Oʻzbekiston “Oʻzkommunxizmat” agentligi faoliyatini takomillashtirish va kommunal xoʻjalik korxonalarini moliyaviy sogʻlomlashtirish chora-tadbirlari toʻgʻrisida (PQ-445-son)

17.08.2006

Oʻzbekiston Respublikasi Prezidentining

Qarori

[Koʻchirma]

Oʻzbekiston Respublikasi Prezidentining “Oʻztransgaz” aksionerlik kompaniyasi faoliyatini tashkil etishni takomillashtirish chora-tadbirlari toʻgʻrisida” 2006-yil 8-avgustdagi PQ–438-sonli qaroriga muvofiq hamda Oʻzbekiston “Oʻzkommunxizmat” agentligi faoliyatini tashkil etishni yanada takomillashtirish va uning samaradorligini oshirish, kommunal xizmat koʻrsatish korxonalarini moliyaviy sogʻlomlashtirishni taʼminlash, kommunal xizmatlar uchun tariflarning asossiz oʻsishiga yoʻl qoʻymaslik maqsadida:

1. Oʻzbekiston Respublikasi Iqtisodiyot vazirligi, Moliya vazirligi, Oʻzbekiston “Oʻzkommunxizmat” agentligining Mintaqalararo suv quvurlaridan foydalanish Bosh direksiyasini tugatish va uning tarkibiga kiruvchi mintaqalararo suv quvurlaridan foydalanish boshqarmalarini bevosita Oʻzbekiston “Oʻzkommunxizmat” agentligiga boʻysundirish toʻgʻrisidagi taklifi qabul qilinsin.

2. Quyidagilar:

xodimlarning umumiy soni 37 birlik, shu jumladan boshqaruv xodimlari soni 29 birlikdan iborat boʻlgan Oʻzbekiston “Oʻzkommunxizmat” agentligining tashkiliy tuzilmasi va markaziy apparati tuzilmasi 1 va 2-ilovalarga* muvofiq;

* 1-2-ilova rus tilidagi matnda berilgan.

mintaqalararo suv quvurlaridan foydalanish boshqarmalarining namunaviy tuzilmasi 3-ilovaga* muvofiq;

* 3-ilova rus tilidagi matnda berilgan.

Oʻzbekiston “Oʻzkommunxizmat” agentligi toʻgʻrisidagi nizom 4-ilovaga* muvofiq tasdiqlansin.

* 4-ilova rus tilidagi matnda berilgan.

3. Quyidagilar Oʻzbekiston “Oʻzkommunxizmat” agentligining asosiy vazifalari etib belgilansin:

kommunal xizmat koʻrsatish sohasida iqtisodiy islohotlarni chuqurlashtirish, zamonaviy talablarga javob beradigan qonunchilik va normativ-huquqiy bazani shakllantirish boʻyicha davlat siyosatini ishlab chiqish va amalga oshirishda qatnashish, xoʻjalik yurituvchi subyektlar va aholiga kommunal xizmat koʻrsatish sohasida raqobat muhitini yaratishga koʻmaklashish;

kommunal xizmat koʻrsatish sohasida yagona texnikaviy siyosatni oʻtkazish, kommunal tarmoqlar va korxonalarni rivojlantirish, texnik qayta jihozlash va modernizatsiyalashga investitsiyalarni, shu jumladan xorijiy investitsiyalarni jalb etishga koʻmaklashish, ilgʻor zamonaviy texnologiyalar, mashina va uskunalarni tatbiq etish, suv va issiqlik energiyasini sotish hamda isteʼmol qilish boʻyicha hisoblagichlar va nazorat asbob-uskunalari bilan jihozlash;

mintaqalararo suv quvurlari faoliyatini muvofiqlashtirish, ulardan samarali foydalanish, ishonchli va barqaror ishlashini taʼminlash, kommunal xoʻjalik tizimida tarmoqlar hamda asbob-uskunalarni kapital va joriy taʼmirlashni tashkil etish;

kommunal xizmat koʻrsatish korxonalari uchun kadrlar tayyorlash, qayta tayyorlash va malakasini oshirishni tashkil etish.

4. 2007-yilning 1-yanvaridan respublikaning issiqlik va suv taʼminoti korxonalari uch yil muddatga asosiy fondlarni har yili qayta baholashni oʻtkazishdan ozod etilsin.

5. Quyidagilar:

Oʻzbekiston Respublikasi Davlat soliq qoʻmitasi va Monopoliyadan chiqarish, raqobat va tadbirkorlikni qoʻllab-quvvatlash davlat qoʻmitasining suv va issiqlik taʼminoti korxonalaridan tabiiy monopoliyalar, isteʼmolchilar huquqini himoya qilish toʻgʻrisidagi qonun hujjatlarini, monopoliyaga qarshi va soliq qonun hujjatlarini buzganligi uchun 5-6 ilovalarga* muvofiq jarima sanksiyalari summasini 2006-yil 1-aprel holatiga koʻra hisobdan chiqarish toʻgʻrisidagi taklifi;

“Oʻzbekenergo” DAK va “Oʻzbekneftgaz” MXKning suv va issiqlik taʼminoti korxonalarining elektr energiya, tabiiy gaz, mazut va issiqlik energiyasi boʻyicha toʻlash muddati oʻtgan qarzlari penyasini 2006-yil 1-aprel holatiga koʻra 7-8 ilovalarga* muvofiq hisobdan chiqarish toʻgʻrisidagi taklifiga rozilik berilsin.

* 5—8-ilovalar rus tilidagi matnda berilgan.

7. Oʻzbekiston “Oʻzkommunxizmat” agentligi, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari, suv va issiqlik taʼminoti korxonalari mazkur qarorda qabul qilingan moliyaviy sogʻlomlashtirish chora-tadbirlari munosabati bilan boʻshagan mablagʻlarni kommunal xoʻjalik tizimidagi tarmoqlar va asbob-uskunalarni kapital va joriy taʼmirlashga yoʻnaltirsin.

8. Oʻzbekiston Respublikasi Adliya vazirligi Oʻzbekiston “Oʻzkommunxizmat” agentligi, boshqa manfaatdor vazirliklar va idoralar bilan birgalikda bir oy muddatda:

amaldagi qonun hujjatlariga ushbu qarordan kelib chiqadigan oʻzgartish va qoʻshimchalar toʻgʻrisida Vazirlar Mahkamasiga takliflar kiritsin;

vazirlik va idoralarning meʼyoriy hujjatlari mazkur qarorga muvofiqlashtirilishini taʼminlasin.

9. Ushbu qarorning ijrosini nazorat qilish Oʻzbekiston Respublikasi Bosh vaziri Sh.M. Mirziyoyev zimmasiga yuklansin.

Oʻzbekiston Respublikasi Prezidenti I. KARIMOV

Toshkent sh.,

2006-yil 17-avgust,

PQ-445-son