(320-son)
04.07.1998
Oʻzbekiston Respublikasi Vazirlar Mahkamasining
Farmoyishi
Kadrlar tayyorlash milliy dasturida belgilangan vazifalarni amalga oshirish, 1998/99 oʻquv yilida Oʻzbekiston Respublikasi oliy va oʻrta maxsus, kasb-hunar taʼlimi muassasalariga yoshlarning uyushqoqlik bilan qabul qilishni va sifatli tanlashni amalga oshirish, shuningdek test sinovlarining yuqori darajada oʻtkazilishini taʼminlash maqsadida:
1. Quyidagilar:
Oʻzbekiston Respublikasi oliy taʼlim muassasalariga bakalavrlar tayyorlash boʻyicha talabalarni qabul qilish tartibi va qoidalari toʻgʻrisidagi Nizom 1-ilovaga muvofiq;
Oʻzbekiston Respublikasi oʻrta maxsus, kasb-hunar taʼlim muassasalariga oʻquvchilarni qabul qilish tartibi va qoidalari toʻgʻrisidagi Nizom 2-ilovaga muvofiq tasdiqlansin.
2. Oʻzbekiston Respublikasi Oliy va oʻrta maxsus taʼlim vazirligi, Xalq taʼlimi vazirligi, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari, tasarrufida taʼlim muassasalari boʻlgan vazirliklar, idoralar va Davlat test markazi tasdiqlangan nizomlarni bajarish boʻyicha zarur tashkiliy tadbirlarni amalga oshirsinlar.
3. Oʻzbekiston Respublikasi Oliy va oʻrta maxsus taʼlim vazirligi, Moliya vazirligi va Adliya vazirligi bir hafta muddatda “Oʻzbekiston Respublikasi oliy va oʻrta maxsus taʼlim muassasalarida oʻqitishning toʻlov-kontrakt shakli va tushgan mablagʻlarni taqsimlash tartibi toʻgʻrisida Nizom”ni ishlab chiqsinlar va belgilangan tartibda tasdiqlash uchun Oʻzbekiston Respublikasi taʼlim muassasalariga qabul qilish boʻyicha Davlat komissiyasiga kiritsinlar.
4. Oʻzbekiston Respublikasi Vazirlar Mahkamasining 1997-yil 4-iyuldagi 282-f-son farmoyishi oʻz kuchini yoʻqotgan deb hisoblansin.
5. Mazkur farmoyishning bajarilishini nazorat qilish Bosh vazir oʻrinbosari A. A. Azizxoʻjayev zimmasiga yuklansin.
Oʻzbekiston Respublikasi Bosh vaziri Oʻ. SULTONOV
Toshkent sh.,
1998-yil 4-iyul,
320-f-son
Vazirlar Mahkamasining 1998-yil 4-iyuldagi 320-f-son farmoyishiga 1-ILOVA
Oʻzbekiston Respublikasi oliy taʼlim muassasalariga bakalavrlar tayyorlash boʻyicha talabalarni qabul qilish tartibi va qoidalari toʻgʻrisida
NIZOM
UMUMIY QOIDALAR
1. Oliy taʼlim muassasalari qabulni Oʻzbekiston Respublikasi Vazirlar Mahkamasining tegishli qarori bilan tasdiqlangan davlat grantlari va toʻlov-kontrakt asosida qabul kvotalariga muvofiq amalga oshiradilar.
2. Respublika oliy taʼlim muassasalariga talabalarni qabul qilish Oʻzbekiston Respublikasi taʼlim muassasalariga qabul qilish boʻyicha Davlat komissiyasi tomonidan test sinovlari natijalariga (ballar) binoan reyting tizimi boʻyicha amalga oshiriladi.
Oliy taʼlim muassasalariga oʻrnatilgan qabul rejasining 50 foizi davlat grantlari hisobidan, qolgan 50 foizi toʻlov-kontrakt asosida tashkil etiladi.
Oliy taʼlim muassasalariga qabul barcha uchun (ham grantlar, ham kontrakt boʻyicha) teng huquqlilik, yagona qabul qoidalari va yagona tanlov asosida amalga oshirilib, test sinovlarida eng yuqori ball toʻplagan abituriyentlarning davlat grantlari boʻyicha birinchi navbatda qabul qilinish huquqi taʼminlanadi. Qolgan abituriyentlar test ballari reytingi asosida oʻrnatilgan toʻlov-kontrakt kvotalari doirasida qabul qilinish huquqiga egadirlar.
Tanlov har bir oliy taʼlim muassasasi boʻyicha taʼlim yoʻnalishlari, oʻqitish tillari va shakllariga koʻra alohida oʻtkaziladi.
Test sinovlarini Oʻzbekiston Respublikasi Vazirlar Mahkamasi huzuridagi Davlat test markazi amalga oshiradi. Test sinovlarini oʻtkazishga masʼul boʻlgan Davlat test markazi vakillari Davlat komissiyasi tomonidan tasdiqlanadi.
Qoraqalpogʻiston Respublikasi Vazirlar Kengashi, viloyatlar, Toshkent shahar hokimliklari va oliy taʼlim muassasalari rektorlari joylarda test sinovlarini oʻtkazish uchun zarur sharoitlarni taʼminlaydilar.
3. Test sinovlari uch tilda — oʻzbek, rus va qoraqalpoq tillarida oʻtkaziladi.
Oliy taʼlim muassasasida taʼlim yoʻnalishlari va mutaxassisliklar boʻyicha oʻqitish tili Oʻzbekiston Respublikasi Vazirlar Mahkamasining tegishli qarori bilan tasdiqlangan qabul koʻrsatkichlari doirasida hujjatlar qabul qilinishiga qadar vazirliklar va idoralar tomonidan belgilanadi va Davlat komissiyasi tomonidan tasdiqlanadi.
Abituriyent test sinovlarini oliy taʼlim muassasasida oʻqiydigan tilda topshiradi.
Taʼlim yoʻnalishlari boʻyicha, test sinovlari uchun, tegishli fanlar majmuasi belgilanadi (1-ilova).
Oliy taʼlimning ayrim yoʻnalishlari (mutaxassisliklari) boʻyicha test sinovlari bilan bir qatorda qoʻshimcha profil (ijodiy) imtihonlar oʻtkaziladi (2-ilova).
4. Ayrim taʼlim yoʻnalishlari (mutaxassisliklar) boʻyicha oʻqitish tojik, qozoq yoki turkman tillarida olib boriladigan oliy taʼlim muassasalariga qabul koʻp balli tizim boʻyicha profil imtihonlar va test sinovlari asosida amalga oshiriladi (3-ilova). Taʼlim (mutaxassislik)ning ushbu yoʻnalishlariga arizalar oʻrta maktabni faqat koʻrsatilgan tillarda tugatgan abituriyentlardan qabul qilinadi.
5. Oʻrta maktabda ispan (arab, fors, dari, hind, urdu, xitoy, koreys, uygʻur) tilini chet tili sifatida oʻqigan abituriyentlar, mazkur tildan koʻp balli baho tizimi boʻyicha imtihon topshiradilar, qolgan fanlar boʻyicha esa test sinovlaridan oʻtadilar.
Mazkur band roman-german filologiyasi (ingliz, nemis va fransuz filologiyasi) yoʻnalishi boʻyicha oʻqishga kiradigan abituriyentlarga nisbatan qoʻllanilmaydi.
