Mehnat daftarchalarini yuritish tartibi toʻgʻrisidagi yoʻriqnomaga oʻzgartirish va qoʻshimchalar kiritish haqida (402-2-son)

19.05.2001

Oʻzbekiston Respublikasi Mehnat va aholini ijtimoiy muhofaza qilish vazirligining

buyrugʻi

[Oʻzbekiston Respublikasi Adliya vazirligi tomonidan 2001-yil 19-mayda 402-2-son bilan davlat roʻyxatidan oʻtkazilgan]

Oʻzbekiston Respublikasi Vazirlar Mahkamasining 2000-yil 15-noyabrdagi “Oʻzbekiston Respublikasi pensiya taʼminoti tizimini takomillashtirish chora-tadbirlari toʻgʻrisida”gi 444-son qarorining ijrosini taʼminlash, shuningdek amaldagi qonun hujjatlariga muvofiq holda tahririy oʻzgartirishlar kiritish maqsadida buyuraman:

1. Oʻzbekiston Kasaba uyushmalari Federatsiyasi Kengashi bilan 1998-yil 7-yanvarda kelishilib, Oʻzbekiston Respublikasi Mehnat vazirligi va Ijtimoiy taʼminot vazirligi tomonidan 1998-yilning 7-yanvarida 8/04-1 va 32/01-sonlar bilan tasdiqlangan Mehnat daftarchalarini yuritish tartibi toʻgʻrisidagi Yoʻriqnomaga (1998-yil 29-yanvarda 402-son bilan roʻyxatga olingan) ilovaga muvofiq oʻzgartish va qoʻshimchalar kiritilsin.

2. Ushbu buyruq Oʻzbekiston Respublikasi Adliya vazirligida davlat roʻyxatidan oʻtkazilgandan soʻng oʻn kundan keyin kuchga kiritilsin.

Vazir O. OBIDOV

Toshkent sh.,

2001-yil 16-may,

4-son

Oʻzbekiston Respublikasi Mehnat va aholini ijtimoiy muhofaza qilish vazirligining 2001-yil 16-maydagi 4-son buyrugʻiga ILOVA

Mehnat daftarchalarini yuritish tartibi toʻgʻrisidagi Yoʻriqnomaga kiritilayotgan

OʻZGARTIRISh VA QOʻShIMChALAR

1. 1.2-bandi boʻyicha:

birinchi xatboshidagi “Pensiya jamgʻarmasining tuman (shahar) boʻlimlari tomonidan beriladi va yuritiladi” soʻzlari “tuman (shahar) ijtimoiy taʼminot boʻlimlari tomonidan amalga oshiriladi” soʻzlariga;

ikkinchi, uchinchi va toʻrtinchi xatboshilaridagi “jamgʻarmaning tuman (shahar)” hamda “Pensiya jamgʻarmasining tuman (shahar)” soʻzlari “tuman (shahar) ijtimoiy taʼminot” soʻzlariga;

uchinchi xatboshidagi “Pensiya jamgʻarmasiga” soʻzlarini “budjetdan tashqari Pensiya jamgʻarmasiga” soʻzlariga almashtirilsin.

2. 1.5-band quyidagi tahrirda bayon etilsin:

“Ishga kirayotgan vaqtda ishga kirayotgan shaxs ish beruvchiga mehnat daftarchasini (birinchi marotaba ishga kirayotganlar bundan mustasno) taqdim etishi shart. Oʻrindoshlik asosida ishga kirayotganlar mehnat daftarchasi oʻrniga asosiy ish joyidan maʼlumotnoma taqdim etadilar”.

3. Quyidagi tahrirda 1.6-band kiritilsin:

“1.6.Mehnat daftarchasi xodim ish haqi oladigan korxonaning xodimlar boʻlimida yoki shunga masʼul etilgan shaxsda saqlanadi. Oʻrindoshlik asosida ishlayotganlarniki esa asosiy ish joylarida saqlanadi”.

4. 2.2-banddagi ikkinchi xatboshi (“Eslatma”) chiqarib tashlansin.

5. 2.3-bandining birinchi xatboshidagi, 2.4, 2.7-bandlardagi, 2.8-bandning ikkinchi xatboshidagi, 4.4-bandning ikkinchi va oltinchi xatboshidagi “koʻchirish”, “koʻchirilishi”, “koʻchirilgan”, “koʻchirilgani” soʻzlari tegishli ravishda “oʻtkazish”, “oʻtkazilishi”, “oʻtkazilgan”, “oʻtkazilgani” soʻzlariga almashtirilsin.

