Oʻzbekiston Respublikasi davlat mustaqilligining oʻn olti yillik bayramiga tayyorgarlik koʻrish va uni oʻtkazish toʻgʻrisida (PQ-644-son)

30.05.2007

Oʻzbekiston Respublikasi Prezidentining

Qarori

Oʻzbekiston Respublikasi mustaqilligining oʻn olti yilligini munosib kutib olish, bu qutlugʻ sana munosabati bilan mamlakatimizda tinchlik va barqarorlikni mustahkamlash, huquqiy demokratik davlat va erkin fuqarolik jamiyati asoslarini barpo etish yoʻlida erishilgan ulkan yutuq va natijalarni xalqimiz va jahon jamoatchiligi oʻrtasida keng targʻib etish, vatandoshlarimiz, ayniqsa, yosh avlod qalbi va ongiga bebaho neʼmat boʻlmish mustaqillikning beqiyos ahamiyati, ona Vatanga muhabbat va sadoqat tuygʻusini yanada chuqurroq singdirish maqsadida:

1. Oʻzbekiston Respublikasi davlat mustaqilligining oʻn olti yillik bayramiga tayyorgarlik koʻrish va uni oʻtkazish boʻyicha respublika komissiyasining tarkibi ilovaga* muvofiq tasdiqlansin.

* Ilova berilmaydi.

2. Respublika komissiyasi “Bu bayram — barchamizniki, butun xalqimizniki” degan ezgu gʻoyani oʻzida mujassam etgan tashkiliy-amaliy, madaniy-maʼnaviy tadbirlar hamda targʻibot-tashviqot ishlari dasturini 20 kun muddatda ishlab chiqsin.

3. Mustaqillik bayramiga bagʻishlangan tadbirlar va tantanali marosimlarni koʻtarinki ruh va kayfiyatda, tashkiliy, gʻoyaviy-badiiy jihatdan yuksak saviyada, aholining barcha qatlamlari, keng jamoatchilik ishtirokida oʻtkazish uchun “Kamolot” yoshlar ijtimoiy harakati, Xotin-qizlar qoʻmitasi, “Nuroniy” va “Mahalla” jamgʻarmalariga alohida tadbirlar rejasini tayyorlash va amalga oshirish tavsiya etilsin.

Ushbu tadbirlar rejasida quyidagi masalalarga eʼtibor qaratilsin:

istiqlolning yosh avlod taqdirida, ularning zamonaviy dunyoqarashi, bilim va tafakkuri, faol grajdanlik pozitsiyasini shakllantirish, isteʼdod va qobiliyatini roʻyobga chiqarish, yosh oilalarni koʻllab-quvvatlashdagi beqiyos oʻrni va ahamiyatini, yigit-qizlarimizning ishlab chiqarish, ilm-fan, madaniyat, sanʼat va sport sohalarida, Vatanimiz sarhadlari daxlsizligini koʻz qorachigʻidek asrash borasida erishayotgan yutuqlarini aniq hayotiy misollar orqali koʻrsatish va keng targʻib etish;

xotin-qizlarning jamiyat hayotidagi oʻrni va nufuzini, ijtimoiy faolligini yuksaltirish, onalik va bolalikni muhofaza qilish, el-yurt tayanchi boʻlmish oila institutini har tomonlama mustahkamlash, uning farovonligini oshirish boʻyicha, jumladan, “Ijtimoiy himoya yili” dasturi doirasida amalga oshirilayotgan davlat siyosatining ustuvor yoʻnalishlarini aks ettirish;

mamlakatimizni iqtisodiy-ijtimoiy rivojlantirish, yurtimiz shuhratini dunyoga tarannum etish, yoshlarimizni barkamol insonlar etib tarbiyalashda oʻz shaxsiy ibrati va hayotiy tajribasi bilan namuna koʻrsatayotgan, el-yurtga xizmati singan keksa avlod vakillariga hurmat-ehtirom koʻrsatish, faxriylarning mehnatini munosib qadrlash, ular ishtirokida turli suhbat va uchrashuvlar, maʼrifiy tadbirlar uyushtirish;

