Umumiy foydalaniladigan avtomobil yoʻllarini qurish va ulardan foydalanishni tashkil etishni hamda sifatini nazorat qilishni takomillashtirish toʻgʻrisida (226-son)

01.11.2006

Oʻzbekiston Respublikasi Vazirlar Mahkamasining

qarori

Avtomobil yoʻllarini qurish va ulardan foydalanishni samarali tashkil etish va sifatini nazorat qilish maqsadida Vazirlar Mahkamasi qaror qiladi:

1. Avtomobil yoʻllarini qurish, rekonstruksiya qilish va mukammal taʼmirlash boʻyicha bajarilgan ishlarning sifati ustidan nazorat qilish va ularni qabul qilib olish tartibi toʻgʻrisidagi nizom ilovaga muvofiq tasdiqlansin.

21. Belgilansinki, Oʻzbekiston Respublikasi Avtomobil yoʻllari davlat qoʻmitasi joriy yilning 1-martidan kechikmay Vazirlar Mahkamasi huzuridagi Respublika yoʻl jamgʻarmasini boshqarish Kengashi bilan kelishgan holda:

umumiy foydalanishdagi avtomobil yoʻllarini mukammal taʼmirlash boʻyicha har yilgi dasturlarni shakllantiradi va tasdiqlaydi;

umumiy foydalanishdagi avtomobil yoʻllari boʻyicha umumiy foydalanishdagi avtomobil yoʻllarini joriy taʼmirlash parametrlarini tasdiqlaydi;

xoʻjaliklararo qishloq avtomobil yoʻllarini, shaharlar, shahar posyolkalari, qishloqlar va ovullar koʻchalarini taʼmirlash boʻyicha har yilgi dasturlarni tasdiqlaydi.

3. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosarlari R.S. Azimov va N.M. Xanov zimmasiga yuklansin.

Oʻzbekiston Respublikasining Bosh vaziri Sh. MIRZIYOYEV

Toshkent sh.,

2006-yil 1-noyabr,

226-son

Vazirlar Mahkamasining 2006-yil 1-noyabrdagi 226-son qaroriga ILOVA

Avtomobil yoʻllarini qurish, rekonstruksiya qilish va mukammal taʼmirlash boʻyicha bajarilgan ishlarning sifati ustidan nazorat qilish va ularni qabul qilib olish tartibi toʻgʻrisida nizom:

nizom

I. Umumiy qoidalar

1. Ushbu Nizom umumiy foydalanishdagi avtomobil yoʻllarini, xoʻjaliklararo qishloq avtomobil yoʻllarini, shaharlar, shahar posyolkalari, qishloqlar va ovullar koʻchalarini, shuningdek, yoʻl inshootlarini (keyingi oʻrinlarda — obyektlar) qurish, rekonstruksiya qilish va mukammal taʼmirlash boʻyicha (shu jumladan tabiiy ofatlar oqibatlarini bartaraf etish chogʻida) bajarilgan ishlarning sifati ustidan nazorat qilish va ularni qabul qilib olish tartibini belgilaydi.

2. Bajarilgan ishlar sifatini nazorat qilish va ularni qabul qilib olish loyiha talablariga, shaharsozlik normalariga, obyektlarni qurish, rekonstruksiya qilish, mukammal taʼmirlash qoidalari va standartlariga hamda boshqa normativ-huquqiy hujjatlarga, shuningdek mazkur Nizomga rioya qilinishini tekshirish maqsadida amalga oshiriladi.

