1997-yilda test oʻtkazish (350-son)

13.06.1997

tartiblari

[Oʻzbekiston Respublikasi Adliya vazirligi tomonidan 1997-yil 13-iyunda 350-son bilan davlat roʻyxatidan oʻtkazilgan]

OʻQUV YuRTLARI KOMISSIYALARINING VAZIFALARI

Abituriyentlar oʻrtasida kasb tanlash boʻyicha axborot berish va ularni oʻquv yurtlariga targʻibot maqsadida oʻquv yurtlari qoshida qabul komissiyalari tashkil etiladi. Qabul komissiyalari oʻz ish faoliyatini “Oʻzbekiston Respublikasi oliy va oʻrta maxsus oʻquv yurtlariga 1997-98 va keyingi yillarda talabalar qabul qilish haqida nizom” asosida amalga oshiradi.

Bu komissiya faoliyatini taʼminlash uchun rektorning buyrugʻi bilan oʻquv yurtining oʻqituvchilari, muhandis-texnik ishchilari va oʻquv-koʻmakchi xodimlari orasida ish yurituvchi texnik xodimlar tasdiqlanadi.

Oldingi yillarda qabul komissiyalari tarkibida ishlab, qoʻpol xatolarga yoʻl qoʻygan (abituriyentlarning hujjatlarini notoʻgʻri toʻldirgan, Davlat komissiyasiga, Davlat test markaziga va vazirliklarga taqdim etiladigan shakllarda xato maʼlumot bergan) va test texnologiyasi va qoidalarini yaxshi bilmagan shaxslar masʼul kotib yoki komissiya aʼzosi etib tayinlanmaydi.

Oʻquv yurti qabul komissiyasining test sinovlari bilan bogʻliq asosiy vazifalari quyidagilardan iborat:

davlat test markazining test oʻtkazishga oid rahbariy va meʼyoriy hujjatlari va yoʻriqnomalari asosida puxta bilimli, iqtidorli yoshlarning oʻquv yurtiga kirishini taʼminlash va testning adolatli, tartibli oʻtishi uchun barcha zarur chora-tadbirlarni koʻrish;

abituriyentlarni test asosida oʻquv yurtiga qabul qilish qoidalari bilan tanishtirish va ularni test materiallari bilan ishlashga oʻrgatish maqsadida konsultatsiya punktini tashkil qilish;

abituriyentlarni kerakli yoʻriqnoma va hujjatlar bilan oʻz vaqtida taʼminlash;

abituriyentlarga ularning huquqlari va vazifalarini tushuntirish;

test oʻtkazish uchun kerakli sharoitlarni yaratish (bino, auditoriya, oʻtirish oʻrinlari va boshqalarni tanlash);

testni tashkil qilish va oʻtkazilishiga sharoit yaratish uchun texnik xodimlarning axborot berish, tibbiy va maishiy xizmat faoliyatlarini uyushtirish va nazorat qilish,

auditoriyalarning binolar boʻyicha joylashish chizmasini (sxemasini) tuzish;

abituriyentlarning ariza va hujjatlarini qabul qilish, shaxsiy hujjatlar yigʻmasini rasmiylashtirish, hujjatlarni qabul qilib olganlik haqidagi tilxat, titul varaqasi, ruxsatnomalarni talabga muvofiq tayyorlash;

mutaxassisliklar, taʼlim tili hamda alohida imtiyozlar boʻyicha kodlarning toʻgʻri belgilanishini taʼminlash;

titul varaqasi va ruxsatnomalarni bexato toʻldirish (bunda asosiy javobgarlik masʼul kotib zimmasiga yuklanadi);

javoblar varaqasidagi kerakli yozuvlar va doirachalarni (titul varaqasidan koʻchiriladi) faqat koʻk (havorang) pastali sharikli ruchka vositasida boʻyash zarurligini abituriyentlarga tushuntirish;

ixtisoslik boʻyicha ijodiy imtihon oʻtkazib, natijalar qaydnomasini rasmiylashtirish va oʻz vaqtida Davlat test markaziga yetkazib berish (bu ishga qabul komissiyasi raisi va masʼul kotib javobgar hisoblanadi), ijodiy imtihon natijalarini titul varaqasining tegishli joylariga yozish;

test oʻtkaziladigan kuni pasport, titul varaqasi va ruxsatnoma bilan binoga kiritish va nazoratchilar xizmatini tashkil qilish;

oʻquv yurti qabul komissiyasining faoliyati haqidagi maʼlumotlarni Test Markaziga oʻz vaqtida va belgilangan tartibda taqdim etish.

