2010-yilgacha davrda Jeroy-Sardara koni negizida tarkibida fosfor boʻlgan oʻgʻitlar ishlab chiqarish va eksportga yetkazib berishni koʻpaytirish chora-tadbirlari dasturi toʻgʻrisida (PQ-420-son)
18.07.2006
Oʻzbekiston Respublikasi Prezidentining
Qarori
Soʻnggi yillarda respublikada fosforit xomashyosining mahalliy bazasini shakllantirish boʻyicha amaliy ishlar olib borildi. Bu oʻz navbatida uni import qilishdan voz kechish imkonini berdi. Jeroy-Sardara koni fosforit xomashyosidan fosforli oʻgʻitlar ishlab chiqarishning muqobil texnologiyasi yaratildi.
Shu bilan birga, Jeroy-Sardara koni negizida tarkibida fosfor boʻlgan oʻgʻitlar ishlab chiqarishni koʻpaytirish masalalari boʻyicha tegishli qarorlar qabul qilinishiga qaramay, hozirgi kungacha Qizilqum fosforit kombinatida fosfor rudasidan xloridlarni yuvish qurilmasini foydalanishga topshirish taʼminlanmagan, buning natijasida fosforli oʻgitlar ishlab chiqaruvchi korxonalarda uskunalar va kommunikatsiyalarning eskirish darajasi yuqoriligicha qolmoqda.
Ishlab chiqariladigan mahsulot tannarxi va energiya sarfini kamaytirishni taʼminlaydigan texnologik jarayonlarni takomillashtirishga, ishlab turgan quvvatlarni modernizatsiyalash va rekonstruksiya qilishga, mashina- uskunalarni yangilashga, shuningdek konsentratlangan fosforli oʻgʻitlar (fosfogips) ishlab chiqarish chiqindilarini kamaytirish, ularning yigʻilib qolgan uyumlarini qayta ishlashning sanoat usullarini tadbiq etishga yetarli eʼtibor berilmayapti. Tarkibida fosfor boʻlgan mineral oʻgʻitlarni eksportga yetkazib berish hajmlarini oʻstirish surʼatlari yetarli darajada emas.
Jeroy-Sardara koni zaxiralari negizida tarkibida fosfor boʻlgan mineral oʻgʻitlar ishlab chiqarish hajmlarini yanada oshirish va eksport potensialini oʻstirish, shuningdek fosfor ishlab chiqarishidagi texnogen chiqindilarni qayta ishlashga jalb etish maqsadida:
1. Oʻzbekiston Respublikasi Bosh vaziri Sh.M.Mirziyoyevga, Navoiy KMK Bosh direktori N.I.Kucherskiyga Qizilqum fosforit kombinatida fosfor rudasidan xloridlarni yuvish qurilmasini oʻz vaqtida foydalanishga topshirishni taʼminlash boʻyicha zarur chora-tadbirlar qabul qilinmaganligi koʻrsatib oʻtilsin.
Oʻzbekiston Respublikasi Bosh vaziri bir hafta muddatda vazirliklar, xoʻjalik birlashmalari va korxonalar rahbarlarining Jeroy-Sardara koni negizida tarkibida fosfor boʻlgan oʻgʻitlar ishlab chiqarishni koʻpaytirish masalalari boʻyicha qabul qilingan qarorlarning ijrosiga masʼuliyatsizlarcha yuzaki munosabatda boʻlish faktlarini koʻrib chiqsin va prinsipial baho bersin. Zarurat tugʻilganda ularga nisbatan egallab turgan lavozimidan ozod etishgacha boʻlgan qatʼiy choralarni qoʻllash boʻyicha takliflar kiritsin.
2. Quyidagilar maʼlumot uchun qabul qilinsin:
Navoiy KMK tomonidan 2006-yilning VI choragida:
tarkibida 30 foizgacha R2O5 boʻlgan yiliga 400 ming tonna yuvilgan kuydirilgan fosfor konsentrati;
tarkibida 18-19 foiz R2O5 boʻlgan yiliga 200 ming tonna yuvilgan fosfor konsentrati;
tarkibida 16-18 foiz R2O5 boʻlgan yiliga 200 ming tonna fosfor uni hajmida fosforit mahsulotlari ishlab chiqarish boʻyicha quvvatlar ishga tushiriladi.
3. Oʻzbekiston Respublikasi Iqtisodiyot vazirligi hamda “Oʻzkimyosanoat” DAKning “Samarqandkimyo” OAJda boyitilmagan Jeroy fosforitlarini azot kislota usuli bilan qayta ishlash orqali tarkibida azot-fosfor-kalsiy boʻlgan yangi oʻgit (nitrokalsiyfosfat) sanoat miqyosida ishlab chiqariladigan yiliga 250 ming tonna quvvatga ega korxonani tashkil etish toʻgʻrisidagi taklifiga rozilik berilsin.
