsning xavfsizligi va soʻralayotgan Tomon zaxiralarining xarajatini oʻz ichiga olishi mumkin boʻlgan soʻrovlarni bajarish soʻralayotgan Tomonning suvereniteti, xavfsizligi yoki asosiy manfaatlarini jiddiy buzsa.

2. Quyidagi hollarda soʻralayotgan Tomonning fikriga koʻra yordam koʻrsatishga rad javobi berilishi mumkin:

(a) agar soʻrov huquqbuzarlik uchun taʼqib ostiga olingan shaxs va u jazoni ijro etish muddati tugashi sababi bilan ortiq taʼqib etilmasligi yoki huquqbuzarliklar soʻralayotgan Tomonning yurisdiksiyasida sodir etilganligi bilan bogʻliq boʻlsa; yoki

(b) agar soʻrov shaxs sodir etgan harakatlari uchun taʼqib etish va jazolash bilan bogʻliq boʻlsa va soʻralayotgan Tomonning yurisdiksiyasida uning bu harakatlari huquqbuzarlik deb qaralmasa.

3. Agar soʻrov soʻrayotgan Tomonda tergov va sud jarayonini amalga oshirishi uchun toʻsqinlik qilsa, yordamni soʻralayotgan Tomon choʻzishi mumkin.

4. Ushbu moddaga muvofiq soʻralayotgan Tomon soʻrovlarni rad etishi yoki uning ijrosini choʻzishidan avval soʻralayotgan Tomon oʻzining Markaziy organlari orqali:

(a) soʻrayotgan Tomonni rad etishi yoki amalga oshirishni qisqartirish sabablari toʻgʻrisida darhol xabar berishi lozim;

(b) soʻrayotgan Tomon bilan unga zarur boʻlgan sharoitda taqdim etilgan yordamlar borasida maslahatlashib olishi lozim.

5. Agar soʻrayotgan Tomon yordamni belgilangan 4(b) bandiga asosan qabul qilayotgan boʻlsa, shu holda bunday shartlarga u rozi boʻlishi lozim.

6-modda Soʻrovlarni amalga oshirish

1. Soʻrovlar soʻralayotgan Tomonning soʻroviga binoan, soʻralayotgan Tomonning vakolatli maʼmurlari tomonidan zudlik bilan, ushbu Tomonning qonunchiligiga asosan va ushbu qonunchilikka zid kelmagan holatda amalga oshirilishi lozim.

2. Bu materiallar jinoiy va fuqarolik ishlarini tergov qilishda mana shu Tomonda zarur boʻlsa, soʻralayotgan Tomon soʻralayotgan materiallarning taqdim etilishini keyinga qoldirishi mumkin. Bunday hollarda soʻralayotgan Tomon, soʻrov boʻlgan holda, tasdiqlangan hujjatlarning koʻchirmasini taqdim etishi lozim.

3. Soʻralayotgan Tomon soʻrayotgan Tomonni unga maʼlum boʻlgan shart-sharoitlar toʻgʻrisida zudlik bilan xabar berishi lozim, agar ular bu soʻrovlarning ijrosi maʼlum darajada kechiktirishga olib kelsa.

7-modda Soʻralayotgan Tomonga materiallarni qaytarib berish

Soʻralayotgan Tomonning talabiga binoan soʻrayotgan Tomon ushbu Shartnoma doirasida olingan barcha materiallar, soʻrov taalluqli boʻlgan jinoiy ish uchun ortiq kerak boʻlmasa, qaytarib berilishi lozim.

8-modda Maxfiylik va foydalanishni chegaralash

1. Soʻralayotgan Tomon soʻrovning, mazmunining, ilova qilinayotgan hujjatlarning va har qanday soʻrovga muvofiq sodir etilgan xatti-harakatlarning maxfiyligini saqlash uchun, agar bu talab etilsa, barcha kuch-gʻayratini qaratishi lozim. Agar maxfiylik saqlanmagan holda soʻrovnoma qoniqtirilishi mumkin boʻlmasa, soʻralayotgan Tomon bu toʻgʻrida soʻrayotgan Tomonga xabar berishi lozim, u oʻz navbatida soʻrovni ijro etilishi mumkin yoki mumkin emasligini aniqlab beradi.

