Toshkent shahrida koʻp xonadonli uylarning umumiy mulkini yaxshi holatda saqlashda va kommunal xizmatlar toʻlovlarini yigʻish uchun yordam berishda faol ishtirok etuvchi shaxslarni ragʻbatlantirish tartibi toʻgʻrisida vaqtinchalik nizomni tasdiqlash haqida (1661-son)
12.03.2007
Oʻzbekiston “Oʻzkommunxizmat” agentligi Bosh direktorining
Buyrugʻi
[Oʻzbekiston Respublikasi Adliya vazirligi tomonidan 2007-yil 12-martda 1661-son bilan davlat roʻyxatidan oʻtkazildi]
Oʻzbekiston Respublikasi Vazirlar Mahkamasining 2006-yil 12-apreldagi 64-son “Xususiy uy-joy mulkdorlarining shirkatlarini yanada rivojlantirish va turar joylarga xizmatlar koʻrsatishning aniq bozorini shakllantirish chora-tadbirlari toʻgʻrisida”gi qaroriga muvofiq buyuraman:
1. Manfaatdor vazirlik va idoralar bilan kelishilgan Toshkent shahrida koʻp xonadonli uylarning umumiy mulkini yaxshi holatda saqlashda va kommunal xizmatlar toʻlovlarini yigʻish uchun yordam berishda faol ishtirok etuvchi shaxslarni ragʻbatlantirish tartibi toʻgʻrisida Vaqtinchalik nizom tasdiqlansin.
2. Mazkur buyruq Oʻzbekiston Respublikasi Adliya vazirligida davlat roʻyxatidan oʻtkazilganidan soʻng oʻn kundan keyin kuchga kiritilsin.
3. Ushbu buyruqning bajarilishini nazorat qilish Bosh direktorning oʻrinbosari O.Y. Axmedov zimmasiga yuklansin.
“Oʻzkommunxizmat” agentligi Bosh direktori U. XALMUXAMEDOV
Toshkent sh.,
2007-yil 19-fevral,
15-son
“Oʻzkommunxizmat” agentligi bosh direktorining 2007-yil 19-fevraldagi 15-son buyrugʻi bilan TASDIQLANGAN
Toshkent shahrida koʻp xonadonli uylarning umumiy mulkini yaxshi holatda saqlashda va kommunal xizmatlar toʻlovlarini yigʻish uchun yordam berishda faol ishtirok etuvchi shaxslarni ragʻbatlantirish tartibi toʻgʻrisida
VAQTINChALIK NIZOM
§ 1. Umumiy qoidalar
1. Ushbu Vaqtinchalik nizom Oʻzbekiston Respublikasining “Xususiy uy-joy mulkdorlarining shirkatlari toʻgʻrisida”gi Qonuniga asosan Toshkent shahrida koʻp xonadonli uylarning umumiy mulkini yaxshi holatda saqlashda va kommunal xizmatlar toʻlovlarini yigʻish uchun koʻmaklashishda faol ishtirok etuvchi shaxslarni ragʻbatlantirish tartibini belgilaydi.
2. Mazkur Vaqtinchalik nizom kommunal xizmatlar uchun toʻlovlarni yigʻishga koʻmaklashgani uchun kommunal xizmatlarni koʻrsatuvchi korxona va tashkilotlardan (“Toshgaz” boshqarmasi, “Toshissiqquvvati” IChB, “Suvsoz tresti” DUKT, “Toshkent shahar elektr tarmoqlari” OAJ) ajratmalar shaklida tushadigan pul mablagʻlarini shartnoma asosida jamlash istagini bildirgan Toshkent shahar xususiy uy-joy mulkdorlari shirkatlari (keyingi oʻrinlarda — XUJMSh) va mahalla fuqarolari yigʻinlariga tatbiq qilinadi.
3. Kommunal xizmatlar koʻrsatuvchi korxona va tashkilotlardan tushgan ajratmalar “Mahalla” jamgʻarmasining Toshkent shahar boʻlinmasi (keyingi oʻrinlarda — “Mahalla” jamgʻarmasining shahar boʻlinmasi) ikkilamchi depozit hisob raqamida (keyingi oʻrinlarda — maxsus hisob raqam) jamlanadi.
4. Koʻp xonadonli uylarning umumiy mulkini yaxshi holatda saqlashda va kommunal xizmatlar toʻlovlarini yigʻish uchun koʻmaklashishda faol ishtirok etuvchi shaxslarni ragʻbatlantirish tartibi “Mahalla” jamgʻarmasining shahar boʻlinmasi hisob raqamida jamlangan pul mablagʻlari hisobidan mukofot puli toʻlash yoʻli bilan amalga oshiriladi.
5. Mukofot puli mablagʻlari toʻlashning eng koʻp miqdori Toshkent shahar hokimi tomonidan “Mahalla” jamgʻarmasining shahar boʻlinmasi bilan kelishilgan holda belgilanadi.
