Davlat maktabgacha taʼlim muassasalariga bolalarni qabul qilish boʻyicha qabul komissiyasining faoliyat koʻrsatish tartibi toʻgʻrisidagi nizomni tasdiqlash haqida (1753-son)

26.12.2007

OʻZBEKISTON RESPUBLIKASI XALQ TAʼLIMI VAZIRINING

BUYRUGʻI

[Oʻzbekiston Respublikasi Adliya vazirligi tomonidan 2007-yil 26-dekabrda 1753-son bilan davlat roʻyxatidan oʻtkazildi]

Oʻzbekiston Respublikasi Vazirlar Mahkamasining 2007-yil 25-oktabrdagi 225-sonli “Maktabgacha taʼlim sohasidagi normativ-huquqiy hujjatlarni tasdiqlash toʻgʻrisida”gi qaroriga (Oʻzbekiston Respublikasi qonun hujjatlari toʻplami, 2007-yil, 43-son, 431-modda) muvofiq buyuraman:

1. Davlat maktabgacha taʼlim muassasalariga bolalarni qabul qilish boʻyicha qabul komissiyasining faoliyat koʻrsatish Tartibi ilovaga muvofiq tasdiqlansin.

2. Mazkur buyruq Oʻzbekiston Respublikasi Adliya vazirligida davlat roʻyxatidan oʻtkazilganidan soʻng oʻn kundan keyin kuchga kiradi.

Xalq taʼlimi vaziri T. JOʻRAYEV

Toshkent sh.,

2007-yil 28-noyabr,

297-son

Xalq taʼlimi vazirining 2007-yil 28-noyabrdagi 297-sonli buyrugʻi bilan TASDIQLANGAN

Davlat maktabgacha taʼlim muassasalariga bolalarni qabul qilish boʻyicha qabul komissiyasining faoliyat koʻrsatish tartibi toʻgʻrisida

NIZOM

Mazkur Nizom Oʻzbekiston Respublikasi Vazirlar Mahkamasining “Maktabgacha taʼlim sohasidagi normativ-huquqiy hujjatlarni tasdiqlash toʻgʻrisida”gi 2007-yil 25-oktabrdagi 225-son qaroriga (Oʻzbekiston Respublikasi qonun hujjatlari toʻplami, 2007-yil, 43-son, 431-modda) muvofiq davlat maktabgacha taʼlim muassasalari (keyingi oʻrinlarda matnda maktabgacha taʼlim muassasasi deb yuritiladi) qabul komissiyasining faoliyatini tartibga soladi.

I. Umumiy qoidalar

1. Maktabgacha taʼlim muassasasiga bolalar 2 yoshdan boshlab 6-7 yoshgacha boʻlgan bolalarni qabul qilish tumanlar (shaharlar) hokimlarining qarori bilan tashkil etiladigan xalq taʼlimi muassasalari faoliyatini metodik taʼminlash va tashkil etish tuman (shahar) boʻlimlari huzuridagi davlat maktabgacha taʼlim muassasalariga bolalarni qabul qilish boʻyicha qabul komissiyasi (bundan buyon matnda qabul komissiyasi deb yuritiladi) tomonidan amalga oshiriladi.

2. Qabul komissiyasi xalq taʼlimi muassasalari faoliyatini metodik taʼminlash va tashkil etish tuman (shahar) boʻlimi huzurida besh kishidan iborat tarkibda tashkil etiladi va uning tarkibi quyidagi mutaxassislardan shakllantiriladi:

Qabul komissiyasi raisi — xalq taʼlimi muassasalari faoliyatini metodik taʼminlash va tashkil etish tuman (shahar) boʻlimi mudiri;

Qabul komissiyasi kotibi — xalq taʼlimi muassasalari faoliyatini metodik taʼminlash va tashkil etish tuman (shahar) boʻlimining maktabgacha taʼlimi boʻlimi mutaxassisi;

Qabul komissiyasi aʼzolari — maktabgacha taʼlim muassasasi mudirlari va uslubchilari.

3. Muassislari mahalliy davlat hokimiyati organlari boʻlgan maktabgacha taʼlim muassasasiga bolalarni qabul qilish qabul komissiyasining qaroriga binoan xalq taʼlimi muassasalari faoliyatini metodik taʼminlash va tashkil etish tuman (shahar) boʻlimlari tomonidan mazkur nizomning 1-ilovasida keltirilgan shaklda beriladigan yoʻllanmalari asosida amalga oshiriladi.

Muassislari boshqa organlar boʻlgan maktabgacha taʼlim muassasalariga bolalarni qabul qilish ularning muassislari tomonidan belgilanadigan tartibda amalga oshiriladi. Boʻsh oʻrinlar mavjud boʻlgan taqdirda ushbu maktabgacha taʼlim muassasalari bolalarni xalq taʼlimi muassasalari faoliyatini metodik taʼminlash va tashkil etish tuman (shahar) boʻlimlarining yoʻllanmalari boʻyicha shartnoma asosida qabul qilishi mumkin.

