12-modda. Yoʻlovchilar, bagaj va yuk bagajini tashish

Temir yoʻl transporti korxonalari yoʻlovchilar, bagaj, yuk bagaji oʻz vaqtida manziliga yetkazilishini, vokzallarda va poyezdlarda yoʻlovchilarning xavfsizligini, ularga xizmat koʻrsatish uchun zarur qulayliklar va sharoitlar yaratilishini, bagaj va yuk bagajining saqlanishini taʼminlashi shart.

Yoʻlovchilar poyezdlarning joʻnash va kelish vaqti, yoʻl haqi, bagaj, yuk bagaji tashish haqi, vokzalxonalarda joylashgan temir yoʻl chiptasi kassalari, saqlash kameralarining ish vaqti, yoʻlovchilarga koʻrsatiladigan xizmatlar toʻgʻrisida vaqtida ishonchli axborot bilan, shuningdek temir yoʻl transporti korxonalari va tashkilotlarining ishi toʻgʻrisidagi boshqa zarur axborot bilan taʼminlanishlari kerak.

Temir yoʻl transportida yoʻl chiptalarini sotish tartibi Temir yoʻl ustavi hamda Yoʻlovchilar, bagaj va yuk bagajini tashish qoidalari bilan belgilanadi.

Temir yoʻl transportida yoʻl chiptalari yoʻlovchilarga toʻliq qiymatida sotiladi, qonunchilikda imtiyozli yurishi belgilangan fuqarolar bundan mustasno. Imtiyozli yurishni kompensatsiya qilish qonunchilikda belgilangan tartibda amalga oshiriladi.

Yoʻlovchi poyezdda oʻzi bilan birga besh yoshgacha boʻlgan bir bolani alohida joy berilmagan holda bepul olib yurish huquqiga ega. Yoʻlovchi bilan birga besh yoshgacha boʻlgan bittadan ortiq bola ketayotgan boʻlsa, ulardan biri bepul olib yuriladi, qolganlari esa chipta toʻliq qiymatining 50 foizi chegirilgan, alohida joy berilgan holda olib yuriladi. Besh yoshdan oʻn yoshgacha boʻlgan bolalarga ham chipta toʻliq qiymatining 50 foizi chegirilgan holda alohida joy beriladi. Temir yoʻl transportida bolalarni tashish boʻyicha bu imtiyozlar temir yoʻl transporti korxonalarining mablagʻlari hisobidan amalga oshiriladi.

Yoʻlovchilarning hamda temir yoʻl transporti xodimlarining hayoti va sogʻligʻini muhofaza qilish, temir yoʻlda tashish xavfsizligini taʼminlash maqsadida vakolatli organlar vokzalga kirishda belgilangan tartibda qoʻl yukini, bagajni koʻzdan kechiradi hamda yoʻlovchilar va boshqa shaxslarni shaxsiy koʻzdan kechirishdan oʻtkazadi. Koʻzdan kechirishdan bosh tortilgan taqdirda, vokzalga kirish taqiqlanadi, yoʻlovchilar esa tashishga qoʻyilmaydi. Koʻzdan kechirishni oʻtkazish huquqiga ega boʻlgan vakolatli organlarning roʻyxati va koʻzdan kechirishni oʻtkazish tartibi, shuningdek yoʻlovchilar va boshqa shaxslarning vokzallarda boʻlishi qoidalari Oʻzbekiston Respublikasi Vazirlar Mahkamasi tomonidan belgilanadi.