§ 2. Mukofot puli mablagʻlarini shakllantirish tartibi
6. Kommunal xizmatlar uchun toʻlovlarni yigʻishga koʻmaklashishdan tushayotgan pul mablagʻlarini jamlash shartnomasi XUJMSh va mahalla fuqarolari yigʻini, kommunal xizmatlar koʻrsatuvchi korxona va tashkilotlar hamda “Mahalla” jamgʻarmasining shahar boʻlinmasi oʻrtasida tuziladi.
7. Koʻrsatilgan kommunal xizmatlar uchun toʻlovlar boʻyicha prognozli tushumlarning 75% dan ortigʻi bajarilgan taqdirda kommunal xizmatlarni koʻrsatuvchi korxona va tashkilotlar amalda kelib tushgan pul mablagʻlarining 7% gacha boʻlgan miqdorini “Mahalla” jamgʻarmasining shahar boʻlinmasi hisob raqamiga oʻtkazadi.
8. Kommunal xizmatlarini koʻrsatuvchi korxona va tashkilotlar ajratmalarni xatlov va avval hisobga olinmagan isteʼmolchilarni aniqlashdan kelib tushgan qoʻshimcha daromadlardan, shuningdek muddati oʻtgan debitor qarzdorlikni undirish hisobidan amalga oshiradi.
9. Kommunal xizmatlarini koʻrsatuvchi korxona va tashkilotlarga ajratmalar uchun asos boʻlib oʻtgan oydagi prognozli tushumlarning bajarilishi yuzasidan hisobot hisoblanadi.
Hisobot Toshkent shahar hokimligi tomonidan kommunal xizmatlar koʻrsatuvchi korxona va tashkilotlar bilan hamkorlikda mazkur Vaqtinchalik nizomning 1-ilovasiga muvofiq oʻtgan oydan keyingi oyning 15-kunidan kechiktirmay har oyda tuziladi.
10. Kommunal xizmatlar uchun toʻlovlar boʻyicha tushumlarning prognozi Toshkent shahar hokimligi tomonidan mazkur Vaqtinchalik nizomning 2-ilovasiga muvofiq har oyning 5-kuniga qadar belgilanadi. Bunda, tabiiy gaz va elektr taʼminoti boʻyicha toʻlovlarning prognoz tushumlari “Oʻztransgaz” AK va “Oʻzbekenergo” DAK bilan kelishilgan holda belgilanadi.
11. “Mahalla” jamgʻarmasining shahar boʻlinmasi maxsus hisob raqamida jamlangan pul mablagʻlari mazkur Vaqtinchalik nizomning 3-ilovasida nazarda tutilgan hisobotlarga asosan “Mahalla” jamgʻarmasining tuman boʻlimlari maxsus hisob raqamiga oʻtkaziladi.
§ 3. Mukofot pul mablagʻlarini berish tartibi
12. Koʻp xonadonli uylarning umumiy mulkini yaxshi holatda saqlashda va kommunal xizmatlar toʻlovlarini yigʻish uchun koʻmaklashishda faol ishtirok etuvchi shaxslarga mukofot pul mablagʻlarini berish oʻtgan oyning yakunlari boʻyicha har oyda bir marotaba amalga oshiriladi.
13. Mahalla fuqarolar yigʻinlari bir oyda bajarilgan ish natijalari boʻyicha har oyda oʻtgan oydan keyingi oyning 20-kunidan kechiktirmay tuman hokimiyati vakili va XUJMSh raislarining majburiy ishtirokida yigʻilish oʻtkazadi va koʻp xonadonli uylarning umumiy mulkini yaxshi holatda saqlashda va kommunal xizmatlar toʻlovlarini yigʻish uchun koʻmaklashishda faol ishtirok etgan shaxslarni mukofotlash toʻgʻrisida qaror qabul qiladi.
Mukofotlanuvchilar soni va mukofot pul mablagʻi toʻlovining summasi toʻgʻrisidagi maʼlumot fuqarolar yigʻini qarori bilan tasdiqlanadi va mazkur Vaqtinchalik nizomning 4-ilovasiga muvofiq buyurtma shaklida “Mahalla” jamgʻarmasining tuman boʻlinmasiga taqdim qilinadi.
14. “Mahalla” jamgʻarmasining tuman boʻlinmalari taqdim qilingan buyurtmalarga muvofiq 3 ish kuni davomida buyurtmada koʻrsatilgan shaxslarni mukofotlash uchun fuqarolar yigʻinining hisob raqamiga pul mablagʻlarini oʻtkazadi.
