Oʻzbekiston Respublikasi Oliy Majlisi Senatining devoni toʻgʻrisidagi nizomni tasdiqlash haqida (23-I-son)

18.04.2005

Oʻzbekiston Respublikasi Oliy Majlisi SENATI KENGAShINING

Qarori

“Oʻzbekiston Respublikasi Oliy Majlisining Senati toʻgʻrisida”gi Oʻzbekiston Respublikasi Konstitutsiyaviy Qonuni 14-moddasining ikkinchi qismiga muvofiq Oʻzbekiston Respublikasi Oliy Majlisi Senatining Kengashi qaror qiladi:

Oʻzbekiston Respublikasi Oliy Majlisi Senatining Devoni toʻgʻrisidagi nizom tasdiqlansin (ilova qilinadi).

Oʻzbekiston Respublikasi Oliy Majlisi Senatining Raisi M. ShARIFXOʻJAYEV

Toshkent sh.,

2005-yil 18-aprel,

23–I-son

Oʻzbekiston Respublikasi Oliy Majlisi Senati Kengashining 2005-yil 18-apreldagi 23-I-sonli Qarori bilan TASDIQLANGAN

Oʻzbekiston Respublikasi Oliy Majlisi Senatining Devoni toʻgʻrisida

NIZOM

I. UMUMIY QOIDALAR

1. “Oʻzbekiston Respublikasi Oliy Majlisining Senati toʻgʻrisida”gi Oʻzbekiston Respublikasi Konstitutsiyaviy Qonuniga, “Oʻzbekiston Respublikasi Oliy Majlisi Qonunchilik palatasi deputatining va Senati aʼzosining maqomi toʻgʻrisida”gi Oʻzbekiston Respublikasi Qonuniga muvofiq, Oʻzbekiston Respublikasi Oliy Majlisining Senati (bundan buyon matnda Senat deb yuritiladi), uning organlari hamda Senat aʼzolarining faoliyatini tashkiliy, axborot va moddiy-texnika jihatidan taʼminlashni Oʻzbekiston Respublikasi Oliy Majlisi Senatining Devoni (bundan buyon matnda Senat Devoni deb yuritiladi) amalga oshiradi.

2. Senat Devoni oʻz faoliyatida Oʻzbekiston Respublikasining Konstitutsiyasiga, Oʻzbekiston Respublikasining qonunlariga, Senatning va Senat Kengashining qarorlariga, Senat Raisining farmoyishlariga hamda ushbu Nizomga amal qiladi.

3. Senat Devoni oʻz faoliyatini Oʻzbekiston Respublikasi Oliy Majlisi Qonunchilik palatasining (bundan buyon matnda Qonunchilik palatasi deb yuritiladi), Oʻzbekiston Respublikasi Vazirlar Mahkamasining devonlari, shuningdek ijro etuvchi va sud hokimiyati organlari, mahalliy davlat hokimiyati organlari hamda fuqarolarning oʻzini oʻzi boshqarish organlari bilan oʻzaro hamkorlikda amalga oshiradi.

4. Senat Devonida jamoat birlashmalarining, shu jumladan siyosiy partiyalar, shuningdek diniy birlashmalarning tuzilmalari tashkil etilishi mumkin emas, kasaba uyushmalari bundan mustasno.

5. Senat Devonining tuzilmasi, shtatlar jadvali, xodimlari mehnatiga toʻlanadigan haq miqdori va ularning moddiy-texnika taʼminoti, shuningdek ularning taʼminoti bilan bogʻliq xarajatlar Senat Raisi tomonidan tasdiqlanadi.

6. Senat Devoni yuridik shaxs boʻlib, oʻzining hisob-kitob varaqlariga, Oʻzbekiston Respublikasi Davlat gerbi tasviri tushirilgan va oʻz nomi yozilgan muhrga ega boʻladi.

