Tutib topshirish toʻgʻrisida

12.02.2003

Oʻzbekiston Respublikasi bilan Koreya Respublikasi oʻrtasida

Shartnoma

Oʻzbekiston Respublikasi bilan Koreya Respublikasi (bundan keyin “Tomonlar” deb ataluvchilar),

ikki mamlakat oʻrtasida jinoyatlarni oldini olish va bartaraf etish boʻyicha yanada samaraliroq hamkorlikka hamda huquqbuzarlarni tutib topshirish toʻgʻrisida shartnomani tuzish orqali tutib topshirish sohasida ikki mamlakat oʻrtasidagi munosabatlarga koʻmaklashish istagida,

quyidagilar toʻgʻrisida ahdlashib oldilar:

1-modda Tutib topshirish majburiyati

Har bir Tomon ushbu Shartnoma qoidalariga muvofiq boshqa Tomonga ayblov qoʻyish, sud jarayoni yoki tutib topshirishni taqozo etadigan huquqbuzarlik uchun jazoni oʻtash maqsadida soʻrayotgan Tomon talab qilayotgan istalgan shaxsni boshqa Tomonga tutib topshirishga rozidir.

2-modda Tutib topshirishni taqozo etadigan huquqbuzarliklar

1. Ushbu Shartnoma maqsadlarida soʻrov kelib tushgan vaqtda ikkala Tomon qonunchiligida kamida bir yil ozodlikdan mahrum etish yoki yanada jiddiyroq jazo belgilangan huquqbuzarliklar uchun tutib topshirishga olib keladigan huquqbuzarliklar sanaladi.

2. Tutib topshirish toʻgʻrisida soʻrov soʻrayotgan Tomon sudi tomonidan tutib topshirishni taqozo etadigan har qanday huquqbuzarlik uchun ozodlikdan mahrum etish toʻgʻrisida hukm chiqarilgan shaxsga taalluqli boʻlsa, jazoni qolgan oʻtash muddati faqat 4 oydan kam boʻlmagan taqdirdagina tutib topshirish amalga oshiriladi.

3. Ushbu modda maqsadlarida harakat ikkala Tomonning qonunchiligiga qarshi qaratilgan huquqbuzarlik ekanligini aniqlash uchun quyidagilarning ahamiyati yoʻq:

(a) Tomonlarning qonunchiligi huquqbuzarlikni tashkil etadigan xuddi ana shunday toifadagi huquqbuzarlik doirasida xulq-atvorni belgilaydimi yoki huquqbuzarlik shunday atama bilan nomlanadimi;

(b) tutib topshirilishi soʻralayotgan shaxsga qarshi taxmin qilinayotgan xulq-atvorning majmui eʼtiborga olinishi lozim va bu Tomonlarning qonunchiligi boʻyicha huquqbuzarlik unsurlari farq qiladimi.

4. Agar shaxsning tutib topshirilishi soliq, bojxona, valyutaga oid yoki boshqa moliyaviy qonunchilikka qarshi huquqbuzarlik uchun talab qilinayotgan boʻlsa, soʻralayotgan Tomon qonunchiligi soʻrayotgan Tomonning qonunchiligi kabi shunday soliqlar yoki majburiyatlarni yoxud soliq, boj, bojxona yoki valyuta qoidalarini koʻzda tutmaganligi asosida tutib topshirish rad etilmaydi.

5. Agar huquqbuzarlik soʻrayotgan Tomonning hududidan tashqarida amalga oshirilgan boʻlsa, soʻralayotgan Tomon qonunchiligi uning hududidan tashqarida shu kabi holatlarda amalga oshirilgan huquqbuzarlik uchun jazo belgilangan boʻlsa, tutib topshirish amalga oshirilishi lozim. Agar soʻralayotgan Tomon qonunchiligi buni koʻzda tutmagan boʻlsa, soʻralayotgan Tomon oʻz ixtiyoriga koʻra tutib topshirishni amalga oshirishi mumkin.

