Mustaqillik va ezgulik monumenti toʻgʻrisida (PQ-275-son)

03.02.2006

Oʻzbekiston Respublikasi Prezidentining

Qarori

Vatanimiz poytaxti – Toshkent shahridagi Mustaqillik maydoni xalqimiz ozodligining, ajdodlarimiz asrlar davomida orziqib kutgan va muttasil intilib yashagan, bugungi avlodlarga nasib etgan eng ulugʻ, eng aziz neʼmat boʻlmish istiqlolimizning muqaddas ramzidir.

Keyingi yillarda Mustaqillik maydoni va unga tutash hududda keng koʻlamdagi qurilish va obodonlashtirish ishlari amalga oshirildi. Vazirlar Mahkamasi binosi tubdan qayta taʼmirlandi. Senat binosi, Ezgulik arkasi, Tasviriy sanʼat galereyasi kabi muxtasham meʼmoriy inshootlar, yashil maydon va xiyobonlar barpo etildi. Ayni vaqtda yangi, Maʼmuriy bino, Biznes markazi qurilishi nihoyasiga yetmoqda.

Bunday katta bunyodkorlik ishlari tufayli bugungi kunda bu maskanning nafaqat qiyofasi oʻzgargani, balki uning butunlay yangicha maʼno-mazmun kasb etganini taʼkidlash lozim.

Mustaqillik maydonining ijtimoiy-siyosiy hayotimizda tutgan muhim oʻrni va ahamiyatini inobatga olib hamda xalqimiz, ayniqsa, yosh avlod qalbi va ongiga istiqlol gʻoyalarini, milliy gʻurur va iftixor, vatanparvarlik tuygʻularini yanada chuqurroq singdirish, qalbimiz turida ayol zotiga boʻlgan yuksak hurmat-ehtirom, taʼzim va tashakkurimizni yana bir bor yorqin ifodalash maqsadida:

1. Respublika “Maʼnaviyat va maʼrifat” markazi, Oʻzbekiston Yozuvchilar uyushmasi, “Mahalla” jamgʻarmasi, “Kamolot” yoshlar ijtimoiy harakati, Oʻzbekiston Badiiy akademiyasi va keng jamoatchilikning Mustaqillik maydonida bunyod etilgan, oʻzida Mustaqillik haykali va Baxtiyor ona siymosini mujassam etgan yangi monumentga Mustaqillik va ezgulik monumenti deb nom berish toʻgʻrisidagi taklifi maʼqullansin.

2. Oʻzbekiston Respublikasining umumxalq bayramlari hamda davlat miqyosidagi boshqa tantanali marosimlarda (1-ilova) Mustaqillik va ezgulik monumenti poyiga gulchambar qoʻyish rasmiy marosimi joriy etilsin.

3. Oʻzbekistonga tashrif buyuradigan chet el davlatlari rahbarlari, hukumat boshliqlari, xorijiy delegatsiyalar vakillari va boshqa rasmiy mehmonlarning davlat protokoliga kiritilgan holatlarda Mustaqillik va ezgulik monumenti poyiga gulchambar qoʻyish marosimining tartibi tasdiqlansin (2-ilova).

4. Mustaqil taraqqiyotimiz, milliy qadriyatlarimiz bilan bogʻliq muhim sanalar, kasb bayramlarini nishonlash, tantana va anjumanlar oʻtkazish munosabati bilan Mustaqillik va ezgulik monumenti poyiga gulchambar qoʻyish rasmiy marosimi, Toshkent shahar hokimligi bilan kelishilgan holda, belgilangan tartibda amalga oshirilishi maʼlumot uchun qabul qilinsin.

5. Toshkent shahar hokimligi (A. Toʻxtayev) “Oʻzbekturizm” milliy kompaniyasi (R. Qurbonov) bilan birgalikda, poytaxt aholisi va mehmonlarining, sayyohlik guruhlarining Mustaqillik maydoni, Mustaqillik va ezgulik monumenti, Xotira xiyobonini ziyorat qilishi uchun zarur shart-sharoitlar yaratilishini taʼminlansin.

6. Oʻzbekiston Matbuot va axborot agentligi (B. Alimov) mamlakatimiz aholisi va chet ellik mehmonlar uchun “Mustaqillik maydoni” deb nomlangan rangli-bezakli otkritka va bukletlarni nashr etsin.

