Paxta tolasini Oʻzbekiston Respublikasi Tovar-xom ashyo birjasi orqali respublika korxonalariga sotishda qoʻshilgan qiymat soligʻini hisoblab chiqarish va toʻlash tartibi toʻgʻrisidagi nizomga oʻzgartirishlar kiritish haqida (1583-1-son)

25.12.2006

OʻZBEKISTON RESPUBLIKASI MOLIYA VAZIRLIGI OʻZBEKISTON RESPUBLIKASI DAVLAT SOLIQ QOʻMITASINING

Qarori

[Oʻzbekiston Respublikasi Adliya vazirligi tomonidan 2006-yil 25-dekabrda 1583-1-son bilan davlat roʻyxatidan oʻtkazildi ]

Oʻzbekiston Respublikasi Soliq kodeksi, Oʻzbekiston Respublikasi “Davlat soliq xizmati toʻgʻrisida”gi Qonunining 7-moddasi va Oʻzbekiston Respublikasi Prezidentining 2006-yil 29-avgustdagi PQ-456-son qarorining 9-bandini bajarish uchun (Oʻzbekiston Respublikasi qonun hujjatlari toʻplami, 2006-y., 31-32-son, 309-modda) qaror qilamiz:

1. Oʻzbekiston Respublikasi Moliya vazirligi va Davlat soliq qoʻmitasining 2006-yil 12-maydagi 44, 2006-26-son qarori bilan tasdiqlangan Paxta tolasini Oʻzbekiston Respublikasi tovar-xomashyo birjasi orqali respublika korxonalariga sotishda qoʻshilgan qiymat soligʻini hisoblab chiqarish va toʻlash tartibi toʻgʻrisidagi nizomiga oʻzgartirishlar (2006-yil 13-iyun, roʻyxat raqami 1583 — Oʻzbekiston Respublikasi qonun hujjatlari toʻplami, 2006-y., 24-son, 222-modda) ilovaga muvofiq tasdiqlansin.

2. Mazkur qaror Oʻzbekiston Respublikasi Adliya vazirligida davlat roʻyxatiga olingan kundan boshlab oʻn kun oʻtgach kuchga kiradi.

Moliya vaziri R. AZIMOV

Toshkent sh.,

2006-yil 7-dekabr,

99-son

Davlat soliq qoʻmitasi raisi B. PARPIYEV

Toshkent sh.,

2006-yil 7-dekabr,

2006-48-son

Moliya vazirligi va Davlat soliq qoʻmitasining 2006-yil 7-dekabrdagi 99, 2006-48-son qaroriga ILOVA

Paxta tolasini Oʻzbekiston Respublikasi tovar-xomashyo birjasi orqali respublika korxonalariga sotishda qoʻshilgan qiymat soligʻini hisoblab chiqarish va toʻlash tartibi toʻgʻrisidagi nizomga kiritilayotgan oʻzgartirishlar

1. 2-band quyidagi tahrirda bayon etilsin:

“2. Paxta tolasini Oʻzbekiston Respublikasi tovar-xomashyo birjasi orqali sotish va respublika korxonalari tomonidan paxta tolasi uchun hisob-kitob qilish sxemalari Oʻzbekiston Respublikasi Prezidentining 2006-yil 29-avgustdagi “Paxta tolasini sotish va uning uchun hisob-kitob qilish mexanizmini tartibga solish toʻgʻrisida”gi PQ-456-son qaroriga (Oʻzbekiston Respublikasi qonun hujjatlari toʻplami, 2006-y., 36-son, 359-modda) muvofiq amalga oshiriladi”.

2. 3-band oʻz kuchini yoʻqotgan deb hisoblansin.