Sanatsiya qilinayotgan korxona maxsus sanatsiya hisobvaragʻining ishlash tartibi toʻgʻrisida nizomni tasdiqlash haqida (1636-son)

03.11.2006

OʻZBEKISTON RESPUBLIKASI MONOPOLIYADAN CHIQARISH, RAQOBAT VA TADBIRKORLIKNI QOʻLLAB-QUVVATLASH DAVLAT QOʻMITASI OʻZBEKISTON RESPUBLIKASI MARKAZIY BANKI BOSHQARUVINING

Qarori

[Oʻzbekiston Respublikasi Adliya vazirligi tomonidan 2006-yil 3-noyabrda 1636-son bilan davlat roʻyxatidan oʻtkazildi ]

Oʻzbekiston Respublikasining “Bankrotlik toʻgʻrisida”gi Qonunining 32-moddasi hamda Oʻzbekiston Respublikasi Vazirlar Mahkamasining 1999-yil 26-iyuldagi 362-sonli qarori bilan tasdiqlangan “Sudgacha sanatsiyadan oʻtkazish tartibi toʻgʻrisidagi nizom”ning 10-bandiga muvofiq Oʻzbekiston Respublikasi Monopoliyadan chiqarish, raqobat va tadbirkorlikni qoʻllab-quvvatlash davlat qoʻmitasi va Markaziy banki Boshqaruvi qaror qiladilar:

1. Sanatsiya qilinayotgan korxona maxsus sanatsiya hisobvaragʻini ishlash tartibi toʻgʻrisida nizom ilovaga muvofiq tasdiqlansin.

2. Ushbu qaror Oʻzbekiston Respublikasi Adliya vazirligida davlat roʻyxatidan oʻtkazilgan kundan boshlab oʻn kundan keyin kuchga kiritilsin.

Monopoliyadan chiqarish, raqobat va tadbirkorlikni qoʻllab-quvvatlash davlat qoʻmitasi raisi v.b. B. ULASHOV

Toshkent sh.,

2006-yil 7-iyul,

2-son

Markaziy bank Boshqaruvi raisi F. MULLAJONOV

Toshkent sh.,

2006-yil 7-iyul,

276-V-son

Oʻzbekiston Respublikasi Monopoliyadan chiqarish davlat qoʻmitasi va Markaziy bank Boshqaruvining 2006-yil 7-iyuldagi 2, 276-V-son qarori bilan “TASDIQLANGAN”

Sanatsiya qilinayotgan korxona maxsus sanatsiya hisobvaragʻining ishlash tartibi toʻgʻrisida

NIZOM

Mazkur Nizom Oʻzbekiston Respublikasining “Bankrotlik toʻgʻrisida”gi Qonuni, Oʻzbekiston Respublikasi Prezidentining 2005-yil 6-noyabrdagi “Respublika komissiyalari va kengashlari faoliyatini tartibga solish toʻgʻrisida” PF-3675-son Farmoni, Oʻzbekiston Respublikasi Vazirlar Mahkamasining 1999-yil 26-iyuldagi 362-son “Korxonalarning bankrotligi toʻgʻrisidagi qonunchilikni amalga oshirishga doir qoʻshimcha chora-tadbirlar toʻgʻrisida”gi qaroriga muvofiq sanatsiya qilinayotgan korxonaning bank hisobvaragʻini qoʻllash va uning ishlash mexanizmini belgilaydi.

I. UMUMIY QOIDALAR

1. Milliy valyutadagi maxsus sanatsiya hisobvaragʻi unga nisbatan Oʻzbekiston Respublikasi Davlat aktivlarini boshqarish agentligi Hayʼatining (bundan buyon matnda Agentlik Hayʼati deb yuritiladi) qaroriga koʻra davlat madadi bilan sudgacha sanatsiya qoʻllanganda iqtisodiy nochor korxonaga ochiladi.

2. Maxsus sanatsiya hisobvaragʻini ochish uchun sanatsiya qilinayotgan korxona uning talab qilib olinguncha asosiy depozit hisobvaragʻiga xizmat koʻrsatayotgan bankka maxsus sanatsiya hisobvaragʻi ochishga ariza taqdim etadi. Arizaga Agentlik Hayʼatining korxonaga nisbatan sudgacha sanatsiyani joriy etish toʻgʻrisidagi qarorining Agentlik tomonidan tasdiqlangan nusxasi, moliyaviy sogʻlomlashtirish biznes-rejasi va barcha kreditorlar qarzlarini soʻndirishning Agentlik Hayʼati maʼqullagan jadvali ilova qilinadi.

