Ijara toʻgʻrisidagi Oʻzbekiston Respublikasining Qonunini amalga kiritish tartibi haqida (428-XII-son)

19.11.1991

Oʻzbekiston Respublikasi Oliy Kengashining

Qarori

Oʻzbekiston Respublikasi Oliy Kengashi qaror qiladi:

1. Oʻzbekiston Respublikasining “Ijara toʻgʻrisida” gi Qonuni eʼlon qilingan paytdan boshlab amalga kiritilsin.

2. Oʻzbekiston Respublikasi Prezidenti huzuridagi Vazirlar Mahkamasiga ikki oy muddat ichida:

— Oʻzbekiston Respublikasining qonun hujjatlarini Oʻzbekiston Respublikasining “Ijara toʻgʻrisida”gi Qonuniga muvofiqlashtirish haqidagi takliflarni Oʻzbekiston Respublikasining Oliy Kengashiga taqdim etish;

— Oʻzbekiston Respublikasi Hukumatining qarorlarini mazkur Qonunga muvofiqlashtirish, respublika vazirliklari, davlat qoʻmitalari va idoralari mazkur Qonunga zid boʻlgan oʻz normativ hujjatlarini qayta koʻrib chiqishlari va bekor qilishlarini taʼminlash;

— sotib olish va ijaraga topshirish yoʻl qoʻyilmaydigan yoki cheklanadigan korxonalar, birlashmalar, tashkilotlar, mol-mulklar va resurslar turlarining roʻyxatini belgilash va uni Oʻzbekiston Respublikasi Oliy Kengashining muhokamasiga kiritish topshirilsin.

3. Oʻzbekiston Respublikasining qonunlari Oʻzbekiston Respublikasining “Ijara toʻgʻrisida”gi Qonunga muvofiqlashtirilgunga qadar amaldagi qonunlar, basharti ular mazkur Qonunga zid kelmasa, qoʻllanaveradi.

4. Belgilab qoʻyilsinki, ushbu Qonun amalga kiritilguncha ijara munosabatlariga oʻtgan ijarachilar oʻz xoʻjalik faoliyatlarini tuzilgan ijara shartnomalariga muvofiq olib borishga haqlidirlar.

5. Oʻzbekiston Respublikasi Oliy Kengashi Rayosati 1989-yilning 29-dekabrida qabul qilgan “Oʻzbekiston Respublikasida ijara toʻgʻrisidagi Nizom haqida” gi Farmon (Oʻzbekiston Respublikasi Oliy Kengashining Vedomostlari, 1990-yil, № 1, 5-modda) oʻz kuchini yoʻqotgan deb hisoblansin.

6. Oʻzbekiston Respublikasi Prezidenti huzuridagi Vazirlar Mahkamasi xalq deputatlari mahalliy Sovetlari, ularning ijroiya idoralari ijaraga oʻtgan korxonalar (tashkilotlar) dan boʻshatilayotgan xodimlarni ish bilan taʼminlash masalalarini zarur boʻlsa koʻrib chiqsin, ularni qayta tayyorlash va malakasini oshirishni uyushtirsin.

7. Ushbu Qonunning ijrosini nazorat qilishni tashkil etish Oʻzbekiston Respublikasi Oliy Kengashining Iqtisodiy islohot, budjet siyosati va mahalliy oʻzini oʻzi boshqarish qoʻmitasi zimmasiga yuklansin.

Oʻzbekiston Respublikasi Oliy Kengashining Raisi Sh.YOʻLDOShEV

Toshkent sh.,

1991-yil 19-noyabr,

428-XII-son