Kinematografiya sohasida boshqarishni takomillashtirish toʻgʻrisida (PF-3407-son)

16.03.2004

Oʻzbekiston Respublikasi Prezidentining

Farmoni

Mamlakatimizda erkin demokratik jamiyat barpo etish yoʻlida amalga oshirilayotgan oʻzgarish va yutuqlarni, milliy istiqlol gʻoyasining mazmun-mohiyatini kino sanʼati vositasida badiiy aks ettirish, kinematografiya sohasining xalqimiz hayotidagi, ayniqsa, yoshlar tarbiyasidagi oʻrni va taʼsirini kuchaytirish, gʻoyaviy-badiiy saviyasini oshirish, uni hozirgi zamon talablari asosida yanada takomillashtirish maqsadida:

1. “Oʻzbekkino” davlat-aksiyadorlik kompaniyasi, Oʻzbekiston kinoarboblari birlashmasi, Respublika “Maʼnaviyat va maʼrifat” Kengashining “Oʻzbekkino” davlat-aksiyadorlik kompaniyasini “Oʻzbekkino” Milliy agentligi etib qayta tashkil qilish toʻgʻrisidagi takliflari maʼqullansin.

2. Quyidagilar “Oʻzbekkino” Milliy agentligining asosiy vazifalari etib belgilansin:

kino sanʼatining milliy madaniyatni rivojlantirish, jamiyat maʼnaviy hayotini yuksaltirishdagi oʻrni va ahamiyatini hisobga olgan holda, bu sohani umumbashariy va milliy qadriyatlar uygʻunligi asosida taraqqiy ettirishning ustuvor yoʻnalishlarini ishlab chiqish;

kino sanʼatida, kino-videofaoliyat sohasida davlat siyosatini amalga oshirish;

kinematografiya sohasida faoliyat koʻrsatayotgan, mulkchilik shaklidan qatʼi nazar, korxona va kinostudiyalarni, ijodiy jamoalarni qullab-quvvatlash, ularning manfaatlarini himoya qilish, tadbirkorlik va raqobat muhitini rivojlantirish uchun qulay shart-sharoitlar yaratish;

milliy kino sanʼatining eng yaxshi anʼanalarini izchil davom ettirish va boyitish maqsadida iqtidorli yosh kinematografchilarni tarbiyalash, ularning ijodiy imkoniyatlarini roʻyobga chiqarishga koʻmaklashish;

Oʻzbekiston Respublikasi Davlat filmlar fondi faoliyatini bugungi kun talablari negizida tashkil etish;

kinofilmlar yaratish va ularni namoyish etish tizimini tanlovlar tashkil etish orqali takomillashtirish va qayta texnik jihozlash, aholiga kino-video xizmat koʻrsatish darajasini oshirish;

mualliflik huquqlari himoyalangan kino va video mahsulotlarini noqonuniy ravishda respublika hududiga olib kirishga, ulardan foydalanish, ijaraga berish va tarqatishga qarshi zarur choralar koʻrish;

import va eksport qilinadigan kino va video mahsulotlariga ekspert bahosi berilishini amalga oshirish, respublika hududida kino va videofilmlar koʻrsatish va ulardan texnik jihatdan foydalanishning qoidalarini belgilash;

kinematografiya sohasida xalqaro hamkorlikni rivojlantirish, milliy kino mahsulotlarini jahon bozoriga olib chiqish, xorijiy kino ishlab chiqaruvchi tashkilot va kino ijodkorlar bilan aloqalarni kengaytirish, milliy kino sanʼatini xalqaro kinofestivallarda namoyish etish.

3. “Qoraqalpoqkino” davlat-aksiyadorlik kompaniyasi “Qoraqalpoqkino” agentligi etib hamda “Kino-video” hududiy aksiyadorlik birlashmalari “Oʻzbekkino” Milliy agentligi tegishli hududiy boʻlimlari etib qayta tashkil qilinsin.

4. Belgilab qoʻyilsinki:

kino va videomahsulotlarini ishlab chiqarish, koʻpaytirish, dublyaj qilish, sotish va prokat boʻyicha faoliyat turlariga litsenziyalar berish, ularning amal qilishini tugatish va bekor qilish toʻgʻrisidagi qarorlar Respublika “Maʼnaviyat va maʼrifat” Kengashining xulosasiga binoan Vazirlar Mahkamasi tomonidan qabul qilinadi;

“Oʻzbekkino” Milliy agentligi Vazirlar Mahkamasining litsenziyalash sohasidagi ishchi organi vazifasini bajaradi.

5. Oʻzbekiston Respublikasi Prezidentining 1996-yil 29-apreldagi “Oʻzbekkino” davlat-aksiyadorlik kompaniyasini tashkil etish toʻgʻrisida”gi PF-1427-son Farmoni oʻz kuchini yoʻqotgan deb hisoblansin.

6. Oʻzbekiston Respublikasi Vazirlar Mahkamasi bir hafta muddat ichida mazkur Farmonni bajarish yuzasidan tegishli qaror qabul qilsin.

Oʻzbekiston Respublikasining Prezidenti I. KARIMOV

Toshkent sh.,

2004-yil 16-mart,

PF-3407-son