3. Sanatsiya qilinayotgan korxonaning talab qilib olinguncha asosiy depozit hisobvaragʻiga xizmat koʻrsatuvchi bankka mazkur Nizomning 2-bandida nazarda tutilgan hujjatlar taqdim etilganidan soʻng sanatsiya qilinayotgan korxonaning talab qilib olinguncha asosiy hisobvaragʻiga maxsus sanatsiya hisobvaragʻi maqomi beriladi.

Xizmat koʻrsatuvchi bank oʻsha kuniyoq 2-kartotekaning va sanatsiya qilinayotgan korxonaning ushbu bankdagi boshqa barcha bank hisobvaraqlarining amal qilishini toʻxtatib, ulardagi mavjud mablagʻlarni sanatsiya qilinayotgan korxonaning maxsus sanatsiya hisobvaragʻiga oʻtkazadi. Bunda sanatsiya qilinayotgan korxonaning chet el valyutasidagi talab qilib olinguncha depozit hisobvaragʻi avvalgi rejimda faoliyatni davom ettiradi, uni tasarruf etish huquqi sanatsiya qilinayotgan korxonaga oʻtadi.

Oʻzbekiston Respublikasi Moliya vazirligi huzuridagi Qishloq xoʻjaligini davlat tomonidan qoʻllab-quvvatlash jamgʻarmasi mablagʻlari harakati bilan bogʻliq va oʻzaro hisob-kitoblarning maxsus chizmalari boʻyicha maxsus hisobvaraqlar harakatini toʻxtatishga yoʻl qoʻyilmaydi.

Oʻzbekiston Respublikasi Moliya vazirligi huzuridagi Qishloq xoʻjaligini davlat tomonidan qoʻllab-quvvatlash jamgʻarmasi mablagʻlari harakati bilan bogʻliq maxsus hisobvaraqlarning ishlash tartibi Oʻzbekiston Respublikasi Markaziy banki bilan kelishilgan holda Oʻzbekiston Respublikasi Moliya vazirligi huzuridagi Qishloq xoʻjaligini davlat tomonidan qoʻllab-quvvatlash jamgʻarmasini boshqarish departamenti tomonidan belgilanadi.

Maxsus hisobvaraqlar orqali oʻzaro hisob-kitoblarning maxsus chizmalarini oʻtkazish tartibi oʻzaro hisob-kitob qilish toʻgʻrisida qaror qabul qilgan tegishli organ tomonidan qonunchilik hujjatlari bilan belgilangan tartibda belgilanadi.

4. Ayni vaqtda xizmat koʻrsatuvchi bank elektron pochta orqali sanatsiya qilinayotgan korxonaga talab qilib olinguncha ikkilamchi depozit hisobvaraqlari ochilgan boshqa barcha banklarga, uning raqami va qabul qilish sanasini koʻrsatgan holda Agentlik Hayʼatining qaroriga havola qilib, ushbu hisobvaraqlarni yopish va ulardagi mavjud mablagʻlarni sanatsiya qilinayotgan korxonaning maxsus sanatsiya hisobvaragʻiga oʻtkazish talabini yuboradi.

1-kartotekada akseptni kutayotgan toʻlov hujjatlari mablagʻlarni oluvchilarga “__________ (korxona nomi)ga nisbatan Agentlik Hayʼatining 20___ yil ________ dagi ____son qarori bilan sudgacha sanatsiya joriy etilgan” belgisi bilan qaytariladi.

5. Agentlik Hayʼati tomonidan sanatsiyani dastlab belgilangan muddatdan koʻpga uzaytirish toʻgʻrisida qaror qabul qilingan taqdirda maxsus sanatsiya hisobvaragʻi sanatsiya yakunlanishigacha amal qilishda davom etadi.

6. Mablagʻlarni sanatsiya hisobvaraqlaridan hisobdan chiqarishga faqat sanatsiya qilinayotgan korxonaning toʻlov topshiriqnomalari asosida yoʻl qoʻyiladi.

7. Maxsus sanatsiya hisobvaragʻiga quyidagilar qayd etiladi: asosiy faoliyatdan, ortiqcha mol-mulkni, tovar-moddiy boyliklarni sotishdan kelib tushayotgan mablagʻlar, valyuta tushumini sotishdan tushadigan mablagʻlar, shuningdek ilgari tuzilgan shartnomaviy majburiyatlar boʻyicha toʻxtatilgan hisobvaraqlarga kelib tushgan mablagʻlar va boshqa tushumlar.