4. Nodavlat maktabgacha taʼlim muassasasiga bolalarni qabul qilish va ularning chiqib ketish tartibi qonun hujjatlariga muvofiq va nodavlat maktabgacha taʼlim muassasining ustavi bilan belgilanadi.

II. Qabul komissiyasining ish tartibi, hujjatlarni rasmiylashtirish

5. Qabul komissiyasi haftada ikki marta yaʼni, seshanba va juma kunlari bolalarni maktabgacha taʼlim muassasalariga joylashtirish masalasida fuqarolarni qabul qiladi.

6. Maktabgacha taʼlim muassasasiga yoʻllanma olish uchun ota-onalar (ularning oʻrnini bosuvchi shaxslar) qabul komissiyasiga quyidagi hujjatlarni taqdim etadi:

a) maktabgacha taʼlim muassasiga qabul qilish boʻyicha yoʻllanma berish toʻgʻrisida ariza;

b) bolaning tugʻilganligi haqidagi guvohnomasining nusxasi;

v) bolaning otasi yoki onasining pasporti nusxasi;

g) turar joyidan shu manzilda ushbu oilaning yashashi haqida fuqarolarning oʻzini oʻzi boshqarish organlari maʼlumoti;

d) ota-onasining (ularning oʻrnini bosuvchi shaxslarning) ish joyidan maʼlumotnoma (ishlamaydigan ota-onalar bundan mustasno).

Qabul komissiyasiga hujjatlar topshirilayotgan vaqtda ushbu bandning “b” va “v” kichik bandlarida koʻrsatilgan hujjatlarning asli solishtirish uchun taqdim qilinadi va hujjatlar qabul qilingandan soʻng egasiga qaytariladi.

7. Oʻzbekiston Respublikasi Vazirlar Mahkamasining “Maktabgacha taʼlim sohasidagi normativ-huquqiy hujjatlarni tasdiqlash toʻgʻrisida”gi 2007-yil 25-oktabrdagi 225-sonli qaroriga muvofiq quyidagi bolalar:

I va II guruh nogironlari;

koʻp bolali oilalarning bolalari;

harbiy xizmatchilarning bolalari;

talabalar va pedagoglarning bolalari maktabgacha taʼlim muassasasiga qabul qilishda imtiyozlardan foydalanadilar.

Qabul komissiyasi, shuningdek ota-onalari maktabgacha taʼlim muassasasining moddiy-texnika bazasini mustahkamlashda yordam bergan bolalarni istisno tarzida navbatdan tashqari qabul qilishi mumkin. Bunday bolalar kontingenti maktabgacha taʼlim muassasasi rejadagi quvvati umumiy sonining 20 foizidan ortiq boʻlmasligi kerak.

8. Maktabgacha taʼlim muassasasiga qabul qilishda imtiyozlardan foydalanuvchi bolalarning ota-onalari (ularning oʻrnini bosuvchi shaxslar) qabul komissiyasiga mazkur Nizomning 6-bandida koʻrsatilgan hujjatlardan tashqari quyidagi hujjatlarni qoʻshimcha ravishda taqdim etadi:

a) I va II guruh nogironligini tasdiqlovchi hujjat nusxasi;

b) koʻp farzandli oila ekanligi toʻgʻrisida turar joyidagi fuqarolarning oʻzini oʻzi boshqarish organlaridan maʼlumotnoma;

v) talabalar uchun taʼlim muassasasidan maʼlumotnoma;

g) homiylar toʻgʻrisida — maktabgacha taʼlim muassasasining rahbariyati va kasaba uyushmasi tomonidan tasdiqlangan homiylik yordami koʻrsatilganligi haqidagi dalolatnoma;

d) pedagoglar — ish joyidan maʼlumotnoma.

9. Yoʻllanma olish uchun taqdim etilgan hujjatlar qabul komissiyasi tomonidan 7 kunlik muddat ichida koʻrib chiqilib, tegishli qaror qabul qilinadi va bu haqda 3 kunlik muddat ichida ariza beruvchilarga maʼlum qilinadi.

10. Ota-onalar (ularning oʻrnini bosuvchi shaxslar) tanlagan maktabgacha taʼlim muassasasida boʻsh oʻrin (joy) boʻlmagan hollarda ularning hujjatlari qabul komissiyasining qaroriga asosan yoʻllanma olish uchun navbatga qoʻyiladi yoki ota-onalarning (ularning oʻrnini bosuvchi shaxslarning) xohishiga koʻra tegishli hududdagi boʻsh oʻrin (joy) mavjud boʻlgan hamda ular tanlagan maktabgacha taʼlim muassasasiga yaqin masofada joylashgan boshqa maktabgacha taʼlim muassasasiga yoʻllanma beriladi.

11. Qabul komissiyasi kotibi quyidagi hujjatlarni yuritadi:

mazkur Nizomning 2-ilovasiga muvofiq shakldagi qabul komissiyasining qaroriga asosan beriladigan yoʻllanmalarni qayd qilish daftari;

mazkur Nizomning 3-ilovasiga muvofiq shakldagi qabul komissiyasining qaroriga asosan yoʻllanma olish uchun navbatga qoʻyilganlarni qayd qilish daftari.