6. Agar tutib topshirish toʻgʻrisida soʻrov ulardan har biri ikkala Tomon qonunchiligiga koʻra jazoga tortiladigan huquqbuzarliklar turkumiga taalluqli boʻlsa, lekin ulardan baʼzi birlari ushbu moddaning 1- va 2-bandlarida qayd etilgan shartlarni bajarmayotgan boʻlsa, huquqbuzarlik uchun tutib topshirish, shaxs, hech boʻlmaganda, tutib topshirishni taqozo etadigan jinoyatlarning biri uchun topshirilishi sharti bilan, amalga oshirilishi mumkin.

3-modda Tutib topshirishda majburiy rad etish

Ushbu Shartnomaga koʻra tutib topshirish quyidagi holatlardan istalgan birida amalga oshirilmaydi:

1. Soʻralayotgan Tomon tutib topshirish soʻralayotgan bu huquqbuzarlikni siyosiy huquqbuzarlik yoki siyosiy huquqbuzarlik bilan bogʻliq boʻlgan huquqbuzarlik deb belgilagan boʻlsa. Siyosiy huquqbuzarlikka tayanish quyidagi huquqbuzarliklarni qamrab olmasligi lozim:

(a) Davlat rahbari yoki Hukumat rahbari shaxsiga qarshi yoxud uning oila aʼzolarini qoʻlga olish yoki hayotiga suiqasd qilishga urinish yoki hujum qilish;

(b) ikkala Tomon ishtirok etayotgan koʻp tomonlama xalqaro bitimlardan kelib chiqib, shu jumladan, lekin genotsid, terrorizm va odamlarni oʻgʻirlash toʻgʻrisida bunday bitimlar bilan cheklanib qolmasdan, huquqbuzarlik yuzasidan Tomonlar yurisdiksiyani oʻrnatish yoki tutib topshirishni amalga oshirish majburiyatiga ega boʻlishi.

2. Agar soʻralayotgan shaxs soʻralayotgan Tomon hududida tutib topshirish soʻralayotgan huquqbuzarlik uchun sud javobgarligiga tortilgan boʻlsa yoki sudlangan va hukm qilingan yo oqlangan boʻlsa.

3. Tutib topshirish soʻralayotgan huquqbuzarlik uchun jinoiy taʼqib etish yoki jazolash soʻralayotgan Tomon qonunchiligiga koʻra muddat oʻtib ketganligi sababli tugatilgan yoki soʻralayotgan Tomon hududida xuddi shunday huquqbuzarlik amalga oshirilgan boʻlsa. Soʻrayotgan Tomon qonunchiligiga muvofiq muddat oʻtib ketganligini toʻxtatib qoʻyishi mumkin boʻlgan harakat va holatlar soʻralayotgan Tomon uchun haqiqiy hisoblanadi va bu holda soʻrayotgan Tomon bunday muddat oʻtib ketganligi bilan bogʻliq boʻlgan oʻz qonunchiligining qoidalari toʻgʻrisida yozma arizani taqdim etadi.

4. Agar soʻralayotgan Tomon tutib topshirish toʻgʻrisida soʻrov soʻralayotgan shaxsning irqi, dini, millati, jinsi, yoki siyosiy qarashlariga koʻra taʼqib etish va jazolash maqsadida taqdim etilgan, yoki mana shu sabablardan istalgan biri boʻyicha ushbu shaxsga zarar yetkazilishi mumkin deb taxmin qilishga yetarlicha asoslarga ega boʻlsa.

4-modda Tutib topshirishni rad etish uchun qoʻshimcha asoslar

Ushbu Shartnomaga muvofiq quyidagi holatlardan istalgan birida tutib topshirishni rad etish mumkin:

1. Tutib topshirish soʻralayotgan huquqbuzarlik soʻralayotgan Tomon qonunchiligiga muvofiq uning hududida toʻla yoki qisman amalga oshirilgan deb baholangan boʻlsa;

2. Soʻralayotgan shaxs tutib topshirish soʻralayotgan xuddi shunday huquqbuzarlik uchun uchinchi davlatda butkul oqlangan yoki sudlangan, hamda, agar chiqarilgan hukm toʻla ijro etilgan boʻlsa yoki endi ijro qilina olinmasa;

