Xalq xoʻjaligidagi oʻzaro hisob-kitoblarni yaxshilash chora-tadbirlari toʻgʻrisida (614-son)

31.12.1993

Oʻzbekiston Respublikasi Vazirlar Mahkamasining

qarori

Hisob-kitoblardagi qiyinchiliklarni bartaraf etish, korxonalar va tashkilotlarning muddati oʻtib ketgan oʻzaro qarzlari koʻpayib ketishining oldini olish, vazirliklar, idoralar, konsernlar, korporatsiyalar, uyushmalar, korxonalar va tashkilotlarning hisob-kitoblarning ahvoli uchun masʼuliyatini oshirish maqsadida Vazirlar Mahkamasi qaror qiladi:

1. Oʻzbekiston Respublikasi Markaziy banki barcha davlat korxonalari va tashkilotlari, shu jumladan, jamoa xoʻjaliklari ishtirokida, xoʻjaliklarning moliyaviy ahvolidan va ularning banklar oldidagi majburiyatlaridan qatʼi nazar, hisob-kitob tugallangandan keyin kredit bergan holda oʻzaro qarzdorlikning 15-yanvargacha boʻlgan holatiga koʻra istisno tariqasida 1994-yil 15-yanvardan 31-yanvargacha respublika ichki tarmoqlararo hisob-kitobini oʻtkazsin.

2. Vazirliklar, idoralar, korporatsiyalar, uyushmalar, korxonalar va tashkilotlar tarmoqlararo hisob-kitobni samarali oʻtkazish maqsadida tegishli bank muassasalari kartotekasidagi mavjud toʻlov hujjatlarini roʻyxatdan oʻtkazish va muqobil tekshirish boʻyicha zarur tayyorgarlik ishlarini amalga oshirsinlar.

3. 1994-yil 1-fevraldan boshlab hisob-kitoblarning inkassa shakli bekor qilinib, hisob-kitoblarning toʻlov talabnomalari-topshiriqlar orqali amalga oshiriladigan yangi shakli joriy etilsin.

Hisob-kitoblar faqat korxonalarning hisob-kitob, joriy va budjet schyotlarida mablagʻ boʻlgan taqdirda toʻlov topshiriqlari, toʻlov talabnomalari-topshiriqlar, akkreditivlar va cheklar orqali amalga oshirilsin.

4. Kelgan toʻlov hujjatlarining hisobini zarur darajada yuritish va hisob-kitoblarni oʻz vaqtida oʻtkazish uchun javobgarlik, mulkchilik shaklidan qatʼi nazar, korxonalar va tashkilotlarning rahbarlari zimmasiga yuklatilsin.

5. Hisob-kitoblarning umumiy ahvoli, oʻzlariga boʻysunuvchi korxonalarda oʻz mablagʻlaridan va qarz mablagʻlardan qatʼiy aniq maqsadlarda va oqilona foydalanish uchun shaxsan javobgarlik vazirliklar, uyushmalar va konsernlarning rahbarlari zimmasiga yuklatilsin.

6. Oʻzbekiston Respublikasi Markaziy banki respublika ichki tarmoqlararo hisob-kitobini oʻtkazish uchun mablagʻ bilan taʼminlovchi banklarga 900 mlrd. soʻmgacha kredit resurslari ajratsin.

7. Vazirlar Mahkamasi xalq xoʻjaligi komplekslarining rahbarlari hisob-kitoblarning ahvolini har oyda koʻrib chiqsinlar va oʻzlariga qarashli tashkilotlarda toʻlov intizomiga rioya qilinishiga doir chora-tadbirlarni amalga oshirsinlar. Oʻzaro hisob-kitoblar boʻyicha ishlar qoniqarsiz boʻlgan hollarda vazirliklar, uyushmalar, konsernlar rahbarlarining, ularni egallab turgan lavozimlaridan ozod qilish toʻgʻrisida taklif kiritishgacha boʻlgan maʼmuriy javobgarligini koʻrib chiqsinlar.

Vazirlar Mahkamasining Raisi I. KARIMOV

Toshkent sh.,

1993-yil 31-dekabr,

614-son