Moliyaviy hisobotlar va soliq hisob-kitoblarini almashtiriladigan magnit (elektron, optik) manbalarda yoki aloqaning telekommunikatsiya kanallari vositasida taqdim etishning tartibi toʻgʻrisidagi vaqtinchalik nizomni tasdiqlash haqida (1756-son)

03.01.2008

OʻZBEKISTON RESPUBLIKASI DAVLAT SOLIQ QOʻMITASINING

QARORI

[Oʻzbekiston Respublikasi Adliya vazirligi tomonidan 2008-yil 3-yanvarda 1756-son bilan davlat roʻyxatidan oʻtkazildi]

Oʻzbekiston Respublikasi Soliq kodeksi, Oʻzbekiston Respublikasining “Davlat soliq xizmati toʻgʻrisida”, “Elektron raqamli imzo toʻgʻrisida”, “Elektron hujjat aylanishi toʻgʻrisida”gi qonunlari, Oʻzbekiston Respublikasi Prezidentining 2005-yil 15-iyundagi “Tadbirkorlik subyektlari tomonidan taqdim etiladigan hisobot tizimini takomillashtirish va uni noqonuniy talab etganlik uchun javobgarlikni kuchaytirish toʻgʻrisida”gi PQ-100-son qarori (Oʻzbekiston Respublikasi qonun hujjatlari toʻplami, 2005-y., 23-24-son, 168-modda) va Oʻzbekiston Respublikasi Vazirlar Mahkamasining 2006-yil 4-avgustdagi “Soliq toʻlovchilarga axborot xizmati koʻrsatish va davlat soliq xizmati organlarining axborot tizimini yanada takomillashtirish toʻgʻrisida”gi 157-son qaroriga muvofiq qaror qiladi:

1. Moliyaviy hisobotlar va soliq hisob-kitoblarini almashtiriladigan magnit (elektron, optik) manbalarda yoki aloqaning telekommunikatsiya kanallari vositasida taqdim etishning tartibi toʻgʻrisidagi vaqtinchalik nizom ilovaga muvofiq tasdiqlansin.

2. Mazkur qaror Oʻzbekiston Respublikasi Adliya vazirligida davlat roʻyxatidan oʻtkazilgan kundan boshlab oʻn kun oʻtgach kuchga kiradi.

Davlat soliq qoʻmitasi raisi B. PARPIYEV

Toshkent sh.,

2007-yil 18-dekabr,

2007-65-son

Davlat soliq qoʻmitasining 2007-yil 18-dekabrdagi 2007-65-son qarori bilan TASDIQLANGAN

Moliyaviy hisobotlar va soliq hisob-kitoblarini almashtiriladigan magnit (elektron, optik) manbalarda yoki aloqaning telekommunikatsiya kanallari vositasida taqdim etishning tartibi toʻgʻrisida

VAQTINChALIK NIZOM

Ushbu Vaqtinchalik nizom Oʻzbekiston Respublikasi Soliq kodeksi, Oʻzbekiston Respublikasining “Elektron raqamli imzo toʻgʻrisida”gi, “Elektron hujjat aylanishi toʻgʻrisida”gi qonunlari, Oʻzbekiston Respublikasi Prezidentining 2005-yil 15-iyundagi “Tadbirkorlik subyektlari tomonidan taqdim etiladigan hisobot tizimini takomillashtirish va uni noqonuniy talab etganlik uchun javobgarlikni kuchaytirish toʻgʻrisida”gi PQ-100-son qarori (Oʻzbekiston Respublikasi qonun hujjatlari toʻplami, 2005-yil, 23-24-son, 168-modda) va Oʻzbekiston Respublikasi Vazirlar Mahkamasining 2006-yil 4-avgustdagi “Soliq toʻlovchilarga axborot xizmati koʻrsatish va davlat soliq xizmati organlarining axborot tizimini yanada takomillashtirish toʻgʻrisida”gi 157-son qaroriga muvofiq moliyaviy hisobotlar va soliq hisob-kitoblarini (bundan buyon matnda elektron koʻrinishdagi soliq hisoboti deb yuritiladi) almashtiriladigan magnit (elektron, optik) manbalarda yoki aloqaning telekommunikatsiya kanallari vositasida taqdim etishni tashkil etishning umumiy tamoyillarini belgilab beradi.

