Qoʻngʻirot soda zavodining ishga tushirilishi toʻgʻrisida (PQ-468-son)

15.09.2006

Oʻzbekiston Respublikasi Prezidentining

Qarori

Qoʻngʻirot soda zavodining qurilishi tugallanganligi va ishga tushirilishi munosabati bilan hamda uning barqaror va samarali ishlashini taʼminlash maqsadida:

1. Qoʻngʻirot soda zavodida yiliga 100 ming tonna kalsiylangan soda ishlab chiqaruvchi quvvatlar qurilishi tugatilganligi, uskunalar ishga tushirilganligi va davlat standartlariga muvofiq keladigan tayyor mahsulotning sanoat koʻlamida ishlab chiqarilishi boshlanganligi maʼlumot uchun qabul qilinsin.

2. Qoʻngʻirot soda zavodi ishga tushirilishini qabul qilish boʻyicha Davlat komissiyasining tarkibi 1-ilovaga* muvofiq tasdiqlansin.

* 1-ilova rus tilidagi matnda berilgan.

Davlat komissiyasi:

Qoʻngʻirot soda zavodini qabul qilish dalolatnomasini tasdiqlash boʻyicha materiallarni belgilangan tartibda Vazirlar Mahkamasiga kiritsin;

ikki hafta muddatda kelgusida ishlatilmaydigan qurilishi tugallanmagan obyektlarni puxta inventarizatsiya qilsin va ularni Qoʻngʻirot soda zavodining balansidan chiqarish boʻyicha Vazirlar Mahkamasiga takliflar kiritsin.

3. “Oʻzkimyosanoat” DAKga:

Qoʻngʻirot soda zavodi uskunalarining barqaror ishlashini tashkil etish va boshlangʻich davrda uning ish tartibini maqbullashtirish, shuningdek zavodning mahalliy muhandis-texnik va boshqaruv xodimlarini oʻqitish boʻyicha “SITIK Interneshnl” (Xitoy) kompaniyasi bilan uning mutaxassislari tomonidan xizmatlar koʻrsatilishi yuzasidan bir yil muddatga shartnoma tuzishga;

mazkur shartnoma boʻyicha toʻlovlarni Kimyo sanoati tashkilotlarini rivojlantirish va qoʻllab-quvvatlash jamgʻarmasi mablagʻlari hisobidan amalga oshirishga ruxsat berilsin.

“Oʻzkimyosanoat” DAK “SITIK Interneshnl” kompaniyasi bilan tuzgan shartnomasida:

Xitoy kompaniyasi mutaxassislari tasdiqlangan lavozimlar yoʻriqnomalariga koʻra ishlab chiqarishni boshqarish funksiyalarini bajargan holda lavozimlarni 2-ilovaga* muvofiq egallashlarini, shuningdek mazkur lavozimlarni keyinchalik egallashi uchun mahalliy xodimlar ichidan ular kamida uch nomzodni oʻqitishlarini;

* 2-ilova rus tilidagi matnda berilgan.

xorijiy mutaxassislarga ishlash va yashash uchun zarur boʻlgan shart-sharoitlar yaratishni, jumladan ularga malakali tarjimonlar biriktirilishini nazarda tutsin.

4. “Oʻzkimyosanoat” DAK:

bir oy muddatda Qoʻngʻirot soda zavodini muhandis-texnik va xizmat koʻrsatish xodimlari bilan toʻliq taʼminlashni, jumladan, tarmoqning boshqa korxonalaridan malakali muhandis-texnik kadrlarni jalb etgan holda nihoyasiga yetkazsin;

zavod xodimlarini Qoʻngʻirot soda zavodi qoshidagi Toshkent kimyo-texnologiya institutining ishlab turgan maxsus sirtqi boʻlimi negizida muntazam oʻqitish va qayta tayyorlashni tashkil etsin.

5. Oʻzbekiston Respublikasi Iqtisodiyot vazirligi va Moliya vazirligi, “Oʻzkimyosanoat” DAK hamda Qoraqalpogʻiston Respublikasi Vazirlar Kengashining:

Oʻzsanoatqurilish banki tomonidan Qoʻngʻirot soda zavodini qurishga ajratilgan 3,0 mlrd. soʻm miqdoridagi kreditni 2007–2011-yillarda 3-ilovaga* muvofiq jadval boʻyicha toʻlash sharti bilan restrukturizatsiya qilish toʻgʻrisidagi;

* 3-ilova rus tilidagi matnda berilgan.