6. Profil (ijodiy) va koʻp balli imtihonlarni oʻtkazish tartibi va qoidalari Davlat komissiyasi bilan kelishilgan holda Oliy va oʻrta maxsus taʼlim vazirligi (keyingi oʻrinlarda — Oliy taʼlim vazirligi deb ataladi) tomonidan manfaatdor vazirliklar va idoralar bilan birgalikda tasdiqlanadi (4 va 5-ilovalar).
7. Oliy taʼlim muassasalariga koʻzi ojiz abituriyentlarni qabul qilish Oliy taʼlim vazirligi belgilagan tartibda amalga oshiriladi (6-ilova).
Test sinovlari natijalari boʻyicha eng koʻp ballning kamida 40 foizini toʻplagan I va II guruh nogironlari, shu jumladan, bolaligidan I va II guruh nogironlari, yetim bolalar va “Mehribonlik uylari” bolalar internat-uylarida tarbiyalanganlarni oʻqishga qabul qilish masalasi Davlat komissiyasi tomonidan koʻrib chiqiladi.
8. MDH fuqarolarini Oʻzbekiston oliy taʼlim muassasalariga oʻqish uchun uyushgan holda (kooperatsiyali) qabul qilish, shuningdek respublika fuqarolarini MDH mamlakatlariga oʻqishga joʻnatish davlatlararo shartnomalar va Davlat komissiyasining tegishli qaroriga asosan amalga oshiriladi.
XORIJIY FUQAROLARNI QABUL QILISh
9. Oliy taʼlim muassasalariga xorijiy fuqarolarni qabul qilish Vazirlar Mahkamasining “Oʻzbekiston Respublikasida xorijiy fuqarolarni oʻqitish toʻgʻrisida” 1994-yil 24-maydagi 266-son qaroriga hamda hukumatlararo bitimlarga muvofiq yoki Davlat komissiyasining roziligi bilan toʻlov-kontrakt asosida amalga oshiriladi.
Xorijiy fuqarolarning oliy taʼlim muassasalarida oʻqishi uchun toʻlov miqdori Oliy taʼlim vazirligi tomonidan Moliya vazirligi bilan kelishilgan holda tasdiqlanadi.
HUJJATLARNI QABUL QILISh
10. Oliy taʼlim vazirligi tomonidan tasdiqlangan Nizomga muvofiq oliy taʼlim muassasalarida oʻz faoliyatini amalga oshiruvchi qabul komissiyalari tashkil etiladi.
Abituriyentlarning oʻqishga qabul qilish haqidagi arizalari qabul komissiyasi tomonidan 20-iyundan 20-iyulgacha (shu kuni ham), Madaniyat ishlari vazirligi va Badiiy akademiya oliy oʻquv yurtlarida esa 20-iyundan 15-iyulgacha qabul qilinadi.
Abituriyent oʻqishga kirish chogʻida quyidagilarni taqdim etadi:
taʼlim yoʻnalishi, oʻquv tili va shakli koʻrsatilgan holdagi ariza;
oʻrta yoki oʻrta maxsus maʼlumot haqidagi hujjatning asl nusxasi;
№ 086-U shakl boʻyicha tibbiy maʼlumotnoma;
3x4 hajmdagi 6 ta fotosurat;
I va II guruh nogironlari, yetim bolalar va “Mehribonlik uylari” bolalar internat-uylarida tarbiyalanganlar asl nusxadagi tegishli tasdiqlovchi hujjatlarni taqdim etadilar.
Tanlovdan tashqari oʻqishga kirish huquqiga ega boʻlgan xalqaro va respublika olimpiadalari, tanlovlar va musobaqalar gʻoliblari asl nusxadagi tasdiqlovchi hujjatlarni topshiradilar.
Muddatli harbiy xizmatni oʻtagan va harbiy qismlarning oʻqishga yuborish haqidagi tavsiyanomalariga ega boʻlgan abituriyentlar ham ularni oliy taʼlim muassasalari qabul komissiyasiga taqdim etadilar.
Abituriyent tomonidan pasport hamda harbiy xizmatga aloqadorligi haqidagi hujjat ham shaxsan koʻrsatiladi.
Koʻrsatib oʻtilgan hujjatlar mavjud boʻlganda qabul komissiyasi abituriyentning hujjatlarini qabul qilishni rad etishga haqli emas.
Hujjatlar qabul qilishning belgilangan muddatlari tugagandan soʻng hujjatlarga qoʻshimchalar va oʻzgartirishlar kiritish qatʼiyan man qilinadi.
Oliy taʼlim muassasalarining qabul komissiyalari 22-iyulga qadar boʻlgan muddatda Davlat komissiyasiga va Davlat test markaziga taʼlim yoʻnalishi, oʻquv shakli va tili koʻrsatilgan holda, abituriyentlarning (shu jumladan, yuqorida qayd etilgan toifalari) soni haqida belgilangan shakldagi maʼlumotni taqdim etadilar.
PROFIL (IJODIY) IMTIHONLAR
11. Profil (ijodiy) imtihonlar test sinovlariga qadar 11-iyuldan 25-iyulgacha, test majmualarida fanning oʻrniga qarab uning uchun nazarda tutilgan eng koʻp ballning 0 dan 100 foizigacha boʻlgan oraliqda yagona koʻp balli baholash tizimi boʻyicha amalga oshiriladi.
Profil (ijodiy) imtihonlar natijalari boʻyicha tushgan norozilik (apellatsiya) arizalari, Oliy taʼlim vazirligi belgilagan tartibda, oliy taʼlim muassasasi qabul komissiyasi tomonidan 26-iyulga qadar boʻlgan muddatda koʻrib chiqiladi.
Profil (ijodiy) imtihonlar natijalari Davlat komissiyasiga oliy taʼlim muassasalari tomonidan 27-iyulgacha taqdim etiladi.
Profil (ijodiy) imtihonlarning natijalari haqidagi maʼlumotlar belgilangan shakllar boʻyicha oliy taʼlim muassasalari qabul komissiyalari tomonidan Davlat test markaziga taqdim etiladi:
kunduzgi boʻlimlar uchun — 1-avgustda;
sirtqi boʻlimlar uchun — 11-avgustda.
TEST SINOVLARIGA TAYYORGARLIK KOʻRISh VA ULARNI OʻTKAZISh
12. Test sinovlari:
kunduzgi boʻlimlarda — 1-avgustda;
sirtqi boʻlimlarda — 11-avgustda oʻtkaziladi.
13. Oliy taʼlim muassasasida tanlangan taʼlim yoʻnalishiga (mutaxassislikka) qarab abituriyentlar 1 va 2-ilovalarga muvofiq ikki yoki uch fan majmualari boʻyicha test sinovlaridan oʻtadilar.
Test topshiriqlari oʻrta umumtaʼlim maktablari oʻquv dasturlariga muvofiq tuziladi.
14. Majmuaning har bir fani 36 topshiriqni oʻz ichiga oladi.
Quyidagi vaqt meʼyorlari belgilanadi:
a) 72 savolga — 2 soat;
b) 108 savolga — 3 soat.
Majmualar quyidagi fanlar boʻyicha shakllanadi:
1. Ona tili: oʻzbek tili va adabiyoti
2. Ona tili: rus tili va adabiyoti
3. Ona tili: qoraqalpoq tili va adabiyoti
4. Ikkinchi til: oʻzbek tili va adabiyoti
5. Ikkinchi til: rus tili va adabiyoti
6. Ikkinchi til: qoraqalpoq tili va adabiyoti
7. Matematika
8. Fizika
9. Kimyo
10. Biologiya
11. Tarix
12. Geografiya
13. Chet tili: ingliz
14. Chet tili: nemis
15. Chet tili: fransuz
Test sinovlari boshlanishiga qadar, 30 daqiqagacha tushuntirish ishlari oʻtkaziladi, bu vaqt test oʻtkazish uchun ajratilgan vaqt meʼyoriga kirmaydi.
