Toshkent shahrida Singapur menejmentni rivojlantirish instituti faoliyatini tashkil qilish toʻgʻrisida (PQ-691-son)

05.09.2007

Oʻzbekiston Respublikasi Prezidentining

Qarori

Ilgʻor xalqaro taʼlim standartlari darajasida yuqori malakali mutaxassislar tayyorlashni yanada rivojlantirish va takomillashtirish, yoshlar, ayniqsa mamlakat mintaqalaridan boʻlgan yoshlarning salohiyatini roʻyobga chiqarish va undan samarali foydalanish uchun shart-sharoitlar yaratish, oliy taʼlim sohasida xalqaro hamkorlikni kengaytirish maqsadida:

1. Toshkent shahrida Singapur menejmentni rivojlantirish institutini (bundan buyon matnda — Institut deb yuritiladi) tashkil etish toʻgʻrisida Singapur menejmentni rivojlantirish instituti (Singapur Respublikasi) hamda Oʻzbekiston Banklar uyushmasining taklifi qabul qilinsin.

Belgilansinki, mazkur Institut Singapur menejmentni rivojlantirish instituti (Singapur Respublikasi) va Oʻzbekiston Banklar uyushmasi tomonidan taʼsis etiladigan oliy taʼlim tashkiloti hisoblanadi.

Institutni tashkil etish boʻyicha tashkiliy komissiyaning tarkibi 1-ilovaga muvofiq tasdiqlansin.

2. Oliy taʼlim sifatiga nisbatan qoʻyiladigan umumeʼtirof etgan xalqaro talablarga, Oʻzbekiston Respublikasining “Taʼlim toʻgʻrisida”gi Qonunining maqsad va vazifalariga muvofiq, “Bank ishi”, “Biznesni boshqarish”, “Turizm” va “Biznesda zamonaviy axborot texnologiyalari” yoʻnalishlari boʻyicha bakalavriat (keyinchalik magistratura) tizimi asosida yuqori malakali mutaxassislar tayyorlash Toshkent shahridagi Singapur menejmentni rivojlantirish institutining asosiy vazifasi deb hisoblansin.

3. Quyidagilar belgilansin:

mazkur Institutning faoliyatiga oʻquv-uslubiy rahbarlikni Singapur menejmentni rivojlantirish instituti (Singapur Respublikasi) bakalavriat va magistratura tizimi boʻyicha kadrlar tayyorlashning umumeʼtirof etgan xalqaro standartlariga muvofiq Oʻzbekiston Respublikasi Oliy taʼlim, fan va innovatsiyalar vazirligi bilan kelishilgan holda amalga oshiradi;

abituriyentlarni qabul qilish hamda bitiruvchilarni attestatsiyadan oʻtkazish Singapur menejmentni rivojlantirish instituti (Singapur Respublikasi) tomonidan oʻrnatiladigan tartib va muddatlarda amalga oshiriladi;

Institutda oʻqish Singapur menejmentni rivojlantirish institutida (Singapur Respublikasi) qabul qilingan normalar, taʼlim standartlari, oʻquv rejalari va dasturlariga muvofiq kunduzgi taʼlim shaklida olib boriladi.

4. Belgilansinki:

Institutda oʻqish toʻlov-kontrakt asosida, shu jumladan, Singapur menejmentni rivojlantirish instituti (Singapur Respublikasi), Oʻzbekiston Banklar uyushmasi, tijorat banklari taʼsis etadigan maxsus taʼlim grantlari boʻyicha, shuningdek homiylarning yoshlarni, asosan mamlakat mintaqalaridan boʻlgan yoshlarni oʻqitishga ajratiladigan mablagʻlari hisobidan olib boriladi;

Institutning joriy faoliyatini moliyalashtirish Singapur menejmentni rivojlantirish instituti (Singapur Respublikasi) mablagʻlari, shuningdek talabalarni toʻlov-kontrakt asosida oʻqitish uchun tushadigan mablagʻlar, xorijiy va milliy homiylarning, Oʻzbekiston Banklar uyushmasi va tijorat banklarining mablagʻlari hisobidan amalga oshiriladi.

5. Institut bitiruvchilariga, 2-ilovaga muvofiq, tegishli taʼlim yoʻnalishlari boʻyicha Singapur menejmentni rivojlantirish instituti (Singapur Respublikasi) ning sheriklaridan boʻlgan yetakchi xalqaro oliy taʼlim muassasalaridan birining diplomi berilishi, bu diplom Oʻzbekiston Respublikasida oliy maʼlumot toʻgʻrisidagi hujjat sifatida eʼtirof etilishi maʼlumot uchun qabul qilinsin.