II. SENAT DEVONINING TARKIBIY BOʻLINMALARI VA ULARNING ASOSIY VAZIFALARI

7. Senat Devoni Senat Raisining, Rais oʻrinbosarlarining (bundan buyon matnda Senat rahbariyati deb yuritiladi) hamda Senat Devoni Rahbarining bevosita rahbarligida ishlaydi va quyidagi tarkibiy boʻlinmalarni oʻz ichiga oladi:

Senat rahbariyati huzuridagi kotibiyat

Matbuot kotibi

Yuridik boʻlim

Nazorat-axborot boʻlimi

Xalqaro aloqalar boʻlimi

Matbuot va tarjima boʻlimi

Umumiy boʻlim

Buxgalteriya.

Senat Devoni boʻlimlarining tarkibida shuʼbalar, guruhlar va boshqa tarkibiy boʻlinmalar tuzilishi mumkin.

8. Senat Devonini Senat Devoni Rahbari boshqaradi.

9. Senat Devoni Rahbari oʻz vakolati doirasida;

Qonunchilik palatasining, Oʻzbekiston Respublikasi Vazirlar Mahkamasining devonlari, shuningdek ijro etuvchi va sud hokimiyati organlari, mahalliy davlat hokimiyati organlari hamda fuqarolarning oʻzini oʻzi boshqarish organlari bilan oʻzaro aloqalarda Senat Devoni nomidan ish koʻradi;

Senat Devoni, uning tarkibiy boʻlinmalari samarali ishlashini taʼminlaydi, Senat Devoni zimmasiga yuklatilgan vazifalar bajarilishi uchun shaxsan javob beradi;

Senat Devoni tarkibiy boʻlinmalarining ishini muvofiqlashtirib va faoliyatini nazorat qilib boradi;

Senatda oʻtkazish moʻljallanayotgan tadbirlar rejalarining loyihalari tayyorlanishini tashkil etadi, Senat rahbariyatining topshirigʻiga binoan va qoʻmitalarning (komissiyalarning) takliflari asosida Kengash majlisining kun tartibi loyihasini shakllantiradi hamda bu hujjatlarni Senat rahbariyati koʻrib chiqishi uchun kiritadi;

Senat rahbariyatiga, qoʻmitalariga (komissiyalariga) axborot, maʼlumotnoma yoʻsinidagi va boshqa materiallar tayyorlanishini tashkil etadi, Senat va uning organlari faoliyati axborotlar bilan taʼminlanishini yaxshilash, axborotlarni qayta ishlash hamda tahlil qilishning zamonaviy usul va vositalarini joriy etish chora-tadbirlarini ishlab chiqadi;

Senatning Qonunchilik palatasi bilan hamkorlikda ishlashini hamda Oʻzbekiston Respublikasi Oliy Majlisi palatalarining qoʻshma majlislari oʻtkazilishini taʼminlaydi;

Senat Devonining tarkibiy boʻlinmalarida tayyorlangan masalalar xususida Senat rahbariyatiga axborot berib boradi;

Senat Devoni ishini takomillashtirish chora-tadbirlari ishlab chiqilishini taʼminlaydi, Senat Devoni tuzilmasi, shtatlari va kadrlar tarkibiga oid masalalar yuzasidan Senat rahbariyati koʻrib chiqishi uchun takliflar kiritadi, Senat Devoni xodimlarining malakasini oshirish, mehnat intizomini mustahkamlash ishlarini tashkil etadi;

ushbu Nizomga muvofiq boshqa vazifalarni amalga oshiradi.

10. Senat rahbariyati huzuridagi kotibiyat:

kelgan xat-xabarlarni saralash yoʻli bilan ishlovdan oʻtkazadi va joʻnatilayotgan xat-xabarlarning hisobini yuritadi;

kelgan hujjatlar bilan tahliliy va axborot-maʼlumotnoma yoʻnalishidagi ishlarni amalga oshiradi;

Senat va uning Kengashi majlislariga hamda Oʻzbekiston Respublikasi Oliy Majlisi palatalarining qoʻshma majlislariga tayyorgarlik koʻrishda Senat rahbariyatiga koʻmaklashadi;

Senat rahbariyatining Senat qoʻmitalari (komissiyalari) bilan hamkorlikdagi ishlarini taʼminlaydi;