3. Agar soʻralayotgan Tomon ayrim hollarda soʻrayotgan Tomon huquqbuzarliklari va manfaatlarining jiddiyligini eʼtiborga olib, soʻralayotgan shaxsning shaxsiy holatlari tufayli tutib topshirish gumanitar sabablar boʻyicha amalga oshirilmasligi mumkin deb hisoblasa;

4. Tutib topshirish soʻralayotgan huquqbuzarlik oddiy jinoyat huquqi boʻyicha emas, balki harbiy huquq boʻyicha huquqbuzarlik boʻlsa.

5-modda Tutib topshirishni kechiktirish

Agar soʻralayotgan shaxs soʻralayotgan Tomonda tutib topshirish soʻralayotgan huquqbuzarlik uchun emas, balki boshqa biror-bir huquqbuzarlik uchun jinoiy taʼqib qilinayotgan yoki muddatni oʻtayotgan boʻlsa, soʻralayotgan Tomon soʻralayotgan shaxsni topshirishi yoki jinoiy taʼqib yoxud belgilangan jazo muddatining toʻla yoki istalgan qismining tugashiga qadar topshirishni kechiktirishi mumkin. Soʻralayotgan Tomon soʻrayotgan Tomonni har qanday kechiktirish toʻgʻrisida xabardor etishi lozim.

6-modda Fuqarolarni tutib topshirish

1. Tomonlardan hech biri ushbu Shartnoma asosida oʻz fuqarolarini tutib topshirish majburiyatini olmagan, biroq, soʻralayotgan Tomon, oʻz ixtiyoriga koʻra, bunday shaxslarni lozim deb topsa tutib topshirishga haqlidir.

2. Agar soʻralayotgan shaxsning tutib topshirilishi faqat fuqarolik asosida rad etilgan boʻlsa, soʻralayotgan Tomon, soʻrayotgan Tomonning iltimosiga koʻra, uning maʼmurlariga ayblov qoʻyish uchun imkoniyat berishi lozim.

3. Fuqarolik tutib topshirish soʻralayotgan huquqbuzarlik amalga oshirilgan vaqt bilan aniqlanadi.

7-modda Tutib topshirish jarayonlari va soʻralayotgan hujjatlar

1. Tutib topshirish toʻgʻrisida soʻrov yozma ravishda diplomatik kanallar orqali taqdim etiladi.

2. Tutib topshirish toʻgʻrisida soʻrov quyidagilar bilan ilova qilinishi lozim:

(a) soʻralayotgan shaxsning shaxsi va mumkin boʻlsa, fuqaroligi hamda turish joyini tavsiflangan hujjatlar;

(b) ish holatlarining bayoni;

(s) huquqbuzarlikning muhim unsurlari va taʼriflarini tavsiflaydigan qonunchilikning bayoni;

(d) huquqbuzarlik uchun jazoni tavsiflaydigan qonunchilikning bayoni; va

(e) huquqbuzarlik uchun sud tomonidan taʼqib etishning muddati yoki jazoni ijro etish bilan bogʻliq boʻlgan qonunchilikning bayoni.

3. Agar tutib topshirish toʻgʻrisida soʻrov hali aybdor deb tan olinmagan shaxsga taalluqli boʻlsa, u quyidagilar bilan ilova qilinishi lozim:

(a) soʻrayotgan Tomon sudi yoki boshqa vakolatli maʼmuri tomonidan berilgan hibsga olish yoki ushlab turish uchun order nusxasi;

(b) soʻralayotgan shaxsni hibsga olish yoki ushlab turish uchun yozilgan order aynan oʻsha shaxsga taalluqligini belgilovchi axborot;

(s) tutib topshirish soʻralayotgan huquqbuzarlikni sodir etgan soʻralayotgan shaxsni gumon qilish uchun asos boʻlib xizmat qiladigan huquqbuzarlik boʻyicha ayblov xulosasi.