Test sinovlarini tashkil etish va ularni oʻtkazish, joylarda test sinovlari qoidalariga qatʼiy rioya etish masʼuliyati Davlat test markazi vakillari, qabul komissiyalari raislari va hokimliklar tomonidan tayinlanadigan auditoriyalarning rahbarlariga yuklanadi.
Test sinovi ertalab soat 8 dan 30 daqiqa oʻtganda boshlanadi.
Javoblar varaqasi abituriyent tomonidan havo rang pastasi boʻlgan sharikli ruchka bilan toʻldiriladi.
Javoblar varaqasini toʻldirishga test sinovi uchun belgilangan vaqt meʼyoridan ortiqcha 20 daqiqa ajratiladi.
Javoblar varaqasi toʻgʻri toʻldirilishi uchun abituriyent shaxsan javobgardir. Qabul qoidalari boʻyicha tegishli doirachalarni notoʻgʻri belgilagan abituriyentlar eʼtirozi koʻrib chiqilmaydi.
Belgilangan vaqtda test sinovlariga kelmagan abituriyentlar uchun qoʻshimcha test sinovlari oʻtkazilmaydi.
ABITURIYENTLARNI TOʻLOV-KONTRAKT ASOSIDA QABUL QILISh, OʻQISh UChUN TOʻLOV TARTIBI VA MIQDORI
15. Abituriyentlarni toʻlov-kontrakt asosida qabul qilish Vazirlar Mahkamasi belgilagan qabul kvotalari doirasida yagona qabul qoidalari asosida test sinovlarining ballar reytingi boʻyicha Davlat komissiyasi tomonidan amalga oshiriladi.
Davlat komissiyasi tomonidan abituriyentlarni toʻlov-kontrakt asosida talabalikka tavsiya etish toʻgʻrisidagi qaror qabul qilingandan keyin ularni oʻqishga qabul qiladigan oliy taʼlim muassasasi bilan yuridik yoki jismoniy shaxslar oʻrtasida ular oʻqitishning toʻliq qiymatini toʻlashlari toʻgʻrisida kontraktlar rasmiylashtiriladi.
Belgilangan namunadagi kontrakt blanklari oliy taʼlim muassasasi qabul komissiyasi tomonidan test natijalari eʼlon qilingan kundan boshlab beriladi va yuridik shaxslar uchun rahbar va bosh buxgalter tomonidan imzolangan holda, 3 nusxada, jismoniy shaxslar uchun 2 nusxada rasmiylashtiriladi.
Toʻlov-kontrakt asosida Davlat komissiyasi tomonidan oʻqishga tavsiya etilgan abituriyentlar toʻlovni kontraktda koʻrsatilgan oʻqishga sarflanadigan xarajatlar qiymatini har yili toʻla qoplagan holda amalga oshiradilar.
Oʻqish uchun toʻlov-kontrakt asosida grantlar ajratish tartibi, kontrakt shartlari va tomonlarning majburiyatlari Oliy va oʻrta maxsus taʼlim vazirligi, Moliya vazirligi va Adliya vazirligi tomonidan ishlab chiqilgan va Davlat komissiyasida tasdiqlangan tegishli Nizom bilan tartibga solinadi.
XALQARO VA RESPUBLIKA OLIMPIADALARI, TANLOVLARI VA MUSOBAQALARI GʻOLIBLARINI QABUL QILISh
16. Oʻzbekiston Respublikasi Prezidentining “Oʻzbekiston oʻquvchi yoshlarini ragʻbatlantirish choralari toʻgʻrisida” 1993-yil 5-fevraldagi Farmoniga muvofiq hamda Oʻzbekiston Respublikasi Vazirlar Mahkamasining 1993-yil 25-martdagi 157-son qarori bilan tasdiqlangan Xalqaro va respublika olimpiadalari, tanlovlari va musobaqalari gʻoliblari boʻlgan maktab va bilim yurtlari oʻquvchilarini ragʻbatlantirish Tartibi asosida Xalq taʼlimi vazirligi, Madaniyat ishlari vazirligi, Davlat sport qoʻmitasi tomonidan oʻtkazilgan xalqaro va respublika olimpiadalari, tanlovlari va musobaqalari gʻoliblari hamda Xalq taʼlimi vazirligining guvohnomasini olganlar Davlat komissiyasining qarori bilan tegishli oliy taʼlim muassasalariga tanlovdan tashqari test sinovlarisiz va profil (ijodiy) imtihonlarsiz qabul qilinadilar.
Respublika maktab olimpiadasi fani bilan oliy taʼlimning yoʻnalishi oʻrtasidagi profil muvofiqlik Oliy taʼlim vazirligi va Xalq taʼlimi vazirligining taqdimnomalariga koʻra Davlat komissiyasi tomonidan belgilanadi (7-ilova).
Oliy oʻquv yurtlari qabul komissiyalari olimpiadalar, tanlovlar va musobaqalar gʻoliblarining arizalari haqidagi maʼlumotlarni, taʼlim yoʻnalishi, oʻquv shakli va tili koʻrsatilgan holda, Davlat komissiyasi va Davlat test markaziga 22-iyulgacha boʻlgan muddatda taqdim etadilar.
MUDDATLI HARBIY XIZMATNI OʻTAGAN ABITURIYENTLARNI QABUL QILISh
17. Oʻzbekiston Respublikasi Vazirlar Mahkamasining “Muddatli xizmat harbiy xizmatchilariga va ularning oila aʼzolariga qoʻshimcha imtiyozlar toʻgʻrisida” 1994-yil 3-oktabrdagi 496-son qaroriga asosan muddatli harbiy xizmatni oʻtagan va harbiy qismlar tavsiyanomasiga ega boʻlgan abituriyentlarni oliy taʼlim muassasalariga qabul qilishda, test sinovlarida ular toʻplagan ballarga eng koʻp toʻplanishi mumkin boʻlgan ballar miqdorining 10 foizini qoʻshgan holda imtiyozli sharoitlar beriladi.
Harbiy qism tavsiyanomasini olish tartibi va uning shakli Mudofaa vazirligi va Oliy taʼlim vazirligining yoʻriq xati bilan belgilanadi.
Oliy taʼlim muassasalarining qabul komissiyalari ushbu toifaga kiruvchi abituriyentlar haqidagi maʼlumotlarni taʼlim yoʻnalishi, oʻquv shakli va tili koʻrsatilgan holda belgilangan shakllar boʻyicha Davlat komissiyasiga va Davlat test markaziga taqdim etadilar:
kunduzga boʻlimlar uchun — 1-avgustda;
sirtqi boʻlimlar uchun — 11-avgustda.
QABUL QILISh TARTIBI
18. Davlat komissiyasining abituriyentlarni oliy taʼlim muassasalariga qabul qilish toʻgʻrisidagi qarori 15-avgustdan kechikmay qabul qilinadi va u oliy taʼlim muassasalarida 20-avgustga qadar abituriyentlarni davlat grantlari boʻyicha talabalar safiga qabul qilish haqidagi buyruqlarni rasmiylashtirishi uchun asos boʻladi.
Toʻlov-kontrakt asosida oʻqishga kiruvchi abituriyentlarni qabul qilish yuridik yoki jismoniy shaxslar tomonidan oʻqish uchun belgilangan mablagʻ miqdori, belgilangan tartibda oʻtkazilgandan soʻng, 10-sentabrdan kechiktirilmay, oliy taʼlim muassasasining buyrugʻi bilan rasmiylashtiriladi.
