Oʻzbekiston Respublikasi oliy taʼlim tizimida magistratura faoliyatini yanada takomillashtirish, uning samaradorligini oshirish chora-tadbirlari toʻgʻrisida (190-son)

10.09.2007

Oʻzbekiston Respublikasi Vazirlar Mahkamasining

qarori

“Taʼlim toʻgʻrisida”gi Oʻzbekiston Respublikasi Qonuni va Kadrlar tayyorlash milliy dasturi talablariga muvofiq respublikada oliy taʼlim tizimining ikkinchi bosqichi sifatida magistraturaning normativ-huquqiy bazasi ishlab chiqildi, oʻquv jarayonini tashkil etishning asoslari belgilandi va oʻquv-metodika kompleksi, axborot taʼminotining yangi avlodi joriy etildi, ilmiy-pedagogik kadrlar tarkibi shakllantirildi.

Oʻquv jarayonini, oliy taʼlim bosqichlarining uzluksizligi va izchilligini taʼminlaydigan normativ-metodik hujjatlar ishlab chiqildi va tasdiqlandi.

Taʼlim, fan va ishlab chiqarish integratsiyasini rivojlantirish maqsadida malaka amaliyoti hamda Davlat attestatsiya komissiyalari faoliyati Oʻzbekiston Respublikasi Fanlar akademiyasining zamonaviy texnika va texnologiyalarga ega boʻlgan ishlab chiqarish bazalarida, ilmiy laboratoriyalarida, tashkilotlari va ilmiy-tadqiqot institutlarida tashkil etildi.

Magistrlarning qiziqishlarini oshirish hamda ularning ilmiy faoliyatini qoʻllab-quvvatlash uchun muntazam ravishda ilmiy konferensiyalar oʻtkazilmoqda, ularga chet tillar oʻrgatilmoqda, oʻquv jarayoniga zamonaviy axborot va pedagogika texnologiyalari jalb etilmoqda.

Oʻtgan ikki oʻquv yili mobaynida magistraturada oʻrganilayotgan predmetlarning oʻquv dasturlari qayta ishlab chiqildi va yangilandi.

Oliy taʼlim muassasalarida magistraturaning 20 tadan ortiq yangi mutaxassisliklari ochildi.

Shu bilan birga, bugungi kunda magistratura faoliyatini tashkil etish, shuningdek kadrlar va axborot resurslari bazalari bilan taʼminlash bilan bogʻliq muammolar mavjud.

Chunonchi, kadrlardan foydalanuvchilar (ish beruvchilar)ning aksariyati magistraturani bitiruvchilarga nisbatan qoʻyiladigan malaka talablari toʻgʻrisida toʻliq va toʻgʻri tasavvurga ega emas. Magistraturani bitiruvchilardan belgilangan maqsadda foydalanmaslik hollari mavjud.

Oʻqitishning zamonaviy texnik vositalari bugungi kun talablariga muvofiq emas, ilmiy va maxsus adabiyotlarning yetishmasligi sezilmoqda, fan va texnologiyalarning yangi yutuqlari oʻquv jarayoniga tezkorlik bilan joriy etilmayapti, taʼlim, fan va ishlab chiqarishni samarali integratsiyalash toʻliq darajada amalga oshirilmayapti, buyurtmachilarning magistrlar tayyorlash jarayonidagi amaliy ulushi mavjud emas.

Magistratura taʼlimi sifatini oshirishga muayyan ulush qoʻshayotgan yuqori malakali professor-oʻqituvchi kadrlarni moddiy va maʼnaviy qoʻllab-quvvatlashning samarali metodlaridan toʻliq foydalanilmayapti.

“Taʼlim toʻgʻrisida”gi Oʻzbekiston Respublikasi Qonuni va Kadrlar tayyorlash milliy dasturiga muvofiq magistratura faoliyatini tashkil etishni tubdan takomillashtirish va uning samaradorligini oshirish, mamlakatimiz iqtisodiyoti tarmoqlari uchun kadrlar tayyorlashning sifatini hamda raqobatbardoshliligini oshirishni kuchaytirish, yuqori malakani va maʼnaviy-axloqiy sifatlarni shakllantirish, shuningdek magistraturada taʼlim-tarbiya jarayonini normativ-huquqiy va ilmiy-metodik jihatdan taʼminlash maqsadida hamda Oʻzbekiston Respublikasi Prezidentining 2007-yil 30-maydagi PQ-645-son qarorini bajarish yuzasidan Vazirlar Mahkamasi qaror qiladi:

2. Belgilab qoʻyilsinki, magistrlar tayyorlash jarayoniga eng yuqori malakali oʻqituvchilar hamda fan doktori va fan nomzodi ilmiy darajalariga, professor va dotsent ilmiy unvonlariga ega boʻlgan olimlar, shuningdek davlat va jamiyatni modernizatsiya qilish, bozor iqtisodiyotini rivojlantirish, ishlab chiqarishni axborotlashtirish sharoitlarida ish tajribasiga ega boʻlgan amaliyotchi mutaxassislar jalb etiladi.