6. Oʻzbekiston Banklar uyushmasi Singapur menejmentni rivojlantirish instituti (Singapur Respublikasi), Oʻzbekiston Respublikasi Oliy va oʻrta maxsus taʼlim vazirligi bilan birgalikda:

ikki oy muddatda Institutni tashkil etish boʻyicha taʼsis hujjatlarini ishlab chiqsin va tasdiqlasin;

belgilangan tartibda Institutning davlat roʻyxatiga olinishini taʼminlasin;

2008-yilning 1-yanvarigacha Institutning tashkiliy tuzilmasi hamda shtat jadvalini ishlab chiqsin va tasdiqlasin.

7. Oʻzbekiston Respublikasi Oliy va oʻrta maxsus taʼlim vazirligi 2008/2009 oʻquv yili boshlangunga qadar Institutni Oʻzbekiston Respublikasi hududida faoliyat koʻrsatayotgan oliy taʼlim muassasalari uchun majburiy boʻlgan zarur oʻquv-uslubiy hujjatlar bilan taʼminlasin.

8. Oʻzbekiston Banklar uyushmasi Institut hamda Oʻzbekiston Respublikasi Prezidentining istiqbolli yosh pedagoglar va ilmiy kadrlar malakasini oshirish “Isteʼdod” jamgʻarmasi bilan birgalikda yuqori malakali va isteʼdodli yosh olimlar, mutaxassislar hamda pedagoglarni keyinchalik Institutga ishlashga jalb etish uchun ularning tanlovini oʻtkazsin hamda malaka oshirishlarini tashkil qilsin.

9. Toshkent shahridagi Singapur menejmentni rivojlantirish institutiga:

oʻqituvchilik va ilmiy ishlar uchun Institutga taklif qilingan xorijiy professorlar hamda oʻqituvchilarning yashashi va transport xarajatlari uchun Oʻzbekiston Respublikasi fuqarolari uchun oʻrnatilgan tariflar boʻyicha milliy valyutada haq toʻlashga;

Singapur menejmentni rivojlantirish instituti (Singapur Respublikasi) hamda Oʻzbekiston Respublikasi Oliy taʼlim, fan va innovatsiyalar vazirligi bilan kelishilgan holda kadrlarga boʻlgan talab-ehtiyojlarni hamda mamlakatning ijtimoiy-iqtisodiy taraqqiyoti istiqbollarini hisobga olib, taʼlimning yangi istiqbolli yoʻnalishlari va ixtisosliklarini ochishga ruxsat berilsin.

10. Institut, jumladan, Institutni jihozlash va uning faoliyat yuritishi uchun respublikaga olib kelinadigan uskunalar, multimedia mahsulotlari, adabiyotlar, anjomlar va moddiy-texnika resurslarini olib kirishda 5 yil muddatga barcha turdagi soliqlar va bojxona toʻlovlari (bojxona rasmiylashtiruvi uchun yigʻimlardan tashqari) toʻlashdan ozod qilinsin.

11. Oʻzbekiston Respublikasi Tashqi ishlar vazirligi Oʻzbekiston Banklar uyushmasi va Institutning qoʻshma buyurtmanomalari boʻyicha taʼlim jarayonida qatnashuvchi chet el oʻqituvchilari va ekspertlarga, shuningdek Institutning xorijiy abituriyentlari va talabalariga konsullik yigʻimlari undirilmasdan kirish vizalari berilishini taʼminlasin.

12. Oʻzbekiston Respublikasi Ichki ishlar vazirligi Oʻzbekiston Banklar uyushmasi va Institutning qoʻshma buyurtmanomalari boʻyicha taʼlim jarayonida qatnashuvchi chet el oʻqituvchilari va ekspertlari uchun, shuningdek Institutning xorijiy abituriyentlari va talabalari uchun davlat boji toʻlanmasdan koʻp martalik vizalar uzaytirilishi va berilishini, turgan joyi boʻyicha roʻyxatdan oʻtkazilishi va uning muddati uzaytirilishini taʼminlasin.

13. Toshkent shahridagi Singapur menejmentni rivojlantirish instituti quyidagi manzilda joylashtirilsin: Toshkent shahri, Xalqlar doʻstligi prospekti, 28-uy.

Oʻzbekiston Respublikasi Favqulodda vaziyatlar vazirligi Favqulodda vaziyatlar vazirligining Toshkent shahar, Xalqlar doʻstligi prospekti, 28-uy manzilida joylashgan Fuqarolik himoyasi institutining bino va inshootlarini balans qiymati boʻyicha Oʻzbekiston Banklar uyushmasiga keyinchalik ularni belgilangan tartibda Institut balansiga oʻtkazish sharti bilan sotsin.

Oʻzbekiston Respublikasi Davlat mulki qoʻmitasi va Toshkent shahar hokimligi mazkur bandda koʻrsatilgan binolar va inshootlarga nisbatan mulkiy huquqlarini rasmiylashtirishda Institutga yordam bersin.