4. Agar tutib topshirish toʻgʻrisida soʻrov aybdor deb tan olingan shaxsga taalluqli boʻlsa, u quyidagilar bilan ilova qilinishi lozim:

(a) soʻrayotgan Tomon sudi uni aybdor deb tan olinganligi toʻgʻrisida chiqargan qaror nusxasi;

(b) soʻralayotgan shaxs aybdor deb tan olinganligini tasdiqlovchi axborot;

(s) shaxs aybdor deb tan olingan huquqbuzarlikni tashkil etadigan xatti-harakatning bayoni.

5. Ushbu Shartnoma qoidalariga muvofiq soʻrayotgan Tomon taqdim etadigan barcha hujjatlar tasdiqlanishi va soʻralayotgan Tomon tiliga yoki ingliz tiliga boʻlgan tarjima bilan ilova qilinishi lozim.

6. Ushbu Shartnoma maqsadlarida hujjat agar u soʻrayotgan Tomon sudyasi yoki boshqa mansabdor shaxs tomonidan imzolangan yoxud tasdiqlangan va soʻrayotgan Tomon vakolatli maʼmurlarining rasmiy muhri bilan biriktirilgan boʻlsa haqiqiy deb hisoblanadi.

8-modda Qoʻshimcha axborot

1. Agar soʻralayotgan Tomon ushbu Shartnomaga muvofiq tutib topshirishni amalga oshirish uchun tutib topshirish toʻgʻrisida soʻrovni asoslash maqsadida taqdim etilgan axborot yetarli emas deb hisoblasa, bu Tomon oʻzi belgilagan vaqt ichida qoʻshimcha axborot taqdim etilishini talab qilishga haqlidir.

2. Agar tutib topshirilishi soʻralayotgan shaxs hibsda boʻlsa, va ushbu Shartnomaga muvofiq taqdim etilgan qoʻshimcha axborot yetarli boʻlmasa yoki belgilangan vaqt ichida olinmagan boʻlsa, bu shaxs ozod etilishi mumkin. Uning ozod etilishi soʻrayotgan Tomonga bu shaxsni tutib topshirish toʻgʻrisidagi yangi soʻrovni yuborishiga toʻsqinlik qilmaydi.

3. Shaxs 2-bandga muvofiq ozod etilayotganda soʻralayotgan Tomon imkon qadar tez orada bu haqda soʻrayotgan Tomonni xabardor etadi.

9-modda Vaqtincha hibsga olish

1. Kechiktirib boʻlmaydigan hollarda tutib topshirish toʻgʻrisida soʻrov yuborilgunga qadar Tomon soʻralayotgan shaxsni vaqtincha hibsga olinishini iltimos qilishi mumkin. Vaqtincha hibsga olish toʻgʻrisida soʻrov diplomatik kanallar orqali yoki bevosita Oʻzbekiston Respublikasi Bosh prokuraturasi bilan Koreya Respublikasi Adliya vazirligi oʻrtasida yuborilishi mumkin.

2. Vaqtincha hibsga olish toʻgʻrisida soʻrov yozma shaklda boʻlishi va quyidagilarni oʻzida aks ettirishi lozim:

(a) soʻralayotgan shaxsning tavsifi, shuningdek uning fuqaroligi toʻgʻrisida axborot;

(b) agar maʼlum boʻlsa, soʻralayotgan shaxsning turish joyi;

(s) ish holatlarining qisqa bayoni, jumladan, agar imkon boʻlsa, huquqbuzarlikning vaqti va joyi;

(d) buzilgan qonunlarning bayoni;

(e) hibsga olishni yoki ushlab turishni amalga oshirish uchun order, yoxud soʻralayotgan shaxsga nisbatan ayblov xulosasi yoki ayblov hukmi;

(f) soʻralayotgan shaxsni tutib topshirish toʻgʻrisida soʻrovni yuborish haqida tasdiq.

3. Bunday ariza qabul qilinishi bilan soʻralayotgan Tomon soʻralayotgan shaxsning hibsga olinishini taʼminlash uchun zaruriy choralarni koʻradi va soʻrayotgan Tomon natijalar toʻgʻrisida zudlik bilan xabardor etiladi.