Senat rahbariyati tomonidan koʻrib chiqiladigan axborot-tahliliy va boshqa materiallarni tayyorlaydi;

Senat rahbariyati tomonidan fuqarolarning qabul qilinishi bilan bogʻliq ishlarni tashkil etadi;

Senat rahbariyatining topshiriqlari bajarilishi ustidan nazorat olib boradi;

Senat Raisi qabulxonasi muntazam ravishda, shu jumladan navbatchilik jadvaliga binoan dam olish va bayram kunlari ham ishlashini taʼminlaydi;

Senat rahbariyati faoliyatiga moddiy-texnika xizmati koʻrsatilishini amalga oshiradi;

Senat rahbariyatining topshiriqlariga binoan boshqa vazifalarni amalga oshiradi.

11. Matbuot kotibi:

ommaviy axborot vositalari bilan hamkorlikni amalga oshiradi;

Senat va uning organlari faoliyati haqida eʼlon qilinishi uchun axborotlar tayyorlaydi;

Senat va uning organlari faoliyati davriy nashrlar sahifalarida, televideniye va radio orqali belgilangan tartibda yoritilishini taʼminlaydi;

Oʻzbekiston Respublikasi Oliy Majlisining, shuningdek chet davlatlar va MDHga aʼzo mamlakatlar parlamentlarining faoliyatini oʻrganish bilan bogʻliq tahliliy ishlarni amalga oshiradi;

Senat ishi natijalarini umumlashtirib boradi;

Senat faoliyati toʻgʻrisida hisobotlar, maʼlumotnoma yoʻsinidagi boshqa materiallar tayyorlaydi;

Senat rahbariyatining topshirigʻiga binoan nodavlat notijorat tashkilotlarining vakillari bilan aloqalarni amalga oshiradi.

12. Senat Devonining boʻlimlariga boʻlim mudirlari rahbarlik qiladilar.

13. Yuridik boʻlim:

Senat hamda uning Kengashi va qoʻmitalari (komissiyalari) muhokamasiga kiritiladigan masalalar yuzasidan materiallar va takliflar tayyorlanishiga koʻmaklashadi;

Qonunchilik palatasi tomonidan kiritilgan qonunlar yuzasidan xulosalar tayyorlashda Senat qoʻmitalariga koʻmaklashadi, shuningdek, qarorlarning, bayonotlarning, murojaatnomalarning loyihalari yuzasidan takliflar tayyorlaydi hamda mazkur hujjatlarni yuridik-texnik jihatdan maromiga yetkazishda ishtirok etadi;

Qonunchilik palatasi tomonidan kiritilgan qonunlarning muhokamasida ishtirok etadi;

Senat va uning Kengashi majlislari huquqiy jihatdan taʼminlanishida ishtirok etadi;

Senat rahbariyati va Senat Devoni Rahbari topshirigʻiga binoan boʻlim vakolatiga taalluqli huquqiy masalalar yuzasidan xulosalar tayyorlaydi;

Qonunchilik palatasi tomonidan kiritilgan qonunlarni koʻrib chiqish uchun Senatning qaysi qoʻmitalari masʼul boʻlsa, shu qoʻmitalar topshirigʻiga binoan mazkur qonunlarning Oʻzbekiston Respublikasining Konstitutsiyasiga va boshqa qonunlariga, shuningdek yuridik texnika talablariga qanchalik muvofiq ekanligini tahlil qiladi, mazkur hujjatlarning sifatini oshirish yuzasidan takliflar tayyorlaydi;

Oʻzbekiston Respublikasi qonunlari hamda Senat va uning Kengashi qarorlari, Qonunchilik palatasi qarorlari, Oʻzbekiston Respublikasi Prezidentining farmonlari, qarorlari va farmoyishlari, Oʻzbekiston Respublikasi Vazirlar Mahkamasining qarorlari va farmoyishlari hisobini yuritadi hamda ularni tizimga solib boradi;

Senatning qonunlar bazasini shakllantiradi va tekshirib, toʻgʻri holatda boʻlishini nazorat qilib boradi;