Daftarlar raqamlangan, tikilgan va tegishli xalq taʼlimi muassasalari faoliyatini metodik taʼminlash va tashkil etish tuman (shahar) boʻlimi mudiri tomonidan imzolangan hamda muhrlangan boʻlishi shart va ularning yuritilishi tegishli yilning 2-sentabr kunidan boshlanib, 31-avgust kunida tugatiladi hamda ushbu hujjatlar 3 yil mobaynida saqlanadi.

12. Ota-onalar (ularning oʻrnini bosuvchi shaxslar) 15 kunlik muddatda olingan yoʻllanmani maktabgacha taʼlim muassasasiga taqdim etishi shart. Ushbu muddat ichida yoʻllanma tegishli maktabgacha taʼlim muassasasiga taqdim etilmasa, mazkur yoʻllanma oʻz kuchini yoʻqotadi.

III. Qabul komissiyasi faoliyatiga koʻmaklashish va taqsimot

13. Maktabgacha taʼlim muassasalarining mudirlari har oyning birinchi sanasida qabul komissiyasiga maktabgacha taʼlim muassasasidagi mavjud boʻsh oʻrinlar haqida yozma xabar beradilar va shu asosda maktabgacha taʼlim muassasalaridagi boʻsh oʻrinlar har bir maktabgacha taʼlim muassasasi boʻyicha yoshiga qarab taqsimot qilinadi.

14. Har yili iyun — avgust oylarida yangi oʻquv yili hisobiga maktabgacha taʼlim muassasalariga jadval asosida ommaviy ravishda yoʻllanma beriladi. Maktabgacha taʼlim muassasalari bolalarni yoʻllanmalarga asosan boʻshagan oʻrinlar (joylar) hisobiga qabul qiladi.

15. Maktabgacha taʼlim muassasasi tarbiyalanuvchisi bir viloyat (Qoraqalpogʻiston Respublikasi, Toshkent shahri) hududida boshqa tumandagi maktabgacha taʼlim muassasasiga oʻtkazilayotganda, tarbiyalanuvchi oʻtayotgan joydagi maktabgacha taʼlim muassasi joylashgan joydagi xalq taʼlimi muassasalari faoliyatini metodik taʼminlash va tashkil etish tuman (shahar) boʻlimi huzurida tashkil etilgan qabul komissiyasi bilan soʻrov xati yuborish orqali amalga oshiriladi.

Bunda soʻrov xatini olgan qabul komissiyasi oʻz hududida faoliyat koʻrsatayotgan maktabgacha taʼlim muassasalari tomonidan har oyda taqdim etiladigan maʼlumotlar asosida mavjud boʻsh oʻrin haqida 3 kunlik muddatda soʻrovnoma yuborgan qabul komissiyasiga javob xati yuboradi va shu asosda maktabgacha taʼlim muassasi tarbiyalanuvchisini boshqa maktabgacha taʼlim muassasasiga koʻchirish amalga oshiriladi.

IV. Yakuniy qoidalar

16. Mazkur Nizom talablarini buzilishi qonun hujjatlarida belgilangan javobgarlikni keltirib chiqaradi.

17. Maktabgacha taʼlim muassasalariga qabul qilish boʻyicha qabul komissiyasi faoliyat yuritishi bilan bogʻliq nizolar qonun hujjatlarida belgilangan tartibda hal etiladi.

Maktabgacha taʼlim muassasalariga bolalarni qabul qilish boʻyicha qabul komissiyasining faoliyatini yuritish tartibi toʻgʻrisidagi nizomga 1-ILOVA

(1-ilova Oʻzbekiston Respublikasi xalq taʼlimi vazirining 2014-yil 25-avgustdagi 253-sonli buyrugʻi (roʻyxat raqami 1753-1, 02.09.2014-y.) tahririda — OʻR QHT, 2014-y., 36-son, 457-modda)

Maktabgacha taʼlim muassasalariga bolalarni qabul qilish boʻyicha qabul komissiyasining faoliyatini yuritish tartibi toʻgʻrisidagi nizomga 2-ILOVA

(2-ilova Oʻzbekiston Respublikasi xalq taʼlimi vazirining 2014-yil 25-avgustdagi 253-sonli buyrugʻi (roʻyxat raqami 1753-1, 02.09.2014-y.) tahririda — OʻR QHT, 2014-y., 36-son, 457-modda)

Maktabgacha taʼlim muassasalariga bolalarni qabul qilish boʻyicha qabul komissiyasining faoliyatini yuritish tartibi toʻgʻrisidagi nizomga 3-ILOVA

(3-ilova Oʻzbekiston Respublikasi xalq taʼlimi vazirining 2014-yil 25-avgustdagi 253-sonli buyrugʻi (roʻyxat raqami 1753-1, 02.09.2014-y.) tahririda — OʻR QHT, 2014-y., 36-son, 457-modda)