15. Toshkent shahrining tuman hokimliklari tomonidan bir oyda bajarilgan ish natijalari boʻyicha har oyda oʻtgan oydan keyingi oyning 20-kunidan kechiktirmay fuqarolar yigʻini raislarining majburiy ishtirokida yigʻilish oʻtkazadi va fuqarolar yigʻini raislarini mukofotlash toʻgʻrisida qaror qabul qiladi.
Mukofotlanadigan shaxslarning roʻyxati oʻtgan oydan keyingi oyning 20-kunidan kechiktirmay “Mahalla” jamgʻarmasining tuman boʻlinmalariga mazkur Vaqtinchalik nizomning 5-ilovasiga muvofiq taqdim etiladi. Fuqarolar yigʻini raislariga mukofot pul mablagʻlari mazkur roʻyxat asosida “Mahalla” jamgʻarmasining tuman boʻlinmalari tomonidan roʻyxat olingandan soʻng 3 ish kuni davomida toʻlanadi.
§ 4. Mablagʻlardan maqsadli foydalanish ustidan nazorat
16. Mablagʻlardan maqsadli foydalanishni nazorat qilish Toshkent shahar hokimligi va “Mahalla” jamgʻarmasining shahar boʻlinmasi zimmasiga yuklatiladi.
17. “Oʻzkommunxizmat” agentligi Toshkent shahar hokimligi va Respublika “Mahalla” jamgʻarmasi bilan hamkorlikda ushbu mexanizmning samaradorligi yuzasidan monitoring oʻtkazadi.
§ 5. Yakuniy qoidalar
18. Mazkur Vaqtinchalik nizom kuchga kirgan kundan boshlab bir yil muddat davomida amalda boʻladi.
19. Mazkur Vaqtinchalik nizom Oʻzbekiston Respublikasi Moliya vazirligi, Respublika “Mahalla” jamgʻarmasi, “Oʻzbekenergo” DAK, “Oʻztransgaz” AK hamda Toshkent shahar hokimligi bilan kelishilgan.
Moliya vazirining birinchi oʻrinbosari B. AShRAFXONOV
Toshkent sh.,
2007-yil 16-fevral
Respublika “Mahalla” jamgʻarmasi raisi A. AXMEDOV
Toshkent sh.,
2007-yil 16-fevral
“Oʻzbekenergo” Davlat aksiyadorlik kompaniyasi boshqaruvi raisi B. TEShABAYEV
Toshkent sh.,
2007-yil 17-fevral
“Oʻztransgaz” Aksiyadorlik kompaniyasi bosh direktori I. VAGAPOV
Toshkent sh.,
2007-yil 17-fevral
Toshkent shahar hokimi A. TOʻXTAYEV
Toshkent sh.,
2007-yil 16-fevral
Toshkent shahrida koʻp xonadonli uylarning umumiy mulkini yaxshi holatda saqlashda va kommunal xizmat toʻlovlarini yigʻish uchun yordam berishda faol ishtirok etuvchi shaxslarni ragʻbatlantirish tartibi toʻgʻrisida Vaqtinchalik nizomga 1-ILOVA
Toshkent shahrida koʻp xonadonli uylarning umumiy mulkini yaxshi holatda saqlashda va kommunal xizmat toʻlovlarini yigʻish uchun yordam berishda faol ishtirok etuvchi shaxslarni ragʻbatlantirish tartibi toʻgʻrisida Vaqtinchalik nizomga 2-ILOVA
* Tabiiy gaz va elektr taʼminoti boʻyicha tushumlar prognozi “Oʻztransgaz” AK va “Oʻzbekenergo” DAK bilan kelishilgan xolda belgilanadi.
Toshkent shahrida koʻp xonadonli uylarning umumiy mulkini yaxshi holatda saqlashda va kommunal xizmat toʻlovlarini yigʻish uchun yordam berishda faol ishtirok etuvchi shaxslarni ragʻbatlantirish tartibi toʻgʻrisida Vaqtinchalik nizomga 3-ILOVA
Toshkent shahrida koʻp xonadonli uylarning umumiy mulkini yaxshi holatda saqlashda va kommunal xizmat toʻlovlarini yigʻish uchun yordam berishda faol ishtirok etuvchi shaxslarni ragʻbatlantirish tartibi toʻgʻrisida Vaqtinchalik nizomga 4-ILOVA
Izoh: ushbu jadval toʻldirilayotganda mahalla fuqarolar yigʻinining bank rekvizitlari koʻrsatilishi lozim.
Toshkent shahrida koʻp xonadonli uylarning umumiy mulkini yaxshi holatda saqlashda va kommunal xizmat toʻlovlarini yigʻish uchun yordam berishda faol ishtirok etuvchi shaxslarni ragʻbatlantirish tartibi toʻgʻrisida Vaqtinchalik nizomga 5-ILOVA
(Oʻzbekiston Respublikasi qonun hujjatlari toʻplami, 2007-y., 11-son, 100-modda)