Oʻzbekiston Respublikasi Prezidentining 2005-yil 2-maydagi “Oʻzbekiston Respublikasi Monopoliyadan chiqarish, raqobat va tadbirkorlikni qoʻllab-quvvatlash davlat qoʻmitasi faoliyatini tashkil etish toʻgʻrisida”gi qaroriga oʻzgartish va qoʻshimchalar kiritish haqida (PQ-265-son)

20.01.2006

Oʻzbekiston Respublikasi Prezidentining

Qarori

Oʻzbekiston Respublikasi Prezidentining 2005-yil 6-noyabrdagi “Respublika komissiyalari va kengashlari faoliyatini tartibga solish toʻgʻrisida”gi PF–3675-son Farmoniga muvofiq:

1. Oʻzbekiston Respublikasi Prezidentining 2005-yil 2-maydagi PQ–66-son qarori bilan tasdiqlangan Oʻzbekiston Respublikasi Monopoliyadan chiqarish, raqobat va tadbirkorlikni qoʻllab-quvvatlash davlat qoʻmitasi toʻgʻrisidagi nizomga ilovaga muvofiq oʻzgartish va qoʻshimchalar kiritilsin.

2. Mazkur qarorning ijrosini nazorat qilish Oʻzbekiston Respublikasi Bosh vazirining oʻrinbosari V.A. Golishev zimmasiga yuklansin.

Oʻzbekiston Respublikasi Prezidenti I. KARIMOV

Toshkent sh.,

2006-yil 20-yanvar,

PQ–265-son

Oʻzbekiston Respublikasi Prezidentining 2006-yil 20-yanvardagi PQ–265-sonli qaroriga ILOVA

Oʻzbekiston Respublikasi Prezidentining 2005-yil 2-maydagi PQ–66-son qarori bilan tasdiqlangan Oʻzbekiston Respublikasi Monopoliyadan chiqarish, raqobat va tadbirkorlikni qoʻllab-quvvatlash davlat qoʻmitasi toʻgʻrisidagi nizomga kiritiladigan oʻzgartish va qoʻshimchalar

1. 3-bandning uchinchi, toʻrtinchi va beshinchi xatboshilari quyidagi tahrirda bayon etilsin:

“Monopoliyadan chiqarish, raqobat va tadbirkorlikni qoʻllab-quvvatlash davlat qoʻmitasi tadbirkorlikni qoʻllab-quvvatlash boʻyicha Kichik va xususiy tadbirkorlikni rivojlantirishni ragʻbatlantirish Respublika muvofiqlashtirish kengashining ishchi organi hisoblanadi”.

2. 8-bandda:

yigirmanchi xatboshi quyidagi tahrirda bayon etilsin:

“d) vakil qilingan respublika komissiyalari va kengashlari, shuningdek, davlat va xoʻjalik boshqaruvi organlari takliflari asosida korxonalarni bankrot deb eʼlon qilish, ularni tarkibiy oʻzgartirish va ixchamlashtirish tartibotini boshlash toʻgʻrisida qaror qabul qiladi”;

yigirma ikkinchi xatboshi quyidagi tahrirda bayon etilsin:

“j) ustav fondida davlat ulushi mavjud boʻlgan va (yoki) Oʻzbekiston Respublikasi oldida pul majburiyatlari boʻyicha qarzi boʻlgan korxonani sudgacha sanatsiya qilish toʻgʻrisida qaror qabul qiladi”;

yigirma toʻrtinchi xatboshi quyidagi tahrirda bayon etilsin:

“i) tarkibiy oʻzgartirilishi kerak boʻlgan iqtisodiy nochor, zarar koʻrib ishlayotgan va past rentabelli korxonalarning, shuningdek, ularga nisbatan bankrotlik tartibotlari qoʻllangan korxonalarning qurilishi tugallanmagan obyektlarini va asosiy fondlarini konservatsiya qilish va sotish masalalarini koʻrib chiqadi hamda Vazirlar Mahkamasiga kiritadi”;

mazmuni quyidagicha boʻlgan yigirma yettinchi—oʻttizinchi xatboshilar qoʻshimcha ravishda kiritilsin:

“m) davlat tomonidan madad olgan korxonalarni sudgacha sanatsiya qilishni uzaytirish va muddatidan ilgari toʻxtatish toʻgʻrisida qaror qabul qiladi;

n) Oʻzbekiston Respublikasi Moliya vazirligi va Davlat soliq qoʻmitasi bilan kelishilgan holda, zarar koʻrib ishlayotgan, toʻlovga qodir boʻlmagan va iqtisodiy nochor korxonalarni tarkibiy oʻzgartirish, ixchamlashtirish, moliyaviy sogʻlomlashtirish va sudgacha sanatsiyalash ishlarini amalga oshirish davrida qonun hujjatlarida nazarda tutilgan shakllarda davlat tomonidan qoʻllab-quvvatlash toʻgʻrisida qarorlar qabul qiladi;

o) oʻz hayʼati majlislarida davlat va xoʻjalik boshqaruvi organlarining, mahalliy davlat hokimiyati organlarining zarar koʻrib ishlayotgan va iqtisodiy nochor korxonalarni tarkibiy oʻzgartirish, ixchamlashtirish va moliyaviy sogʻlomlashtirish dasturlari amalga oshirilishi toʻgʻrisidagi hisobotlarini tinglaydi;

p) davlat tomonidan qoʻllab-quvvatlangan yoki mulkida davlat ulushi boʻlgan sanatsiya qilinadigan korxonalar tashqi boshqaruvchilari, shuningdek, rahbarlarining hisobotlarini tinglaydi”.

yigirma yettinchi—oʻttiz ikkinchi xatboshilar tegishli ravishda oʻttiz birinchi—oʻttiz oltinchi xatboshilar deb hisoblansin.

3. 10-band mazmuni quyidagicha boʻlgan oʻn toʻrtinchi xatboshi bilan toʻldirilsin:

“tarkibiy oʻzgartirish va sanatsiya amalga oshirilayotgan korxonalarning ijtimoiy infratuzilma obyektlarini qonun hujjatlarida belgilangan tartibda mahalliy davlat hokimiyati organlari balansiga oʻtkazish toʻgʻrisida Vazirlar Mahkamasiga va mahalliy davlat hokimiyati organlariga takliflar kiritish;

oʻn toʻrtinchi—oʻn toʻqqizinchi xatboshilar tegishli ravishda oʻn beshinchi—yigirmanchi xatboshilar deb hisoblansin.

4. 17-bandning uchinchi xatboshidagi “tabiiy monopoliyalar subyektlari faoliyati,” soʻzlaridan keyin “korxonalarni sudgacha sanatsiyalashni joriy etish va uzaytirish, iqtisodiy nochor korxonalarni bankrot deb eʼlon qilish, tarkibiy oʻzgartirish va ixchamlashtirish, davlat tomonidan qoʻllab-quvvatlash va moliyaviy sogʻlomlashtirish,”.