II. Sifatni nazorat qilishni tashkil etish

4. Obyektlarni qurish, rekonstruksiya qilish, mukammal taʼmirlashda sifatni nazorat qilishning quyidagi turlari amalga oshiriladi:

shaharsozlik normalari, qoidalari va standartlariga asosan pudratchi tashkilotlarning texnik xodimlari (bosh muhandislari, ish bajaruvchilar, ustalar, brigadirlar va laboratoriyalar) tomonidan ishlar bajarilishi jarayonida doimiy ravishda amalga oshiriladigan ishlab chiqarish va laboratoriya nazorati;

buyurtmachi tomonidan belgilangan tartibda amalga oshiriladigan texnik nazorat;

buyurtmachi bilan tuziladigan shartnoma boʻyicha obyekt uchun loyiha hujjatlarini ishlab chiqqan loyihalash tashkilotlari (loyihaning bosh muhandislari) tomonidan belgilangan tartibda amalga oshiriladigan mualliflik nazorati;

Obyektlarni qurish, rekonstruksiya qilish, mukammal taʼmirlash boʻyicha loyiha, qurilish-montaj va taʼmirlash ishlari sifati ustidan davlat nazorati belgilangan tartibda Oʻzbekiston Respublikasi Transport vazirligi huzuridagi Transport nazorati inspeksiyasi tomonidan amalga oshiriladi.

Qurish, rekonstruksiya qilish, mukammal taʼmirlash jarayonida texnologik jarayon olib borilishining toʻgʻriligi, bajariladigan ishlar hamda foydalaniladigan materiallarning sifati yuzasidan texnik nazoratni amalga oshirish, shuningdek yopilib ketadigan va oraliq ishlarni qabul qilib olishda hamda tugallangan obyektlarni foydalanishga qabul qilib olishda buyurtmachi tomonidan komissiya tarkibida ishtirok etish uchun ushbu obyektga xizmat koʻrsatadigan yoʻl tashkilotlari jalb etilishi mumkin.

III. Obyektlarni qurish, rekonstruksiya qilish, mukammal taʼmirlash boʻyicha bajarilgan ishlarni qabul qilib olishning umumiy tartibi

5. Tasdiqlangan loyihalar va ishchi chizmalar, shaharsozlik normalari, qoidalari va standartlariga toʻliq muvofiq holda bajarilgan, toʻliq tugallangan ishlar qabul qilib olinishi lozim. Ishlarni qabul qilib olishda ishlar naturada tasdiqlanadi, nazorat tartibida oʻlchashlar amalga oshiriladi, qurilish materiallari va nazorat namunalarining ishlab chiqarish hamda laboratoriya sinovlari natijalari, ishlarni bajarish va mualliflik nazorati jurnallaridagi yozuvlar tekshiriladi.

6. Obyektlarni qurish, rekonstruksiya qilish, mukammal taʼmirlashda quyidagi ishlar amalga oshiriladi:

yopilib ketadigan ishlarni qabul qilib olish;

bajarilgan ishlarni oylik (oraliq) qabul qilib olish.

7. Yopilib ketadigan ishlarni ularning har bir turi (bosqichi) boʻyicha qabul qilib olish ularning keyingi tur (bosqich) ishlari boshlangunga qadar bajarilishiga qarab amalga oshiriladi. Ishlarni quyidagi tarkibdagi komissiya qabul qilib oladi: buyurtmachining vakili — texnik nazoratchi (rais); pudratchi tashkilot vakili — ish bajaruvchi yoki usta, laborant va geodezist (zarur hollarda); yoʻlga xizmat koʻrsatadigan yoʻl tashkiloti vakili; loyiha tashkiloti vakili (koʻtarib turuvchi konstruksiyalarni qabul qilib olishda). Koʻtarib turuvchi konstruksiyalar roʻyxati loyihada belgilanadi. Yopilib ketadigan ishlarni qabul qilib olish natijalari ushbu Nizomga 1-ilovadagi shakl boʻyicha dalolatnoma bilan rasmiylashtiriladi, unda qabul qilinadigan ishlarning loyiha, normativ-texnik hujjatlar, standartlar talablariga muvofiqlik darajasi aks ettiriladi, shuningdek qabul qilinadigan ishlarga baho va ishlarning keyingi turlarini bajarishga ruxsat beriladi. Dalolatnomaga oʻlchovlar qaydnomasi va laboratoriya sinovlari natijalari ilova qilinadi.