14. Maʼlumot uchun qabul qilinsinki, Institut balansiga topshiriladigan binolar hamda inshootlarni rekonstruksiya qilish va mukammal taʼmirlash, uning moddiy-texnika va oʻquv-uslubiy bazasini jihozlash Oʻzbekiston Banklar uyushmasining ulush bilan ishtirokida Singapur menejmentni rivojlantirish instituti (Singapur Respublikasi)ning mablagʻlari hisobidan amalga oshiriladi.

Oʻzbekiston Banklar uyushmasi Singapur menejmentni rivojlantirish instituti (Singapur Respublikasi), Oʻzbekiston Respublikasi “Davarxitektqurilish” qoʻmitasi, Toshkent shahar hokimligi bilan birgalikda zarur loyiha-smeta hujjatlari oʻz vaqtida tayyorlanishini, Institutni joylashtirish uchun berilayotgan bino va inshootlar rekonstruksiya qilinishi hamda mukammal taʼmirlanishini, shuningdek oʻqituvchilar va talabalar yashashi uchun yotoqxona tayyorlanishini, ularning zarur oʻquv uskunalari, kompyuter texnikasi va kutubxona fondi bilan jihozlanishini, Institutning butun kompleksi 2008/2009 oʻquv yili boshlangungacha ishga tushirilishini taʼminlasin.

Oʻzbekiston aloqa va axborotlashtirish agentligi Institutni belgilangan tartibda zarur turdagi telefon va telekommunikatsiya aloqalari, shu jumladan hukumat telefon aloqasi bilan taʼminlasin.

15. Mazkur qarorning ijrosini nazorat qilish Oʻzbekiston Respublikasi Bosh vazirining oʻrinbosarlari R.S. Azimov va R.S. Qosimov zimmalariga yuklansin.

Oʻzbekiston Respublikasi Prezidenti I. KARIMOV

Toshkent sh.,

2007-yil 5-sentabr,

PQ-691-son

Oʻzbekiston Respublikasi Prezidentining 2007-yil 5-sentabrdagi PQ-691-son qaroriga 1-ILOVA

Toshkent shahridagi Singapur menejmentni rivojlantirish institutini tashkil etish boʻyicha tashkiliy komissiyaning

TARKIBI

R.S. Azimov — Oʻzbekiston Respublikasi Bosh vazirining oʻrinbosari, moliya vaziri, komissiya raisi R.S. Qosimov — Oʻzbekiston Respublikasi Bosh vazirining oʻrinbosari, oliy va oʻrta maxsus taʼlim vaziri, komissiya raisi oʻrinbosari I.T. Neʼmatov — Oʻzbekiston Respublikasi tashqi ishlar vazirining birinchi oʻrinbosari E.M. Gʻaniyev — Oʻzbekiston Respublikasi tashqi iqtisodiy aloqalar, investitsiyalar va savdo vaziri K.R. Berdiyev — Oʻzbekiston Respublikasi favqulodda vaziyatlar vaziri S.X. Nosirov — Oʻzbekiston Respublikasi Davlat bojxona qoʻmitasi raisi A.R. Toxtayev — Oʻzbekiston Respublikasi Davlat arxitektura va qurilish qoʻmitasi raisi A.X. Toʻxtayev — Toshkent shahar hokimi X.S. Mahkamov — Toshkent shahar Chilonzor tumani hokimi R. Deyvendran — Singapur menejmentni rivojlantirish instituti bosh kotibi (Singapur Respublikasi) S.P. Abdullayev — Oʻzbekiston Banklar uyushmasi bosh direktori, komissiya kotibi

* Izoh. Komissiya aʼzolari boshqa ishga oʻtgan taqdirda uning tarkibiga ularning lavozimiga qaytadan tayinlangan shaxslar kiritiladi.

Oʻzbekiston Respublikasi Prezidentining 2007-yil 5-sentabrdagi PQ-691-son qaroriga 2-ILOVA

Toshkent shahridagi Singapur menejmentni rivojlantirish instituti bitiruvchilariga diplomlari beriladigan, Singapur menejmentni rivojlantirish instituti (Singapur Respublikasi)ning sheriklari boʻlgan

OLIY TAʼLIM MUASSASALARI

Nomi Taʼlim yoʻnalishlari Singapur Milliy universiteti (Singapur Respublikasi) Biznesni boshqarish Edit Kovan universiteti (Avstraliya) Biznesni boshqarish Biznesda zamonaviy axborot texnologiyalari Grenobl Oliy biznes maktabi (Fransiya) Biznesni boshqarish Bredford universiteti (Buyuk Britaniya) Bank ishi Biznesni boshqarish Turizm Biznesda zamonaviy axborot texnologiyalari Uels universiteti (Buyuk Britaniya) Bank ishi Biznesni boshqarish Sanderlend universiteti (Buyuk Britaniya) Turizm