Nikohlanuvchi shaxslarni tibbiy koʻrikdan oʻtkazish toʻgʻrisidagi nizomga oʻzgartirish va qoʻshimchalar kiritish haqida (78-son)

17.04.2007

Oʻzbekiston Respublikasi Vazirlar Mahkamasining

qarori

Oʻzbekiston Respublikasi Prezidentining 2007-yil 23-yanvardagi PQ-573-son qarori bilan tasdiqlangan “Ijtimoiy himoya yili” davlat dasturining 5.2-bandini bajarish yuzasidan hamda nikohlanuvchi shaxslarning tibbiy koʻrikdan oʻtish tartibini takomillashtirish maqsadida Vazirlar Mahkamasi qaror qiladi:

1. Vazirlar Mahkamasining 2003-yil 25-avgustdagi 365-son qarori (Oʻzbekiston Respublikasi QT, 2003-y., 8-son, 77-modda) bilan tasdiqlangan Nikohlanuvchi shaxslarni tibbiy koʻrikdan oʻtkazish toʻgʻrisidagi nizomga ilovaga muvofiq oʻzgartirish va qoʻshimchalar kiritilsin.

2. Oʻzbekiston Respublikasi Adliya vazirligi va Sogʻliqni saqlash vazirligi bir oy muddatda idoraviy normativ hujjatlarga tegishli oʻzgartirish va qoʻshimchalar kiritsinlar.

3. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosarlari R.S. Qosimov va S.T. Inomova zimmasiga yuklansin.

Oʻzbekiston Respublikasining Bosh vaziri Sh. MIRZIYOYEV

Toshkent sh.,

2007-yil 17-aprel,

78-son

Vazirlar Mahkamasining 2007-yil 17-apreldagi 78-son qaroriga ILOVA

Vazirlar Mahkamasining 2003-yil 25-avgustdagi 365-son qarori bilan tasdiqlangan Nikohlanuvchi shaxslarni tibbiy koʻrikdan oʻtkazish toʻgʻrisidagi nizomga kiritilayotgan oʻzgartirish va qoʻshimchalar

1. 2-bandga “50 yoshdan katta shaxslarning nikohini roʻyxatdan oʻtkazish hollari bundan mustasno, ushbu shaxslar tibbiy koʻrikdan faqat ularning roziligiga koʻra oʻtkaziladi” soʻzlari qoʻshilsin.

2. 5-bandda:

“yashash joyidagi” soʻzlari “doimiy yoki vaqtinchalik yashash joyidagi” soʻzlari bilan almashtirilsin;

quyidagi mazmundagi xatboshi qoʻshilsin:

“Tibbiy koʻrikdan oʻtkazish uchun berilgan yoʻllanmalar FHDY organlarida nikoh tuzish toʻgʻrisidagi arizalarni roʻyxatdan oʻtkazish daftarida qayd etiladi”.

3. 11-band quyidagi tahrirda bayon qilinsin:

“11. Nikohlanuvchi shaxslarning tibbiy koʻrigi natijalari toʻgʻrisida tibbiyot muassasasining xulosasi maʼlumotnomada aks ettiriladi. Maʼlumotnoma tibbiyot muassasasining muhri va rahbarining imzosi bilan tasdiqlanadi (mazkur Nizomga 3-ilova) hamda alohida daftarda roʻyxatdan oʻtkaziladi, daftar belgilangan muddat mobaynida viloyat sogʻliqni saqlash boshqarmasining arxivida saqlanadi. Maʼlumotnomaning amal qilish muddati — uch oy.

Tibbiyot muassasasining masʼul xodimi tibbiy koʻrikdan oʻtkazish natijalari boʻyicha maʼlumotnoma berishda nikohlanuvchi shaxsga aniqlangan kasalliklarning nikoh tuzilgandan keyin yuzaga kelishi mumkin boʻlgan oqibatlarini tushuntiradi. Tibbiy koʻrikdan oʻtgan shaxs oʻtkazilgan tushuntirish toʻgʻrisida Maʼlumotnomalarni roʻyxatdan oʻtkazish daftariga imzo qoʻyadi”.

4. 29-bandga “nikoh tuzilishiga” soʻzlaridan keyin “Oʻzbekiston Respublikasi Oila kodeksining 16-moddasida nazarda tutilgan” soʻzlari qoʻshilsin.