Osiyo taraqqiyot banki ishtirokida “ayollar va bolalar sogʻligini mustahkamlash” loyihasini amalga oshirish chora-tadbirlari toʻgʻrisida (515-son)

02.11.2004

Oʻzbekiston Respublikasi Vazirlar Mahkamasining

qarori

Onalik va bolalikni muhofaza qilish tizimini takomillashtirish, tugʻuruqqa koʻmaklashuvchi muassasalar, gematologiya xizmatining moddiy-texnika bazasini mustahkamlash, shuningdek Osiyo taraqqiyot banki bilan hamkorlikni yanada kengaytirish maqsadida Vazirlar Mahkamasi qaror qiladi:

1. Quyidagilar:

Osiyo taraqqiyot banki Direktorlar kengashi “Ayollar va bolalar sogʻligini mustahkamlash” loyihasini (keyingi oʻrinlarda loyiha deb ataladi) amalga oshirish uchun Oʻzbekiston Respublikasiga qarz berilishini maʼqullaganligi;

loyihaning umumiy qiymati 70,0 mln AQSH dollari miqdorida belgilanganligi va uni moliyalashtirishda tomonlarning ishtiroki sxemasi, shu jumladan Osiyo taraqqiyot bankining besh yillik imtiyozli davrni oʻz ichiga olgan holda 25 yil muddatda 1-ilovaga* muvofiq moliyalashtirish rejasiga muvofiq qaytariladigan 40,0 mln AQSH dollari miqdoridagi qarzi kelishilganligi;

* 1-ilova berilmaydi.

loyiha doirasida mamlakatning 6 tajriba mintaqasida (Qoraqalpogʻiston Respublikasi, Buxoro, Qashqadaryo, Toshkent, Fargʻona va Xorazm viloyatlari) onalik va bolalikni muhofaza qilish xizmatlarini, shuningdek gematologiya markazlari va qon quyish stansiyalarini milliy darajada takomillashtirish nazarda tutilganligi;

loyihani amalga oshirish besh yil muddatga belgilanganligi;

loyihani amalga oshirish davrida Osiyo taraqqiyot banki qarzi boʻyicha foizlar va vositachilik haqini toʻlash qarz mablagʻlari hisobiga amalga oshirilishi maʼlumot uchun qabul qilinsin.

2. Belgilansinki:

Oʻzbekiston Respublikasi Sogʻliqni saqlash vazirligi loyiha amalga oshirilishi uchun masʼul boʻlgan ijro etuvchi agentlik hisoblanadi;

Osiyo taraqqiyot bankining qarzi boʻyicha asosiy qarzni qaytarish, u boʻyicha foizlar toʻlash bilan bogʻliq xarajatlar davlat budjeti mablagʻlari hisobiga amalga oshiriladi.

Loyihani amalga oshirish uchun ajratilayotgan Osiyo taraqqiyot bankining qarzini qaytarish jadvali 2-ilovaga* muvofiq tasdiqlansin.

* 2-ilova berilmaydi.

3. Oʻzbekiston Respublikasi Bosh vazirining oʻrinbosari R.S. Azimov Osiyo taraqqiyot banki bilan qarz bitimini Oʻzbekiston Respublikasi Hukumati nomidan imzolashga vakil qilinsin.

4. Oʻzbekiston Respublikasi Adliya vazirligi imzolangan qarz bitimi taqdim etilgandan keyin bir hafta muddatda u boʻyicha belgilangan tartibda yuridik xulosa bersin.

5. Oʻzbekiston Respublikasi Sogʻliqni saqlash vazirligiga quyidagi qoʻshimcha vazifalar yuklansin:

umumiy muvofiqlashtirish, koʻrsatib oʻtilgan loyihani amalga oshirish boʻyicha asosiy tadbirlarni, shuningdek loyihaning yillik budjetini tasdiqlash;

loyiha amalga oshirilishi va uning mablagʻlaridan foydalanishning iqtisodiy samaradorligi ustidan muntazam nazorat qilish;

loyihani amalga oshirish doirasida tovarlar, ishlar (xizmatlar) xarid qilish uchun baholash va tender komissiyalari tarkiblarini tasdiqlash vazifalari yuklansin.