2. Soʻrayotgan Tomon agar talab etilsa, soʻralayotgan Tomondan taqdim etilgan maʼlumotlar va isbotlarning maxfiyligini saqlanishi uchun barcha harakatlarni amalga oshirishi lozimdir, soʻrov bilan bogʻliq boʻlgan jinoiy ish uchun muhim boʻlgan isbotlar va maʼlumotlar bundan istisnodir.

3. Soʻralayotgan Tomon agar bu talab etilsa, maʼlumotlar yoki isbotlarning yoʻqolishidan va ogohlantirilmagan foydalanish, qoʻllanishi, oʻzgartirish, yashirish yoki boshqa suiisteʼmol qilishdan saqlashni taʼminlash uchun barcha harakatlarni amalga oshirishi lozim.

4. Soʻrayotgan Tomon soʻralayotgan Tomonning dastlabki roziligisiz olingan axborot yoki isbotlar yoxud ularning parchalaridan soʻrovnomada belgilanmagan maqsadda foydalanishi mumkin emas.

9-modda Hujjatlarni taqdim etish

1. Soʻralayotgan Tomon oʻz qonunchiligi ruxsat bergan darajada jinoiy ishga taalluqli hujjatlarni taqdim etishi toʻgʻrisidagi soʻrovnomani amalga oshirishi lozim.

2. Soʻrayotgan Tomondan guvoh sifatida chiqayotgan shaxsni sudga chaqirilishi toʻgʻrisidagi soʻrovnoma soʻralayotgan Tomonga ushbu shaxs rejalashtirilgan ishtirokidan 45 kun ichida topshirilishi lozim. Shoshilinch hollarda soʻralayotgan Tomon bunday soʻrovni rad etishi ham mumkin.

3. Soʻralayotgan Tomon soʻrayotgan Tomonga hujjatlarning taqdimoti toʻgʻrisidagi tasdiqni berishi lozim, agar tasdiqnoma amalga oshirilishi mumkin boʻlmasa, soʻrayotgan Tomon bu toʻgʻrida va uning sabablari toʻgʻrisida xabar topishi lozim.

4. Soʻralayotgan yoki soʻrayotgan Tomonlarning qonunchiligiga asosan shaxs maʼlum protsedurani ijro etishdan bosh tortayotgan boʻlsa, unga jazo yoki boshqa majburiy choralarni qoʻllash mumkin emas.

10-modda Guvohliklarni olish

1. Soʻralayotgan Tomon oʻz qonunchiligi doirasida va soʻrovga koʻra shaxslarni soʻroq qiladi yoki guvohlik koʻrsatmalarini oladi yoki ulardan soʻrayotgan Tomonga taqdim etish uchun guvohlik koʻrsatmalarini talab etadi.

2. Soʻralayotgan Tomon oʻz qonunchiligi doirasida soʻrovnoma amalga oshirish muddati davomida soʻrovda belgilangan shaxslarning ishtirokiga va ularga soʻroq qilinayotgan hamda koʻrsatma berayotgan shaxslarga savollar berish ruxsat etiladi. Bunday holatlarda ularga toʻgʻri yoʻllangan savollar berish taqiqlanib, balki soʻroq qilinayotgan va koʻrsatma berayotgan shaxslarga qaratilgan savollar tavsiya etish ruxsat beriladi.

3. Soʻralgan Tomonda guvohlik koʻrsatmalari olinadigan shaxslar ushbu moddaga binoan guvohlik koʻrsatmalarini berishdan bosh tortishlari mumkin, agar:

(a) soʻralayotgan Tomon qonunchiligi bunday shaxslarga shunga oʻxshash sharoitlarda, sud jarayonida koʻrsatmalar bermaslikka ruxsat bersa, yoki

(b) soʻrayotgan Tomonning qonunchiligi shunga oʻxshash sharoitlarda sud jarayonida koʻrsatmalar bermaslikka ruxsat bersa.

4. Soʻralayotgan Tomonda ishtirok etayotgan shaxs, ushbu soʻrayotgan Tomonning qonunchiligiga muvofiq guvohlik koʻrsatmalarini bermaslik huquqi va majburiyati borligi toʻgʻrisida taʼkidlasa, soʻrovga binoan soʻrayotgan Tomon Markaziy organi soʻralayotgan Tomon Markaziy organiga ushbu huquq yoki boshqalarning mavjudligi toʻgʻrisida hujjat taqdim etishi lozim. Agar qaytarma isbotlar yoʻq boʻlsa, ushbu sertifikat berilgan savollarning kerakli isboti boʻlib hisoblanadi.