1-ILOVA
Oʻzbekiston Respublikasi oliy taʼlim muassasalariga kiruvchilar uchun taʼlim yoʻnalishlari roʻyxati va test boʻyicha ularga muvofiq keluvchi fanlar
MAJMUASI
Izohlar:
Ingliz, nemis, fransuz — chet tillaridan test sinovi topshiriladi
(*) — mutaxassislik kodidagi “X” belgisi oʻrniga oʻqish olib boriladigan tegishli tilning raqami koʻrsatiladi:
umumiy talablar asosida oʻqishga kiruvchi abituriyentlar uchun
1 — oʻzbek tili
2 — rus tili
3 — qoraqalpoq tili
muddatli harbiy xizmatni oʻtagan va harbiy qismlar tavsiyanomasiga ega boʻlgan abituriyentlar uchun
4 — oʻzbek tili
5 — rus tili
6 — qoraqalpoq tili
(**) agar maktabda ingliz, nemis yoki fransuz tillaridan boʻlak chet tillari oʻqilgan boʻlsa, chet tilidan koʻp balli tizim boʻyicha imtihon topshiriladi. Turdosh mutaxassislik boʻyicha tanlov (chiziq bilan ajratilmagan yuqorida turuvchi mutaxassislik) umumiy oʻtkaziladi.
2-ILOVA
Test sinovlari bilan bir qatorda profil (ijodiy) imtihonlar (36*3.1=111,6 ga teng, eng koʻp ballning 0 dan 100% gacha baholanuvchi) oʻtkaziladigan taʼlim yoʻnalishlari (mutaxassisliklar)
ROʻYXATI
Izoh:
(*) mutaxassislik kodidagi “X” belgisi oʻrniga oʻqish olib boriladigan tegishli tilning raqami koʻrsatiladi:
umumiy talablar asosida oʻqishga kiruvchi abituriyentlar uchun
1 — oʻzbek tili
2 — rus tili
3 — qoraqalpoq tili
muddatli harbiy xizmatni oʻtagan va harbiy qismlar tavsiyanomasiga eta boʻlgan abituriyentlar uchun
4 — oʻzbek tili
5 — rus tili
6 — qoraqalpoq tili
3-ILOVA
Koʻp balli tizim boʻyicha profil imtihonlar hamda test sinovlari asosida amalga oshiriladigan qabul va oʻqitish qozoq, tojik va turkman tillarida olib boriladigan taʼlim yunalishlari (mutaxassisliklar)
ROʻYXATI
Izoh:
(*) - muddatli harbiy xizmatni oʻtagan va harbiy qismlar tavsiyanomasiga ega boʻlgan abituriyentlar uchun, mutaxassisliklar kodidagi boshlangʻich raqam 0 oʻrniga oʻqish olib boriladigan tegishli tilning raqami koʻrsatiladi:
7 — tojik tili
8 — qozoq tili
9 — turkman tili
4-ILOVA
Oʻzbekiston Respublikasi oliy taʼlim muassasalarida yagona koʻp balli baholash tizimi boʻyicha profil (ijodiy) imtihonlarni oʻtkazish
TARTIBI
1. Respublika oliy taʼlim muassasalarida yagona koʻp balli baholash tizimi boʻyicha profil (ijodiy) imtihonlar (keyingi oʻrinlarda — imtihonlar deb ataladi) test sinovlari boshlangunga qadar Oʻzbekiston Respublikasi taʼlim muassasalariga qabul qilish boʻyicha Davlat komissiyasi belgilagan muddatlarda oʻtkaziladi.
2. Test sinovlariga qoʻshimcha tarzda nazarda tutilgan ijodiy yoki profil imtihonlar Davlat komissiyasi tasdiqlagan taʼlim yoʻnalishlari (mutaxassisliklar) roʻyxati boʻyicha oʻtkaziladi.
3. Profil (ijodiy) imtihonlarning bosh maqsadi abituriyentlarning tanlangan mutaxassislik boʻyicha oʻqish va keyinchalik ishlab ketish imkoniyatlarini aniqlash, ularning tanlangan fanlar boʻyicha bilimlari va malakalari darajalarini, ijodiy va jismoniy qobiliyatlarini baholashdir.
4. Imtihonlar savollari va topshiriqlarining mazmuni umumiy oʻrta va oʻrta maxsus, kasb-hunar taʼlim muassasalari dasturlariga qatʼiy muvofiqlashtirilgan boʻlishi lozim. Sport fanlari boʻyicha imtihonlar topshiriqlari abituriyentlarning alohida toifalari uchun (jinsi va yoshi boʻyicha) belgilangan meʼyoriy talablarga muvofiq tuziladi.
5. Abituriyentlardan profil (ijodiy) imtihonlar qabul qilish uchun oliy taʼlim muassasasida fan boʻyicha imtihon komissiyasi tashkil etiladi.
Oliy taʼlim muassasasida imtihonlarni tashkil etish va oʻtkazish quyidagi tartibda amalga oshiriladi:
imtihonlar boshlanishidan bir oy oldin rektorning buyrugʻi bilan oliy taʼlim muassasasida tegishli fanlar boʻyicha imtihonlarni tashkil etish va qabul qilish masalalari boʻyicha tajribali, malakali va masʼuliyatli oʻqituvchilar tarkibidan fan imtihon komissiyasi tashkil etiladi;
ayrim hollarda oliy taʼlim muassasasi fan imtihon komissiyasi tarkibiga boshqa taʼlim muassasalari oʻqituvchilari va ilmiy-tadqiqot muassasalari xodimlarining asosiy ish joyi maʼmuriyatining tavsiyalariga binoan kiritilishiga yoʻl qoʻyiladi;
oliy taʼlim muassasasi idoraviy boʻysunishiga qarab vazirlik (idora) bilan kelishilgan holda fan boʻyicha imtihon komissiyasining raisligiga nomzodni oʻz vaqtida tasdiqlash uchun Oʻzbekiston Respublikasi Oliy va oʻrta maxsus taʼlim vazirligiga taqdim etadi;
imtihonlar tasdiqlangan jadvalga qatʼiy rioya etilgan holda oʻtkaziladi;
imtihonlarga ajratiladigan vaqt oliy taʼlim muassasasi qabul komissiyasining qarori bilan belgilanadi;
abituriyentlarning yozma shaklda bajargan imtihon ishlarini tekshirish va baholash kirish yozma imtihonlarini tekshirish va baholash uchun belgilangan tartibda amalga oshiriladi.
6. Imtihonlar test sinovlari majmualaridagi fanning egallagan oʻrniga qarab (muvofiq ravishda 111,6 ball; 75,6 ball yoki 39,6 ball) belgilangan eng koʻp ballning 0 dan 100 foizgacha boʻlgan oraligʻida, yagona koʻp balli tizim boʻyicha baholanadi.
Imtihonlarni baholash mezonlari har bir fanga ajratilgan umumiy ballar doirasida, abituriyentlarga qoʻyilgan talablarning xususiyatlari hisobga olingan holda, oliy taʼlim muassasasi fan imtihon komissiyasi tomonidan belgilanadi.
Agar imtihon taʼlim yoʻnalishi (mutaxassislik) doirasidagi qator mustaqil fanlar boʻyicha oʻtkaziladigan boʻlsa, unda uni baholash uchun belgilangan ballarning umumiy miqdori, har bir fanning xususiyatlari hisobga olingan holda, differensial tartibda, uning tarkibidagi fanlarga boʻlinadi.
