Xorazm viloyati hokimligining 1996 yil 11 noyabrdagi 275-raqamli qarori bilan qabul qilingan «Viloyat hududida badiiy jamoalar konsyert gastrol faoliyatini hamda yakka ijrochilarning toʻy va marosimlarda badiiy xizmat koʻrsatishlarini tartibga solish maqsadida davlat ruxsatnomasi (lisyenziya) berish hamda madaniy xizmat byurosi faoliyati toʻgʻrisida» nizomning 2.7-bandi konstitusiyaga mosligini tekshirish toʻgʻrisidagi ish boʻyicha qarori

25.02.1997

Oʻzbekiston Respublikasi Konstitutsiyaviy sudining

Qarori

Konstitutsiyaviy sud Rais B. Eshonov, sudyalar O. Ernazarov, Gʻ. Abdumajidov va G. Pirjanovdan iborat tarkibda,

Oʻzbekiston Respublikasi Konstitutsiyasi 109-moddasining 1-bandiga va «Oʻzbekiston Respublikasi Konstitutsiyaviy sudi toʻgʻrisida»gi Qonunning 1-moddasiga amal qilib, Xorazm viloyati hokimligi tomonidan qabul qilingan «Viloyat hududida badiiy jamoalar konsert gastrol faoliyatini hamda yakka ijrochilarning toʻy va marosimlarda badiiy xizmat koʻrsatishlarini tartibga solish maqsadida davlat ruxsatnomasi (litsenziya) berish hamda madaniy xizmat byurosi faoliyati toʻgʻrisida» Nizomning 2.7-bandi Oʻzbekiston Respublikasi Konstitutsiyasining 105-moddasiga qanchalik mos kelishi toʻgʻrisidagi ishni ochiq sud majlisida koʻrib chiqdi.

Ishni koʻrib chiqishga Oʻzbekiston Respublikasi Konstitutsiyaviy sudining sudyalari O. Ernazarov, Gʻ. Abdumajidov, G. Pirjanovni tashabbusi asos boʻldi.

Maʼruzachi sudya O. Ernazarovning axborotini, Xorazm viloyati hokimining yozma tushuntirishi va ish materiallarini tekshirib Konstitutsiyaviy sud quyidagilarni aniqladi:

Xorazm viloyati hokimligining 1996 yil 11 noyabrdagi 27-raqamli qarori bilan qabul qilingan «Viloyat hududida badiiy jamoalar konsert gastrol faoliyatini hamda yakka ijrochilarni toʻy va marosimlarda badiiy xizmat koʻrsatishlarini tartibga solish maqsadida davlat ruxsatnomasi (litsenziya) berish hamda madaniy xizmat byurosi faoliyati toʻgʻrisida» Nizomning 2.7-bandida «Mahalla qoʻmitalari va qishloq kengashlari oqsoqollari oʻz hududlaridagi toʻy-marosimlarda badiiy xizmat koʻrsatayotgan jamoalar, guruhlar va yakka ijrochilarning davlat ruxsatnomalari (litsenziya) va kundalik yoʻllanmasi bor-yoʻqligini qattiq nazorat qilish uchun masʼuldir» deb yozilgan.

Xalq deputatlari Kengashlari va hokimliklar tarkibiga kirmaydigan, jamoatchilik asosida ishlaydigan fuqarolarning oʻzini oʻzi boshqaruv idoralari zimmasiga bunday masʼuliyatni yuklash Konstitutsiya talablariga ziddir. Chunki Konstitutsiya 105-moddasining 2-qismida «Oʻzini oʻzi boshqarish organlarini saylash tartibi, faoliyatini tashkil etish hamda vakolat doirasi qonun bilan belgilanadi» deb koʻrsatilgan.

Nizomning 2.7-bandi Konstitutsiyaning qonunlarning ustunligini soʻzsiz tan olish haqidagi 15-moddasiga ham ziddir.

Bayon qilinganlarga koʻra, «Oʻzbekiston Respublikasining Konstitutsiyaviy sudi toʻgʻrisida»gi Qonunning 25, 26 va 27-moddalariga amal qilib, Konstitutsiyaviy sud qaror qildi:

1. Xorazm viloyati hokimligining 1996 yil 11 noyabrdagi 275-raqamli qarori bilan qabul qilingan «Viloyat hududida badiiy jamoalar konsert gastrol faoliyatini hamda yakka ijrochilarning toʻy va marosimlarda badiiy xizmat koʻrsatishlarini tartibga solish maqsadida davlat ruxsatnomasi (litsenziya) berish hamda madaniy xizmat byurosi faoliyati toʻgʻrisida» Nizomning 2.7-bandi Oʻzbekiston Respublikasi Konstitutsiyasining 105-moddasiga muvofiq emas deb topilsin.

2. Ushbu qaror qatʼiy, uning ustidan shikoyat qilish mumkin emas.

Oʻzbekiston Respublikasi Konstitutsiyaviy sudi

Toshkent sh.,

1997 yil 25 fevral