5. Ushbu modda maqsadida guvohlikni olish oʻz ichiga hujjatlarni tuzish yoki boshqa harakatlarni oladi.

11-modda Hibsga olingan shaxslarni guvohlik koʻrsatmalarini berishlari uchun topshirish

1. Hibsga olingan shaxs soʻralayotgan Tomonda, soʻrayotgan Tomonning soʻroviga binoan vaqtincha jinoyat protsessida koʻrsatma berish uchun oʻtkazilishi mumkin. Ushbu modda maqsadida hibsga olingan shaxs boʻlib, jinoyati moliyaviy xarakteriga ega boʻlmagan, qamoqda saqlanmayotgan, lekin hukm subyekti boʻlib hisoblanuvchi shaxs boʻlib hisoblanadi.

2. Soʻralayotgan Tomon soʻrayotgan Tomonga hibsga olingan shaxsni topshirishi mumkin agar:

(a) shaxs topshirilishiga ixtiyoriy ravishda rozi boʻlsa; va

(b) Soʻrayotgan Tomon soʻralayotgan Tomonning topshirilayotgan shaxsni hibsga olish yoki xavfsizligiga doir barcha shartlarga amal qilishga rozilik beradi.

3. Agar soʻralayotgan Tomon soʻrayotgan Tomonni topshirilgan shaxsni hibsda ushlab turishi zaruriyati yoʻqligi toʻgʻrisida xabar bersa, bu holda shaxs ozod etiladi.

4. Ushbu moddadagi soʻrovga asosan, topshirilgan shaxs soʻralayotgan Tomonga soʻrayotgan Tomon bilan tuzilgan ahdlashuvlarga muvofiq guvohlik koʻrsatmalarini berib boʻlishi bilan yoki shaxsning hozirligi ortiq talab etilmagan ilgariroq vaqtda imkoni boʻlishi bilanoq qaytarilishi lozim.

5. Topshirilgan shaxsni soʻrayotgan Tomonda saqlanib kelgan vaqti, soʻralayotgan Tomonda jazoni amalga oshirilgan muddati deb hisoblanadi.

12-modda Boshqa shaxslarning guvohlik koʻrsatmalarini berish yoki tergov olib borishda yordam berish imkoniyati

1. Soʻrayotgan Tomon soʻralayotgan Tomondan shaxsni soʻralayotgan Tomonda koʻrsatmalar berish uchun yoki jinoiy ishga taalluqli yordam uchun taklif etishni tashkillashtirish boʻyicha yordam berish toʻgʻrisida soʻrov qilishi mumkin (agar ushbu shaxs Shartnomaning 11-moddasiga taalluqli boʻlmasa). Eslatilgan shaxs barcha sharoitlar va belgilangan xarajatlar toʻgʻrisida xabarlantiriladi.

2. Soʻralayotgan Tomon soʻrayotgan Tomonga shaxsni qarori toʻgʻrisida zudlik bilan xabar berishi lozim.

13-modda Xavfsizlikni taʼminlash

1. Ushbu moddaning 2-bandiga binoan ushbu Shartnomaning 11- va 12-moddalari doirasida qilingan soʻrov maqsadida shaxs soʻralayotgan Tomonda boʻlib turishi talab etilsa:

(a) soʻralayotgan Tomonda shaxs hech qanday huquqbuzarlik uchun ushlab turilishi, hukm qilinishi yoki jazolanishi mumkin emas, shuningdek turli fuqarolik protsessining predmeti boʻlishi mumkin emas, agar ushbu shaxs soʻrayotgan Tomonda boʻlmagan boʻlsa, shuningdek uning soʻralayotgan Tomondan ketishiga sabab boʻlgan harakat yoki harakatsizlikka nisbatan; va

(b) shaxsning roziligisiz soʻrovnomadan farqi boʻlgan jinoiy protsessda koʻrsatma berish yoki jinoiy tergovga yordam berishi mumkin emas.