7. Oʻzbekiston Milliy teleradiokompaniyasi, Oʻzbekiston Milliy axborot agentligi va respublika ommaviy axborot vositalariga Mustaqillik maydonida amalga oshirilgan ishlar, bu yerda oʻtkaziladigan tadbirlarni muntazam ravishda yoritib borish tavsiya etilsin.

8. Mazkur qarorning ijrosini nazorat qilish Oʻzbekiston Respublikasi Bosh vaziri Sh. Mirziyoyev zimmasiga yuklansin.

Oʻzbekiston Respublikasining Prezidenti I. KARIMOV

Toshkent sh.,

2006-yil 3-fevral,

PQ-275-son

Oʻzbekistan Respublikasi Prezidentining 2006-yil 3-fevraldagi 275-son qaroriga 1-ILOVA

Oʻzbekiston Respublikasining Mustaqillik va ezgulik monumenti poyiga gulchambar qoʻyish marosimi oʻtkaziladigan umumxalq bayramlari

- 14-yanvar – Vatan himoyachilari kuni;

- 31-avgust – Mustaqillik kuni;

- 8-dekabr – Konstitutsiya kuni.

Eslatma:

- 14-yanvar – Vatan himoyachilari kuni Oʻzbekistan Qurolli Kuchlari va huquq-tartibot idoralari tomonidan gulchambar qoʻyiladi;

- 31-avgust – Mustaqillik kuni Oʻzbekistan Respublikasi Prezidenti tomonidan gulchambar qoʻyiladi;

- 8-dekabr – Konstitutsiya kuni Oʻzbekistan Respublikasi Oliy Majlisi Senati va Qonunchilik palatasi hamda jamoatchilik vakillari tomonidan gulchambar qoʻyiladi;

- 9-may – Xotira va kadrlash kuni gulchambar qoʻyish marosimi Motamsaro ona haykali poyida belgilangan tartibda amalga oshiriladi;

- gulchambar qoʻyish marosimida 90 x110 santimetr hajmidagi gulli savat qoʻyish tavsiya etiladi.

Oʻzbekiston Respublikasi Prezidentining 2006-yil 3-fevraldagi 275-son qaroriga 2-ILOVA

Oʻzbekistonga tashrif buyuradigan chet el davlatlari rahbarlari, hukumat boshliqlari, xorijiy delegatsiyalar vakillari va boshqa rasmiy mehmonlarning davlat protokoliga kiritilgan holatlarda Mustaqillik va ezgulik monumenti poyiga gulchambar qoʻyish marosimini oʻtkazish tartibi

Mustaqillik va ezgulik monumentiga olib boradigan zinapoya oldidagi maydonchaga Yuksak martabali mehmon nomidan gul solingan savat qoʻyiladi.

Monument poyiga olib boradigan zinapoyaning ikki tarafida faxriy qorovul rotasi askarlari saf tortadi.

- Yuksak martabali mehmon Oʻzbekiston Respublikasi Hukumati vakili hamrohligida Mustaqillik va ezgulik monumenti oldiga keladi, bu yerda ularni Toshkent shahar hokimi kutib oladi;

- Toshkent shahar hokimi Yuksak martabali mehmonni gul solingan savat yonidagi maxsus ajratilgan joyni egallashga taklif qiladi (1);

- hamrohlik qiluvchi shaxslar va delegatsiya aʼzolari Yuksak martabali mehmonning orqa tarafida saf tortadi va marosim davomida oʻz joyida turadi (2);

- faxriy qorovul komandiri “Qorovul!” deb buyruq bergan holda Yuksak martabali mehmonni qutlaydi;

- faxriy qorovul rotasi askarlari gul solingan savatni koʻtarib, tantanali qadamlar bilan Mustaqillik va ezgulik monumentiga qarab yoʻl oladi;

- harbiy orkestr tantanali musiqani ijro etadi;

- Yuksak martabali mehmon askarlar ortidan monumentga qarab yoʻl oladi;

- faxriy qorovul gul solingan savatni Mustaqillik va ezgulik monumenti poyiga qoʻyadi va chetga oʻtadi;

- Yuksak martabali mehmon gulchambar oldiga keladi va unga bogʻlangan lentani toʻgʻrilab, yengil bosh egib, hurmat bajo keltiradi (3);

- marosim yakuniga yetganidan soʻng Yuksak martabali mehmon mashina oldiga qaytadi, Toshkent shahar hokimi bilan xayrlashadi;

- Yuksak martabali mehmonning Oʻzbekiston Respublikasi Hukumati vakili hamrohligida maydondan joʻnab ketishi tashrif dasturiga muvofiq amalga oshiriladi.