oʻquv yurtiga kirish masalalari boʻyicha fuqarolarni qabul qilishni uyushtirish. Qabul qilish toʻgʻrisida buyruqlar chiqarish va tegishli maʼlumotlarni eʼlon qilish;

abituriyentning oʻzi haqidagi maʼlumotlarni oʻz dastxati bilan javoblar varaqasining (1-3) bloklariga toʻldirishini taʼminlash;

kod bilan viloyat, tuman, shahar, shahar tumani, maktab nomeri, oʻquv yurti va ixtisoslikni koʻrsatish — (4) blokda;

javoblarni belgilash jarayonida (kitobchadan javoblar varaqasiga koʻchirish) savollar bloklarini (I — IX) chalkashtirib yubormaslik;

QABUL KOMISSIYASI IShINI TAShKIL QILISh

Qabul komissiyasi oʻz ishini tashkil qilishda quyidagilarga amal qiladi:

1. Qabul komissiyasi tayyorgarlik davrida (20-iyungacha) yoshlarning kasb tanlashi boʻyicha targʻibot ishini tashkil qiladi, Davlat test markazidan olingan hujjatlar, bosma ish qogʻozlari (blanklar) va turli axborot materiallarini oldindan tayyorlab qoʻyadi, texnik xodimlar tarkibini belgilaydi. Oʻz ish grafigini eʼlon qiladi.

Test oʻtkazilishini tashkil qilishga jalb qilingan har bir kishining bajaradigan vazifalarini aniqlab, tegishli hujjat bilan rasmiylashtiradi, ulardan kerakli hujjatlarni oʻrganib chiqishni talab qiladi.

2. Qabul komissiyasi hujjatlar qabuli boshlanishiga qadar oʻquv yurtida auditoriyalar va ulardagi oʻrinlar sonini aniqlaydi, test oʻtkazish uchun yetarli shart-sharoitlarni hozirlaydi, auditoriya joylashuvi reja-chizmalarini (plan-sxema) tuzadi va belgilangan tartibda Test markaziga topshiradi.

3. Quyidagilarni eʼlon qiladi:

3.1. Hujjat qabul qilish boshlanishi oldidan Davlat komissiyasi tomonidan tasdiqlangan “Oʻzbekiston Respublikasi oliy va oʻrta maxsus oʻquv yurtlariga 1997-98 va keyingi yillarda talabalar qabul qilish haqida nizom”ni.

3.2. Ixtisosliklar boʻyicha tasdiqlangan qabul rejasini.

3.3. Oʻqishning sirtqi turi boʻyicha mazkur oʻquv yurti ixtisosliklarining roʻyxatini.

3.4. Oʻquv yurtining mintaqaviy boʻlimlariga (filiallar, fakultetlar) kiruvchilardan arizalar qabul qilish tartibini.

3.5 Test oʻtkaziladigan predmetlarning roʻyxati, dasturlari, baholash mezonlari, shuningdek, ixtisoslik boʻyicha ijodiy imtihon natijalari jadvalini.

4. Test oʻtkazishda tashkiliy-tayyorgarlik ishlarini olib borish uchun quyidagi hujjatlarni yetarli miqdorda tayyorlamoq kerak:

a) abituriyent arizasi;

b) hujjatlari qabul qilinganligi haqida tilxat (ilovaga qarang);

v) arizalarni qayd etish daftari;

g) ichki yoʻriqnomalar (abituriyentlardan hujjatlarni qabul qilib olish tartibi);

d) auditoriyalarning joylashish reja-chizmasi;

e) guruhlar roʻyxati (14-shaklda);

j) “Ruxsatnoma” va “Titul varaqasi” (bu hujjatlar bilan DTM taʼminlaydi).

Zarur hujjatlardan nusxa koʻchirish, vaqtida eʼlon qilish, DTMga yetkazib berish va ularni saqlash qabul komissiyasi zimmasiga yuklanadi.