Qabul komissiyasi imtihonlar boshlanishidan bir oy oldin oʻqishga kiruvchilarga Oliy taʼlim vazirligi tomonidan tasdiqlangan imtihon olinadigan fanlar dasturini, ularni baholash mezonlarini, konsultatsiyalar va imtihonlar jadvalini maʼlum qiladi.
7. Imtihonlar yakunlari ballar miqdori sifatida, tanlov tartibida imtihon varaqasiga va imtihon roʻyxatiga kiritiladi. Bu hujjatlarning har biri fan boʻyicha imtihon komissiyasi raisi va oliy taʼlim muassasasi qabul komissiyasining masʼul kotibi tomonidan imzolanadi.
Imtihon vedomostlari oliy taʼlim muassasasi qabul komissiyasi tomonidan oʻz vaqtida Davlat test markaziga taqdim etiladi.
8. Jadval boʻyicha profil (ijodiy) imtihonlarga kelmagan abituriyentlar test sinovlariga qoʻyilmaydi.
9. Oliy taʼlim muassasasida profil (ijodiy) imtihonlar oʻtkazilishi davrida belgilangan tartibda norozilik (appelatsiya) komissiyasining ishi tashkil etiladi.
5-ILOVA
Oʻqitish tojik, qozoq va turkman tillarida olib boriladigan ayrim taʼlim yoʻnalishlari (mutaxassisliklar) boʻyicha kirish imtihonlarini qabul qilish
TARTIBI
1. Ayrim taʼlim yoʻnalishlari (mutaxassisliklar) boʻyicha oʻqitish tojik, qozoq va turkman tillarida olib boriladigan oliy taʼlim muassasalarida, Davlat komissiyasi bilan kelishgan holda, qabul koʻp balli tizim boʻyicha profil imtihonlar va test sinovlari asosida amalga oshiriladi.
Bu taʼlim yoʻnalishlari (mutaxassisliklar)ga arizalar faqat oʻrta maktabni koʻrsatilgan tillarda bitirgan abituriyentlardan qabul qilinadi.
2. Koʻp balli tizim boʻyicha profil imtihonlar va test sinovlari asosida qabulni amalga oshiruvchi oliy taʼlim muassasalari koʻrsatilgan holda oʻqitish tojik, qozoq va turkman tillarida olib boriladigan taʼlim yoʻnalishlari (mutaxassisliklar)ning roʻyxatini va profil imtihonlar va test sinovlari fanlarini Oʻzbekiston Respublikasi taʼlim muassasalariga qabul qilish boʻyicha Davlat komissiyasi (Davlat komissiyasi) belgilaydi.
3. Savollar mazmuni va imtihonlar topshiriqlari umumiy oʻrta taʼlim dasturlariga qatʼiy muvofiq boʻlishi lozim.
4. Abituriyentlardan profil imtihonlarni qabul qilish uchun oliy taʼlim muassasasida belgilangan tartibda fanlar boʻyicha imtihon komissiyalari tashkil etiladi.
Oliy taʼlim muassasasi idoraviy boʻysunishiga qarab vazirlik (idora) bilan kelishilgan holda fanlar boʻyicha imtihon komissiyalarining raisligiga nomzodlarni oʻz vaqtida tasdiqlash uchun Oʻzbekiston Respublikasi Oliy va oʻrta maxsus taʼlim vazirligiga taqdim etadi.
Imtihonlar tasdiqlangan jadvalga qatʼiy rioya etilgan holda oʻtkaziladi.
Imtihonlarga ajratiladigan vaqt oliy taʼlim muassasasi qabul komissiyasining qarori bilan belgilanadi.
5. Imtihonlar test sinovlari majmualaridagi fanning egallagan oʻrniga qarab (muvofiq ravishda 111,6 ball; 75,6 ball yoki 39,6 ball) belgilangan eng koʻp ballning 0 dan 100 foizgacha boʻlgan oraligʻida, yagona koʻp balli tizim boʻyicha baholanadi.
Imtihonlarni baholash meʼzonlari, har bir fanga ajratilgan umumiy ballar doirasida, oliy taʼlim muassasasining imtihon komissiyasi tomonidan belgilanadi.
Qabul komissiyasi imtihonlar boshlanishidan bir oy oldin, oʻqishga kiruvchilarga Oliy taʼlim vazirligi tomonidan tasdiqlangan imtihon olinadigan fanlar dasturi, ularni baholash mezonlari, konsultatsiyalar va imtihonlar jadvalini maʼlum qiladi.
6. Imtihonlar yakunlari ballar miqdori sifatida, tanlov tartibida imtihon varaqasiga va imtihon roʻyxatiga kiritiladi. Bu hujjatlarning har biri fan boʻyicha imtihon komissiyasi raisi va oliy taʼlim muassasasi qabul komissiyasining masʼul kotibi tomonidan imzolanadi.
Imtihonlar natijalariga koʻra, oliy taʼlim muassasasi qabul komissiyasi muayyan taʼlim yoʻnalishlari (mutaxassisliklar) boʻyicha Davlat komissiyasi ajratgan muvofiq oʻrinlarga tanlov oʻtkazadi.
7. Jadval boʻyicha imtihonga kelmagan abituriyentlar navbatdagi imtihonni topshirishga kiritilmaydi.
8. Oliy taʼlim muassasasida profil imtihonlar oʻtkazilishi davrida belgilangan tartibda norozilik (appelatsiya) komissiyasining ishi tashkil etiladi.
6-ILOVA
Oʻzbekiston Respublikasi oliy taʼlim muassasalariga koʻzi ojiz abituriyentlarni qabul qilish
TARTIBI
1. Koʻzi ojizlar toifasiga maxsus maktab-internatlar tomonidan koʻzi ojizlar uchun berilgan yetuklik attestatiga ega boʻlgan abituriyentlar kiradi.
2. Koʻzi ojiz abituriyentlar respublika oliy taʼlim muassasalariga kirish chogʻlarida kirish imtihonlarini taʼlim yoʻnalishlari (mutaxassisliklar) boʻyicha Oʻzbekiston Respublikasi taʼlim muassasalariga qabul qilish Davlat komissiyasi (Davlat komissiyasi) tomonidan test sinovlari uchun belgilangan fanlar majmuasi boʻyicha, besh balli baholash tizimi boʻyicha, anʼanaviy uslubda topshiradilar.
3. Fanlar boʻyicha kirish imtihonlarini oʻtkazish shakli — yozma yoki ogʻzaki — Oʻzbekiston Respublikasi Oliy va oʻrta maxsus taʼlim vazirligi bilan kelishilgan holda oliy taʼlim muassasasi qabul komissiyasi tomonidan belgilanadi.
4. Koʻzi ojiz abituriyentlar bilan tushuntirish ishlarini olib borish uchun oliy taʼlim muassasasi qabul komissiyasi tomonidan maxsus masʼul xodim ajratiladi.
5. Oliy taʼlim muassasasi qabul komissiyasi kirish imtihonlarini oʻtkazish uchun fanlar komissiyalarini tashkil etadi.
6. Fan boʻyicha kirish imtihonlarining savollari fan komissiyasi tomonidan umumiy oʻrta taʼlim dasturlariga toʻla muvofiq holda tuziladi, hamda u belgilangan tartibda muhokamadan oʻtkaziladi va tasdiqlanadi.
7. Kirish imtihonlarini oʻtkazuvchi komissiya tarkibiga koʻzi ojizlar yoki nogironlar jamiyatining vakili kiradi.
8. Oliy taʼlim muassasalari qabul komissiyalari koʻzi ojiz abituriyentlar uchun kirish imtihonlari fanlari boʻyicha maxsus tuzilgan jadvalga binoan konsultatsiyalar tashkil etadilar.