Qoʻngʻirot soda zavodining ijtimoiy soha obyektlari hamda noishlab chiqarish ahamiyatidagi aktivlarini joriy holatiga koʻra, 4-ilovaga* muvofiq Qoraqalpogʻiston Respublikasi Vazirlar Kengashi va idoralarning balansiga topshirish toʻgʻrisidagi;

* 4-ilova rus tilidagi matnda berilgan.

Qoʻngʻirot soda zavodidagi keyinchalik foydalanilmaydigan obyektlarni belgilangan tartibda, 5-ilovaga* muvofiq birja va auksion savdolariga qoʻyish, bunda ularni sotishdan tushgan mablagʻlarni Oʻzsanoatqurilish bankining zavodni qurishga ajratgan kreditini toʻlashga yoʻnaltirish toʻgʻrisidagi;

* 5-ilova rus tilidagi matnda berilgan.

xomashyo bazasi obyektlarini 6-ilovaga* muvofiq 2007-yilning 1-oktabrigacha tegishli tashkilotlar balansida saqlash va keyinchalik ularni Qoʻngʻirot soda zavodi balansiga oʻtkazish toʻgʻrisidagi;

* 6-ilova rus tilidagi matnda berilgan.

2007-yilning oxirigacha Qoʻngʻirot soda zavodi mahsulotlarini xorijiy bozorlardagi raqobat narxlarda birja savdolari orqali eksportga sotish toʻgʻrisidagi takliflariga rozilik berilsin.

6. Navoiy KMK va Olmaliq KMK 2007-yilning 1-oktabrigacha boʻlgan davr mobaynida 6-ilovaga muvofiq Qoʻngʻirot soda zavodining xomashyo bazasi obyektlari oʻzlarining shaxsiy mablagʻlari hisobidan barqaror ishlatilishini hamda “Borsakelmas” tuz rudasi konidan zavodga xomashyoni va Jamansoy karyeridan ohaktoshli kelishilgan jadval boʻyicha uzluksiz yetkazib berilishini taʼminlasin.

7. Qoʻngʻirot soda zavodi:

5-ilovada koʻrsatilgan obyektlar uchun 2006-yilning 1-sentabridan boshlab ularning birja va auksion savdolarida sotilishiga qadar boʻlgan davrda mulk soligʻi toʻlashdan;

ishlab chiqarish faoliyatini taʼminlash hamda yordamchi infratuzilma obyektlarini qoʻshimcha butlash uchun zarur boʻlgan Oʻzbekiston Respublikasi Vazirlar Mahkamasi tomonidan tasdiqlanadigan roʻyxatlar boʻyicha import qilinadigan tovarlar uchun 2010-yilning 1-yanvarigacha bojxona rasmiylashtiruvi yigʻimlaridan tashqari bojxona toʻlovlari toʻlashdan ozod etilsin.

8. Oʻzbekiston Respublikasi Tashqi ishlar vazirligi “Oʻzkimyosanoat” DAKning talabnomalariga koʻra “SITIK Interneshnl” kompaniyasining mazkur qarorga muvofiq xizmat koʻrsatuvchi mutaxassislariga koʻp martalik vizalarni, ularni rasmiylashtirish uchun konsullik yigʻimlari undirilmagan holda belgilangan tartibda berilishini taʼminlasin.

9. Oʻzbekiston Respublikasi Ichki ishlar vazirligi:

belgilangan tartibda Qoʻngʻirot soda zavodining qoʻriqlanishini taʼminlasin;

“Oʻzkimyosanoat” DAKning talabnomalariga koʻra, “SITIK Interneshnl” kompaniyasining mazkur qarorga muvofiq xizmat koʻrsatuvchi xorijiy mutaxassislariga koʻp martalik vizalar berish va ularning muddatini uzaytirish, shuningdek vaqtincha roʻyxatda turish va uning muddatini uzaytirishni taʼminlasin hamda ular davlat boji toʻlashdan ozod qilinsin.

10. Mazkur qarorning ijrosini nazorat qilish Oʻzbekiston Respublikasi Bosh vaziri Sh.M. Mirziyoyev zimmasiga yuklansin.

Oʻzbekiston Respublikasi Prezidentining I. KARIMOV

Toshkent shahri,

2006-yil 15-sentabr,

PQ - 468-son