4. Hibsga olingan shaxs ozod etiladi qachonki, soʻrayotgan Tomon 7-moddada qayd etilgan tegishli hujjatlar bilan ilova qilingan tutib topshirish toʻgʻrisida soʻrovni hibsga olingan kundan boshlab qirq besh (45) kun ichida taqdim etish imkoniga ega boʻlmasa, agar soʻrov kelgusida olingan boʻlsa, bu soʻralayotgan shaxsni tutib topshirish boʻyicha jarayon boshlanishiga toʻsiq boʻlmasligi sharti bilan.

10-modda Yengillashtirilgan tutib topshirish

Soʻralayotgan shaxs tutib topshirishni amalga oshirish yoʻriqnomasiga nisbatan shaxsning roziligi toʻgʻrisida soʻralayotgan Tomonning sud yoki boshqa vakolatli organlarini xabardor qilgan holda soʻrayotgan Tomon tutib topshirishni yengillashtirish uchun oʻz qonunchiligida koʻzda tutilgan barcha zarur choralarni koʻrishi lozim.

11-modda Parallel soʻrovlar

1. Ikki yoki undan ortiq davlatlardan aynan bir shaxsni ayni bir huquqbuzarlik yoki turli huquqbuzarliklar boʻyicha tutib topshirish toʻgʻrisida soʻrov olinsa, soʻralayotgan Tomon shaxsni bu davlatlarning qay biriga tutib topshirishini aniqlab olib, oʻz qarori toʻgʻrisida boshqa davlatlarni xabardor qilishi lozim.

2. Shaxs tutib topshiriladigan davlatni aniqlashda soʻralayotgan Tomon barcha shart-sharoitlarni, jumladan quyidagilarni koʻrib chiqishi lozim:

(a) soʻralayotgan shaxsning fuqaroligi va odatiy turar joyi;

(b) soʻrov shartnomaga muvofiq yuborilganmi yo yoʻqmi;

(s) har bir huquqbuzarlik sodir etilgan vaqti va joyi;

(d) soʻrayotgan davlatlarning tegishli manfaatlari;

(e) huquqbuzarliklarning ogʻirligi;

(f) jabrlanuvchining fuqaroligi;

(g) soʻrayotgan davlatlar oʻrtasida tutib topshirishning kelgusi imkoniyatlari; va

(h) soʻrovlarning tegishli sanalari.

12-modda Topshirish

1. Soʻralayotgan Tomon tutib topshirish toʻgʻrisidagi soʻrov boʻyicha qaror qabul qilishi bilanoq bunday qaror toʻgʻrisida soʻrayotgan Tomonni diplomatik kanallar orqali xabardor qiladi. Tutib topshirish toʻgʻrisidagi soʻrovni ijro etishni butunlay yoki qisman rad qilish sabablari toʻgʻrisida xabar qilinishi lozim.

2. Soʻralayotgan Tomon soʻralayotgan shaxsni soʻrayotgan Tomonning tegishli maʼmurlariga soʻralayotgan Tomonning hududida belgilangan ikkala Tomon uchun qulay joyda topshirishi lozim.

3. Soʻrayotgan Tomon shaxsni soʻralayotgan Tomon hududidan soʻralayotgan Tomon belgilaydigan maʼqul muddat ichida olib ketishi lozim va agar shaxs bu muddat ichida qabul qilinmagan boʻlsa, soʻralayotgan Tomon bu shaxsni ozod etishi va xuddi oʻsha huquqbuzarlik uchun topshirishni rad etishi mumkin.

4. Topshiriladigan shaxsni Tomon olib ketishi yoki boshqa joyga koʻchirishiga toʻsqinlik qilayotgan hollarda, bu Tomon boshqa Tomonni bu haqda xabardor etishi lozim va bu holda ushbu moddaning 3-bandi qoidalari qoʻllanilmaydi. Ikkala Tomon ushbu modda qoidalari asosida topshirish yoki boshqa joyga koʻchirishning yangi sanasini oʻzaro belgilaydilar.