3. Oʻzbekiston Respublikasi Oliy va oʻrta maxsus taʼlim vazirligi, oliy taʼlim muassasalariga ega boʻlgan vazirliklar va idoralar, “Isteʼdod” jamgʻarmasi bir oy muddatda:

oʻqituvchilar va yosh olimlarning mamlakatimiz va chet ellardagi yetakchi universitetlarda va ilmiy markazlarda tajriba orttirishlarini (ularning natijalaridan biri magistraturada oʻqitish sifatini oshirishdan iborat), xorijiy mutaxassislar bilan birgalikda magistratura dasturlari uchun darsliklar va oʻquv qoʻllanmalari nashr etilishini;

respublikaning oliy taʼlim muassasalariga pedagogik ishlarga yuborilgan magistratura bitiruvchilariga ularning universitetlarda va ilgʻor texnologiyali ilmiy markazlarda malaka oshirishlari uchun zarur shart-sharoitlarni, shuningdek magistratura oʻquv predmetlari boʻyicha oʻquv-metodik materiallar ishlab chiqilishini hamda oʻquv jarayoniga zamonaviy ilm-fan yutuqlari joriy etilishini taʼminlash boʻyicha amaliy chora-tadbirlarning istiqbolli dasturlarini ishlab chiqsinlar va tasdiqlasinlar.

4. Vazirlar Mahkamasi huzuridagi Taʼlim sifatini nazorat qilish davlat inspeksiyasi Oʻzbekiston Respublikasi Oliy va oʻrta maxsus taʼlim vazirligi hamda oliy taʼlim muassasalariga ega boʻlgan boshqa vazirliklar va idoralar bilan birgalikda:

magistrlar tayyorlash bilan band boʻlgan pedagog kadrlarni qayta tayyorlash va malakasini oshirish sifati monitoringini, shuningdek ularning malaka darajasini baholashni amalga oshirsin;

magistrlarni oʻqitish va tayyorlash sifati oʻrganilishini tashkil etsin va uning sifati nazorat qilinishini taʼminlasin;

oliy taʼlim muassasalarida magistratura mutaxassislari roʻyxatini qayta koʻrib chiqsin va har yili 1-martgacha belgilangan tartibda Oʻzbekiston Respublikasi taʼlim muassasalariga oʻqishga qabul qilish boʻyicha davlat komissiyasiga magistraturaga qabul qilish parametrlari boʻyicha asoslangan takliflar kiritsin.

5. Oʻzbekiston Respublikasi Oliy va oʻrta maxsus taʼlim vazirligining 2008-yil 1-yanvardan boshlab respublika oliy taʼlim muassasalarida oliy taʼlim muassasalarining budjetdan tashqari mablagʻlari hisobiga ish haqi fondi va maʼmuriy-boshqaruv xodimlari soni doirasida 2-ilovaga muvofiq magistratura boʻlimlari tashkil etish toʻgʻrisidagi taklifiga rozilik berilsin.

Magistratura boʻlimlariga kafedralar va dekanatlar bilan birgalikda quyidagilar yuklansin:

magistrlar tayyorlash boʻyicha oʻquv jarayonini tashkil etish va taʼminlashga, ulardagi taʼlim va oʻqitish sifatini nazorat qilishga koʻmaklashish;

oʻquv-izlanish va ilmiy-tadqiqot ishlari amalga oshirilishini taʼminlash;

oliy taʼlim muassasalari barcha boʻlinmalarining magistrlar tayyorlash boʻyicha faoliyatini muvofiqlashtirish va nazorat qilish;

magistrlarni oʻqitish va ularning ishga joylashishi ustidan muntazam monitoringni amalga oshirish, magistrlar tayyorlash masalalarini muntazam ravishda tahlil qilish va ular yuzasidan hisobotlar tayyorlash.

6. Vazirliklar, idoralar va kadrlardan asosiy foydalanuvchilar boʻlgan boshqa tashkilotlar magistrlar tayyorlash jarayonida faol qatnashsinlar hamda ularning mehnatidan samarali foydalanilishini taʼminlasinlar, magistrantlarning amaliy mashgʻulotlarda qatnashishlari, yetuk mutaxassislarning magistrlik tayyorgarligiga rahbarlik qilishlariga jalb etilishi, real topshiriqlar boʻyicha dissertatsiyalar tayyorlashga, ularning taʼlim-kasbiy faoliyatini tashkil etish uchun ishlab chiqarish salohiyatidan foydalanish uchun zarur shart-sharoitlar yaratsinlar.

7. Oʻzbekiston Respublikasi Oliy va oʻrta maxsus taʼlim vazirligi:

Oʻzbekiston Respublikasi Fanlar akademiyasi bilan birgalikda magistratura taʼlim jarayonini fundamental va amaliy fanlar bilan real integratsiyalash, Fanlar akademiyasining yetakchi olimlarini hamda uning moddiy-texnika bazasini magistrantlarni oʻqitish va ular tomonidan ilmiy-tadqiqot ishlarini amalga oshirish, ularning natijalarini amaliyotga jalb etish boʻyicha Harakatlar dasturini ishlab chiqsin hamda uni 2008-yildan boshlab amalga oshirishga kirishsin;

bir oy muddatda Magistratura toʻgʻrisidagi Nizomga ushbu qaror talablariga muvofiq oʻzgartirish va qoʻshimchalar kiritsin.

8. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari R.S. Qosimov zimmasiga yuklansin.

Oʻzbekiston Respublikasining Bosh vaziri Sh. MIRZIYOYEV

Toshkent sh.,

2007-yil 10-sentabr,

190-son

Vazirlar Mahkamasining 2007-yil 10-sentabrdagi 190-son qaroriga 2-ILOVA

Oliy taʼlim muassasasi magistratura boʻlimining shtat birliklari roʻyxati

Izoh: * — magistrlar soni 200 kishigacha boʻlganda 0,5 stavka belgilanadi.