5. Oʻquv yurtlari qabul komissiyalari abituriyentlar arizasini qabul qilish va barcha oʻquv shakllari boʻyicha hujjatlarni rasmiylashtirish ishlarini 20-iyundan 20-iyulga qadar olib boradi.

6. Ariza va hujjatlarni qabul qilish belgilangan shakldagi daftarda qayd qilinadi. Qabul toʻgʻrisidagi arizaga oʻquv yurtiga kiruvchining oʻrta yoki oʻrta maxsus maʼlumoti haqidagi hujjatning asl nusxasi, 086/U-shaklidagi tibbiy maʼlumotnoma, 3x4 sm oʻlchamli 6 ta fotosurat ilova qilinadi, pasport va harbiy xizmatga aloqadorligi haqida hujjat koʻrsatiladi. Abituriyentga hujjatlari qabul qilinganligi toʻgʻrisida tilxat beriladi (hujjatlarni qabul qilish tartibi DTM tomonidan nazorat qilib turiladi, hujjatlarni qabul qilish tartibini buzgan xodimlarga qatʼiy choralar koʻriladi).

7. Kiruvchilar uchun test dasturining mazmuni hamda test oʻtkazishni tashkil qilish, baholash mezonlari, abituriyentlarga qoʻyiladigan talablar, talabalar safiga oʻtkazish va boshqalar haqida axborot va tushuntirishlar beriladi.

8. Barcha abituriyentlar “Abituriyentlarga eslatma” bilan taʼminlanadi va “Test oʻtkazish qoidalari” bilan tanishtiriladi.

9. 1. iyulda DTMga qabul komissiyasining raisi tomonidan tasdiqlangan test oʻtkaziladigan auditoriyalarning joylashish chizmasi topshiriladi.

Test oʻtkazilishi uchun abituriyentlardan, hujjatlarining qayd etilishiga qarab, 30 yoki 60 kishidan iborat alohida-alohida guruhlar tuziladi. Guruh nomeri auditoriya nomeriga mos tushishi kerak.

10. Shuningdek, qabul komissiyasiga quyidagi vazifalar yuklatiladi:

a) javoblar varaqasini toʻldirishda zarur boʻladigan karton qogʻozlarni (format 11) kerakli miqdorda tayyorlash;

b) test oʻtkaziladigan kuni abituriyentlarning koʻk (havorang) pastali sharikli ruchkalarni olib kelishini taʼminlash;

v) sinov hujjatlari qutilari va paketlarini maxsus belgi bilan muhrlash uchun har bir auditoriyani yetarli miqdorda yelim bilan taʼminlash;

g) abituriyentlarning hujjat topshirishi va 10-, 13-, 15-, 16-shakllar boʻyicha maʼlumotlarni DTMga, boshqa shakllarni vazirliklarga yuborishni avtomatlashtirish maqsadida qabul komissiyalari kompyuterlari xotirasiga har bir abituriyent toʻgʻrisida quyidagi maʼlumotlarni kiritish:

1. Attestat nomeri 2. Familiyasi 3. Ismi 4.Otasining ismi 5. Maktabni tugatgan yili 6. Viloyati 7. Shahri 8. Tumani 9. Maktab nomeri 10.Taʼlim tili 11. Taʼlim yoʻnalishi 12. Chet tili 13. Shartnoma borligi 14. Harbiy qismdan tavsiyanoma borligi (muddatli harbiy xizmatni tugatgan abituriyent uchun) 15. Bu yilgi Respublika olimpiadasi gʻolibimi, yoʻqmi?

11. 21-iyulda qabul komissiyalari belgilangan tartibda, ixtisoslik, taʼlim turi va tili boʻyicha guruhlar soni, auditoriyalarning miqdori va nomerlari, oʻrinlar sonini koʻrsatgan holda, umumiy abituriyentlar soni haqidagi maʼlumotlarni (11-shakl) Test markaziga yetkazib berishlari lozim. Yuqoridagi maʼlumotlar 21-iyulda Test markaziga berilgandan keyin qabul komissiyasi tomonidan guruhlar, auditoriyalar nomeri va guruhlardagi abituriyentlar sonini oʻzgartirish man etiladi. Aks holda, oʻzgartirilgan maʼlumotlar DTM tomonidan eʼtiborga olinmaydi. Oʻquv yurti boʻyicha auditoriyalar nomeri guruhlar nomeri bilan bir xil boʻlishi va qaysi binoda oʻtkazilishidan qatʼi nazar, takrorlanmasligi kerak.