13-modda Mulkni topshirish

1. Coʻralayotgan Tomonning qonunchiligi ruxsat bergan darajada va rioya etilishi lozim boʻlgan uchinchi tomonlarning huquqlariga rioya qilish sharti bilan soʻralayotgan Tomon hududida aniqlangan, huquqbuzarlik oqibatida oʻzlashtirilgan yoki soʻrayotgan Tomonning soʻroviga binoan ashyoviy dalillar sifatida talab qilinishi mumkin boʻlgan barcha mulklar tutib topshirish amalga oshirilayotgan boʻlsa, topshirilishi lozim.

2. Agar soʻralayotgan shaxsning oʻlimi, yoʻqolib qolishi yoki qochishi oqibatida tutib topshirishning imkoni boʻlmasa, soʻralayotgan Tomonning soʻroviga binoan ushbu moddaning 1-bandida qayd etilgan mulk soʻralayotgan Tomonga topshirilishi lozim.

3. Agar ushbu Tomon, soʻralayotgan Tomon qonunchiligi talablariga muvofiq yoki uchinchi tomonlarning manfaatlarini himoya etish maqsadida topshirilgan mulkni qaytarish toʻgʻrisida soʻrasa, har qanday topshirilgan mulk soʻralayotgan Tomonga bepul qaytarilishi lozim.

14-modda Maxsus qoidalar

1. Ushbu Shartnomaga koʻra tutib topshirilgan shaxsni soʻrayotgan Tomonda ushlab turish, taʼqib etish yoki sud javobgarligiga tortish mumkin emas, quyidagi hollar bundan mustasno:

(a) tutib topshirish boʻyicha amalga oshirilgan huquqbuzarliklar yoki aynan oʻsha dalillarga asoslanib tutib topshirish amalga oshirilgan, boshqacha nomlangan huquqbuzarliklar, agar bunday huquqbuzarlik tutib topshirishga olib kelsa, yoki unchalik ahamiyatga ega boʻlmagan huquqbuzarlik oʻz ichiga olsa;

(b) shaxsni tutib topshirish amalga oshirilgandan keyingi huquqbuzarliklar; yoki

(s) soʻralayotgan Tomonning vakolatli maʼmurlari shaxsni ushlab turishni amalga oshirishga rozi boʻlgan huquqbuzarliklar boʻyicha taʼqib qilish yoki sud javobgarligiga tortish;

Ushbu moddaning 1-bandi maqsadlarida:

(i) soʻralayotgan Tomon 7-moddada qayd etilgan hujjatlarni talab qilib olish huquqiga ega;

(ii) mavjud boʻlgan taqdirda soʻralayotgan Tomonga tutib topshirilgan shaxsning huquqbuzarlikka taalluqli bergan koʻrsatmalarining huquqiy yozmalari taqdim etilishi lozim; va

(iii) soʻrov koʻrib chiqilgunga qadar soʻralayotgan Tomon aytgan vaqt davomida tutib topshirilgan shaxs soʻrayotgan Tomon tarafidan ushlab turishi mumkin.

2. Ushbu Shartnomaga koʻra tutib topshirilgan shaxs, uning tutib topshirilishiga qadar boʻlgan muddatda sodir etgan huquqbuzarlik boʻyicha soʻralayotgan Tomonning roziligisiz uchinchi davlatga tutib topshirilishi mumkin emas.

3. Ushbu moddaning 1- va 2-bandlari tutib topshirilgan shaxsni ushlab turish, taʼqib qilish yoki sud javobgarligiga tortishga yoki uni uchinchi davlatga tutib topshirilishiga monelik qilmaydi, agar:

(a) shaxs tutib topshirilganidan soʻng soʻrayotgan Tomonning hududini tark etib, ixtiyoriy ravishda qaytsa; yoki

(b) shaxs ketishi mumkin boʻlgan kundan boshlab qirq besh kun (45) davomida soʻrayotgan Tomonning hududini tark etmasa.