“Oʻzkimyosanoat” DAK, Oʻzbekiston Respublikasi Iqtisodiyot vazirligi, Moliya vazirligi 250 ming tonna nitrokalsiy fosfat oʻgʻiti (NKFOʻ) ishlab chiqarish quvvatiga ega boʻlgan yangi korxona 2008-yil oxirida ishga tushirilishini taʼminlash yuzasidan barcha zarur chora-tadbirlarni qabul qilsin.
4. 2010-yilgacha davrda Jeroy-Sardara koni negizida tarkibida fosfor boʻlgan oʻgʻitlar ishlab chiqarish va eksportga yetkazib berishni koʻpaytirish chora-tadbirlari Dasturining asosiy yoʻnalishlari hamda 2006—2010-yillarda fosforli oʻgʻitlar ishlab chiqarish va eksport qilishning maqsadli parametrlari 1—3-ilovalarga muvofiq* maʼqullansin.
* Ilovalar rus tilidagi matnda berilgan.
“Oʻzkimyosanoat” DAK rahbariyati zimmasiga Dasturda belgilangan asosiy tashkiliy-texnikaviy tadbirlarni amalga oshirishda shaxsiy javobgarlik yuklansin.
8. Oʻzbekiston Respublikasi Vazirlar Mahkamasi Dastur amalga oshirilishining tizimli monitoringini taʼminlasin hamda Dasturning amalga oshirilishi uchun masʼul boʻlgan vazirliklar, idoralar va xoʻjalik birlashmalari rahbarlarining hisobotlarini mamlakatning ijtimoiy-iqtisodiy rivojlanishi yakunlariga bagʻishlangan Vazirlar Mahkamasining har chorakdagi majlislarida muntazam tinglab borishni amaliyotga tadbiq qilsin.
9. “Oʻzbekiston temir yoʻllari” davlat-aksiyadorlik kompaniyasi:
“Oʻzkimyosanoat” DAKning fosforli oʻgʻitlar ishlab chiqaruvchi korxonalar manziliga fosforit xomashyosi ortilgan yoʻnalishlarda harakatlanish, shuningdek tarmoq korxonalaridan boshqa xomashyo va mineral oʻgʻitlarni belgilangan tartibda yetkazib berishning normativ muddatlariga rioya etilishini;
“Qoʻqon superfosfat zavodi” OAJga fosforit xomashyosini yetkazib berish uchun Tojikiston temir yoʻlining Soʻgʻd uchastkasini kesib oʻtish kodlari Navoiy KMKga zarur miqdorda milliy valyutaga sotilishini taʼminlasin.
10. Vazirlar Mahkamasining “Oʻzbekiston Respublikasi hududida atrof tabiiy muhit ifloslantirilganligi va chiqindilar joylashtirilganligi uchun toʻlovlar tizimini takomillashtirish toʻgʻrisida” 2003-yil 1-maydagi 199-sonli qarori bilan tasdiqlangan Oʻzbekiston Respublikasi hududida atrof tabiiy muhit ifloslantirilganligi va chiqindilar joylashtirilganligi uchun kompensatsiya toʻlovlarini qoʻllash tartibi toʻgʻrisidagi Nizomning 7-bandi quyidagi mazmundagi kichik band bilan toʻldirilsin:
“j) mineral oʻgʻitlar va iqtisodiyot tarmoqlari uchun mahsulotlar ishlab chiqarish uchun xomashyo resurslari sifatida keyinchalik yana qayta ishlanadigan hamda maxsus jihozlangan saqlash joylari (uyumlar)da joylashtiriladigan fosforli oʻgʻitlar (fosfogips) ishlab chiqarish chiqindilari”.
11. Oʻzbekiston Respublikasi Adliya vazirligi “Oʻzkimyosanoat” DAK hamda Navoiy kon-metallurgiya kombinati bilan birgalikda ikki hafta muddatda amaldagi hukumat qarorlariga ushbu qarordan kelib chiqadigan oʻzgartish va qoʻshimchalar boʻyicha takliflar kiritsin.
12. Mazkur qarorning ijrosini nazorat qilish Oʻzbekiston Respublikasi Bosh vaziri Sh.M.Mirziyoyev zimmasiga yuklansin.
Oʻzbekiston Respublikasining Prezidenti I. KARIMOV
Toshkent sh.,
2006-yil 18-iyul,
PQ-420-son