12 . Qabul komissiyasi ixtisoslik boʻyicha ijodiy imtihon natijalari qaydnomasini (10-shakl) test oʻtkazilgandan keyin bir kun ichida taʼlim tili va turi boʻyicha rasmiylashtiradi, barcha abituriyentlarning ijodiy imtihon bali va javoblar varaqasi nomerini koʻrsatib (bu nomer ruxsatnomadan olinadi), IBM tipidagi kompyuterda Test markazi tomonidan tuzilgan dastur boʻyicha quyidagi formatda teradi va 3.5 oʻlchovli disketda Test markaziga belgilangan tartibda aniq toʻldirilgan holda yuboradi.

Masalan: 0000001 1016 36.3

Ijodiy imtihon natijalari qaydnomalarida javoblar varaqasi nomeri qoʻyilmagan abituriyentlarning ballari hisobga olinmaydi. Qaydnomaning toʻgʻri toʻldirilishi oʻquv yurti qabul komissiyasi raisi va masʼul kotibi zimmasiga yuklatiladi.

13. Ijodiy imtihonlar (ixtisoslik boʻyicha) natijalari oʻquv yurtida 27-iyulgacha kiruvchilarga maʼlumot sifatida ilib qoʻyiladi va Davlat komissiyasining abituriyentlarni talabalar safiga oʻtkazish haqidagi qarori chiqmaguncha olinmaydi.

14. Test oʻtkaziladigan binolarda test oʻtkazilishidan 5(10) kun ilgari xonalarning (auditoriya nomeri) joylashishi, abituriyentlarning bino boʻyicha harakat yoʻnalishi chizmasi ilib qoʻyilishi kerak.

15. Test oʻtkazilishidan 8 kun ilgari abituriyentlar umumiy roʻyxati tayyorlanadi (qayd daftari boʻyicha).

16. Abituriyentlarning guruhlar boʻyicha roʻyxati, auditoriya koʻrsatilgan holda, test sinovlari oʻtkazilishidan 3 kun ilgari umumiy maʼlumot uchun eʼlonlar taxtasiga ilib qoʻyiladi.

Qabul komissiyalari 1997-yilda maktabni bitirgan abituriyentlardan alohida va undan oldin bitirganlardan alohida guruhlar tashkil qiladi. Guruhlar DTM tavsiya etgan algoritm asosida shakllantiriladi.

17. Test topshiruvchilarga belgilangan shakldagi ruxsatnoma, titul varaqasi test oʻtkazilishiga 3 kun qolganda beriladi.

18. Abituriyentlarni tartibli ravishda auditoriyalarga kiritishni taʼminlash uchun nazoratchilik xizmati postlarini tashkil qilish kerak (ularning miqdori binolarning miqdoriga bogʻliq). Barcha binolarning qavatlarida texnik xodimlar navbatchiligi tashkil etiladi.

19. Test oʻtkazilishidan ikki kun oldin barcha auditoriyalar test oʻtkazilishiga tayyorlanib, eshiklarga koʻchma koʻrsatkichlar ilib qoʻyiladi (auditoriya nomeri, nomi va oʻtirish uchun oʻrinlar soni).

20. Auditoriyalarda joylarning nomerlari koʻrsatilgan boʻlishi shart. Abituriyentlarni stol yoki partalarga oʻtqazish guruhdagi tartib raqamiga mos ravishda amalga oshiriladi.

TEST VAQTIDA ABITURIYENTLARGA QOʻYILADIGAN TALABLAR

1. Test oʻtkaziladigan kuni abituriyentlar oʻquv yurti binosiga va auditoriyalarga ruxsatnoma, pasport, titul varaqasini koʻrsatganlaridan keyin qoʻyiladi.

Abituriyent testga koʻk (havorang) pastali sharikli ruchka bilan kelishi kerak.

2. Javoblar varaqasi, savollar kitobchasi, titul varaqasi va ruxsatnomadagi barcha yozuvlar va boʻyashlar koʻk (havorang) pastali sharikli ruchka bilan bajariladi.