8. Obyektning bajarilgan ishlari va tugallangan obyektlarini oylik (oraliq) qabul qilib olish buyurtmachi va pudratchi tashkilot tomonidan rasmiylashtiriladi. Bajarilgan ishlar va yoʻllarning tugallangan konstruktiv elementlarini Oylik (oraliq) qabul qilib olish natijalari mazkur Nizomga 2-ilovaga muvofiq shakl boʻyicha maʼlumotnoma-hisob-faktura bilan, miqdor va qiymat koʻrsatkichlari hisob-kitob jadvalida aks ettirilgan holda 2a-ilovaga muvofiq aks ettirilgan holda rasmiylashtiriladi.

IV. Qurilishi tugallangan va rekonstruksiya qilingan obyektlarni foydalanishga qabul qilib olish tartibi

9. Qurilishi tugallangan va rekonstruksiya qilingan obyektlarni foydalanishga qabul qilib olish amaldagi shaharsozlik normalari, qoidalari va standartlariga asosan amalga oshiriladi.

10. Qurilishi tugallangan va rekonstruksiya qilingan obyektlar yoki ularning uchastkalari (ishga tushirish majmualari) quyidagi ikki bosqichda;

obyektning tugallanganligi va u qabul qilib olishga tayyorligi toʻgʻrisida pudratchi tashkilotning xabarnomasidan keyin ishchi komissiyalar tomonidan;

ishchi komissiya tavsiyanomasi hamda obyektni foydalanishga qabul qilib olishga taqdim etish toʻgʻrisida buyurtmachidan xabarnoma olingandan keyin davlat qabul komissiyalari tomonidan foydalanishga qabul qilinadi.

11. Ishchi komissiyalar buyurtmachining qarorlari (buyruqlari) bilan tayinlanadi. Ishchi komissiyalar tarkibiga qabul qilinayotgan obyektdan foydalanish yuklangan buyurtmachi, Oʻzbekiston Respublikasi Transport vazirligi huzuridagi Transport nazorati inspeksiyasi, Qoraqalpogʻiston Respublikasi Vazirlar Kengashi va viloyatlar hokimliklari, pudrat tashkilotlari (subpudrat tashkilotlari), yoʻl tashkiloti, loyiha tashkiloti va boshqa manfaatdor tashkilotlarning vakillari kiradi.

12. Pudratchi tashkilot ishchi komissiyaga quyidagi hujjatlarni taqdim etadi:

qurilish-montaj ishlarini amalga oshirishda ishtirok etgan tashkilotlarning ular tomonidan bajarilgan ishlarning turlari va hajmlari hamda masʼul ijrochilari koʻrsatilgan holdagi roʻyxati;

qabul qilishga taqdim etilgan yoʻlning texnik loyihasi va ishchi chizmalari toʻplami, ijro sxemalari;

yopilib ketadigan ishlarni qabul qilib olish dalolatnomalari;

yoʻl-qurilish materiallari va yoʻl toʻshamalarining konstruktiv qatlamlaridan kesiklar (tuproq jinslari) sinovlari jurnallari, muvofiqlik sertifikatlari;

ishlarni bajarish va mualliflik nazorati jurnallari;

Oʻzbekiston Respublikasi Transport vazirligi huzuridagi Transport nazorati inspeksiyasi tomonidan koʻrsatilgan kamchiliklarni bartaraf etish dalolatnomalari.

13. Ishchi komissiya obyektni foydalanishga qabul qilish uchun Davlat qabul komissiyasiga taqdim etgunga qadar quyidagilarni bajarishi shart:

bajarilgan ishlar hajmlari va turlarining tasdiqlangan loyihaga, ishlarni bajarishning shaharsozlik normalari, qoidalari va standartlariga muvofiqligini tekshirish;

zarur nazorat oʻlchovlari va laboratoriya sinovlarini oʻtkazgan holda ishlar sifatini tekshirish;

obyektni qurish va uni rekonstruksiya qilish qiymati toʻgʻri shakllantirilganligini koʻrib chiqish. Qiymat oʻsishi va (yoki) unga obyektni qurish va rekonstruksiya qilishga tegishli boʻlmagan xarajatlar notoʻgʻri kiritilishi holatlari aniqlanganda, uning sabablarini oʻrganib chiqadi va ularni bartaraf etish boʻyicha taklif kiritadi;

mazkur Nizomga 3-ilovaga muvofiq shakl boʻyicha obyekt foydalanishga qabul qilishga tayyorligi toʻgʻrida dalolatnoma tuzish.

