“Normativ-huquqiy hujjatni davlat reyestridan chiqarish toʻgʻrisida” (1284-1-son)

22.02.2007

Oʻzbekiston Respublikasi Adliya vazirining

Buyrugʻi

[Oʻzbekiston Respublikasi Adliya vazirligi tomonidan 2007-yil 22-fevralda 1284-1-son bilan davlat roʻyxatidan oʻtkazildi]

Oʻzbekiston Respublikasi Vazirlar Mahkamasining “Kapital qurilishda xoʻjalik munosabatlari mexanizmini takomillashtirish chora-tadbirlari toʻgʻrisida” 2003-yil 12-sentabrdagi 395-son qaroriga muvofiq 2006-yil 1-yanvargacha boʻlgan davrda pudrat qurilish tashkilotlari tomonidan qurilish texnikasi va asbob-uskunalar sotib olishga yoʻnaltiriladigan mablagʻlari daromad (foyda) soligʻini hisoblab chiqishda soliq solinadigan bazadan chiqarilishi belgilangan. Mazkur imtiyoz uchun belgilangan muddat oʻtganligini inobatga olib hamda Oʻzbekiston Respublikasi Vazirlar Mahkamasining “Vazirliklar, davlat qoʻmitalari va idoralar meʼyoriy hujjatlarining qonuniyligini taʼminlash toʻgʻrisida” 1997-yil 9-oktabrdagi 469-son qarori va “Vazirliklar, davlat qoʻmitalari va idoralar meʼyoriy hujjatlarini qabul qilish tartibini takomillashtirish toʻgʻrisida” 2000-yil 19-maydagi 197-son qaroriga asosan buyuraman:

1. Oʻzbekiston Respublikasi Adliya vazirligida 2003-yil 30-oktabrda 1284-son bilan davlat roʻyxatidan oʻtkazilgan Oʻzbekiston Respublikasi Moliya vazirligi, Davlat soliq qoʻmitasi va Davlat arxitektura va qurilish qoʻmitasining “Pudrat qurilish tashkilotlarining qurilish texnikasi va asbob-uskunalarini sotib olishga yoʻnaltiriladigan mablagʻlarini daromad (foyda) soligʻi bazasidan kamaytirish boʻyicha imtiyozni qoʻllash tartibi toʻgʻrisidagi nizomni tasdiqlash haqida” 2003-yil 14-oktabrdagi 117, 2003-70 va 5-son qarori davlat reyestridan chiqarilsin va bu haqda Oʻzbekiston Respublikasi vazirliklari, davlat qoʻmitalari va idoralari normativ-huquqiy hujjatlarining Davlat reyestriga tegishli yozuv kiritilsin.

2. Oʻzbekiston Respublikasi Moliya vazirligi, Davlat soliq qoʻmitasi va Davlat arxitektura va qurilish qoʻmitasi mazkur hujjatning davlat reyestridan chiqarilganligini barcha manfaatdor shaxslar eʼtiboriga yetkazishi lozimligi maʼlumot uchun qabul qilinsin.

3. Idoraviy meʼyoriy hujjatlarni davlat roʻyxatidan oʻtkazish boshqarmasi (S. Sattarov) ushbu normativ-huquqiy hujjatni davlat reyestridan chiqarilganligini barcha manfaatdor shaxslar eʼtiboriga yetkazilishi ustidan nazoratni taʼminlasin.

4. Qonun hujjatlarini turkumlash va huquqiy axborot boshqarmasi (U. Ayubov) normativ-huquqiy hujjatni “Oʻzbekiston Respublikasi qonun hujjatlari toʻplami” — “Sobraniye zakonodatelstva Respubliki Uzbekistan”da nashr etilishini taʼminlasin.

5. Mazkur buyruqning bajarilishini nazorat qilish vazir oʻrinbosari E. Kanyazov zimmasiga yuklansin.

Adliya vaziri F. OTAXONOV

Toshkent sh.,

2007-yil 22-fevral,

35-mh-son