istiqlolimiz bilan bogʻliq ezgu tushunchalarni yanada chuqurroq anglash, uning qanday kurash va mashaqqatlar, fidokorona mehnat va qatʼiyat evaziga qoʻlga kiritilgani, keng koʻlamli islohotlarimiz mohiyat eʼtibori bilan inson manfaatlarini taʼminlashga qaratilganini taʼsirchan usul-uslublar orqali yoritish, millati, tili va dinidan qatʼi nazar, yurtimizda yashayotgan har qaysi insonning jamiyatimizdagi tub oʻzgarishlardagi ishtiroki, hayotga ongli munosabati, daxldorlik tuygʻusi va masʼuliyat hissi, oʻzaro mehr-oqibat va hamjihatlik fazilatlari tobora kuchayib borayotganini, bu esa barcha yutuqlarimizning, bugungi va ertangi taraqqiyotimizning asosiy sharti va garovi boʻlib xizmat qilayotganini har tomonlama chuqur ochib berish.

4. Respublika komissiyasi oʻz yigʻilishlarida markazda va joylarda amalga oshirilayotgan tadbirlar rejasini bajarish boʻyicha hisobotlarni muntazam ravishda eshitib borsin.

5. Mamlakatimiz poytaxti Toshkent shahrida, Qoraqalpogʻiston Respublikasi va viloyatlarda oʻtkaziladigan bayram dasturlarini tayyorlashga ommaviy tomoshalar boʻyicha yuksak professional mahorat va tajribaga ega boʻlgan ssenarist va rejissorlar, yozuvchi va shoirlar, kompozitor va baletmeystyerlar, sahna rassomlari, isteʼdodli yosh sanʼatkorlar, folklor sanʼati vakillaridan iborat ijodiy guruhlar keng jalb etilsin.

6. Bayram munosabati bilan shahar va qishloqlarda, mahalla va guzarlarda, koʻp qavatli uylar atrofida keng koʻlamli obodonlashtirish ishlari amalga oshirilsin.

7. Madaniyat va sport ishlari vazirligi “Oʻzbeknavo” estrada birlashmasi, Yozuvchilar va Bastakorlar uyushmalari bilan birgalikda Vatanimiz istiqlolini tarannum etadigan eng yaxshi qoʻshiq va musiqiy asarlar uchun respublika tanlovini oʻtkazish maqsadida uning nizomini ishlab chiqsin va belgilangan tartibda tasdiqlasin. Tanlov gʻoliblari va sovrindorlari Mustaqillik bayrami arafasida eʼlon qilinsin.

8. Oʻzbekiston matbuot va axborot agentligi Oʻzbekiston jurnalistlari ijodiy uyushmasi bilan birgalikda avgust oyining oxirida mamlakatimiz mustaqilligiga bagʻishlangan “Eng ulugʻ va eng aziz” anʼanaviy tanlovining yakuniy bosqichini oʻtkazsin.

9. Madaniyat va sport ishlari vazirligi, “Kamolot” yoshlar ijtimoiy harakati, “Oʻzbeknavo” estrada birlashmasi va Bastakorlar uyushmasi yosh ijrochilar oʻrtasida “Nihol” mukofotiga nomzodlarning respublika saralash bosqichini hamda gʻoliblar ijrosidagi konsert dasturini avgust oyining birinchi yarmida yuqori darajada tashkil etsin.

10. Belgilab qoʻyilsinki, oʻtkaziladigan bayram tadbirlari:

Qoraqalpogʻiston Respublikasi va viloyatlarda mahalliy budjetlar hamda joylardagi ishlab chiqarish korxonalari, xoʻjaliklar, jamgʻarmalar hisobidan;

Toshkent shahrida respublika budjeti va Toshkent shahar mahalliy budjeti mablagʻlari hisobidan teng ulushlarda qoplanadi.

11. Oʻzbekiston matbuot va axborot agentligi, Oʻzbekiston milliy teleradiokompaniyasi, Oʻzbekiston milliy axborot agentligi, “Jahon” axborot agentligi va boshqa ommaviy axborot vositalariga mustaqillikning oʻn olti yilligi bayramiga tayyorgarlik koʻrish va uni oʻtkazish boʻyicha amalga oshirilayotgan ishlarni atroflicha yoritib borish tavsiya etilsin.

12. Mazkur Qarorning ijrosini taʼminlash Oʻzbekiston Respublikasining Bosh vaziri Sh. Mirziyoyev zimmasiga yuklansin.

Oʻzbekiston Respublikasining Prezidenti I. KARIMOV

Toshkent sh.,

2007-yil 30-may,

PQ-644-son