“Foydali modelga, sanoat namunasiga hamda dori vositasi yoki pestitsidga taalluqli ixtiroga Oʻzbekiston Respublikasi patentining amal qilishini uzaytirish qoidalari”ni tasdiqlash toʻgʻrisida (1678-son)

05.05.2007

OʻZBEKISTON RESPUBLIKASI DAVLAT PATENT IDORASI DIREKTORINING

Buyrugʻi

[Oʻzbekiston Respublikasi Adliya vazirligi tomonidan 2007-yil 5-mayda 1678-son bilan davlat roʻyxatidan oʻtkazildi]

“Ixtirolar, foydali modellar va sanoat namunalari toʻgʻrisida”gi Oʻzbekiston Respublikasi Qonuniga muvofiq buyuraman:

1. “Foydali modelga, sanoat namunasiga hamda dori vositasi yoki pestitsidga taalluqli ixtiroga Oʻzbekiston Respublikasi patentining amal qilishini uzaytirish qoidalari” ilovaga muvofiq tasdiqlansin.

2. Ushbu buyruq Oʻzbekiston Respublikasi Adliya vazirligida davlat roʻyxatidan oʻtkazilgandan soʻng 10 kun oʻtgandan keyin kuchga kiradi.

Davlat patent idorasi direktori A. AZIMOV

Toshkent sh.,

2007-yil 3-aprel,

25-son

Davlat patent idorasi direktorining 2007-yil 3-apreldagi 25-sonli buyrugʻi bilan TASDIQLANGAN

Foydali modelga, sanoat namunasiga hamda dori vositasi yoki pestitsidga taalluqli ixtiroga Oʻzbekiston Respublikasi patentining amal qilishini uzaytirish

QOIDALARI

Foydali modelga, sanoat namunasiga hamda dori vositasi yoki pestitsidga taalluqli ixtiroga Oʻzbekiston Respublikasi patentining amal qilishini uzaytirish qoidalari (keyingi oʻrinlarda Qoidalar deb yuritiladi) “Ixtirolar, foydali modellar va sanoat namunalari toʻgʻrisida” Oʻzbekiston Respublikasi Qonuniga (keyingi oʻrinlarda Qonun deb yuritiladi) (Oʻzbekiston Respublikasi qonun hujjatlari toʻplami, 2002-yil 19-son, 143-modda) muvofiq foydali modelga, sanoat namunasiga hamda dori vositasi yoki pestitsidga taalluqli ixtiroga Oʻzbekiston Respublikasi patentining amal qilishini uzaytirish tartibini belgilaydi.

1-§. Umumiy qoidalar

1. Qonunning 5-moddasiga muvofiq patent berish haqidagi talabnoma Oʻzbekiston Respublikasi Adliya vazirligiga (bundan buyon matnda Vazirlik deb yuritiladi) topshirilgan sanadan eʼtiboran ixtiro patenti yigirma yil, sanoat namunasi patenti oʻn yil, foydali model patenti besh yil mobaynida amal qiladi.

Foydali model patentining, sanoat namunasi patentining amal qilishi tegishincha uch va besh yilga uzaytirilishi mumkin.

Ixtiro patentining amal qilishi qonunchilik hujjatlarida nazarda tutilgan hollarda besh yildan koʻp boʻlmagan muddatga uzaytirilishi mumkin.

2. Qoʻllanilishi uchun belgilangan tartibda vakolatli organdan ruxsatnoma olinishi lozim boʻlgan dori vositasi yoki pestitsidga taalluqli ixtiro patentining (keyingi oʻrinlarda ixtiro patenti deb yuritiladi) amal qilishi ixtiroga talabnoma berish sanasidan boshlab mahsulotni qoʻllash uchun birinchi ruxsatnoma olingan sanaga qadar hisoblanadigan muddatga uzaytiriladi. Bunda ixtiro patentning amal qilishining uzaytiriladigan muddati besh yildan oshmasligi kerak.

3. Foydali model patentining, sanoat namunasi patentining amal qilishini uzaytirish toʻgʻrisidagi iltimosnoma Vazirlikka patentning amal qilishi tugagunga qadar soʻnggi uch oy ichida yoki patentning amal qilishi tugagandan keyin olti oy ichida qoʻshimcha patent bojini toʻlash sharti bilan beriladi.

4. Foydali model patentining, sanoat namunasi patentining amal qilishini uzaytirish uchun qonunchilik hujjatlarida belgilangan miqdorda patent boji toʻlanadi.

5. Ixtiro patentining amal qilishini uzaytirish toʻgʻrisidagi iltimosnoma Vazirlikka patentning amal qilishi davomida mahsulotni qoʻllash uchun birinchi ruxsatnoma olingan sanadan olti oy oʻtguniga qadar yoki patentni berish sanasidan, mazkur muddatlarning qaysi biri kechroq tugashiga bogʻliq holda beriladi.

6. Foydali model patentining, sanoat namunasi patentining, ixtiro patentining (keyingi oʻrinlarda patent deb yuritiladi) amal qilishini uzaytirishga doir ishlarni yuritish mustaqil ravishda patent egasi tomonidan, vakolati qonunchilik hujjatlariga muvofiq rasmiylashtirilgan ishonchnoma bilan tasdiqlanadigan vakil yoki patent vakili orqali amalga oshiriladi.

