Ichki tarmoq va tarmoqlararo sanoat kooperatsiyasini yanada kuchaytirish chora-tadbirlari toʻgʻrisida (PF-3937-son)

12.11.2007

Oʻzbekiston Respublikasi Prezidentining

Farmoni

Qayd etib oʻtilsinki, Oʻzbekiston iqtisodiyotida amalga oshirilayotgan chuqur, aniq maqsadga yoʻnaltirilgan tarkibiy oʻzgartirishlar keyingi yillarda iqtisodiy rivojlanishning yuksak surʼatlarini va sanoatning ildam oʻsishini taʼminladi. Sanoatning yalpi ichki mahsulotdagi ulushi 90-yillar boshidagi 11 foizdan 2007-yilga kelib 24 foizgacha koʻpaydi.

Mustaqillik yillari mobaynida neft-gaz, mashinasozlik, elektr texnika, kimyo, metallurgiya sanoatida oʻnlab yangi yirik sanoat korxonalari barpo etildi. Iqtisodiyotning yangi tarmogʻi — rivojlangan infratuzilmaga ega boʻlgan avtomobil sanoati yaratildiki, unda ishlab chiqarishni mahalliylashtirish darajasi bugungi kunda 60 foizdan koʻproqni tashkil etadi.

Vatanimiz sanoati tomonidan yengil, yuk avtomobillari hamda yoʻlovchi avtobuslari, polietilen, siqilgan va suyultirilgan gaz, kalsiylashtirilgan soda, elektr texnika va kabel-oʻtkazgich mahsulotlari, elastik temir yoʻl shpallari, mashinasozlik hamda boshqa sanoat tarmoqlari uchun ehtiyot qismlar va butlovchi buyumlar kabi yangi yuqori texnologik mahsulot turlarini ishlab chiqarish oʻzlashtirildi.

Shu bilan birga, vujudga keltirilgan sanoat salohiyatidan hali yetarlicha samarali va toʻliq darajada foydalanilmayapti. Ishlab chiqarish quvvatlari, yuqori malakali ishchi kuchi, qulay iqlim sharoitlari mavjud boʻlgani holda, tayyor sanoat mahsulotining koʻpgina turlari, xomashyo va materiallar, yetarli darajadagi manfaatdorlikning yoʻqligi sababli koʻpincha xorijdan qoʻshimcha transport xarajatlari va valyuta sarflab olib kelinadi, vaholanki ularni mahalliy korxonalarda muvaffaqiyatli ishlab chiqarish mumkin boʻlur edi.

Xususan, qishloq xoʻjalik mashinasozligi, rangli metallurgiya, paxta tozalash va toʻqimachilik sanoatida ichki tarmoq va tarmoqlararo sanoat kooperatsiyasi imkoniyatlaridan yetarlicha foydalanilmayapti. Mahalliylashtirilayotgan ishlab chiqarishga kichik biznes korxonalari sust jalb etilmoqda.

Ishlab chiqarishni maqbullashtirishda, ichki tarmoq va tarmoqlararo kooperatsiyani mustahkamlash hamda rivojlantirishda xoʻjalik yurituvchi subyektlarga yordam berish, mahalliylashtirish jarayonlarini kengaytirish uchun qoʻshimcha shart-sharoitlar yaratish, ishlab chiqarish samaradorligini, aholining ish bilan bandligini va sanoat mahsuloti hajmlarini oshirishda mavjud zaxiralardan foydalanish maqsadida:

1. Respublika sanoatining tez rivojlanib borayotgan tarmoqlari uchun zarur boʻlgan, eksport salohiyatini kengaytirish, savdo va toʻlov balansini maqbullashtirish imkonini beradigan butlovchi buyumlar, ehtiyot qismlar, sarflanadigan materiallar va qayta ishlangan xomashyo zaxiralari ishlab chiqaradigan vatanimiz korxonalarini har tomonlama qoʻllab-quvvatlash, valyuta mablagʻlarini birinchi navbatda ilgʻor texnologiyalar va mashina-uskunalarni import qilishga yoʻnaltirish uzoq muddatli istiqbolni koʻzlab sanoatni yanada rivojlantirishning eng muhim ustuvor vazifasi deb hisoblansin.

Quyidagilar ichki tarmoq va tarmoqlararo sanoat kooperatsiyasini yanada rivojlantirishning asosiy yoʻnalishlari etib belgilansin:

sanoat korxonalarining ichki tarmoq va tarmoqlararo kooperatsiyasi doirasida uzoq muddatli xoʻjalik aloqalarini shakllantirish hamda kengaytirish uchun zarur qonunchilik bazasini va bozor infratuzilmasini yaratish;

uskunalar, butlovchi buyumlar, xomashyo va materiallar ishlab chiqarishni mahalliylashtirishni amalga oshirayotgan korxonalarning zarur xomashyo va kredit zaxiralaridan erkin foydalanishini taʼminlash;

mahalliy xomashyo negizida tayyor mahsulot, butlovchi buyumlar va materiallar ishlab chiqarishni mahalliylashtirish borasida har yili qabul qilinadigan Dasturlarning sanoat kooperatsiyasini rivojlantirishdagi roli va ahamiyatini oshirish, shuningdek dasturlarga kiritilgan mahalliylashtirish loyihalarining oʻz vaqtida bajarilishi uchun ijrochilarning javobgarligini kuchaytirish;