I. Umumiy qoidalar

1. Ushbu Vaqtinchalik nizomni amalda qoʻllash maqsadida quyidagi asosiy tushunchalardan foydalaniladi:

elektron raqamli imzo (ERI) — elektron hujjatdagi mazkur elektron hujjat axborotini ERI yopiq kalitidan foydalangan holda maxsus oʻzgartirish natijasida hosil qilingan hamda ERI ochiq kaliti yordamida elektron hujjatdagi axborotda xatolik yoʻqligini aniqlash va ERI yopiq kalitining egasini identifikatsiya qilish imkoniyatini beradigan imzo;

ERI yopiq kaliti egasi — elektron raqamli imzoni yaratgan (elektron hujjatga imzo qoʻygan) va roʻyxatga olish markazi tomonidan uning nomiga elektron raqamli imzo kaliti sertifikati berilgan jismoniy shaxs;

axborotni kriptografik muhofaza qilish — kriptografik almashtirish algoritmlari yordamida amalga oshiriladigan axborotning toʻla-toʻkisligi, qulayligi va maxfiyligini taʼminlashga qaratilgan chora-tadbirlar majmui;

ERI kalitining sertifikati (imzo kaliti sertifikati) — elektron raqamli imzoning ochiq kaliti elektron raqamli imzoning yopiq kalitiga mosligini tasdiqlaydigan va elektron raqamli imzo yopiq kalitining egasiga Roʻyxatga olish markazi tomonidan berilgan hujjat;

axborotni kriptografik muhofaza qilish vositalari (AKMV) — axborot xavfsizligini taʼminlash uchun uni kriptografik almashtirishni amalga oshiruvchi apparat, dasturiy va apparat-dasturiy vositalar;

ERI vositalari — elektron hujjatda ERI yaratilishini, ERIning haqiqiyligi tasdiqlanishini, ERIning yopiq va ochiq kalitlari yaratilishini taʼminlaydigan barcha texnikaviy va dasturiy vositalar majmui;

ERI kalitlarini roʻyxatga olish markazi (bundan buyon matnda Roʻyxatga olish markazi deb yuritiladi) — maxsus vakolatli organda davlat roʻyxatidan oʻtgan va qonunchilikda nazarda tutilgan vazifalarni bajaradigan yuridik shaxsdir;

elektron hujjat — elektron shaklda qayd etilgan, elektron raqamli imzo bilan tasdiqlangan hamda elektron hujjatning uni identifikatsiya qilish imkonini beradigan boshqa rekvizitlariga ega boʻlgan axborot;

2. Soliq hisobotini elektron koʻrinishda taqdim etishda elektron hujjat aylanishining ishtirokchilari boʻlib quyidagilar hisoblanadi:

soliq toʻlovchi — soliq hisobotini joʻnatuvchi;

soliq hisobotini qabul qiluvchi va ularga ishlov beruvchi davlat soliq xizmati organlari — soliq hisobotini qabul qiluvchi.

3. Soliq hisobotini elektron koʻrinishda taqdim etish soliq toʻlovchining xohishiga koʻra va unda zarur apparat vositalari, shuningdek mos keladigan dasturiy taʼminot mavjud boʻlganda amalga oshirilishi mumkin.

4. Soliq hisobotini elektron koʻrinishda taqdim etmaydigan soliq toʻlovchilar uchun soliq hisobotini qogʻozda taqdim etish tartibi saqlanib qoladi. Bunda soliq hisobotini elektron koʻrinishda taqdim etayotgan soliq toʻlovchi, soliq organlariga ushbu hisobotining nushasini qogʻozda taqdim etmasdan, keyingi nazorat uchun qogʻozdagi nusxalarini tayyorlashi va oʻzida tikib qoʻyishi shart.