Dalolatnomaga oʻlchovlar qaydnomasi va laboratoriya sinovlari natijalari ilova qilinadi.

Ishchi komissiya tomonidan aniqlangan kamchiliklar va chala qilingan ishlar dalolatnomaning ilovasida aks ettirilishi hamda komissiya tomonidan belgilangan muddatda bartaraf etilishi lozim.

14. Qurish va rekonstruksiya qilish tugallangan obyektlarni qabul qilib olish boʻyicha davlat komissiyasi obyektni qurish va rekonstruksiya qilishni loyihalashtirishga topshiriqni tasdiqlagan organ tomonidan tashkil etiladi. Qurish va rekonstruksiya qilish tugallangan obyektlarni (yoki ularning uchastkalarini — ishga tushirish komplekslarini) qabul qilib olish boʻyicha davlat komissiyasi tarkibiga qabul qilinayotgan obyektlardan foydalanish yuklangan buyurtmachi, Oʻzbekiston Respublikasi Transport vazirligi huzuridagi Transport nazorati inspeksiyasi, mahalliy ijro etuvchi hokimiyat organlari, pudrat tashkilotlari (subpudrat tashkilotlar), yoʻl tashkiloti, loyiha tashkilotlari, Ichki ishlar vazirligining yoʻl harakati xavfsizligi davlat xizmati organlari, Oʻzbekiston Respublikasi Sogʻliqni saqlash vazirligi huzuridagi Sanitariya-epidemiologik osoyishtalik va jamoat salomatligi qoʻmitasi va yongʻin nazorati organlari (liniyadagi binolar va qoʻshimcha inshootlar boʻyicha), tabiatni muhofaza qilish organlarining vakillari, Bosh davlat mehnat texnika inspektori va boshqa manfaatdor tashkilotlarning vakillari kiradi.

15. Qurilishi tugallangan va rekonstruksiya qilingan obyektlarni (yoki ularning uchastkalari — ishga tushirish majmualarini) doimiy foydalanishga qabul qilib olish Davlat komissiyasiga obyekt boʻyicha barcha zarur ijro hujjatlari, shuningdek ishchi komissiya dalolatnomasi taqdim etiladi.

Taqdim etilgan hujjatlar tekshirilgandan keyin va nazorat oʻlchovlari oʻtkazilib hamda ayrim konstruktiv elementlar tekshirilib obyekt koʻrib chiqilgandan keyin komissiya tomonidan mazkur Nizomga 4-ilovaga muvofiq shakl boʻyicha obyektni qabul qilish dalolatnomasi tuziladi. Dalolatnomada obyekt sifatini baholash va uning qiymati koʻrsatilgan holda doimiy foydalanishga qabul qilinadigan obyektning qisqacha tavsifi beriladi, shuningdek obyektni foydalanishga qabul qilish toʻgʻrisida soʻnggi xulosa kiritiladi.

16. Davlat qabul komissiyasining obyektni foydalanishga qabul qilish dalolatnomasi u taqdim etilgandan keyin bir oy muddatda Davlat qabul komissiyasini tayinlagan organ tomonidan tasdiqlanadi.

Obyektni foydalanishga qabul qilish dalolatnomasi va unga axborot xati besh nusxada tuzilib, ikki nusxasi qaror loyihasi bilan birga Davlat qabul komissiyasini tayinlagan organga, ikki nusxasi buyurtmachiga va bir nusxasi pudratchiga topshiriladi.

