“Musavvir” ilmiy-ishlab chiqarish markazi toʻgʻrisidagi nizomni tasdiqlash haqida (346-son)

10.07.1997

Oʻzbekiston Respublikasi Vazirlar Mahkamasining

qarori

Vazirlar Mahkamasi qaror qiladi:

“Musavvir” ilmiy-ishlab chiqarish markazi toʻgʻrisidagi ilova qilinayotgan Nizom tasdiqlansin.

Oʻzbekiston Respublikasining Bosh vaziri Oʻ. SULTONOV

Toshkent sh.,

1997-yil 10-iyul,

346-son

Vazirlar Mahkamasining 1997-yil 10-iyuldagi 346-son qarori bilan TASDIQLANGAN

“Musavvir” ilmiy-ishlab chiqarish markazi toʻgʻrisida

NIZOM

I. Umumiy qoidalar

1. “Musavvir” ilmiy-ishlab chiqarish markazi Oʻzbekiston Respublikasi Prezidentining “Xalq badiiy hunarmandchiliklari va amaliy sanʼatini yanada rivojlantirishni davlat yoʻli bilan qoʻllab-quvvatlash chora-tadbirlari toʻgʻrisida” 1997-yil 31-martdagi Farmoniga, Oʻzbekiston Respublikasi Vazirlar Mahkamasining 1997-yil 4-iyundagi 282-son qaroriga muvofiq tashkil etilgan va oʻz faoliyati toʻgʻrisida Oʻzbekiston Respublikasi Vazirlar Mahkamasiga hisob beradi.

2. “Musavvir” ilmiy-ishlab chiqarish markazi oʻz faoliyatida Oʻzbekiston Respublikasi Konstitutsiyasi va qonunlariga, Oʻzbekiston Respublikasi Prezidentining farmonlari va farmoyishlariga, Oʻzbekiston Respublikasi Vazirlar Mahkamasining qarorlari va farmoyishlariga hamda mazkur Nizomga amal qiladi.

3. “Musavvir” ilmiy-ishlab chiqarish markazi yuridik shaxs hisoblanadi, mustaqil balansga, oʻz nomi oʻzbek va ingliz tillarida yozilgan gerbli muhrga, hisob-kitob va valyuta schyotlariga ega, xoʻjalik hisobi asosida va Oʻzbekiston Respublikasi Vazirlar Mahkamasining 1997-yil 4-iyundagi 282-son Qaroriga muvofiq ish yuritadi.

4. “Musavvir” ilmiy-ishlab chiqarish markazi tarkibiga “Hunarmand” uyushmasi tegishli ijodiy jamoalar, sexlar va ustaxonalar bilan birgalikda kiradi.

5. “Musavvir” ilmiy-ishlab chiqarish markazi Toshkent shahar, Gʻ. Mavlonov koʻchasidagi 18-uyda joylashgan.

II. Asosiy vazifalari va funksiyalari

6. Quyidagilar “Musavvir” ilmiy-ishlab chiqarish markazining asosiy vazifalari hisoblanadi:

xalq badiiy hunarmandchiligi va xalq sanʼatining anʼanaviy turlarini tiklash va rivojlantirish, yuqori badiiy original, mualliflik buyumlari va xalq isteʼmol tovarlari ishlab chiqarish va ularni sotish, qimmatbaho metallar va toshlardan mahsulotlar namunalari yaratish;

qadimiy sanʼatning yoʻqolib ketgan turlarini aniqlash va tiklash hamda ularni ishlab chiqarishga joriy etish yuzasidan yordam koʻrsatish;

“Hunarmand” uyushmasini barcha zarur yoʻriqnoma hujjatlar va tavsiyanomalar bilan taʼminlash;

marketingni amalga oshirish va yuqori badiiy saviyadagi buyumlarni eksportga yetkazib berish maqsadida ularning yangi turlarini ishlab chiqarishga oid istiqbolli yoʻnalishlarni ishlab chiqish;

binolarni zamonaviy dizayn, xalq monumental va tasviriy sanʼatning barcha turlarini koʻllagan holda milliy uslubda bezash;

rasmli kitoblar, albomlar, bukletlar, kataloglar va taqvimlar chiqarilishini, koʻrgazmali savdolar, kimoshdi savdolari oʻtkazilishini, mamlakat ichkarisida va chet elda xalq ustalari va hunarmandlarini keng targʻib va reklama qilish uchun xalq sanʼati toʻgʻrisida hujjatli filmlar va videokassetalar yaratilishini tashkil etish;

xalq ustalari tajribasini oʻrgatish va “Hunarmand” uyushmasi huzurida isteʼdodli yoshlarga xalq sanʼati anʼanalarini singdirish uchun yakka tartibdagi shogirdlar maktablari ochilishini tashkil etish.