Senat qoʻmitalarining yozma soʻroviga binoan qonunlar bazasi asosida huquqiy masalalar boʻyicha axborot yoʻsinidagi maʼlumotnomalar tayyorlaydi;

Senat tomonidan maʼqullangan qonunlarni va qabul qilingan qarorlar, bayonotlarni, murojaatnomalarni, shuningdek parlament soʻrovlarini yuridik-texnik jihatdan rasmiylashtirishga bir xil yondashilishini taʼminlaydi, Senat aʼzolariga maslahat yoʻsinidagi va uslubiy yordam koʻrsatadi;

Senat tomonidan nazorat qilish sohasidagi vakolatlarning amalga oshirilishiga koʻmaklashadi.

14. Nazorat-axborot boʻlimi:

Senat qoʻmitalariga nazorat-tahlil ishlarini amalga oshirishlarida tashkiliy, uslubiy, axborot va maslahat yoʻsinidagi xizmat koʻrsatilishini taʼminlaydi;

Senat qoʻmitalari konferensiyalar, seminarlar, davra suhbatlari va boshqa tadbirlarni tashkil etishida hamda oʻtkazishida koʻmaklashadi;

Senat majlislariga tashkiliy va axborot yoʻsinidagi xizmat koʻrsatilishini taʼminlaydi, Senat aʼzolariga tashkiliy-texnik yordam beradi;

Senat aʼzolariga vakolatlarini amalga oshirishlarida koʻmaklashadi hamda ularni tegishli axborot materiallari bilan taʼminlaydi;

Qonunchilik palatasi tomonidan kiritilgan qonunlarning muhokamasida ishtirok etadi;

senatorlarning joylarda olib borgan ishlari, aholi bilan oʻtkazgan uchrashuvlari haqida Senat Devoniga kelib tushgan axborotlarni umumlashtirib boradi;

fuqarolardan Senatga tushayotgan murojaatlar yuzasidan olib boriladigan ishlarni tashkil etadi, murojaatlarning hisobini yuritadi hamda roʻyxatdan oʻtkazilishini taʼminlaydi, ularni tegishli davlat organlariga va boshqa organlarga yuboradi hamda yuborilgan murojaatlarning ana shu organlarda koʻrib chiqilishini nazoratga oladi;

fuqarolarning qabul qilinishini tashkil etadi;

fuqarolarning murojaatlarini hamda bu murojaatlarning koʻrib chiqish natijalarini muntazam tahlil qilib va umumlashtirib boradi, shikoyatlarning kelib chiqishi sabablarini oʻrganadi, zarur axborotlar tayyorlaydi;

Senat aʼzolarining roʻyxatlarini nashrga tayyorlaydi, soʻrovnoma yoʻli bilan ularga oid maʼlumotlardagi oʻzgarishlar hisobini yuritadi;

maʼmuriy-hududiy tuzilishni tartibga solish, Oʻzbekiston Respublikasi chegaralarini oʻzgartirish, tumanlar, shaharlar va viloyatlarni tashkil etish, tugatish, ularning nomini hamda chegaralarini oʻzgartirish masalalariga oid takliflarni umumlashtiradi va hujjatlar tayyorlaydi;

xalq deputatlari Kengashlariga uslubiy va boshqa yoʻsindagi yordam koʻrsatish bilan bogʻliq tegishli materiallar hamda takliflar tayyorlanishini tashkil etadi;

xalq deputatlari viloyat, tuman va shahar Kengashlariga saylovga, fuqarolarning oʻzini oʻzi boshqarish organlari sayloviga tayyorgarlik koʻrish hamda ularni oʻtkazishga doir tashkiliy-texnik tadbirlarda mahalliy vakillik va ijro etuvchi hokimiyat organlariga, saylov komissiyalariga yordam koʻrsatadi.

