Elektron tijoratni rivojlantirish chora-tadbirlari toʻgʻrisida (21-son)

30.01.2007

Oʻzbekiston Respublikasi Vazirlar Mahkamasining

qarori

“Elektron tijorat toʻgʻrisida”gi Oʻzbekiston Respublikasi Qonunini amalga oshirish, shuningdek zamonaviy axborot texnologiyalaridan foydalangan holda savdoni rivojlantirishni ragʻbatlantirish maqsadida Vazirlar Mahkamasi qaror qiladi:

1. Oʻzbekiston Respublikasi Tashqi iqtisodiy aloqalar, investitsiyalar va savdo vazirligi:

Oʻzbekiston Respublikasi Adliya vazirligi, Moliya vazirligi, Iqtisodiyot vazirligi, Oʻzbekiston aloqa va axborotlashtirish agentligi bilan birgalikda 2007-yil 1-aprelgacha boʻlgan muddatda Elektron davlat xaridlarini tashkil etish va ularni amalga oshirish tartibi toʻgʻrisida Vaqtinchalik nizomni ishlab chiqsin va tasdiqlasin;

Oʻzbekiston Respublikasi Adliya vazirligi, Oʻzbekiston aloqa va axborotlashtirish agentligi, Davlat bojxona qoʻmitasi va Davlat soliq qoʻmitasi bilan birgalikda 2007-yil 1-iyulgacha boʻlgan muddatda elektron shakldagi kontraktga talablarni va elektron tijoratda qoʻllaniladigan hujjatlarning boshqa namunaviy shakllarini belgilangan tartibda ishlab chiqsin va tasdiqlasin;

Moliya vazirligi, Iqtisodiyot vazirligi, Markaziy bank, Oʻzbekiston aloqa va axborotlashtirish agentligi bilan birgalikda 2007-yil 1-oktabrgacha boʻlgan muddatda vazirlik tizimiga kiradigan tashkilotlar va korxonalar tomonidan arzonbaho inventarlar sotib olish uchun elektron davlat xaridlari tizimini yaratish boʻyicha kelishilgan loyihani Davlat budjeti ijrosining gʻaznachilik tizimi bilan avtomatlashtirilgan oʻzaro hamkorlik qilishni hisobga olgan holda tayyorlasin va amalga oshirsin;

2008-yil 1-aprelgacha boʻlgan muddatda kelishilgan loyiha natijalariga koʻra toʻplangan tajribani tovarlar va xizmatlar boshqa turlarining davlat xaridlariga nisbatan tatbiq etish, shuningdek tizimni respublikaning barcha davlat muassasalari ehtiyojlari uchun rivojlantirish toʻgʻrisida Vazirlar Mahkamasiga takliflar kiritsin.

2. Savdo-sanoat palatasi Oʻzbekiston Respublikasi Tashqi iqtisodiy aloqalar, investitsiyalar va savdo vazirligi bilan birgalikda tadbirkorlar hamda manfaatdor vazirliklar va idoralar mutaxassislari keng doirasini jalb etgan holda konferensiyalar, seminarlar, davra suhbatlari, treninglar oʻtkazish, shuningdek elektron tijoratning imkoniyatlari toʻgʻrisidagi axborot materiallarini ishlab chiqish va ularni elektron tijoratning salohiyatli ishtirokchilari oʻrtasida ommalashtirish chora-tadbirlarini amalga oshirsin.

3. Oʻzbekiston Respublikasi Tashqi iqtisodiy aloqalar, investitsiyalar va savdo vazirligi manfaatdor vazirliklar va idoralar bilan birgalikda tadbirlarni oʻtkazish davomida olingan takliflar va ilgʻor xalqaro tajribani oʻrganish asosida 2008-yil 1-fevralgacha boʻlgan muddatda Vazirlar Mahkamasiga elektron tijoratni yanada rivojlantirish chora-tadbirlari dasturini kiritsin.

4. Oʻzbekiston Respublikasi Moliya vazirligi, Markaziy banki, Davlat soliq qoʻmitasi, Davlat bojxona qoʻmitasi, Iqtisodiyot vazirligi, Oʻzbekiston aloqa va axborotlashtirish agentligi, Savdo-sanoat palatasi manfaatdor xoʻjalik yurituvchi subyektlar bilan birgalikda uch oy muddatda Vazirlar Mahkamasiga ulgurji va chakana elektron savdoni amalga oshirishda toʻlovlarni qabul qilish va toʻlash tizimini takomillashtirish, shuningdek uni amalga oshirishda zamonaviy apparatlar va texnika vositalarini joriy etish boʻyicha takliflar kiritsinlar.

5. Oʻzbekiston Respublikasi Oliy va oʻrta maxsus taʼlim vazirligi Tashqi iqtisodiy aloqalar, investitsiyalar va savdo vazirligi hamda Savdo-sanoat palatasi bilan birgalikda elektron tijorat sohasida kadrlarni tayyorlash, qayta tayyorlash va ularning malakasini oshirish tizimini takomillashtirish boʻyicha amaliy chora-tadbirlar koʻrsin.

6. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosarlari R.S. Azimov va A.N. Aripov zimmasiga yuklansin.

Oʻzbekiston Respublikasining Bosh vaziri Sh. MIRZIYOYEV

Toshkent sh.,

2007-yil 30-yanvar,

21-son