7. “Musavvir” ilmiy-ishlab chiqarish markazi koʻrsatib oʻtilgan vazifalarni bajarish uchun quyidagi funksiyalarni bajaradi:

ishlab chiqarilayotgan buyumlarga talabdan kelib chiqib ilmiy-ishlab chiqarish faoliyati yoʻnalishlarini, rivojlanish istiqbollarini ishlab chiqadi;

davlat korxonalari va boshqa korxonalardan zarur materiallar, xomashyo, asboblar va boshqa mol-mulkni, ular bilan xalq ustalari va hunarmandlarini taʼminlash uchun, qiymatini belgilangan tartibda toʻlagan holda sotib oladi;

ikkilamchi resurslar va chiqindilar toʻplanishi va qayta ishlanishini, uskunalar va jihozlarni tuzatishni tashkil etadi, nostandart uskunalar, asboblar tayyorlaydi;

davlat korxonalari va boshqa korxonalardan, muassasalar va fuqarolardan foydalanilmayotgan binolar, inshootlar, imoratlar, mashinalar, asbob-uskunalar, transport vositalari, xomashyo va materiallarni sotib oladi, almashtiradi, ijaraga oladi;

boshqa korxonalar, muassasalar bilan birgalikda vaqtinchalik mehnat jamoalari, shuningdek ijodiy va ilmiy-texnik jamoalar tashkil etadi, ular faoliyatiga shartnoma shartlarida haq toʻlaydi;

oʻz nomenklaturasiga kiruvchi mahsulotlarni ishlab chiqarish boʻyicha qoʻshma korxonalar, badiiy salonlar, shuningdek xorijiy mamlakatlarda oʻzi ishlab chiqargan tovarlarni konvertatsiya qilinadigan valyutaga sotuvchi doʻkonlar ochadi;

oʻz mahsulotini buyumlarning badiiy va texnik sifatini hisobga olgan holda badiiy kengash tomonidan belgilanadigan yoki shartnoma asosidagi narxlarda sotadi.

III. Mol-mulki

8. “Musavvir” ilmiy-ishlab chiqarish markazining mol-mulkini asosiy va aylanma mablagʻlar, shuningdek qiymati uning mustaqil balansida aks ettiriladigan va uning mulki hisoblangan boshqa boyliklar tashkil etadi.

9. “Musavvir” ilmiy-ishlab chiqarish markazining mol-mulki oʻz tadbirkorlik faoliyati, aʼzolarining badallari, Oʻzbekiston Respublikasi rezidentlari boʻlgan yuridik shaxslarning xorijiy yuridik shaxslar va xalqaro tashkilotlarning homiylik mablagʻlari hisobiga shakllanadi.

10. “Musavvir” ilmiy-ishlab chiqarish markazining moliyaviy resurslari mahsulotlarni sotishdan, ishlarni bajarishdan, xizmatlar koʻrsatishdan olingan tushum, amortizatsiya ajratmalari, shuningdek boshqa kirimlar hisobiga shakllanadi.

11. “Musavvir” ilmiy-ishlab chiqarish markazi budjetga toʻlovlarni Oʻzbekiston Respublikasining soliq solish toʻgʻrisidagi qonun hujjatlarida belgilangan tartibda amalga oshiradi.

12. Barcha belgilangan va oʻz zimmasiga olgan moliyaviy majburiyatlar toʻlangandan keyin “Musavvir” ilmiy-ishlab chiqarish markazi ixtiyorida qoladigan foyda zaxira jamgʻarmasi, ilmiy-texnik va ijtimoiy rivojlantirish jamgʻarmasini va boshqa jamgʻarmalarni shakllantirishga, ishlovchilarga toʻlanishi kerak boʻlgan barcha summalarni (badiiy kengash baholari, pudrat shartnomalari, mehnat shartnomalari, lavozim maoshlari, stavkalar, tariflar boʻyicha ish haqi) toʻlashga yoʻnaltiriladi, Direktorlar kengashining qaroriga koʻra foydalaniladi va xodimlar tomonidan ishlab chiqarishga qoʻshilgan payga muvofiq ular oʻrtasida taqsimlanadi.

13. “Musavvir” ilmiy-ishlab chiqarish markazi ishlovchilar mehnatiga haq toʻlash shakli, tizimi va miqdorlarini mustaqil belgilaydi.