3. Test boshlanishi oldidan abituriyent oʻz javoblar varaqasining nomerini titul varaqasiga va ruxsatnomasiga koʻchirib yozadi. Javoblar varaqasi nomerini titul varaqasiga va ruxsatnomasiga koʻchirmagan yoki notoʻgʻri koʻchirgan abituriyentlarning test natijalari bekor qilinadi.

4. Test paytida abituriyentning, qanday sabab boʻlishidan qatʼi nazar, auditoriyadan chiqishi taqiqlanadi. Auditoriyadan chiqqanlar qaytadan test sinovlariga qoʻyilmaydi.

5. Test boshlangandan keyin auditoriyada sinovni tashkil qiluvchi shaxslarga savol berish man etiladi.

6. Test davomida abituriyentlarning bir-birlari bilan gaplashishi, javoblarni bir-biriga koʻrsatishi, test materiallarini uzatishi, ortiqcha ruchka soʻrashi va boshqalar taqiqlanadi.

7. Test davomida hisoblash lineykasi, mikrokalkulyator, lugʻat, jadval, yozuv kitobchalaridan va shpargalkalardan foydalanish taqiqlanadi.

8. Test hujjatlaridan nusxa koʻchirish va boshqalarga koʻmaklashish taqiqlanadi.

6-,7-,8-bandlarga rioya qilmagan va sinovlar chogʻida intizomli boʻlmagan abituriyentlar uchun belgilangan namunada dalolatnoma toʻldiriladi, ulardan test materiallari olib qoʻyiladi va auditoriyadan chiqarib yuboriladi.

9. Abituriyent, avvalo, savollar kitobchasida toʻgʻri deb hisoblagan javoblarni belgilaydi va shundan keyin javoblar varaqasidagi mos doirachalarni boʻyaydi. Buning uchun testga ajratilgan vaqtdan tashqari yana 20 daqiqa vaqt beriladi.

Javoblar varaqasi abituriyent ballari yigʻindisini aniqlaydigan yagona hujjatdir.

10. Test savollariga javob tanlashni va javoblar varaqasida belgilashni belgilangan vaqtdan ilgari tugatgan abituriyentlar test materiallari uchun ajratilgan stolning yoniga kelib, savollar kitobchasini qutichaga, javoblar varaqasi va titul varaqasini uning yoniga qoʻyib, guruh qaydnomasidagi oʻz familiyasi toʻgʻrisiga topshirgan vaqtini yozib, imzo qoʻyadilar.

11.Test uchun ajratilgan vaqt tugagach, auditoriya rahbari testning tugaganligini eʼlon qiladi, abituriyentlar bir vaqtning oʻzida oʻrinlaridan turib, tartib bilan keyingi partalardan boshlab test materiallari uchun ajratilgan stolning yoniga kelishadi, savollar kitobchasini qutichaga, javoblar varaqasi va titul varaqasini uning yoniga qoʻyib, guruh qaydnomasidagi oʻz familiyasi toʻgʻrisiga topshirgan vaqtlarini yozishib, imzo qoʻyadilar.

12. Auditoriyada test oʻtkazilish jarayonini nazorat qilish faqatgina auditoriya rahbari va kuzatuvchigagina emas, balki abituriyentga ham yuklanadi.

13. Test tugagandan soʻng abituriyent ruxsatnoma va pasportni olib, auditoriyadan chiqadi.

DAVLAT TEST MARKAZI VAKILINING OʻQUV YuRTI QABUL KOMISSIYASI BILAN BIRGALIKDA BAJARADIGAN IShLARI

1. Nizomga muvofiq hujjatlarni rasmiylashtirish (roʻyxatdan oʻtkazish) qoidasi va tartibini koʻrib chiqish.

2. Abituriyentlardan tushgan arizalarni taʼlim tili (oʻzbek, rus va qoraqalpoq) va mutaxassisligiga qarab ajratilganligini hamda alohida guruhlar tuzilganligini tekshirish, ularning sonini aniqlash. Guruhlar 30 yoki 60 ta abituriyentdan tuzilgan boʻlishi va alohida mutaxassisliklar uchun faqat oxirgi guruh 30 tadan farq qilishi mumkin. Bir xil fan bloklari boʻyicha test oʻtkaziladigan mutaxassisliklarda guruhlarni birlashtirish mumkin. DTM tomonidan yuborilgan maxsus dastur asosida 10-11, 13-16 shakllarning tuzilganligi va ularni DTMga yuborilganligini tekshirish.