6. 2.6-band quyidagi tahrirda bayon etilsin:

“Mehnat daftarchasiga notoʻgʻri yoki noaniq yozuv kiritgan korxona tugatilgan boʻlsa, bunday xatoni tuzatish mazkur korxona bevosita boʻysungan yuqori tashkilot tomonidan (bunday tashkilot mavjud boʻlmagan taqdirda tegishli arxivlardan olingan maʼlumotlar asosida amalga oshiriladi), korxona qayta tashkil etilgan hollarda esa uning huquqiy vorisi tomonidan amalga oshiriladi”.

7. 2.10-bandning ikkinchi xatboshi quyidagi tahrirda bayon etilsin:

“Mazkur maʼlumotlarni yozgan shaxsning imzosi korxona muhri bilan tasdiqlanadi”.

8. 2.12-bandda:

toʻrtinchi xatboshi quyidagi tahrirda bayon etilsin:

“3-ustunga “Falon sex, boʻlim, boʻlinma, qism va h.k. falonchi lavozimga (kasbga, mutaxassislikka) qabul qilindi (tayinlandi yoki saylandi)” deb yozib, berilgan malaka darajasi (agar shunday daraja berilsa) aniq koʻrsatiladi”;

oʻninchi xatboshi quyidagi tahrirda bayon etilsin:

“Xodim mazkur korxonaning oʻzida boshqa ishga oʻtkazilsa, uning mehnat daftarchasiga quyidagicha yozuv kiritiladi: 1-ustunda tartib raqami, 2-ustunda sana, 3-ustunda “Falon lavozimga (kasbga, mutaxassislikka) oʻtkazildi” deb yozib, 4-ustunda tegishli buyruqning soni va sanasi koʻrsatiladi”.

9. III-qism quyidagi tahrirda 3.5-band bilan toʻldirilsin:

“Mehnat daftarchasi xodimga faqatgina mehnat shartnomasi bekor qilinganida beriladi. Boshqa hollarda xodimning talabiga binoan mehnat daftarchasidan koʻchirma yoki nusxa beriladi”.

10. 2.16-bandning birinchi, toʻrtinchi xatboshilaridagi, 2.21-bandning birinchi va uchinchi xatboshilaridagi, 3.2-banddagi “shaxsiy yordamchi xoʻjaliklarda” va “shaxsiy yordamchi xoʻjalikda” soʻzlari tegishli ravishda “dehqon xoʻjaliklarida” va “dehqon xoʻjalikda” soʻzlariga almashtirilsin.

11. 2.16-bandining birinchi xatboshidagi “Pensiya jamgʻarmasini tuman (shahar)”, 2.21-bandining birinchi xatboshidagi va 3.2-bandidagi “Pensiya jamgʻarmasining tuman (shahar)” soʻzlari “tuman (shahar) ijtimoiy taʼminot” soʻzlariga almashtirilsin.

12. 2.19-bandning uchinchi xatboshi quyidagi tahrirda bayon qilinsin:

“Ishsiz shaxs deb eʼtirof etilgan fuqarolar mahalliy mehnat boʻlimiga belgilangan muddatda roʻyxatdan oʻtish uchun kelganlarida mehnat daftarchalarini mehnat boʻlimi xodimiga koʻrsatishlari shart”.

13. 7.1-band “nazoratni” soʻzidan keyin “oʻrnatilgan tartib asosida” soʻzlari bilan toʻldirilsin.

14. 7.2-banddan keyin quyidagi tahrirda xatboshi kiritilsin:

“Eslatma: har bir xodimga faqatgina bitta mehnat daftarchasi yuritiladi, agarda ayrim sabablarga koʻra xodimda ikki yoki undan koʻp mehnat daftarchasi mavjud boʻlsa keyingilari shunday mavjudlikni aniqlagan ish beruvchi tomonidan bekor qilinadi. Bunda keyingi mehnat daftarchalaridagi yozuvlar uchun shu ish beruvchi masʼul boʻlmaydi”.

Mazkur oʻzgartirish va qoʻshimchalar Oʻzbekiston Kasaba uyushmalari Federatsiyasi Kengashi bilan kelishildi.

Oʻzbekiston Kasaba uyushmalari Federatsiyasi Kengashi raisi D. Jahongirova

2001-yil 16-may