9. Koʻrsatilgan abituriyentlar toifasi uchun kirish imtihonlari qabul komissiyalari tomonidan 26-iyulga qadar oʻtkaziladi.
10. Mazkur toifa abituriyentlari va kirish imtihonlari natijalari haqidagi maʼlumotlar 27-iyulga qadar Davlat komissiyasiga va Davlat test markaziga topshiriladi.
11. Kirish imtihonlaridan muvaffaqiyatli oʻtgan abituriyentlar, Davlat komissiyasi bilan kelishilgan holda, qabul komissiyasi majlisining bayonnomasiga asosan, oliy taʼlim muassasasi rektorining buyrugʻi bilan, tanlovsiz taʼlim muassasasiga qabul qilinadilar.
7-ILOVA
Respublika maktab olimpiadalari fani bilan oliy taʼlim yoʻnalishi oʻrtasidagi profil
MUVOFIQLIK
Vazirlar Mahkamasining 1998-yil 4-iyuldagi 320-f-sonli farmoyishiga 2-ILOVA
Oʻzbekiston Respublikasi oʻrta maxsus, kasb-hunar taʼlimi muassasalariga oʻquvchilarni qabul qilish tartibi va qoidalari toʻgʻrisida
NIZOM
UMUMIY QOIDALAR
1. Oʻrta maxsus, kasb-hunar taʼlimi muassasalari Oʻzbekiston Respublikasi Vazirlar Mahkamasining tegashli farmoyishi bilan tasdiqlangan belgilangan bepul oʻqish uchun davlat grantlariga muvofiq va toʻlov-kontrakt asosida qoʻshimcha oʻrinlarga qabulni amalga oshiradilar.
2. Makroiqtisodiyot va statistika vazirligi, vazirlik va idoralarning taqdimnomalariga koʻra Oʻzbekiston Respublikasi taʼlim muassasalariga qabul qilish boʻyicha Davlat komissiyasi (keyingi oʻrinlarda — Davlat komissiyasi deb ataladi) mutaxassisliklar guruhlari (mutaxassisliklar) boʻyicha oʻrinlar sonini tasdiqlaydi va bu haqidagi maʼlumotlarning eʼlon qilinishini taʼminlaydi.
3. Oʻzbekiston Respublikasi oʻrta maxsus, kasb-hunar taʼlimi muassasalariga oʻquvchilarni qabul qilish umumiy oʻrta taʼlim (11- sinflar) negizida — test sinovlari natijalari asosida yigʻilgan ballarni hisobga olgan holda reyting tizimi boʻyicha; bazaviy taʼlim asosida (9-sinflar) — kirish sinovlari natijalariga koʻra amalga oshiriladi.
Oʻrta maxsus, kasb-hunar taʼlimi muassasalariga qabul barcha uchun (ham grantlar, ham kontrakt boʻyicha) teng huquklilik, yagona qabul qoidalari va yagona tanlov asosida amalga oshirilib, imtihonlar natijalariga koʻra va test sinovlarida eng yuqori ball toʻplagan abituriyentlarning davlat grantlari boʻyicha birinchi navbatda qabul qilinish huquqi taʼminlanadi. Qolgan abituriyentlar imtihon natijalari va test ballari reytingi asosida oʻrnatilgan toʻlov-kontrakt kvotalari doirasida qabul qilinish huquqiga egadirlar.
Tanlov har bir oʻrta maxsus, kasb-hunar taʼlimi muassasalariga, mutaxassisliklar guruhlari (mutaxassislik), oʻqitish tillari va shakllari boʻyicha alohida oʻtkaziladi.
Test sinovlarini Oʻzbekiston Respublikasi Vazirlar Mahkamasi huzuridagi Davlat test markazi amalga oshiradi. Test sinovlarini oʻtkazishga masʼul boʻlgan Davlat test markazi vakillari Davlat komissiyasi tomonidan tasdiqlanadi.
Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari va oʻrta maxsus kasb-hunar taʼlimi muassasalari direktorlari joylarda test oʻtkazish uchun zarur sharoitlarni taʼminlaydilar.
Koʻzi ojiz abituriyentlarni oʻrta maxsus, kasb-hunar taʼlimi muassasalariga qabul qilish Oʻzbekiston Respublikasi Oliy va oʻrta maxsus taʼlim vazirligi (keyingi oʻrinlarda — Oliy taʼlim vazirligi deb ataladi) tomonidan belgilangan tartibda amalga oshiriladi.
Test sinovlarida toʻplash mumkin boʻlgan ballarning kamida 30 foizini toʻplagan I va II guruh nogironlari, shu jumladan, bolalikdan I va II guruh nogironlarini, yetim bolalar hamda “Mehribonlik uylari” bolalar internat-uylari tarbiyalanuvchilarini qabul qilish masalasi Davlat komissiyasi tomonidan koʻrib chiqiladi.
4. Test sinovlari uch tilda — oʻzbek, rus va qoraqalpoq tillarida oʻtkaziladi.
Oʻrta maxsus, kasb-hunar taʼlimi muassasasida mutaxassisliklar guruhlari (mutaxassislik) boʻyicha oʻqitish tili Oʻzbekiston Respublikasi Vazirlar Mahkamasining tegishli farmoyishi bilan tasdiqlangan qabul koʻrsatkichlari doirasida hujjatlarni qabul qilish boshlangunga qadar vazirliklar va idoralar tomonidan aniqlanadi va Davlat komissiyasi tomonidan tasdiqlanadi.
Abituriyent test sinovlarini u oʻrta maxsus, kasb-hunar talimi muassasasida oʻqiydigan tilda topshiradi.
Mutaxassisliklar guruhlari (mutaxassisliklar) boʻyicha test sinovlari uchun tegishli fanlar majmuasi belgilanadi (1-ilova).
Oʻrta maxsus, kasb-hunar taʼlimining ayrim mutaxassisliklari boʻyicha test sinovlari bilan bir qatorda qoʻshimcha profil (ijodiy) imtihonlar oʻtkaziladi (2-ilova).
5. Ayrim mutaxassisliklar boʻyicha oʻqitish tojik tilida (3-ilova) yoki qozoq tilida (4-ilova) olib boriladigan oʻrta maxsus, kasb-hunar taʼlimi muassasalarida test sinovlari oʻrniga Oliy taʼlim vazirligining alohida Nizomi bilan belgilanadigan mazkur mutaxassislik uchun moʻljallangan oʻqitish tilida koʻp balli baholash tizimi boʻyicha imtihon sinovlari oʻtkaziladi.
Ushbu mutaxassisliklarga arizalar maktabni tegishlicha faqat tojik yoki qozoq tillarida bitirgan abituriyentlardan qabul qilinadi.
6. Profil (ijodiy) hamda koʻp balli imtihonlar, shuningdek, bazaviy maʼlumotli abituriyentlar uchun imtihon sinovlari Davlat komissiyasi bilan kelishilgan holda Oliy taʼlim vazirligi tomonidan tasdiqlangan tartib va dasturlarga muvofiq oʻtkaziladi.
XORIJIY FUQAROLARNI QABUL QILISh
7. Xorijiy fuqarolar oʻrta maxsus, kasb-hunar taʼlimi muassasalariga Vazirlar Mahkamasining “Oʻzbekiston Respublikasida xorijiy fuqarolarni oʻqitish toʻgʻrisida” 1994-yil 24-maydagi 266- sonli qaroriga koʻra hamda hukumatlararo bitimlarga muvofiq taʼlim yoki Davlat komissiyasi bilan yozma ravishda kelishilgan shartlarda taʼlim toʻlov-kontrakt asosida qabul qilinadilar.