3. Har bir auditoriyaga kiradigan abituriyentlar roʻyxati (14-shakl boʻyicha) tayyorligini tekshirish.

4.Qabul rejasini koʻrib chiqish. Shu jumladan, quyidagilarni aniqlash:

olimpiada va xalqaro musobaqalar gʻoliblari soni;

kooperatsiya boʻyicha kiradiganlarga ajratilgan oʻrinlar soni;

koʻzi ojizlardan tushgan arizalar soni;

muddatli harbiy xizmatni tugatib, harbiy qismlarning tavsiyanomasi bilan kelganlar soni;

davlat granti va pulli-kontrakt asosida kiruvchilar soni;

pulli-kontrakt asosida kiruvchilarning titul varaqalari toʻgʻri toʻldirilganligi.

5. Mutaxassisliklar, taʼlim tili hamda alohida imtiyozlar boʻyicha kodlarning toʻgʻri belgilanishini tekshirish.

6. Ruxsatnoma va titul varaqasining toʻldirilishini (qayd daftari asosida) nazorat qilish.

7. Viloyat, tuman, shahar, shahar tumani, oʻquv yurti kodlari va maktab nomerining toʻgʻri belgilanishini tekshirish.

8. Karton qogʻozlar va qurʼa tashlab abituriyentlarni oʻz joylariga oʻtqazish uchun nomerlar mavjudligini tekshirish.

9. Abituriyentlarning “Eslatma” bilan taʼminlanganligini tekshirish. Ularga javoblar varaqasini toʻlgʻazish qoidalari va tartibini tushuntirish (ular bilan yigʻilish oʻtkazish).

10. Test oʻgkaziladigan binolar va xonalarni aniqlash, ularning chizmasini olish, u erdagi stol (parta) va stullarning hamda test materiallarini topshirish uchun ajratilgan alohida stolning tayyorligini koʻzdan kechirish.

11. DTM vakili va uning binolar boʻyicha yordamchilari uchun ajratilgan maxsus xonalarni koʻzdan kechirish. (Bu xonalarda temir sandiqlar-seyf boʻlishi kerak).

12. 1 va 11-avgust kunlari soat 6.30 da direktor, oʻquv yurtining 1 boʻlim yoki maxsus paket olish uchun masʼul xodimi (gerbli muhr bilan) ishtirokida maxsus aloqa xodimlaridan test materiallarini qabul qilib olishni rejalashtirish.

13. Auditoriya rahbarlari va kuzatuvchilarning qaysi auditoriyada boʻlishini qurʼa tashlash yoʻli bilan aniqlash uchun joyni belgilab qoʻyish. Bu joy test oʻtkaziladigan xonaga yaqin boʻlishi kerak.

14. Test materiallarini 1 va 11-avgust kunlari soat 7.30 dan 8.00 ga qadar roʻyxat asosida sinov binolari (DTM vakili yordamchilariga) va xonalariga (auditoriya rahbarlariga) tarqatishni rejalashtirish.

15. Test kuni abituriyentlarni yigʻish joylari va xonalarga yoʻnaltiruvchi koʻrsatmalar tayyorligini aniqlash.

II. HOKIMIYAT BILAN HAMKORLIKDA QILINADIGAN IShLAR

1. Kuzatuvchi sifatida jalb qilinadiganlar roʻyxatini olish va uning tarkibi bilan sinchiklab tanishish (familiyasi, ismi, mutaxassisligi, ish joyi, uy adresi va telefoni). Ular bilan yigʻilish oʻtkazish va ularning zimmasiga qoʻyiladigan ishlarni tushuntirish 1 va 11-avgust kunlari boʻladigan testga keladigan kuzatuvchilar sonini 27-iyul kuni aniqlash.

2. Test oʻtkazish jarayonida tartib va intizomni nazorat qiluvchi xodimlarni aniqlash (roʻyxatini tayyorlash).

3. Tibbiy xizmatni tashkil qilish.

4. Milliy xavfsizlik xizmati va tartibni saqlash idoralari bilan birgalikda test oʻtkaziladigan joylarda jamoat tartibini saqlashni tashkil qilish.