Qogʻoz koʻrinishdagi soliq hisobotlariga imzo chekuvchi vakolatli shaxs, elektron koʻrinishdagi soliq hisobotlariga ham imzo chekish vakolatiga ega boʻlib, shu shaxs ERI kalitining egasi hisoblanadi.

Vakolatli shaxs tomonidan imzo chekilmagan elektron koʻrinishdagi soliq hisobotlari qabul qilinishi mumkin emas.

5. Soliq hisobotini elektron koʻrinishda taqdim etishda apparat vositalar, shuningdek unga mos dasturiy taʼminot:

soliq toʻlovchi roʻyxatdan oʻtgan joydagi davlat soliq xizmati organiga joʻnatish uchun soliq hisobotini elektron koʻrinishda shakllantirish;

axborotni kriptografik muhofaza qilish vositalaridan foydalangan holda soliq hisobotini elektron koʻrinishda joʻnatishda shifrlash va qabul qilib olishda shifrdan echish;

axborotni uzatishda elektron raqamli imzoni shakllantirish va uni qabul qilib olishda elektron raqamli imzo vositalari yordamida tekshirish;

elektron koʻrinishdagi soliq hisobotini magnit (elektron, optik) manbalarda hamda telekommunikatsiya kanallari orqali joʻnatish imkoniyatiga ega boʻlishi kerak.

6. Soliq hisobotini elektron koʻrinishda taqdim etishga:

soliq hisobotining majburiy rekvizitlari mavjud boʻlganda;

elektron koʻrinishdagi soliq hisobotlarida elektron raqamli imzo mavjud boʻlganda;

soliq hisobotidagi maʼlumotlarda xatoliklar mavjud boʻlmaganda ruxsat beriladi.

7. Elektron koʻrinishdagi soliq hisobotdagi axborotlarni muhofaza qilish maqsadida, axborotni uzatishda elektron hujjat aylanishining ishtirokchilari axborotni kriptografik muhofaza qilish vositalarini qoʻllaydilar.

8. Soliq toʻlovchilar soliq hisobotini elektron koʻrinishda taqdim etganda davlat soliq xizmati organlarining dasturiy-apparat vositalari soliq hisobotini avtomatik tarzda qabul qilinishini yoki soliq hisoboti notoʻgʻri tuzilganligi yoki unda xatoliklar mavjudligi sababli qaytarilishini taʼminlaydi.

Soliq hisobotining notoʻgʻri tuzilganligi yoki unda xatoliklar mavjudligi sababli qaytarilgan holatda soliq organlari soliq toʻlovchiga bu haqda elektron koʻrinishda xabar beradi.

9. Mazkur vaqtinchalik nizomda koʻzda tutilgan tartibda soliq hisobotini elektron koʻrinishda taqdim etganda, soliq toʻlovchi va davlat soliq xizmati organlari qonunchilikda belgilangan tartib va muddatlarda elektron koʻrinishda saqlanishini taʼminlaydilar.

10. Soliq hisobotini elektron koʻrinishda saqlash vaqtida elektron hujjat aylanishining ishtirokchilari tomonidan soliq hisobotining qogʻoz nusxalarini berish va ulardan foydalana olish imkoniyatlari koʻzda tutilgan boʻlishi lozim.

11. Soliq hisobotining elektron koʻrinishda saqlanish muddatlari, qogʻozdagi hisobotlar uchun oʻrnatilgan muddatlardan kam boʻlmasligi lozim.

II. Elektron hujjat aylanishi ishtirokchilarining soliq hisobotini taqdim etishdagi oʻzaro munosabatlari

12. Soliq toʻlovchi soliqlar va boshqa majburiy toʻlovlar boʻyicha hisob-kitoblarni topshirish uchun belgilangan muddatlarda soliq hisobotini elektron koʻrinishda davlat soliq xizmati organlariga taqdim etadi.

13. Elektron koʻrinishdagi soliq hisobotini qabul qilib olish vaqtida, Oʻzbekiston Respublikasi Davlat soliq qoʻmitasining dasturiy-apparat vositalari mazkur hisobotni qabul qilib olganligi toʻgʻrisida, qabul qilib olingan sanasi va vaqti koʻrsatilgan holda, avtomatik tarzda tasdiqlanishni taʼminlaydi.

