“Budjet tizimi toʻgʻrisida”gi Oʻzbekiston Respublikasi Qonuniga oʻzgartish va qoʻshimchalar kiritish haqida (O‘RQ-95-son)

27.04.2007

Hujjat kuchini yo‘qotgan 01.01.2014

Oʻzbekiston Respublikasining qonuni

Qonunchilik palatasi tomonidan 2006-yil 27-dekabrda qabul qilingan Senat tomonidan 2007-yil 29-martda maʼqullangan

1-modda. Oʻzbekiston Respublikasining 2000-yil 14-dekabrda qabul qilingan “Budjet tizimi toʻgʻrisida”gi 158-II-sonli Qonuniga (Oʻzbekiston Respublikasi Oliy Majlisining Axborotnomasi, 2001-yil, № 1-2, 6-modda; Oʻzbekiston Respublikasi Oliy Majlisi palatalarining Axborotnomasi, 2005-yil, № 5, 152-modda, № 12, 413, 418-moddalar) quyidagi oʻzgartish va qoʻshimchalar kiritilsin:

1) 6-moddaning oltinchi xatboshisi “hisobotni” degan soʻzdan keyin “belgilangan tartibda” degan soʻzlar bilan toʻldirilsin;

2) 26-moddaning uchinchi qismi quyidagi tahrirda bayon etilsin:

“Oʻzbekiston Respublikasi Moliya vazirligi kelgusi moliya yiliga moʻljallangan Davlat budjeti loyihasini tayyorlaydi, uni joriy yilning oʻn beshinchi sentyabrigacha Oʻzbekiston Respublikasi Hisob palatasiga yuboradi hamda Davlat budjeti loyihasini Oʻzbekiston Respublikasi Hisob palatasining tegishli xulosasi bilan birga joriy yilning birinchi oktyabrigacha Oʻzbekiston Respublikasi Vazirlar Mahkamasiga taqdim etadi”;

3) 27-moddaning uchinchi qismidagi “Oʻzbekiston Respublikasi Vazirlar Mahkamasi Raisi yoki uning topshirigʻiga koʻra” degan soʻzlar chiqarib tashlansin;

4) 28-modda birinchi qismining:

birinchi xatboshisidagi “oʻn beshinchi sentyabrgacha” degan soʻzlar “birinchi oktyabrgacha” degan soʻzlar bilan almashtirilsin;

2-bandi “hisobot” degan soʻzdan keyin “Oʻzbekiston Respublikasi Hisob palatasining tegishli xulosasi bilan” degan soʻzlar bilan toʻldirilsin;

4-bandi “Oʻzbekiston Respublikasi Hisob palatasining tegishli xulosasi bilan” degan soʻzlar bilan toʻldirilsin;

7-bandi “Oʻzbekiston Respublikasi Hisob palatasining tegishli xulosasi bilan” degan soʻzlar bilan toʻldirilsin;

5) 39-moddaning:

toʻqqizinchi va oʻninchi qismlari quyidagi mazmundagi toʻqqizinchi, oʻninchi, oʻn birinchi va oʻn ikkinchi qismlar bilan almashtirilsin:

“Oʻzbekiston Respublikasi Moliya vazirligi Davlat budjetining ijrosi toʻgʻrisidagi hisobotni hisobot yilidan keyingi yilning birinchi apreligacha Oʻzbekiston Respublikasi Vazirlar Mahkamasiga taqdim etadi.

Oʻzbekiston Respublikasi Vazirlar Mahkamasi Davlat budjetining ijrosi toʻgʻrisidagi hisobotni Oʻzbekiston Respublikasi Hisob palatasiga u tashqi audit va baholash oʻtkazishi uchun hisobot yilidan keyingi yilning beshinchi apreligacha yuboradi.

Oʻzbekiston Respublikasi Hisob palatasi Davlat budjetining ijrosi toʻgʻrisidagi hisobotga doir xulosasini hisobot yilidan keyingi yilning oʻninchi mayidan kechiktirmay Oʻzbekiston Respublikasi Vazirlar Mahkamasiga taqdim etadi.

Oʻzbekiston Respublikasi Vazirlar Mahkamasi Davlat budjetining ijrosi toʻgʻrisidagi hisobotni Oʻzbekiston Respublikasi Hisob palatasining tegishli xulosasi bilan birga hisobot yilidan keyingi yilning oʻn beshinchi mayidan kechiktirmay Oʻzbekiston Respublikasi Oliy Majlisining Qonunchilik palatasiga taqdim etadi”;

oʻn birinchi va oʻn ikkinchi qismlari tegishincha oʻn uchinchi va oʻn toʻrtinchi qismlar deb hisoblansin.

2-modda. Ushbu Qonun rasmiy eʼlon qilingan kundan eʼtiboran kuchga kiradi.

Oʻzbekiston Respublikasining Prezidenti I. KARIMOV

Toshkent sh.,

2007-yil 27-aprel,

OʻRQ-95-son