“Usmon musʼhafi”ni talab darajasida saqlashni taʼminlash toʻgʻrisida (115-son)

08.06.2007

Oʻzbekiston Respublikasi Vazirlar Mahkamasining

qarori

Islom olamida ulkan ahamiyatga ega boʻlgan yodgorlik hisoblangan Qurʼonning eng qadimiy nusxalaridan biri — “Usmon Musʼhafi”ni noyob qoʻlyozma sifatida taʼmirlash va talab darajasida saqlash, bebaho maʼnaviy boyligimizni kelajak avlodlarga bezavol yetkazishni taʼminlash maqsadida Vazirlar Mahkamasi qaror qiladi:

1. “Usmon Musʼhafi”ni taʼmirlash va uni talab darajasida saqlash masalalarini tashkil etish boʻyicha Respublika komissiyasi ilovaga* muvofiq tarkibda tuzilsin.

* Ilova berilmaydi.

2. Respublika komissiyasiga:

bir oy muddatda mamlakatimizdagi va xorijdagi yetakchi mutaxassislardan iborat ekspertlar guruhini tuzish;

ekspertlar guruhining ishi uchun zarur shart-sharoitlar yaratish topshirilsin.

3. Din ishlari boʻyicha qoʻmita va Oʻzbekiston Respublikasi Fanlar akademiyasi ekspertlar guruhi xulosalari asosida “Usmon Musʼhafi”ni taʼmirlash va saqlash yuzasidan tadbirlar rejasini 2007-yil 1-oktabrga qadar Respublika komissiyasiga taqdim etsin.

4. Moliya vazirligi:

tegishli hisob-kitoblar asosida xorijiy ekspertlarning Toshkentga kelib-ketish va ishlash xarajatlari uchun Vazirlar Mahkamasining zaxira jamgʻarmasidan zarur mablagʻ ajratilishini;

Respublika komissiyasi tasdiqlagan sarf-xarajatlar asosida Madaniyat va sport ishlari vazirligiga zarur mablagʻ ajratilishini 2008-yil budjet parametrlariga kiritilishini nazarda tutsin.

5. Taʼmirlash ishlarini amalga oshirishda homiy sifatida qatnashish istagini bildirgan nodavlat va jamoat tashkilotlari, xorijiy va xalqaro tuzilmalarning tashabbuslari qoʻllab-quvvatlansin.

6. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari R. Qosimov zimmasiga yuklansin.

Oʻzbekiston Respublikasi Bosh vaziri Sh. MIRZIYOYEV

Toshkent sh.,

2007-yil 8-iyun,

115-son