Soliq hisoboti almashtiriladigan magnit (elektron, optik) manbalarda taqdim etilgan holatda, soliq organlari soliq hisobotini qabul qilib olganligini tasdiqlovchi hujjatni qogʻozda taqdim etishadi.

14. Elektron koʻrinishdagi soliq hisoboti, agar u bevosita soliq toʻlovchi tomonidan joʻnatilgan boʻlsa, joʻnatilgan deb hisoblanadi.

15. Elektron koʻrinishdagi soliq hisoboti joʻnatuvchisining elektron manzilidan joʻnatish sanasi va vaqti soliq qabul qilib oluvchisining elektron manzilidan qabul olinganligi toʻgʻrisida tasdiqnoma kelganda soliq hisobotini taqdim etish sanasi va vaqti hisoblanadi.

16. Elektron koʻrinishdagi soliq hisobotini qabul qilib oluvchisining elektron manziliga soliq hisoboti kelib tushgan sana va vaqt elektron koʻrinishdagi soliq hisoboti qabul qilib olingan sana va vaqt hisoblanadi.

17. Elektron koʻrinishdagi soliq hisobotini joʻnatish va qabul qilib olish sanasi va vaqti Oʻzbekiston Respublikasi Davlat soliq qoʻmitasining dasturiy-apparat vositalari orqali avtomatik tarzda qayd qilinadi.

Elektron koʻrinishdagi soliq hisoboti almashtiriladigan magnit (elektron, optik) manbalarda taqdim etilgan holatda, soliq hisobotini almashtiriladigan magnit (elektron, optik) manbadan qabul qilib oluvchining elektron manziliga oʻtkazish sanasi va vaqti soliq hisobotini qabul qilib olish sanasi va vaqti hisoblanadi.

III. Soliq hisobotini joʻnatishda axborotni kriptografik muhofaza qilish vositasi va elektron raqamli imzodan foydalanish qoidalari

18. Elektron raqamli imzo vositalari va axborotni kriptografik muhofaza qilish vositalarini tarqatish va hisobga olish Oʻzbekiston Respublikasi Aloqa, axborotlashtirish va telekommunikatsiya texnologiyalari davlat qoʻmitasi, Oʻzbekiston Respublikasi Davlat soliq qoʻmitasi tomonidan oʻrnatilgan tartibda, Roʻyxatga olish markazi litsenziyasiga amal qilish shartlariga hamda elektron raqamli imzo vositalari va axborotni kriptografik muhofaza qilish vositalarini ishlab chiquvchi tashkilotlar texnik hujjatlari talablaridan kelib chiqib, Roʻyxatga olish markazi yoki uning joylardagi hamkorlari (agentlari) tomonidan tashkil etiladi.

19. Axborotni kriptografik muhofaza qilish vositalarini olish, uzatish va foydalanishga faqat elektron raqamli imzo kaliti sertifikatining egasiga ruxsat beriladi.

IV. Elektron hujjat aylanishi ishtirokchilarining javobgarligi

20. Soliq hisobotini elektron koʻrinishda taqdim etuvchi soliq toʻlovchi soliq hisobotidagi maʼlumotlarning oʻz vaqtida, toʻla va ishonchli taqdim etilishiga javobgar hisoblanadi.

21. Soliq hisobotini qabul qiluvchi va unga ishlov beruvchi davlat soliq xizmati organlarining mansabdor shaxslari keyingi foydalanish uchun qabul qilinib olinayotgan axborotga oʻz vaqtida ishlov berilishiga shaxsan javobgardirlar.

V. Yakuniy qoidalar

22. Mazkur Vaqtinchalik nizom Oʻzbekiston aloqa va axborotlashtirish agentligi va Oʻzbekiston Respublikasi Moliya vazirligi bilan kelishilgan.

Oʻzbekiston aloqa va axborotlashtirish agentligi Bosh direktori A. ARIPOV

Toshkent sh.,

2007-yil 17-dekabr

Moliya vaziri R. AZIMOV

Toshkent sh.,

2007-yil 17-dekabr