Yaponiya Hukumatining begʻaraz yordamidan samarali foydalanish chora-tadbirlari toʻgʻrisida (605-son)

23.12.2004

Oʻzbekiston Respublikasi Vazirlar Mahkamasining

qarori

“Samarqand—Gʻuzor—Termiz avtomobil yoʻlini saqlash va taʼmirlash” loyihasini amalga oshirish doirasida yoʻl-qurilish texnikasi va asbob-uskunalar yetkazib berish uchun Yaponiya hukumati tomonidan berilayotgan 976 mln. Yaponiya yeni miqdoridagi begʻaraz yordamni jalb etish hamda undan samarali foydalanishni taʼminlash maqsadida Vazirlar Mahkamasi qaror qiladi:

1. Oʻzbekiston Respublikasi Bosh vazirining oʻrinbosari E.M.Gʻaniyev Ayirboshlash notasini Oʻzbekiston Respublikasi hukumati nomidan imzolashga vakil qilinsin.

2. “Oʻzavtoyoʻl” davlat-aksiyadorlik kompaniyasi yoʻl-qurilish texnikasi va asbob-uskunalar yetkazib berish uchun Yaponiya hukumati tomonidan berilayotgan begʻaraz yordamni oluvchi etib belgilansin.

“Oʻzavtoyoʻl” davlat-aksiyadorlik kompaniyasi Oʻzbekiston Respublikasi Tashqi iqtisodiy aloqalar agentligi bilan birgalikda bir oy muddatda begʻaraz yordam doirasida olinadigan zarur yoʻl-qurilish texnikasi va asbob-uskunalarning aniq roʻyxatini Yaponiya tomoni bilan ishlab chiqsin.

“Oʻzavtoyoʻl” davlat-aksiyadorlik kompaniyasi kelib tushayotgan yoʻl-qurilish texnikasi va asbob-uskunalarning saqlanishini hamda qatʼiy maqsadli foydalanilishini taʼminlasin.

3. Quyidagilarga:

begʻaraz asosda ajratilayotgan mablagʻlarni olish va ularga xizmat koʻrsatish uchun barcha zarur tartibotlarni Yaponiya tomoni bilan kelishilgan muddatlarda rasmiylashtirish — Oʻzbekiston Respublikasi Tashqi iqtisodiy aloqalar, investitsiyalar va savdo vazirligi va “Oʻzavtoyoʻl” davlat aksiyadorlik kompaniyasiga;

koʻrsatib oʻtilgan begʻaraz yordamga hisob-kitob xizmati koʻrsatish — Oʻzbekiston Respublikasi Tashqi iqtisodiy faoliyat milliy bankiga yuklansin.

4. “Oʻzavtoyoʻl” davlat-aksiyadorlik kompaniyasi Yaponiya hukumatining koʻrsatib oʻtilgan begʻaraz yordami hisobiga Oʻzbekiston Respublikasiga olib kelinadigan asbob-uskunalar, avtomashinalar, texnikalar, mexanizmlar hamda ularni yetkazib berish uchun zarur boʻlgan xizmatlar uchun bojxona toʻlovlari (bojxonada rasmiylashtirish yigʻimlaridan tashqari) toʻlashdan ozod qilinsin.

5. Belgilansinki, Yaponiya hukumatining begʻaraz yordami hisobiga kelib tushayotgan yoʻl-qurilish texnikasi va asbob-uskunalardan daromad (foyda) soligʻi undirilmaydi.

6. Oʻzbekiston Respublikasi Tashqi ishlar vazirligi “Oʻzavtoyoʻl” davlat-aksiyadorlik kompaniyasi buyurtmanomalariga binoan loyihani amalga oshirishda qatnashuvchi xorijiy mutaxassislarga vizalar konsullik va boshqa yigʻimlar undirilmasdan rasmiylashtirilishini taʼminlasin.

7. Oʻzbekiston Respublikasi Ichki ishlar vazirligi “Oʻzavtoyoʻl” davlat-aksiyadorlik kompaniyasi buyurtmanomalariga binoan loyihaning xorijiy qatnashchilarini davlat boji undirmasdan vaqtinchalik roʻyxatdan oʻtkazishni va vaqtinchalik roʻyxatdan oʻtkazish muddati uzaytirilishini taʼminlasin.

8. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari E.M. Gʻaniyev zimmasiga yuklansin.

Vazirlar Mahkamasining Raisi I. KARIMOV

Toshkent sh.,

2004-yil 23-dekabr,

605-son