5. Abituriyentlarning ota-onalari uchun oziq-ovqat rastalari va dam olish joylarini tashkil qilish.

6. Kuzatuvchilarni 1 va 11-avgust kunlari soat 7.00 dan 7.30 gacha sinov xonalariga yetib kelishini taʼminlash.

III. KUZATUVChILAR BILAN BAJARILADIGAN IShLAR

1. Kuzatuvchilarga testning maqsadi, qoidalari, sinov jarayonining qanday amalga oshirilishi haqida tushuncha berish.

2. Javoblar varaqasini toʻldirish yoʻlini oʻrgatish (kodlar, bloklar haqida tushuncha berish). Javoblar varaqasini toʻldirish boʻyicha “Yoʻriqlar”ni ularga tarqatish.

3. Abituriyentlarning ruxsatnomasi, titul varaqasi va pasportini (yoki harbiy hujjat) tekshirish asosida auditoriyaga kiritilishini tushuntirish.

DTM VAKILINING TEST OʻTKAZILADIGAN 1 VA 11 AVGUST KUNLARI BAJARADIGAN IShLARI

TEST JARAYoNIDA AUDITORIYA RAHBARINING BAJARADIGAN IShLARI

1. DTM vakilidan belgilangan vaqtda (soat 7.30-8.00 orasida) oʻziga biriktirilgan auditoriya uchun test materiallarini qabul qilib olish va qurʼa tashlash yoʻli bilan tanlangan auditoriyaga darhol yetib borish. Test materiallari qutisi ichida quyidagilar boʻladi.

Quti ichidagi materiallar:

a) guruhdagi abituriyentlar soniga teng boʻlgan miqdorda ichiga javoblar varaqasi solingan savollar kitobi;

b) 2 ta dalolatnoma;

3-shakl — savollar kitobi va javoblar varaqasi qutisini ochish va savollar kitobini qutiga joylab, qutini yopish uchun;

4-shakl — ishlatilgan javoblar varaqalari paketini yopish uchun;

v) ishlatilmay qolgan javoblar varaqalari va savollar kitoblari uchun 1 ta paket;

g) ishlatilgan javoblar varaqalari uchun 1 ta paket;

d) titul varaqalari uchun 1 ta paket;

e) chiqarib yuborilgan abituriyentlar haqida 2 ta dalolatnoma (6-shakl);

j) qayta muhrlash uchun 4 ta emblema:

ishlatilmay qolgan varaqalar va kitoblar paketini muhrlashga;

ishlatilgan javoblar varaqalari paketini qayta muhrlashga;

titul varaqalari paketini muhrlashga;

qutini qayta muhrlashga.

2. Auditoriyadagi abituriyentlardan ikki kishi taklif qilinadi. Auditoriya rahbari, kuzatuvchi va ana shu ikki abituriyent birgalikda quti muhrlanganligiga ishonch hosil qiladilar va qutini ochadilar. Savollar kitobi va uning ichiga solingan javoblar varaqasi birgalikda sanalib, ularning soni 3- va 4-shakllardagi dalolatnomalarning birinchi qismiga yoziladi, abituriyentlar vakillari bilan birgalikda imzo qoʻyiladi. Mazkur dalolatnomalarning ikkinchi qismlari test tugagach, eng keyin qolgan ikkita abituriyent ishtirokida toʻldiriladi va muhrlanadi.

3. Ichiga javoblar varaqasi solingan savollar kitobi abituriyentlarga tartib bilan tarqatiladi.

4. Abituriyentlarning eʼtibori javob varaqasining “Abituriyentlar diqqatiga” deb yozilgan qismiga jalb qilinib, “Yoʻriqlar” boʻyicha uni toʻldirish tartibi tushuntiriladi. Abituriyentlarga javob varaqalari bilan ishlashni tushuntirishda ularning diqqatini quyidagilarga alohida jalb etish zarur:

a) javob varaqalarini bukmaslik;

b) marker chiziqlariga qoʻshimcha chiziq va yozuvlar yozmaslik;

v) javoblar varaqasining nomeri (raqami) kodlangan (6) blok tagidagi doirachalarga ruchka tegizmaslik.

5. Abituriyentlarga “Test oʻtkazish qoidalari va talablari” tushuntiriladi.

Test boshlanishidan avval auditoriya rahbari va kuzatuvchi javoblar varaqasi nomeri titul varaqasi va ruxsatnomaga koʻchirib yozilganligini tasdiqlash maqsadida titul varaqasining va ruxsatnomaning maxsus joyiga imzo chekishlari kerak.

