“Tabiatni muhofaza qilish toʻgʻrisida”gi Oʻzbekiston Respublikasi Qonunini amalga kiritish tartibi haqida (755-XII-son)

09.12.1992

Oʻzbekiston Respublikasi Kengashining

Qarori

Oʻzbekiston Respublikasi Oliy Kengashi qaror qiladi:

1. “Tabiatni muhofaza qilish toʻgʻrisida”gi Oʻzbekiston Respublikasi Qonuni matbuotda eʼlon qilingan kundan boshlab amalga kiritilsin.

2. Belgilab qoʻyilsinki, Oʻzbekiston Respublikasining amaldagi qonun hujjatlari “Tabiatni muhofaza qilish toʻgʻrisida”gi Oʻzbekiston Respublikasi Qonuniga muvofiqlashtirilgunga qadar ularning ushbu Qonunga zid boʻlmagan qismi qoʻllanilaveradi.

3. Oʻzbekiston Respublikasi Tabiatni muhofaza qilish davlat qoʻmitasi toʻgʻrisidagi nizomga tegishli oʻzgartirishlar kiritishga oid takliflarni Oʻzbekiston Respublikasi Tabiatni muhofaza qilish davlat qoʻmitasi uch oylik muddat ichida Oʻzbekiston Respublikasi Oliy Kengashi Rayosatiga taqdim etsin.

4. Oʻzbekiston Respublikasi Vazirlar Mahkamasi uch oylik muddat ichida:

Oʻzbekiston Respublikasi Hukumatining qarorlarini “Tabiatni muhofaza qilish toʻgʻrisida”gi Oʻzbekiston Respublikasi Qonuniga muvofiqlashtirsin;

Oʻzbekiston Respublikasining vazirliklari, davlat qoʻmitalari, idoralari, konsernlari ushbu Qonunga zid boʻlgan oʻz normativ hujjatlarini qayta koʻrib chiqishlari va bekor qilishlarini taʼminlasin;

tabiatni muhofaza qilish jamgʻarmalari toʻgʻrisidagi nizomni ishlab chiqsin va tasdiqlasin.

5. Quyidagilar oʻz kuchini yoʻqotgan deb hisoblansin:

— 1959-yil 19-noyabrda qabul qilingan “Oʻzbekiston Respublikasida tabiatni qoʻriqlash haqida”gi Qonun (Oʻzbekiston Respublikasi Oliy Sovetining Vedomostlari, 1959-yil, № 12, 6-modda);

— “Oʻzbekiston Respublikasida tabiatni qoʻriqlash haqidagi Qonunga oʻzgartirishlar kiritish toʻgʻrisida”gi Oʻzbekiston Respublikasi Oliy Soveti Prezidiumining 1972-yil 26-oktabrdagi Farmoni (Oʻzbekiston Respublikasi Oliy Sovetining Vedomostlari, 1972-yil, № 30, 316-modda);

— “Oʻzbekiston Respublikasida tabiatni qoʻriqlash haqidagi Qonunga oʻzgartirishlar kiritish toʻgʻrisida”gi Oʻzbekiston Respublikasi Oliy Soveti Prezidiumining Farmonini tasdiqlash haqida” Oʻzbekiston Respublikasining 1972-yil 27-dekabr Qonuni (Oʻzbekiston Respublikasi Oliy Sovetining Vedomostlari, 1972-yil, № 36, 370-modda);

— “Oʻzbekiston Respublikasida tabiatni qoʻriqlash haqidagi Qonun”ga oʻzgartish va qoʻshimchalar kiritish toʻgʻrisida” Oʻzbekiston Respublikasi Oliy Soveti Prezidiumining 1984-yil 1-mart Farmoni (Oʻzbekiston Respublikasi Oliy Sovetining Vedomostlari, 1984-yil, № 7, 110-modda);

— “Oʻzbekiston Respublikasi Oliy Soveti Prezidiumining Oʻzbekiston Respublikasining baʼzi bir qonun aktlariga oʻzgartish va qoʻshimchalar kiritish toʻgʻrisidagi farmonlarini tasdiqlash haqida” 1984-yil 28-iyundagi Oʻzbekiston Respublikasi Qonunining “Oʻzbekiston Respublikasida Tabiatni qoʻriqlash haqidagi Qonun”ga oʻzgartish va qoʻshimchalar kiritish toʻgʻrisida”gi Oʻzbekiston Respublikasi Oliy Soveti Prezidiumining 1984-yil 1-mart Farmonini tasdiqlashga doir qismi (Oʻzbekiston Respublikasi Oliy Sovetining Vedomostlari, 1984, № 19, 281-modda).

Oʻzbekiston Respublikasi Oliy Kengashining Raisi Sh. YOʻLDOSHEV

Toshkent sh.,

1992-yil 9-dekabr,

755-XII-son