15. Xalqaro aloqalar boʻlimi:

xalqaro munosabatlarga, shuningdek Oʻzbekiston Respublikasining xalqaro shartnomalarini ratifikatsiya yoki denonsatsiya qilishga taalluqli materiallar va takliflar tayyorlashda ishtirok etadi;

Qonunchilik palatasi tomonidan kiritilgan, xalqaro munosabatlarni tartibga solishga qaratilgan qonunlar yuzasidan xulosalar tayyorlashda Senatning tegishli qoʻmitalariga koʻmaklashadi;

Qonunchilik palatasi tomonidan kiritilgan qonunlarning muhokamasida ishtirok etadi;

chet el delegatsiyalarining, chet davlatlar ayrim davlat va siyosat arboblarining, diplomatiya vakillarining, shuningdek xalqaro tashkilotlar vakillarining Senatdagi qabulini uyushtiradi;

parlament delegatsiyalari tashrifining, Senat ishtirokida oʻtkazilayotgan xalqaro parlament tadbirlarining (konferensiyalar, seminarlar, simpozium va boshqalarning) protokol taʼminoti masalalarini hal etadi;

rasmiy tashrif bilan chet ellarga borayotgan Senat rahbariyatini, delegatsiyasini va Senat aʼzolarini axborot, maʼlumotnoma yoʻsinidagi va boshqa materiallar bilan taʼminlaydi;

Qonunchilik palatasining, Oʻzbekiston Respublikasi Vazirlar Mahkamasining devonlari tegishli tarkibiy boʻlinmalari, vazirliklar, davlat qoʻmitalari va idoralar bilan, diplomatik va boshqa vakolatxonalar hamda Oʻzbekiston Respublikasida akkreditatsiya qilingan xalqaro shartnomalar hisobini yuritadi hamda ularni tizimga solib boradi;

Senatning parlamentlararo aloqalari masalalariga doir materiallarni umumlashtirib boradi, xalqaro parlament institutlari bilan muloqotni yoʻlga qoʻyadi va olib boradi;

xalqaro shartnomalar hisobini yuritadi hamda ularni tizimga solib boradi;

xalqaro aloqalarga taalluqli, Senat rahbariyati nazoratidagi hujjatlarning ijrosi nazorat etilishini taʼminlaydi;

Senatning qoʻmitalari (komissiyalari) faoliyatiga tashkiliy, uslubiy va axborot yoʻsinidagi xizmat koʻrsatilishini taʼminlaydi, ularga xalqaro xususiyatdagi tadbirlar oʻtkazishda koʻmaklashadi;

xorijiy mamlakatlarga xizmat safariga borayotgan Senat rahbariyatiga, senatorlarga va Senat Devoni xodimlariga tashkiliy-texnik, uslubiy va boshqa xil koʻmak beradi;

Senatga kelib tushgan chet tillardagi xat-xabarlarning tarjima qilinishini taʼmin etadi.

16. Matbuot va tarjima boʻlimi:

qonunlar, shuningdek Senatning va Senat Kengashining hujjatlari, Senat rahbariyatining topshirigʻiga binoan esa boshqa materiallar matnlari tarjima va tahrir etilishini taʼminlaydi;

Senat tomonidan qabul qilingan hujjatlarning matbuotda eʼlon qilinishini tashkil etadi;

Senat va uning Kengashi muhokamasiga kiritilayotgan materiallar va takliflarni tayyorlashda ishtirok etadi;

Senatning matbuot organlari faoliyati bilan bogʻliq masalalarda mutasaddilik qiladi, bu organlar oʻz ustavlarida belgilangan talablarni bajarishi ustidan nazoratni amalga oshiradi;

ommaviy axborot vositalari bilan aloqani yoʻlga qoʻyadi va olib boradi;

Senat Kengashi majlislarining bayonnomalari, Senat tomonidan qabul qilingan hujjatlarning toʻplamlari nashr qilinishini tashkil etadi.

