389-modda. Konsert-tomosha faoliyatini amalga oshiruvchi yuridik shaxslarga soliq solish tartibi

Konsert-tomosha faoliyati bilan shugʻullanish huquqi uchun davlat boji toʻlovchi yuridik shaxslar mazkur faoliyat turi boʻyicha ushbu Kodeksning 23-moddasida nazarda tutilgan soliqlar va boshqa majburiy toʻlovlardan ozod etiladi, ushbu moddaning ikkinchi qismida koʻrsatilgan toʻlovlar bundan mustasno.

Ushbu moddaning birinchi qismida koʻrsatilgan yuridik shaxslar zimmasida quyidagilarni toʻlash majburiyati saqlanib qoladi:

bojxona toʻlovlari;

yagona ijtimoiy toʻlov;

avtotransport vositalarini olganlik va (yoki) vaqtinchalik olib kirganlik uchun yigʻim;

toʻlov manbaida ushlab qolinadigan soliqlar va boshqa majburiy toʻlovlar.

Yuridik shaxslar konsert-tomosha faoliyatini amalga oshirish bilan bogʻliq boʻlmagan faoliyat turlari bilan shugʻullanganlarida soliq toʻlovchi faoliyatning mazkur turlari boʻyicha alohida-alohida hisob yuritishi hamda ushbu Kodeksda nazarda tutilgan soliqlar va boshqa majburiy toʻlovlarni toʻlashi shart. .

Yuridik shaxslar konsert-tomosha faoliyatini amalga oshirish bilan bogʻliq boʻlmagan faoliyat turlari bilan shugʻullangan taqdirda, davlat boji ushbu Kodeksning XVII boʻlimida nazarda tutilgan tartibda toʻlanadi.