yangi texnologiyalarni ishlab chiqish hamda ularni yirik va kichik korxonalarda joriy etish imkonini beradigan innovatsiya loyihalarini qoʻllab-quvvatlash va amalga oshirish uchun venchur jamgʻarmalarini, shuningdek infratuzilma obyektlarini tashkil etish;

mamlakatimiz korxonalarining ehtiyojlari uchun, shuningdek eksportga yetkazib berish uchun uskunalar, butlovchi buyumlar, qayta ishlangan xomashyo va materiallar ishlab chiqarishni taʼminlayotgan korxonalarga mahalliylashtirish dasturi doirasida soliq hamda bojxona sohasida imtiyoz va preferensiyalar berish.

2. Oʻzbekiston Respublikasi Iqtisodiyot vazirligi, Tashqi iqtisodiy aloqalar, investitsiyalar va savdo vazirligi, Savdo-sanoat palatasining Xalqaro sanoat yarmarkasi va Kooperatsiya birjasini muntazam asosda oʻtkazib turishni tashkil etish toʻgʻrisidagi taklifi qabul qilinsin.

Ichki tarmoq va tarmoqlararo kooperatsiyani rivojlantirish, respublikada ishlab chiqarilayotgan mahsulot toʻgʻrisida keng xabardor qilish, sheriklarni izlab topish hamda oʻzi ishlab chiqargan mahsulotni yetkazib berish toʻgʻrisida mahalliy ishlab chiqaruvchilar oʻrtasida xoʻjalik shartnomalari tuzishda, shuningdek eksportga mahsulotni yetkazib berish uchun shartnomalar tuzishda yordam koʻrsatish sanoat yarmarkasi va Kooperatsiya birjasining asosiy vazifasi etib belgilansin.

3. Doimiy faoliyat koʻrsatuvchi Xalqaro sanoat yarmarkasi va Kooperatsiya birjasining tashkiliy qoʻmitasi tarkibi ilovaga* muvofiq tasdiqlansin.

* Ilova rus tilidagi matnda berilgan.

4. Belgilansinki, mahalliy korxonalar tomonidan ishlab chiqarilgan asbob-uskunalar, butlovchi buyumlar, qayta ishlangan mahsulotlar va materiallarni Kooperatsiya birjasi doirasida xarid qilish mamlakatimizning barcha isteʼmolchilari uchun qoʻshimcha tendyerlar oʻtkazmay toʻgʻridan toʻgʻri shartnomalar asosida amalga oshiriladi.

5. Oʻzbekiston Respublikasi Iqtisodiyot vazirligi, Moliya vazirligi bir oy muddatda, 2008-yilgi mahalliylashtirish Dasturidan boshlab, mahalliy xomashyo negizida tayyor mahsulot, butlovchi buyumlar va materiallar ishlab chiqarishni mahalliylashtirish Dasturiga kiritilgan korxonalar uchun qoʻshimcha soliq imtiyozlari va preferensiyalar berish toʻgʻrisida Vazirlar Mahkamasiga takliflar kiritsin.

6. Oʻzbekiston Respublikasi Iqtisodiyot vazirligi Tashqi iqtisodiy aloqalar, investitsiyalar va savdo vazirligi, boshqa manfaatdor idoralar bilan birgalikda har chorakda hamda yil yakunlari boʻyicha mahalliy xomashyo negizida tayyor mahsulot, butlovchi buyumlar va materiallar ishlab chiqarishni mahalliylashtirishning tasdiqlangan Dasturi ijrosi natijalarini koʻrib chiqish uchun Vazirlar Mahkamasi yigʻilishlariga kiritib borsin.

7. Oʻzbekiston standartlashtirish, metrologiya va sertifikatlashtirish agentligi 2008-yilning birinchi yarmi davomida Agentlikning kooperatsiya aloqalari doirasida texnikaviy audit hamda ishlab chiqarilayotgan va oʻzlashtirilayotgan mahsulotlar sifatini boshqarish tizimini keng qoʻllash borasida xoʻjalik yurituvchi subyektlarga joylarda xizmatlar koʻrsatish filiallari bilan ixtisoslashtirilgan tuzilmalari tarmogʻi tashkil etilishini taʼminlasin.

8. Oʻzbekiston Respublikasi Tashqi iqtisodiy aloqalar, investitsiyalar va savdo vazirligi Davlat bojxona qoʻmitasi hamda Iqtisodiyot vazirligi bilan birgalikda keyinchalik aynan narxi va sifati boʻyicha raqobatbardosh mahsulotlar ishlab chiqarishni taʼminlovchi mahalliy ishlab chiqaruvchilarni qoʻllab-quvvatlash chora-tadbirlarini ishlab chiqqan holda, asbob-uskunalar, butlovchi buyumlar, xomashyo va materiallarni import qilishning doimiy monitoringi va tahlilini amalga oshirsin.

9. Mazkur Farmonning ijrosini nazorat qilish Oʻzbekiston Respublikasi Bosh vaziri Sh.M. Mirziyoyev zimmasiga yuklansin.

Oʻzbekiston Respublikasi Prezidenti I. KARIMOV

Toshkent sh.,

2007-yil 12-noyabr,

PF-3937-son