17. Umumiy boʻlim:

Senat hujjatlarining (qarorlar, bayonnomalar, farmoyishlar va boshqa hujjatlarning) roʻyxatga olinishini, hisobi yuritilishini, rasmiylashtirilishini, koʻpaytirilishini va joylarga joʻnatilishini amalga oshiradi;

kelgan xat-xabarlarni qabul qilib oladi, roʻyxatdan oʻtkazadi, hisobini yuritadi, taqsimlaydi va tegishliligi boʻyicha yetkazib beradi, shuningdek joʻnatilayotgan xat-xabarlarning qabul qilib olinishi hamda joylarga yuborilishini taʼminlaydi;

Senat Devonining tarkibiy boʻlinmalarida ish yuritilishini belgilangan tartibda tashkil etadi, maxfiylik rejimini taʼminlaydi, Senat Devonining tarkibiy boʻlinmalarida mehnat intizomi ahvolini tahlil qilib boradi;

Senat Devonining boshqa tarkibiy boʻlinmalari bilan birgalikda Senat va uning Kengashi majlislariga tashkiliy-texnik xizmat koʻrsatilishini taʼminlaydi;

Senat va uning Kengashi hamda qoʻmitalari (komissiyalari) majlislarining, Senatda oʻtkaziladigan boshqa tadbirlarning bayonnomalarini, stenogrammalarini yuritadi, ana shu majlis va tadbirlarda soʻzga chiqqanlarning ovozlari magnit lentasiga yozib olinishini taʼminlaydi;

yuritilishi tugallangan hujjatlar yigʻmajildlarining qabul qilib olinishi, hisobi yuritilishi va saqlanishini, joriy arxiv shakllantirilishini taʼminlaydi, ishlar, yigʻmajildlar va hujjatlarni belgilangan tartibda davlat arxiviga topshiradi;

Senat ishlari nomenklaturasini ishlab chiqadi, uni “Oʻzarxiv” agentligi bilan kelishib oladi va tasdiqlash uchun Senat rahbariyatiga kiritadi;

Senat kutubxonasi ishini tashkil etadi;

Senat rahbariyati va Senat Devoni Rahbari topshirigʻiga binoan farmoyishlar loyihalarini tayyorlaydi;

Senatda doimiy asosda ishlayotgan senatorlarning hamda Senat Devoni xodimlarining shaxsiy hujjatlar yigʻmajildlari va mehnat daftarchalarini rasmiylashtirish hamda saqlashga doir ishlarni amalga oshiradi;

Senat Devoni xodimlarini harbiy roʻyxatga kiritish va undan chiqarish, shuningdek bronlashtirib qoʻyish masalalarida tuman, shahar mudofaa ishlari boʻlimlari bilan aloqada boʻladi;

Senat Devoni tarkibiy boʻlinmalari taqdim etadigan maʼlumotlar asosida har kuni Senat rahbariyatini Senat Devoni xodimlarining ishga chiqqan-chiqmaganligidan xabardor etadi;

Senatning, uning Kengashi va qoʻmitalarining (komissiyalarining), Senat aʼzolarining hamda Senat Devonining faoliyatiga moliyaviy, moddiy-texnik va xoʻjalik xizmati koʻrsatilishini taʼminlaydi;

Xalqaro aloqalar boʻlimi bilan birgalikda parlament delegatsiyalari va boshqa delegatsiyalarning Senatdagi qabullarini tashkil etadi, Senat delegatsiyalarini xorijiy mamlakatlarga yuborish, senatorlar hamda Senat Devoni xodimlari uchun aviatsiya chiptalarini band (bron) qilib qoʻyish bilan bogʻliq tashkiliy-texnik masalalarni hal etadi;

Senat qoʻmitalarining (komissiyalarining) va Senat Devoni tarkibiy boʻlinmalarining materiallari kompyuterda terib (koʻchirib) berilishini hamda koʻpaytirilishini tashkil etadi;

Senat aʼzolarining va Senat Devoni xodimlarining xizmat guvohnomalari hamda boshqa hujjatlar blankalari tayyorlanishini taʼmin etadi;

ovoz berishning elektron tizimi, Senatning mahalliy kompyuter tarmogʻi, shuningdek boshqa tashkiliy texnikalar talab darajasida ishlashini taʼminlaydi;

Senatda doimiy asosda ishlayotgan senatorlarga va Senat Devoni xodimlariga mehnat, maishiy, dam olish sharoitlari yaratib berilishini hamda ularga tibbiy xizmat koʻrsatilishini tashkil etish ishlarini olib boradi.