IV. Huquqlari

14. “Musavvir” ilmiy-ishlab chiqarish markazi quyidagi huquqlarga ega:

respublikada va chet elda korxonalar, tashkilotlar va firmalar bilan, shuningdek xorijiy fuqarolar bilan oʻz vakolatiga kiruvchi masalalar boʻyicha amaliy aloqalarni amalga oshirish;

bitishuvlar va boshqa yuridik harakatlarni, shu jumladan tashqi savdo harakatlarini sodir etish;

koʻchar va koʻchmas mulkni qurish, sotib olish, ijaraga olish yoki ijaraga berish, ularni belgilangan tartibda balansdan chiqarish;

respublikada oʻz filiallarini taʼsis etish, kichik korxonalar tashkil etish, faoliyati oʻz maqsad va vazifalariga muvofiq keladigan aksiyadorlik jamiyatlari va boshqa tashkilotlarda qatnashish;

yarmarkalar va koʻrgazmalarda qatnashish, ixtisoslashtirilgan koʻrgazmalar, seminarlar tashkil etish, oʻz faoliyati ixtisosligi boʻyicha xalq sanʼati toʻgʻrisida reklama mahsuloti chiqarish;

shtatdan tashqari jalb etiladigan mutaxassislar mehnatiga haq toʻlash tartibi va miqdorini belgilash;

asosiy faoliyat bilan bogʻliq masalalarni hal etish uchun chet elga xizmat safarlariga yuborish va respublikada xorijiy mutaxassislarni qabul qilish.

V. Boshqaruv

15. Bosh direktor boshchilik qiladigan Direktorlar kengashi “Musavvir” ilmiy-ishlab chiqarish markazini boshqarishning yuqori organi hisoblanadi. Uning tarkibiga “Hunarmand” uyushmasi raisi, Ilmiy-ishlab chiqarish markazi Bosh direktori oʻrinbosarlari, “Hunarmand” uyushmasi hududiy boʻlimlari rahbarlari, shuningdek yetakchi xalq hunarmand ustalari kiradi. Kengash oʻz ishini “Musavvir” ilmiy-ishlab chiqarish markazi Bosh direktori tasdiqlaydigan rejaga muvofiq amalga oshiradi.

16. Direktorlar kengashi har yili Markaz faoliyati toʻgʻrisida Bosh direktorning hisobotlarini eshitadi, uni iqtisodiy va ijtimoiy rivojlantirish istiqbollarini, shuningdek ishlab chiqarish faoliyati va boshqa faoliyatning eng muhim masalalarini koʻrib chiqadi va tasdiqlaydi.

17. Direktorlar kengashi yil choragida kamida bir marta chaqiriladi.

18. “Musavvir” ilmiy-ishlab chiqarish markaziga Oʻzbekiston Respublikasi Vazirlar Mahkamasi tomonidan lavozimga tayinlanadigan va lavozimdan ozod qilinadigan Bosh direktor boshchilik qiladi.

Bosh direktor “Musavvir” ilmiy-ishlab chiqarish markazi faoliyatiga rahbarlik qiladi, Markazga yuklangan vazifalar va funksiyalar bajarilishi uchun shaxsan javob beradi, oʻz oʻrinbosarlarini, tarkibiy boʻlinmalar rahbarlarini lavozimga tayinlaydi va lavozimdan ozod qiladi, “Musavvir” ilmiy-ishlab chiqarish markazi Bosh direktorining taqdimnomasiga koʻra Oʻzbekiston Respublikasi Vazirlar Mahkamasi tomonidan tayinlanadigan “Hunarmand” uyushmasi raisi bundan istisno, oʻz oʻrinbosarlari oʻrtasida vazifalarni taqsimlaydi. Markaz faoliyatining alohida uchastkalariga va tarkibiy boʻlinmalar ishiga rahbarlik qilish uchun ularning javobgarligi darajasini belgilaydi.

19. Bosh direktor:

Markaz vakolatiga tegishli boʻlgan masalalar boʻyicha “Musavvir” ilmiy-ishlab chiqarish markazi tizimida bajarilishi majburiy boʻlgan buyruqlar, farmoyishlar va yoʻriqnomalar chiqaradi;

barcha korxonalar, muassasalar va tashkilotlarda, xorijiy firmalarda “Musavvir” ilmiy-ishlab chiqarish markazi manfaatlarini ifodalaydi, shartnomalar tuzadi, ishonchnomalar beradi;

“Musavvir” ilmiy-ishlab chiqarish markazining moddiy va pul mablagʻlarini boshqaradi, ularning sarflanishini nazorat qiladi.

VI. Tugatish va qayta tashkil etish

20. “Musavvir” ilmiy-ishlab chiqarish markazini tugatish va qayta tashkil etish (ajralib chiqish, birlashish) qonunda belgilangan tartibda amalga oshiriladi.