6. Test vaqtida abituriyentning kuzatuvchi, kuzatuvchining abituriyent bilan gaplashishi, savol- javob qilishi mumkin emasligini eslatish kerak.

7. Yuqoridagi ishlar amalga oshirilib boʻlgach, baland ovoz bilan “TEST BOShLANDI” deb eʼlon qilish hamda test boshlanishi va tugashi vaqtini doskaga yozib qoʻyish kerak.

8. Abituriyentlarning bir-birlari bilan gaplashmasligi, turli qogʻoz va boshqa narsalardan foydalanmasligini kuzatish lozim, eshik, derazalar orqali abituriyentlarning mustaqil ishlashiga xalaqit beradigan har qanday salbiy aralashuvlarning oldini oling.

9. Bino boʻyicha masʼul xodim ortib qolgan savol kitoblari va uning ichiga solingan javob varaqalarini maxsus paketga solishi va uni muhrlab, DTM vakiliga topshirishi kerak.

10. Moʻljallangan vaqtdan oldin test topshiriqlarini bajarib boʻlgan abituriyentlarga test materiallari qoʻyilishi kerak boʻlgan stol oldiga kelishi, savollar kitobchasini qutiga, javoblar varaqasi hamda titul varaqasini quti yoniga alohida qoʻyishi, roʻyxatga vazifani topshirgan vaqtini yozishi va imzo qoʻyishi kerakligini aytish kerak.

11. Abituriyentlar tomonidan test oʻtkazish qoidalari buzilgan hollarda auditoriya kuzatuvchisi va ikki abituriyent ishtirokida b-shakldagi testdan chetlashtirish haqidagi dalolatnoma toʻldirilishi lozim. Bunda sana, oʻquv yurti nomi, guruh nomeri, qoidani buzgan abituriyentning familiyasi, ismi, otasining ismi, javoblar varaqasi nomeri va qanday qoidani, talabni buzganligi va soat nechada chetlashtirilganligi yozilishi shart.

12. Test vaqti tugagach, abituriyentlarga navbat bilan test materiallarini topshirish stoli yoniga kelishlari va test savollari kitobchasini qutiga va javob varaqasi hamda titul varaqasini stoldagi ajratilgan joyga alohida qoʻyishlari uqtiriladi.

13. Javob varaqalari va savollar kitoblarini alohida sanang.

a) ishlatilgan javob varaqalarining hammasini marker chizigʻini bir tomonga qilib taxlang, eng chetiga testdan chetlashtirilgan abituriyentning javoblar varaqasiga dalolatnomani yelimlab, tartib bilan unta ajratilgan paketga joylang (buklanmasligi va muhrlanganda yelim tegmasligi kerak).

4-shakldagi dalolatnomani toʻldiring. Unga ham b) bandda aytilgan toʻrt kishi imzo cheksin. Dalolatnomani javoblar varaqalari paketiga joylang. Paketni ehtiyotlab, uning ichidagi javoblar varaqasiga yelim tegizmasdan emblema bilan muhrlang.

b) savollar kitoblarini qutiga soling, 3-shakldagi dalolatnomaning ikkinchi qismini toʻldiring va imzo qoʻying. Imzo qoʻyuvchilar: rahbar, kuzatuvchi va eng keyin qolgan ikki abituriyent. (Qutini ochganda ishtirok etgan abituriyentlarning boʻlishi shart emas);

v) titul varaqalarini sanang va uni kerakli paketga soling. Kuzatuvchi bilan birgalikda guruh roʻyxatini yana bir marta koʻrib chiqing, kerak joylarini toʻldiring, imzo qoʻying va titul varaqalari paketiga soling. Titul varaqalari paketini emblema bilan muhrlang.

Qutiga 3-shakldagi dalolatnomani soling va emblema bilan muhrlang.

Shundan soʻng maxsus xonada javoblar varaqasi solingan paketni, kitoblar solingan qutini va titul varaqasi solingan paketni zudlik bilan DTM vakiliga topshirasiz va 2-shaklga imzo qoʻyasiz.

14. Oxirida auditoriya rahbari va kuzatuvchi oʻz guvohnomalarini bosh rahbarga topshiradi va shu haqda imzo qoʻyadi.