Xorijiy fuqarolarning oʻrta maxsus, kasb-hunar taʼlimi muassasalarida oʻqishlari uchun toʻlov mikdori Oliy taʼlim vazirligi tomonidan tasdiqlanadi.
HUJJATLARNI QABUL QILISh
8. Oʻrta maxsus, kasb-hunar taʼlimi muassasalarida oʻz faoliyatini Oliy taʼlim vazirligi tomonidan tasdiqlanadigan Nizomga muvofiq amalga oshiradigan qabul komissiyalari tashkil qilinadi.
Abituriyentlarning oʻqishga qabul qilish toʻgʻrisidagi arizalari qabul komissiyalari tomonidan 20-iyundan 25-iyulgacha (shu kuni ham) qabul qilinadi.
Abituriyent oʻqishga kirish chogʻida quyidagilarni taqdim etadi:
mutaxassislik guruhi (mutaxassislik), oʻquv tili va shakli koʻrsatilgan holdagi ariza;
maʼlumoti haqidagi hujjatning asl nusxasi;
№ 086-U shakl boʻyicha tibbiy maʼlumotnoma;
3x4 hajmdagi 6 ta fotosurat;
I va II guruh nogironlari, yetim bolalar va “Mehribonlik uylari” bolalar internat-uylarida tarbiyalanganlar asl nusxadagi tegishli tasdiqlovchi hujjatlarni taqdim etadilar.
Tanlovdan tashqari oʻqishga kirish huquqiga ega boʻlgan xalqaro va respublika olimpiadalari, tanlovlar va musobaqalar gʻoliblari asl nusxadagi tasdiqlovchi hujjatlarni topshiradilar.
Muddatli harbiy xizmatni oʻtagan va harbiy qismlarning oʻqishga yuborish haqidagi tavsiyanomalariga ega boʻlgan abituriyentlar ham ularni oʻrta maxsus, kasb-hunar taʼlimi muassasalari qabul komissiyasiga taqdim etadilar.
Abituriyent tomonidan pasport (tugʻilganligi toʻgʻrisida guvohnoma) hamda harbiy xizmatga aloqadorligi haqidagi hujjat ham shaxsan koʻrsatiladi.
Koʻrsatib oʻtilgan hujjatlar mavjud boʻlganda qabul komissiyasi abituriyentning hujjatlarini qabul qilishni rad etishga haqli emas.
Hujjatlar qabul qilishning belgilangan muddatlari tugaganidan soʻng hujjatlarga qoʻshimchalar va oʻzgartirishlar kiritish qatʼiyan man qilinadi.
Oʻrta maxsus, kasb-hunar taʼlimi muassasalarining qabul komissiyalari 27-iyulga qadar Davlat komissiyasiga va Davlat test markaziga mutaxassislik guruhi (mutaxassislik), oʻquv shakli va tili koʻrsatilgan holda, abituriyentlarning (shu jumladan, yuqorida qayd etilgan toifalari) soni haqida belgilangan shakldaga maʼlumotni taqdim etadilar.
PROFIL (IJODIY) IMTIHONLAR
9. Profil (ijodiy) imtihonlar test sinovlariga qadar — 11-iyuldan 27-iyulgacha, test sinovlarida nazarda tutilgan eng koʻp ballning 0 dan 50 foizigacha boʻlgan oralikda yagona koʻp balli baholash tizimi boʻyicha amalga oshiriladi.
Profil (ijodiy) imtihonlar natijalari boʻyicha tushgan norozilik (appelatsiya) arizalari oʻrta maxsus kasb-hunar taʼlimi muassasasining qabul komissiyasi tomonidan Oliy taʼlim vazirligi tomonidan belgalangan tartibda, 28-iyulga qadar koʻrib chiqiladi.
Profil (ijodiy) imtihonlar natijalari haqidagi maʼlumotlar Davlat test markaziga oʻrta maxsus, kasb-hunar taʼlimi muassasalari tomonidan 29-iyulga qadar taqdim etiladi.
TEST SINOVLARINI OʻTKAZISh
10. Oʻqitish shaklidan qatʼi nazar, barcha oʻrta maxsus, kasb-hunar taʼlimi muassasalari uchun test sinovlarini oʻtkazishning yagona taʼlim muddati — 11-avgust qilib belgilanadi.
11. Abituriyentlar mutaxassisliklar guruhlari (mutaxassislik)ga koʻra 1-ilovaga muvofiq ikki fan majmuasi boʻyicha test sinovlaridan oʻtadilar.
Test topshiriqlari va imtihon savollari oʻrta va bazaviy umumtaʼlim maktabining oʻquv dasturlarga muvofiq tuziladi.
12. Majmuaning har bir fani 36 topshiriqni oʻz ichiga oladi. Test sinovlari uchun quyidagi vaqt meʼyori belgilanadi:
72 savolga 2 soat.
Majmualar quyidagi fanlardan tuziladi:
1. Matematika;
2. Kimyo;
3. Biologiya;
4. Tarix;
5. Ona tili va adabiyot (oʻzbek tili va adabiyoti, rus tili va adabiyoti yoki qoraqalpoq tili va adabiyoti).
Test sinovlari boshlanishiga qadar, 30 daqiqagacha tushuntirish ishlari oʻtkaziladi, bu vaqt test oʻtkazish uchun ajratilgan vaqt meʼyoriga kirmaydi.
Test sinovlarini tashkil etish va ularni oʻtkazish, joylarda test sinovlari qoidalariga qatʼiy rioya etish masʼuliyati Davlat test markazi vakillari, qabul komissiyalarining raislari va hokimliklar tomonidan tayinlanadigan auditoriyalarning rahbarlariga yuklanadi.
Barcha oʻrta maxsus, kasb-hunar taʼlimi muassasalarida test sinovi ertalab soat 8 dan 30 daqiqa oʻtganda, tushuntirish ishlari bilan boshlanadi. Javoblar varaqasi abituriyent tomonidan havo rang pastali sharikli ruchka bilan toʻldiriladi.
Javoblar varaqasini toʻldirishga test sinovi uchun belgilangan vaqt meʼyoridan ortiqcha 20 daqiqa ajratiladi.
Javoblar varaqasining toʻgʻri toʻldirilishi uchun abituriyent shaxsan javobgardir. Qabul qoidalari boʻyicha tegishli doirachalarni notoʻgʻri belgilagan abituriyentlar eʼtirozi koʻrib chiqilmaydi.
Belgilangan vaqtda test sinovlariga kelmagan abituriyentlar uchun qoʻshimcha test sinovlari oʻtkazilmaydi.
ABITURIYENTLARNI TOʻLOV-KONTRAKT ASOSIDA QABUL QILISh, OʻQISh UChUN TOʻLOV TARTIBI VA MIQDORI
13. Abituriyentlarni toʻlov-kontrakt asosida qoʻshimcha qabul qilish Vazirlar Mahkamasi belgilagan grantlarning umumiy sonining 50 foizi doirasida yagona qabul qoidalari asosida imtihonlar natijalari va test sinovlarining ballar reytingi boʻyicha Davlat komissiyasi tomonidan amalga oshiriladi.
Davlat komissiyasi tomonidan abituriyentlarni toʻlov-kontrakt asosida oʻqishga tavsiya etish toʻgʻrisidagi qaror qabul qilingandan keyin ularni oʻqishga qabul qiladigan oʻrta maxsus, kasb-hunar taʼlimi muassasasi bilan yuridik yoki jismoniy shaxslar oʻrtasida ular oʻqitishning toʻliq qiymatini toʻlashlari toʻgʻrisida kontraktlar rasmiylashtiriladi.