8. Sanatsiyaning borishi va qarzlarni soʻndirish jadvali bajarilishining monitoringini Agentlik amalga oshiradi.

9. Sanatsiya boshlanganidan soʻng olti oy mobaynida qarzni soʻndirish jadvali (jadvallari) buzilib, bu hol qarzdorning moliyaviy ahvoli yomonlashishi bilan bogʻliq boʻlsa, Agentlik Hayʼatining (shu jumladan kreditorlarning) koʻrib chiqishiga sanatsiyaning samarasizligi munosabati bilan sudgacha sanatsiyani muddatidan avval tugatish toʻgʻrisida taklif kiritilishi mumkin.

II. MAXSUS SANATSIYA HISOBVARAGʻI BOʻYICHA OPERATSIYALARNI AMALGA OSHIRISH

10. Maxsus sanatsiya hisobvaragʻidagi sanatsiya qilinayotgan korxonaning toʻlov topshiriqnomasi bilan Qarzni soʻndirish jadvaliga muvofiq joriy toʻlovlar va toʻlovlar amalga oshiriladi.

Joriy toʻlovlar deganda sudgacha sanatsiya rejimida korxonaning ishlab chiqarish faoliyati jarayonida yuzaga kelgan pul majburiyatlari va majburiy toʻlovlar tushuniladi.

11. Joriy toʻlovlarga quyidagilar kiradi:

mehnatga haq toʻlash, alimentlar, mualliflik shartnomalari boʻyicha haqlar, fuqarolarning hayot yoki sogʻliqqa yetkazilgan zararni qoplash talablari boʻyicha hisob-kitoblar;

budjetga va davlat maqsadli jamgʻarmalariga soliqlar va yigʻimlar boʻyicha toʻlovlar;

ijro muddati sanatsiya davrida boshlangan kreditlar boʻyicha joriy toʻlovlar va bank komissiyalari;

ular yetkazib beradigan mahsulot va bajaradigan ishlar uchun mahsulot yetkazib beruvchilar va pudratchilarga boʻnak hamda asosiy toʻlovlar;

ishlab chiqarish ehtiyojlari boʻyicha hisob-kitoblar, shu jumladan energiya resurslarining barcha turlari, aloqa xizmatlari, xom ashyo, materiallar, butlovchi buyumlar, taʼmirlash-foydalanish xarajatlari;

olingan kreditlar boʻyicha, shuningdek ijro muddati sanatsiya davrida boshlangan, hukumat kafolati bilan taʼminlangan kreditlar boʻyicha bank va Oʻzbekiston Tiklanish va taraqqiyot jamgʻarmasi oldidagi majburiyatlarga doir hisob-kitoblar.

Joriy toʻlovlarga ehtiyoj boʻlmaganida sanatsiya hisobvaragʻi mablagʻlarining qoldiqlari qarzni soʻndirish jadvalini muddatidan avval ijro etishga yoʻnaltiriladi.

12. Sanatsiya qilinayotgan korxonaning chet el valyutasidagi talab qilib olinguncha depozit hisobvaragʻi boʻyicha operatsiyalar Markaziy bankning ushbu hisobvaraqning amal qilishini tartibga soluvchi meʼyoriy hujjatlari bilan belgilangan tartibda, sanatsiya qilinayotgan korxonaning topshiriqlariga koʻra oʻtkaziladi.

III. SANATSIYA HISOBVARAGʻINING AMAL QILISHINI TUGATISH

13. Maxsus sanatsiya hisobvaragʻining amal qilishi belgilangan sanatsiya muddati yakunlanganda yoki Agentlik Hayʼati tomonidan sanatsiyani muddatidan avval tugatish toʻgʻrisida qaror qabul qilingan taqdirda tugatiladi.

Xizmat koʻrsatuvchi bankka Agentlik Hayʼatining sanatsiyani muddatidan avval tugatish toʻgʻrisida qarorining Agentlik tomonidan tasdiqlangan nusxasi taqdim etilgan kundan boshlab maxsus sanatsiya hisobvaragʻining amal qilishi toʻxtatiladi va u talab qilib olinguncha asosiy depozit hisobvaragʻi sifatida amal qilishda davom etadi.

Ana shu kuni xizmat koʻrsatuvchi bank 2-kartotekaning amal qilishini tiklaydi.

IV. YAKUNIY QOIDA

14. Mazkur Nizom Oʻzbekiston Respublikasi Moliya vazirligi va Davlat soliq qoʻmitasi bilan kelishilgan.

Moliya vaziri R. AZIMOV

2006-yil 7-iyul

Davlat soliq qoʻmitasi raisi B. PARPIYEV

2006-yil 7-iyul