2-§. Iltimosnomani berish va koʻrib chiqish

7. Patentning amal qilishini uzaytirish toʻgʻrisidagi iltimosnoma mazkur Qoidalarning 1 va 2-ilovalarda keltirilgan shakl boʻyicha taqdim etiladi.

Iltimosnoma patent egasi yoki uning vakili tomonidan imzolanadi. Yuridik shaxs nomidan iltimosnoma lavozimi koʻrsatilgan holda rahbar tomonidan imzolanadi. Imzo muhr bilan tasdiqlanadi.

8. Foydali model patentining, sanoat namunasi patentining amal qilishini uzaytirish toʻgʻrisidagi iltimosnomaga patentning amal qilishini uzaytirish uchun belgilangan miqdorda patent boji toʻlanganligini tasdiqlovchi hujjat ilova qilinadi.

Belgilangan miqdorda patent boji toʻlanganligini tasdiqlovchi hujjat taqdim etilmaganida iltimosnomani koʻrib chiqishga doir yuridik ahamiyatga ega harakatlar amalga oshirilmaydi.

9. Ixtiro patentining amal qilishini uzaytirish toʻgʻrisidagi iltimosnomaga patentlangan ixtiro formulasida tavsiflangan mahsulot bilan identifikatsiyalashga imkon beradigan mahsulot toʻgʻrisidagi maʼlumotlarni, roʻyxatdan oʻtkazilgan raqami va vakolatli organdan ushbu mahsulotni qoʻllash uchun birinchi ruxsatnoma olingan sanani ichiga olgan rasmiy hujjatning tasdiqlangan nusxasi (rasmiy hujjatlarning tasdiqlangan nusxalari) ilova qilinadi.

10. Zaruriyat boʻlganida iltimosnomaga vakilning vakolatlarini tasdiqlovchi ishonchnoma, shuningdek vorislik huquqi yoki merosga boʻlgan huquqni tasdiqlovchi hujjat ilova qilinadi.

11. Iltimosnoma va unga ilova qilinadigan hujjatlar Vazirlikka bevosita beriladi yoki pochta orqali yuboriladi.

12. Ishonchnoma va unga ilova qilinadigan hujjatlar kelib tushgan kundan boshlab oʻn besh kunlik muddat ichida barcha kerakli hujjatlarning mavjudligi va ularning ushbu Qoidalarning 1—11-bandlarida belgilangan talablarga mos kelishi tekshiriladi.

13. Ushbu Qoidalarning 7—10-bandlarida koʻrsatib oʻtilgan kerakli hujjatlar mavjud boʻlmagan va/yoki notoʻgʻri rasmiylashtirilgan taqdirda, patent egasiga mavjud boʻlmagan va/yoki tuzatilgan hujjatlarni soʻrovnoma joʻnatilgan sanadan boshlab uch oy ichida taqdim etish zarurligi toʻgʻrisida soʻrovnoma yuboriladi. Bunda ishonchnomani koʻrib chiqishning belgilangan muddatining oʻtishi yetishmayotgan yoki tuzatilgan hujjatlarning oxirgisi kelib tushgunga qadar toʻxtatib turiladi.

14. Taqdim etilgan hujjatlar mazkur Qoidalarning talablariga mos kelganida patentning amal qilishi uzaytiriladi.

Patentning amal qilishini uzaytirish toʻgʻrisidagi maʼlumotlar tegishli Davlat reyestriga kiritiladi va Vazirlikning rasmiy byulletenida eʼlon qilinadi. Patent egasiga patentning amal qilishi uzaytirilganligi toʻgʻrisidagi yozuvli “Patentga ilova” yuboriladi.

15. Taqdim etilgan hujjatlar mazkur Qoidalarning talablariga mos kelmaganida, shuningdek tuzatilgan yoki yetishmayotgan hujjatlar belgilangan muddatda taqdim etilmagan taqdirda Vazirlik patent egasiga iltimosnomani qanoatlantirish rad etilganligi toʻgʻrisidagi rad etish asoslari koʻrsatilgan bildirishnomani yuboradi.

Foydali modelga, sanoat namunasiga hamda dori vositasi yoki pestitsidga taalluqli ixtiroga Oʻzbekiston Respublikasi patentining amal qilishini uzaytirish qoidalariga 1-ILOVA

(1-ilova matni Oʻzbekiston Respublikasi adliya vazirining 2022-yil 14-oktabrdagi 24-mh-sonli buyrugʻi (roʻyxat raqami 3393, 17.10.2022-y.) tahririda — Qonunchilik maʼlumotlari milliy bazasi, 17.10.2022-y., 10/22/3393/0952-son)

Foydali modelga, sanoat namunasiga hamda dori vositasi yoki pestitsidga taalluqli ixtiroga Oʻzbekiston Respublikasi patentining amal qilishini uzaytirish qoidalariga 2-ILOVA

(2-ilova matni Oʻzbekiston Respublikasi adliya vazirining 2022-yil 14-oktabrdagi 24-mh-sonli buyrugʻi (roʻyxat raqami 3393, 17.10.2022-y.) tahririda — Qonunchilik maʼlumotlari milliy bazasi, 17.10.2022-y., 10/22/3393/0952-son)