Oʻzbekiston Respublikasida naqd pulsiz hisob-kitoblar toʻgʻrisidagi nizomga oʻzgartirishlar kiritish haqida (1122-4-son)

22.04.2006

Oʻzbekiston Respublikasi Markaziy banki Boshqaruvining

Qarori

[Oʻzbekiston Respublikasi Adliya vazirligi tomonidan 2006-yil 22-aprelda 1122-4-son bilan davlat roʻyxatidan oʻtkazilgan]

Oʻzbekiston Respublikasining “Oʻzbekiston Respublikasining Markaziy banki toʻgʻrisida”gi Qonuniga muvofiq Oʻzbekiston Respublikasi Markaziy banki Boshqaruvi qaror qiladi:

1. Oʻzbekiston Respublikasida naqd pulsiz hisob-kitoblar toʻgʻrisidagi nizomga (2002-yil 15-aprel, roʻyxat raqami 1122) ilovaga muvofiq oʻzgartirishlar kiritilsin.

2. Ushbu qaror Oʻzbekiston Respublikasi Adliya vazirligida davlat roʻyxatidan oʻtkazilgandan soʻng, 10 kundan keyin kuchga kiritilsin.

Markaziy bank Boshqaruvi raisi F. MULLAJONOV

Toshkent sh.,

2006-yil 8-aprel

9/5-son

Markaziy bank Boshqaruvining 2006-yil 8-apreldagi 9/5-sonli qaroriga ILOVA

Oʻzbekiston Respublikasida naqd pulsiz hisob-kitoblar toʻgʻrisidagi nizomga kiritilayotgan oʻzgartirishlar

1. 10-banddagi “Oʻzbekiston Respublikasi banklari oʻrtasida elektron toʻlovlar tizimi boʻyicha hisob-kitoblar yuritish toʻgʻrisida”gi Nizom (2001-yil 19-fevral, roʻyxat raqami 1010)” soʻzlari ““Markaziy bankning banklararo toʻlov tizimi orqali elektron toʻlovlarni amalga oshirish tartibi toʻgʻrisida”gi Nizom (2006-yil 14-fevral, roʻyxat raqami 1545)” soʻzlari bilan almashtirilsin.

2. 41-bandning “g” kichik bandi quyidagi tahrirda bayon etilsin:

“g) Oʻzbekiston Respublikasi Moliya vazirligi:

respublika budjetidan moliyalashtirish jarayonida belgilangandan ortiqcha oʻtkazilgan mablagʻlarni qaytarish uchun budjet tashkilotlarining budjet hisobvaraqlariga;

yuqori moliya organlari — quyi moliya organlarining budjet hisobvaraqlariga;

Oʻzbekiston Respublikasi Monopoliyadan chiqarish, raqobat va tadbirkorlikni qoʻllab-quvvatlash davlat qoʻmitasi tomonidan taqdim etilgan hujjatlar boʻyicha noqonuniy olingan mablagʻlar va jarimalarni undirib olish uchun xoʻjalik yurituvchi subyektlarning bank hisobvaraqlariga;

Oʻzbekiston Respublikasi kafolati ostida berilgan xorijiy kreditlarni qaytarish va foizlar toʻlash bilan bogʻliq majburiyatlari boʻyicha qarzdorlar va subqarzdorlarning milliy va chet el valyutalaridagi bank hisobvaraqlariga.”.

3. 87 va 88-bandlar oʻz kuchini yoʻqotgan deb hisoblansin.