2. Agar boʻlgʻusi ozod shaxsga kelgusida uning hozirligi zarur emas deb rasman xabar qilingandan keyin 15 kun ichida soʻrayotgan Tomonni tark etmagan boʻlsa yoki tark etib yana qaytib kelgan boʻlsa, ushbu moddaning 1-bandini qoʻllash toʻxtatiladi.

3. Ushbu Shartnomaning 11- va 12-moddalariga asosan shaxs guvohlik berishga rozilik boʻlmasa, shu sababga koʻra u soʻrayotgan va soʻralayotgan Tomonlarning sudlari tomonidan jazoga tortilishi yoki boshqa majburlov choralarini qoʻllanilishi mumkin emas.

4. Ushbu shartnomaning 11- va 12-moddalariga asosan shaxs guvohlik berishga rozi boʻlmasa, u oʻz koʻrsatmalariga asoslanadigan jinoiy taʼqibning predmeti boʻlishi mumkin emas, bundan albatta qasamyodni buzish va sudga behurmatlik qilish istisnodir.

14-modda Axborotni taqdim etish

1. Soʻralayotgan Tomon jamoatchilik uchun ochiq foydalanishi mumkin boʻlgan rasmiy hujjatlar sifatida yoki boshqacha qilib aytganda ochiq savdoda va keng koʻlamda tanishuv uchun boʻlgan material va hujjatlarning nusxasini taqdim etishi lozimdir.

2. Soʻralayotgan Tomon har qanday hujjatlar yoki materiallarning nusxalarini ularni taqdim etish uchun belgilangan tartibda oʻzining huquqini muhofaza qiluvchi va sud organlariga taqdim etadi.

15-modda Tintuv va mulk xati

1. Soʻralayotgan Tomon qonunchiligi ruxsat bergan doirada soʻrayotgan Tomonning jinoiy ishiga taalluqli tintuv, mulk xati va materiallarni bu Tomonga yetkazib berish bilan bogʻliq soʻrovlarni amalga oshirishi lozim.

2. Soʻrayotgan Tomonning talabiga binoan, soʻralayotgan Tomon har qanday tintuv, musodaraning joyi va shart-sharoitlari, shuningdek olib qoʻyilgan materiallarni keyingi hibsga olinish natijalariga taalluqli maʼlumot bilan taʼminlashi lozim.

3. Soʻrayotgan Tomon soʻralayotgan Tomonning taqdim etgan har qanday ushlab olingan materiallariga taalluqli belgilab bergan sharoitlarga rioya etishi lozimdir.

16-modda Jinoiy faoliyat orqali olingan daromadlar

1. Soʻralayotgan Tomon oʻzining qonun tasarrufi doirasida jinoiy faoliyat orqali olingan daromadlarini aniqlash toʻgʻrisidagi soʻrovnomani qabul qilgandan soʻng, soʻrayotgan Tomonga tergovni natijalari toʻgʻrisida xabar beradi.

2. Jinoiy faoliyat orqali olingan daromadlar aniqlangan holda, soʻralayotgan Tomon 1-bandga asosan, qonunchiligi doirasida bunday daromadlarni chegaralash yoki ushlab olish bilan bogʻliq barcha choralarni amalga oshirishi lozim.

3. Ushbu moddani qoʻllashda uchinchi tomonning huquqi soʻralayotgan Tomonning qonun tasarrufiga tushadi.

4. Agar bu alohida konkret holat bilan kelishib olinmagan boʻlsa, soʻralayotgan Tomon ushlab olingan jinoiy faoliyatdan olingan daromadni oʻzida saqlashi lozim.

5. Ushbu Shartnoma maqsadi doirasida, “jinoiy faoliyatdan olingan daromadlar” har qanday gumon qilinayotgan mulkni yoki sud tomonidan qonuniy yoki noqonuniy ravishda olingan va qonunbuzarlik natijasida amalga oshirilgan deb aniqlangan boʻlsa, jinoyatni sodir etish yoki uni yengillashtirish uchun xizmat qilgan mulk boʻlib hisoblansa.

17-modda Shaxsiyatning tasdiqlanishi va guvohlantirilishi

1. Yordam toʻgʻrisidagi soʻrovning ikkinchi bandidan tashqari, soʻrovga javoban taqdim etilgan tasdiqlovchi hujjatlar va materiallar tasdiqlanishni va shaxsiy guvohlantirilishni talab etmaydi.