18. Buxgalteriya Senat va uning organlari faoliyati bilan bogʻliq xarajatlar smetalarining loyihalarini, bu smetalarning ijrosiga doir hisobotlarni tayyorlaydi hamda ularni Senat rahbariyati va Senat Devoni Rahbari koʻrib chiqishi uchun kiritadi.

III. SENAT DEVONINING XODIMLARI

19. Senat Devoni Rahbari va Devon xodimlari Senat Raisi tomonidan lavozimga tayinlanadi hamda lavozimdan ozod qilinadi.

20. Senat Devoni boʻlimlarining mudirlari oʻz vakolatlari doirasida:

Senat Devonining tegishli boʻlinmalari faoliyatiga bevosita rahbarlik qiladilar hamda ana shu boʻlinmalar zimmasiga yuklatilgan vazifalar bajarilishi uchun shaxsan javob beradilar;

xodimlar oʻrtasida vazifalarni taqsimlaydilar, ish uyushqoqlik bilan va batartib borishini, mehnat intizomiga rioya etilishini taʼminlaydilar, xodimlarning oʻz vazifalarini bajarishlari hamda ish yuritish tartibli boʻlishi uchun javob beradilar;

Senat rahbariyati va Senat Devoni Rahbari topshiriqlari bajarilishini nazorat qilib boradilar;

boʻlim xodimlarining malakasini oshirish choralarini koʻradilar;

Senat Devonining tegishli boʻlimida tayyorlangan masalalar xususida Senat Devonining Rahbariga axborot berib boradilar;

Senat Kengashining hamda qoʻmitalarining (komissiyalarining) majlislarida ishtirok etadilar;

Senat rahbariyati va Senat Devoni Rahbari huzurida oʻtkaziladigan yigʻilishlarda Senat Devonining tegishli boʻlimi nomidan vakillik qiladilar hamda ish koʻradilar;

oʻz vakolati doirasiga taalluqli masalalar boʻyicha boʻlimning Senat aʼzolari, Senat qoʻmitalari (komissiyalari), Senat Devoni tarkibiy boʻlinmalari bilan, Qonunchilik palatasining, Oʻzbekiston Respublikasi Vazirlar Mahkamasining devonlari tegishli tarkibiy boʻlinmalari bilan, davlat hokimiyati boshqa organlari va boshqa tashkilotlar bilan hamkorlikda ishlashini tashkil qiladilar.

21. Boʻlim mudirlarining oʻrinbosarlari Senat Devoni tegishli boʻlinmalari rahbarlari yoʻqligida ularning vazifalarini bajaradilar, shuningdek oʻzlariga topshirilgan ish jabhasiga rahbarlik qiladilar.

22. Matbuot kotibi, Senat Devonining katta referentlari, referentlari va boshqa masʼul xodimlari:

xizmat vazifalari va mansab yoʻriqnomalariga muvofiq tegishli jabhada topshirilgan ish vaqtida, sifatli bajarilishini hamda tashkil etilishini taʼminlaydilar, bu yoʻnalishdagi ishlar uchun shaxsan javob beradilar;

tegishincha Senat rahbariyati, Senat Devoni Rahbari, boʻlim mudirlari va boʻlim mudirlarining oʻrinbosarlari tomonidan berilgan vazifa hamda topshiriqlarni bajaradilar.

23. Senat Devonining texnik xodimlari:

zimmalariga yuklatilgan xizmat vazifalarini, tegishincha Senat Devoni Rahbari, boʻlim mudirlari va boʻlim mudirlarining oʻrinbosarlari tomonidan berilgan topshiriqlarni bajaradilar;

oʻz ishlariga taalluqli masalalar yuzasidan oʻtkaziladigan xizmat yigʻilishlarida ishtirok etadilar;

oʻz ishlari bilan bogʻliq masalalar yuzasidan, zarurat boʻlganda, Senatning tegishli qoʻmitasi rahbariga, Senat Devoni boʻlimlarining mudirlariga takliflar kiritadilar.