15-modda Natijalar toʻgʻrisida xabar qilish

Soʻrayotgan Tomon tutib topshirilgan shaxsga nisbatan jinoiy ish qoʻzgʻash yoki unga nisbatan jazoni ijro etish yoxud bu shaxsni uchinchi davlatga tutib topshirish toʻgʻrisida soʻralayotgan Tomonni oʻz vaqtida xabardor qilishi lozim.

16-modda Tranzit

1. Bir Tomon, uchinchi davlat tomonidan tutib topshirilgan shaxsni, boshqa Tomon hududi orqali oʻz qonunchiligida koʻzda tutilgan tashishga Oʻzbekiston Respublikasi Bosh prokuraturasi va Koreya Respublikasi Adliya vazirligi oʻrtasida diplomatik kanallar yordamida yoki bevosita yozma soʻrov yuborish orqali hal qilinadi.

2. Tranzit Tomon hududida hech qanday qoʻnish rejalashtirilmaydi degan shart bilan havo transportidan foydalanishda tranzit toʻgʻrisida ruxsat olish talab etilmaydi. Bu Tomonning hududida rejalashtirilmagan qoʻnish chogʻida boshqa Tomondan ushbu moddaning 1-bandida koʻzda tutilganidek tranzit tashish toʻgʻrisida soʻrovning taqdim etilishini talab qilib olish mumkin.

17-modda Xarajatlar

1. Soʻralayotgan Tomon tutib topshirish toʻgʻrisidagi soʻrov bilan bogʻliq uning yurisdiksiyasidagi ishni yuritish boʻyicha kelib chiqadigan har qanday xarajatlarni qoplaydi.

2. Soʻralayotgan Tomon uning hududida tutib topshirilishi soʻralayotgan shaxsning hibsga olinishi va ushlanishi yoki mulkni xatga olish hamda uni topshirish bilan bogʻliq xarajatlarni qoplaydi.

3. Soʻrayotgan Tomon soʻralayotgan Tomon hududidan tutib topshirilayotgan shaxsni topshirishda qilingan xarajatlar va tranzit xarajatlarini qoplaydi.

18-modda Maslahatlashuvlar

1. Tomonlar har bir Tomonning soʻroviga koʻra ushbu Shartnomani talqin qilish va qoʻllash bilan bogʻliq maslahatlashuvlarni olib boradilar.

2. Oʻzbekiston Respublikasi Bosh prokuraturasi va Koreya Respublikasi Adliya vazirligi ushbu Shartnomaning alohida holatlarini koʻrib chiqish bilan bogʻliq, shuningdek bajarish protseduralariga koʻmaklashish va yaxshilash maqsadida bir-birlari bilan maslahatlashuvlar olib boradilar.

19-modda Kuchga kirishi va amal qilishdan toʻxtashi

1. Ushbu Shartnoma ratifikatsiya qilinishi lozim. Ushbu Shartnoma ratifikatsiya yorliqlari almashinuvidan soʻng kuchga kiradi.

2. Ushbu Shartnoma u kuchga kirgan sanaga qadar va undan keyin sodir etilgan huquqbuzarliklarga nisbatan qoʻllaniladi.

3. Tomonlarning har biri istalgan vaqtda yozma xabar qilish orqali ushbu Shartnomaning amal qilishini toʻxtatishi mumkin. Ushbu Shartnoma bunday xabarnoma yuborilgan sanadan olti (6) oy oʻtgach amal qilishdan toʻxtaydi.

Ushbuni tasdiqlab, oʻzlarining tegishli hukumatlari tomonidan tegishlicha vakolatlangan quyida imzo chekuvchilar ushbu Shartnomani imzoladilar.

Toshkent shahrida 2003-yil 12-fevralda, ikki nusxada, oʻzbek, koreys va ingliz tillarida tuzildi, bunda barcha matnlar autentikdir. Talqin qilishda har qanday kelishmovchiliklar kelib chiqsa, ingliz tilidagi matn ustunlik qiladi.

(imzolar)