2. Soʻrayotgan yoki soʻralayotgan Tomonning hujjatlar va materiallarni haqiqiyligini tasdiqlash va guvohlantirishga oid soʻrovnoma holatida, hujjatlar hamda materiallar 3-bandga asosan tasdiqlanib berilishi lozim.

3. Ushbu Shartnoma maqsadi doirasida hujjatlar va materiallar tasdiqlanadi, agar:

(a) hujjatni yoʻllagan Tomoning sudyasi yoki mansabdor shaxsi tomonidan imzolangan yoki tasdiqlangan boʻlishi lozim boʻlsa;

(b) hujjatlarni yoʻllagan Tomonni, Vazir, Departament yoki Hukumatning mansabdor shaxslarining rasmiy muhri bilan tasdiqlanishi lozim boʻlsa.

18-modda Qoʻshimcha ahdlashuvlar

Ushbu Shartnomaning maqsadlari va Tomonlarning qonunchiligiga binoan har bir Tomonning Markaziy organi qoʻshimcha ahdlashuvlarga kirishi mumkin.

19-modda Vakillik qilish va xarajatlar

1. Agar boshqacha kelishib olinmagan boʻlsa, yordam toʻgʻrisidagi soʻrovnomaga asosan, soʻralayotgan Tomon soʻrayotgan Tomonni har qanday jinoiy jarayonda ishtirok etishi uchun barcha choralarni koʻrishi va soʻrayotgan Tomonning manfaatlarini namoyon etishi lozimdir.

2. Soʻralayotgan Tomon yordam toʻgʻrisidagi soʻrovni amalga oshirishi boʻyicha xarajatlarni qoplaydi, soʻrayotgan Tomonning toʻlov xarajatlari bundan istisnodir:

(a) shaxslarni soʻralayotgan Tomonning hududidan kuzatib borish ushbu Shartnomaning 9-, 11-, 12-moddalariga binoan, shuningdek yashashi bilan bogʻliq barcha xarajatlar, toʻlovlar soʻrayotgan Tomondagi shaxsga toʻlanadi;

(b) hukm qilinganlarni kuzatib borish yoki zobitlar eskorti natijasida yuzaga kelgan xarajatlar;

(c) ekspertlarga beriladigan toʻlov va xarajatlar;

(d) soʻralayotgan Tomonning talabiga koʻra soʻrovni bajarish natijasida kelib chiqadigan favqulodda xarajatlar.

20-modda Maslahatlashuvlar va bahslarni hal qilish

Tomonlar ushbu Shartnomaning toʻlaligicha yoki muayyan holatlarga nisbatan talqin qilish bilan bogʻliq har qanday masalalar boʻyicha Tomonlardan birining soʻroviga koʻra maslahatlashuvlar olib boradilar.

21-modda Kuchga kirishi va amal qilishdan toʻxtashi

1. Ushbu Shartnoma ratifikatsiya yorliqlari almashingandan soʻng kuchga kiradi.

2. Ushbu Shartnoma kuchga kirguniga qadar yoki keyin sodir etilganidan qatʼi nazar, tegishli harakatlar yoki harakatsizliklar bilan bogʻliq boʻlgan soʻrovnomaga nisbatan qoʻllaniladi.

3. Tomonlarning xohlagan biri yozma xabar qilish orqali ushbu Shartnomaning amal qilishini toʻxtatishi mumkin va ushbu Shartnoma bunday xabarnoma olingan kundan boshlab olti oy oʻtgach amal qilishdan toʻxtaydi. Ushbu Shartnomaning ushbu moddaga muvofiq amal qilishi toʻxtatilgunga qadar yordam toʻgʻrisida olingan har qanday soʻrov Ahdlashuvchi Tomon boshqa narsani talab qilmasa, ushbu Shartnomaga muvofiq ijro etilishi lozim.

Ushbuni tasdiqlab, oʻzlarining tegishli hukumatlari tomonidan tegishlicha vakolatlangan quyida imzo chekuvchilar ushbu Shartnomani imzoladilar.

Toshkent shahrida 2003-yil 12-fevralda, ikki nusxada, oʻzbek, koreys va ingliz tillarida tuzildi, bunda barcha matnlar autentikdir. Talqin qilishda har qanday kelishmovchiliklar kelib chiqsa, ingliz tilidagi matn ustunlik qiladi.

(imzolar)