17. Buyurtmachi Davlat qabul komissiyasi dalolatnomasining bir nusxasini hamda texnik (loyiha-smeta) va ijro hujjatlarining toʻliq toʻplamini yoʻl tashkilotiga berishi shart.

Qabul qilish dalolatnomasi va texnik (loyiha-smeta) hujjatlari yoʻldan foydalanadigan yoʻl tashkilotida saqlanadi.

V. Mukammal taʼmirlash tugallangan obyektlarni qabul qilish tartibi

18. Mukammal taʼmirlash tugallangan obyektlarni foydalanishga qabul qilish amaldagi shaharsozlik normalari, qoidalari va standartlariga asosan amalga oshiriladi.

19. Mukammal taʼmirlash tugallangan obyektlar buyurtmachi (rais), Oʻzbekiston Respublikasi Transport vazirligi huzuridagi Transport nazorati inspeksiyasi, Qoraqalpogʻiston Respublikasi Vazirlar Kengashi va viloyatlar hokimliklari, pudrat tashkilotlari, yoʻlga xizmat koʻrsatuvchi yoʻl tashkiloti, Ichki ishlar vazirligining yoʻl harakati xavfsizligi davlat xizmati organlari, loyiha tashkiloti (mualliflik nazorati) va boshqa manfaatdor tashkilotlar vakillaridan iborat tarkibda ishchi komissiyalar tomonidan foydalanishga qabul qilinadi.

20. Mukammal taʼmirlash tugallangan obyektlarni qabul qilib olishda pudrat tashkiloti ishchi komissiyaga loyiha-smeta hujjatlarini, yopilib ketadigan ishlar dalolatnomalarini, qurilish materiallari sinovlari jurnallari va dalolatnomalarini va nazorat namunalarini, muvofiqlik sertifikatlarini, ishlarni bajarish va mualliflik nazorati jurnallarini, Oʻzbekiston Respublikasi Transport vazirligi huzuridagi Transport nazorati inspeksiyasining mulohazalarini bartaraf etish dalolatnomalarini taqdim etishga majburdir.

Komissiya tomonidan bajarilgan ishlar hajmlari va turlarining tasdiqlangan loyihaga, shaharsozlik normalariga, ishlarni bajarish qoidalari va standartlariga muvofiqligi; Oʻzbekiston Respublikasi Transport vazirligi huzuridagi Transport nazorati inspeksiyasining mulohazalari bartaraf etilishi; zarur nazorat oʻlchovlari va laboratoriya sinovlari oʻtkazilgan holda ishlarning sifati; bajarilgan ishlar hajmlari va turlarining tasdiqlangan loyihaga, standartlarga, qurilish normalariga va ishlarni bajarish qoidalariga muvofiqligi tekshiriladi.

Bajarilgan ishlar natijalari ushbu Nizomga 5-ilovaga muvofiq shakl boʻyicha mukammal taʼmirlash tugallangan obyektni foydalanishga qabul qilib olish toʻgʻrisida ishchi komissiyaning dalolatnomasida aks ettiriladi. Dalolatnomaga oʻlchov vedomostlari, laboratoriya sinovlari natijalari va ijro hujjatlari ilova qilinadi.

21. Ishchi komissiyaning mukammal taʼmirlash tugallangan obyektni foydalanishga qabul qilish dalolatnomasi taqdim qilingandan keyin bir oydan kechikmasdan komissiyani tayinlagan organ tomonidan tasdiqlanadi.

Obyektni foydalanishga qabul qilish dalolatnomasi va unga axborot xati besh nusxada tuzilib, ikki nusxasi qaror loyihasi bilan birga Davlat qabul komissiyasini tayinlagan organga, ikki nusxasi buyurtmachiga va bir nusxasi pudratchiga topshiriladi.

22. Buyurtmachi ishchi komissiya dalolatnomasining bitta nusxasini hamda texnik (loyiha-smeta) va ijro hujjatlarining toʻliq toʻplamini yoʻl tashkilotiga berishi shart.