Belgilangan namunadagi kontrakt blanklari oʻrta maxsus, kasb-hunar muassasasi qabul komissiyasi tomonidan test natijalari eʼlon qilingan kundan boshlab beriladi va yuridik shaxslar uchun rahbar va bosh buxgalter tomonidan imzolangan holda, 3 nusxada, jismoniy shaxslar uchun 2 nusxada rasmiylashtiriladi.
Toʻlov-kontrakt asosida Davlat komissiyasi tomonidan oʻqishga tavsiya etilgan abituriyentlar toʻlovni kontraktda koʻrsatilgan oʻqishga sarflanadigan xarajatlar qiymatini har yili toʻla qoplagan holda amalga oshiradilar.
Oʻqish uchun toʻlov-kontrakt asosida grantlar ajratish tartibi, kontrakt shartlari va tomonlarning majburiyatlari Oliy va oʻrta maxsus taʼlim vazirligi, Moliya vazirligi va Adliya vazirligi tomonidan ishlab chiqilgan va Davlat komissiyasida tasdiqlangan tegishli Nizom bilan tartibga solinadi.
XALQARO VA RESPULIKA OLIMPIADALARI, TANLOVLARI VA MUSOBAQALAR GʻOLIBLARINI QABUL QILISh
14. Oʻzbekiston Respublikasi Prezidentining “Oʻzbekiston oʻquvchi yoshlarini ragʻbatlantirish choralari toʻgʻrisida” 1993-yil 5-fevraldagi Farmoniga muvofiq hamda Oʻzbekiston Respublikasi Vazirlar Mahkamasining 1993-yil 25-martdagi 157-sonli qarori bilan tasdiqlangan Xalqaro va respublika olimpiadalari, tanlovlari va musobaqalari gʻoliblari boʻlgan maktab va bilim yurtlari oʻquvchilarini ragʻbatlantirish Tartibi asosida Xalq taʼlimi vazirliga, Madaniyat ishlari vazirligi, Davlat sport qoʻmitasi tomonidan oʻtkazilgan xalqaro va respublika olimpiadalari,tanlovlari va musobaqalari gʻoliblari hamda Xalq taʼlimi vazirligining guvohnomasini olganlar Davlat komissiyasining qarori bilan tegishli oʻrta maxsus, kasb-hunar taʼlimi muassasalariga tanlovdan tashqari, test sinovlarisiz va profil ijodiy imtihonlarsiz qabul qilinadilar.
Oʻrta maxsus, kasb-hunar taʼlimi muassasalari qabul komissiyalari olimpiadalar, tanlovlar va musobaqalar gʻoliblarining arizalari haqidagi maʼlumotlarni Mutaxassisliklar guruhlari (mutaxassisliklar), oʻqitish shakli va tili koʻrsatilgan holda, Davlat komissiyasi va Davlat test markaziga 27-iyulgacha boʻlgan muddatda taqdim etadilar
MUDDATLI HARBIY XIZMATNI OʻTAGAN, ABITURIYENTLARNI QABUL QILISh
15. Oʻzbekiston Respublikasi Vazirlar Mahkamasining “Muddatli xizmat harbiy xizmatchilariga va ularning oila aʼzolariga qoʻshimcha imtiyozlar toʻgʻrisida” 1994-yil 3-oktabrdagi 496- sonli qaroriga asosan muddatli harbiy xizmatni oʻtagan va harbiy qismlar tavsiyanomasiga ega boʻlgan abituriyentlarga oʻrta maxsus, kasb-hunar taʼlimi muassasalariga qabul qilinishida, test sinovlarida ular toʻplagan ballarga ega koʻp toʻplanishi mumkin boʻlgan ballar miqdorining 10 foizini qoʻshgan holda imtiyozli sharoitlar beriladi.
Harbiy qism tavsiyanomasini olish tartibi va uning shakli Mudofaa vazirligi va Oliy taʼlim vazirligining yoʻriq xati bilan belgilanadi.
Qabul komissiyalari 27-iyulgacha ushbu toifaga kiruvchi abituriyentlardan tushgan arizalarning mavjudligi haqidagi maʼlumotlarni mutaxassisliklar guruhlari (mutaxassisliklar), oʻqitish shakli va tili koʻrsatilgan holda Davlat komissiyasiga va Davlat test markaziga taqdim etadilar.
QABUL QILISh TARTIBI
16. Davlat komissiyasining abituriyentlarni oʻrta maxsus, kasb-hunar taʼlimi muassasalariga qabul qilish toʻgʻrisidagi qarori 20-avgustdan kechikmay qabul qilinadi va u 25-avgustga qadar abituriyentlarni davlat grantlari boʻyicha oʻquvchilar safiga qabul qilish haqidagi buyruqlarning rasmiylashtirishi uchun asos boʻladi.
Toʻlov-kontrakt asosida oʻqishga kiruvchi abituriyentlarni qabul qilish yuridik yoki jismoniy shaxslar tomonidan oʻqish uchun belgilangan mablagʻ miqdori, belgilangan tartibda oʻtkazilgandan soʻng, 10-sentabrdan kechiktirilmay oʻrta maxsus, kasb-hunar taʼlimi muassasasining buyrugʻi bilan rasmiylashtiriladi.
1-ILOVA
Oʻzbekiston Respublikasi oʻrta maxsus, kasb-hunar taʼlimi muassasalariga kiruvchilar uchun test sinovlari boʻyicha mutaxassisliklar guruhlari (mutaxassisliklar) (*) hamda ularga tegishli fanlar
ROʻYXATI
Izoh:
*) “Madaniyat va sanʼat” mutaxassisliklari guruhidan tashqari
**) Mutaxassislik kodidagi “X” belgisi oʻrniga oʻqish olib boriladigan tegishli tilning raqami koʻrsatiladi:
Umumiy asoslarda oʻqishga kiruvchi abituriyentlar uchun:
1 oʻzbek tili
2 rus tili
3 qoraqalpoq tili
Muddatli harbiy xizmatni oʻtagan abituriyentlar uchun:
4 oʻzbek tili
5 rus tili
6 qoraqalpoq tili
2-ILOVA
Test sinoviga qoʻshimcha ravishda profil (ijodiy) imtihon (*) oʻtkaziladigan mutaxassisliklar
ROʻYXATI
Izox:
(*) “Madaniyat va sanʼat” mutaxassisliklari guruhidan tashqari
(**) Abituriyentlar test sinovlari usulida tanlanadigan, qabul va oʻqitish oʻzbek va rus tillarida ham olib boriladigan mutaxassisliklar
3-ILOVA
Oʻzbekiston Respublikasining qabul va oʻqitish tojik tilida olib boriladigan oʻrta maxsus, kasb-hunar taʼlimi muassasalari mutaxassisliklari (*)
ROʻYXATI
IZOH:
(*) “Madaniyat va sanʼat” mutaxassisliklari guruhidan tashqari
(**) Abituriyentlar test sinovlari usulida tanlanadigan, qabul va oʻqitish oʻzbek va rus tillarida ham olib boriladigan mutaxassisliklar
4-ILOVA
Oʻzbekiston Respublikasining qabul va oʻqitish qozoq tilida olib boriladigan oʻrta maxsus, kasb-hunar taʼlimi muassasalari mutaxassisliklari
ROʻYXATI
IZOH:
(*) Abituriyentlar test sinovlari usulida tanlanadigan, qabul va oʻqitish oʻzbek va rus tillarida ham olib boriladigan mutaxassisliklar