6. Oʻzbekiston Respublikasi Sogʻliqni saqlash vazirligi:

Osiyo taraqqiyot banki bilan tuzilgan qarz bitimi shartlariga muvofiq bitim imzolangandan keyin bir hafta muddatda Osiyo taraqqiyot bankining koʻrsatib oʻtilgan loyihasini va Jahon bankining “Salomatlik-2” loyihasini amalga oshirish boʻyicha qoʻshma byuro tashkil etsin;

Osiyo taraqqiyot banki loyihasini amalga oshirish qismi boʻyicha byuroning taʼminoti xarajatlarini moliyalashtirish manbalari etib Osiyo taraqqiyot banki loyihasi mablagʻlarini belgilasin;

loyihaning texnik-iqtisodiy hisoblari ishlab chiqilishini va belgilangan tartibda tasdiqlash uchun kiritilishini taʼminlasin.

7. Qoraqalpogʻiston Respublikasi Vazirlar Kengashi, Buxoro, Qashqadaryo, Toshkent, Fargʻona va Xorazm viloyatlari hokimliklari:

Qoraqalpogʻiston Respublikasi Vazirlar Kengashi, viloyat sogʻliqni saqlash boshqarmalari huzurida xodimlarning shtatda belgilangan soni doirasida ikki kishidan iborat loyihani amalga oshirish boʻyicha hududiy byuro tashkil etsinlar;

loyiha doirasida jihozlar xarid qilish boshlangunga qadar tuman markaziy kasalxonalarining bolalar va tugʻuruq boʻlimlari (komplekslari)ni hamda viloyat tugʻuruq komplekslarini taʼmirlash-qurish ishlari oʻz vaqtida bajarilishini taʼminlasinlar.

8. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari loyiha doirasida jihozlar xarid qilish boshlangunga qadar qon quyish stansiyalarini taʼmirlash-qurish ishlari oʻz vaqtida bajarilishini taʼminlasinlar.

9. Oʻzbekiston Respublikasi Iqtisodiyot vazirligi, Moliya vazirligi 2005-yildan boshlab har yili investitsiya dasturlarini shakllantirishda loyihani amalga oshirish boʻyicha Oʻzbekiston Respublikasi ulushini moliyalashtirish uchun davlat budjetidan zarur mablagʻlar ajratishni nazarda tutsinlar.

10. Oʻzbekiston Respublikasi Tashqi ishlar vazirligi Oʻzbekiston Respublikasi Sogʻliqni saqlash vazirligi buyurtmanomalariga binoan loyihani amalga oshirishda qatnashuvchi xorijiy mutaxassislar uchun kelish vizalari konsullik yigʻimlari undirilmasdan rasmiylashtirilishini belgilangan tartibda taʼminlasin.

11. Oʻzbekiston Respublikasi Ichki ishlar vazirligi Oʻzbekiston Respublikasi Sogʻliqni saqlash vazirligi buyurtmanomalariga binoan loyihani amalga oshirishda qatnashuvchi xorijiy mutaxassislarga, ularni davlat boji toʻlovidan ozod qilgan holda, koʻp martalik vizalar berilishini hamda vizalar muddati uzaytirilishini, shuningdek ularni vaqtinchalik roʻyxatdan oʻtkazishni va vaqtinchalik roʻyxatdan oʻtkazish muddati uzaytirilishini taʼminlasin.

12. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosarlari R.S. Azimov va R.S. Qosimov zimmasiga yuklansin.

Vazirlar Mahkamasining Raisi I. KARIMOV

Toshkent sh.,

2004-yil 2-noyabr,

515-son