Qabul qilish dalolatnomasi va texnik (loyiha-smeta) hujjatlari yoʻldan foydalanadigan yoʻl tashkilotida saqlanadi.

VI. Javobgarlik

23. Buyurtmachi qurilishi tugallangan, rekonstruksiya qilingan, mukammal taʼmirlangan obyektni, transport harakati ochilishiga tayyorlangan uning ayrim qismlari, binolar, inshootlarni qabul qilishni asossiz kechiktirganligi uchun pudratchi tashkilot oldida qonunchilikka va shartnomaga muvofiq mulkiy javobgar hisoblanadi.

24. Pudratchi tashkilot shartnomada belgilangan kafolat davrida buyurtmachi oldida mulkiy javobgar hisoblanadi. Kafolat muddati mobaynida obyektdan foydalanish jarayonida nuqsonlar va chala qilingan ishlar aniqlanganda, pudratchi tashkilot ularni bepul bartaraf etadi.

Umumiy foydalaniladigan avtomobil yoʻllarini qurish, rekonstruksiya qilish, mukammal va oʻrtacha taʼmirlash boʻyicha bajarilgan ishlar sifatini nazorat qilish va ularni qabul qilib olish tartibi toʻgʻrisidagi nizomga 1-ILOVA

Umumiy foydalaniladigan avtomobil yoʻllarini qurish, rekonstruksiya qilish, mukammal va oʻrtacha taʼmirlash boʻyicha bajarilgan ishlar sifatini nazorat qilish va ularni qabul qilib olish tartibi toʻgʻrisidagi nizomga 2-ILOVA

Izoh: QQS toʻlovchilari hisoblanmaydigan pudratchi qurilish tashkilotlari QQS satrini toʻldirmaydilar.

Umumiy foydalaniladigan avtomobil yoʻllarini qurish, rekonstruksiya qilish, mukammal va oʻrtacha taʼmirlash boʻyicha bajarilgan ishlar sifatini nazorat qilish va ularni qabul qilib olish tartibi toʻgʻrisidagi nizomga 2a-ILOVA

Obyekt qurilishida foydalanilgan qurilish materiallari, konstruksiyalar, buyumlar va asbob-uskunalar soni, joriy narxlari va qiymatlari toʻgʻrisida hisob-kitob jadvali

Umumiy foydalaniladigan avtomobil yoʻllarini qurish, rekonstruksiya qilish, mukammal va oʻrtacha taʼmirlash boʻyicha bajarilgan ishlar sifatini nazorat qilish va ularni qabul qilib olish tartibi toʻgʻrisidagi nizomga 3-ILOVA

(3-ilova Oʻzbekiston Respublikasi Vazirlar Mahkamasining 2020-yil 8-maydagi 271-sonli qarori tahririda — Qonun hujjatlari maʼlumotlari milliy bazasi, 08.05.2020-y., 09/20/271/0565-son)

Umumiy foydalaniladigan avtomobil yoʻllarini qurish, rekonstruksiya qilish, mukammal va oʻrtacha taʼmirlash boʻyicha bajarilgan ishlar sifatini nazorat qilish va ularni qabul qilib olish tartibi toʻgʻrisidagi nizomga 4-ILOVA

(4-ilova Oʻzbekiston Respublikasi Vazirlar Mahkamasining 2020-yil 8-maydagi 271-sonli qarori tahririda — Qonun hujjatlari maʼlumotlari milliy bazasi, 08.05.2020-y., 09/20/271/0565-son)

Umumiy foydalaniladigan avtomobil yoʻllarini qurish, rekonstruksiya qilish, mukammal taʼmirlash boʻyicha bajarilgan ishlar sifatini nazorat qilish va ularni qabul qilib olish tartibi toʻgʻrisidagi nizomga 5-ILOVA

(5-ilova Oʻzbekiston Respublikasi Vazirlar Mahkamasining 2024-yil 30-dekabrdagi 901-sonli qarori tahririda — Qonunchilik maʼlumotlari milliy bazasi, 10.01.2025-y., 09/25/901/0019-son)