Xalqaro shartnomalarga qoʻshilish toʻgʻrisida (PQ-435-son)
04.08.2006
Oʻzbekiston Respublikasi Prezidentining
Qarori
“Oʻzbekiston Respublikasining xalqaro shartnomalari toʻgʻrisida” Oʻzbekiston Respublikasi Qonunining 21-moddasiga muvofiq:
1. Oʻzbekiston Respublikasi quyidagilarga:
Rossiya Federatsiyasi, Belarus Respublikasi, Qozogʻiston Respublikasi va Qirgʻiziston Respublikasi oʻrtasida 1996-yil 29-martda Moskva shahrida imzolangan iqtisodiy va gumanitar sohalarda integratsiyalashuvni chuqurlashtirish toʻgʻrisidagi Shartnomaga;
Belarus Respublikasi, Qozogʻiston Respublikasi, Qirgʻiziston Respublikasi va Rossiya Federatsiyasi oʻrtasida 1998-yil 22-yanvarda Moskva shahrida imzolangan Transport uyushmasini tuzish toʻgʻrisidagi Bitimga;
1996-yilning 29-martida imzolangan iqtisodiy va gumanitar sohalardagi integratsiyalashuvni chuqurlashtirish toʻgʻrisidagi Shartnomada qatnashuvchi davlatlarning jismoniy shaxslari tomonidan pul oʻtkazmalarini amalga oshirish tartib-qoidalarini soddalashtirish haqida 1998-yil 24-noyabrda Moskva shahrida imzolangan Protokolga;
1996-yilning 29-martida imzolangan iqtisodiy va gumanitar sohalardagi integratsiyalashuvni chuqurlashtirish toʻgʻrisidagi Shartnomada qatnashuvchi davlatlar oʻrtasida pochta joʻnatmalari va erkin obuna hamda davriy nashrlarni yetkazib berish tartib-qoidalarini soddalashtirish haqida 1998-yil 24-noyabrda Moskva shahrida imzolangan Protokolga;
1996-yilning 29-martida imzolangan iqtisodiy va gumanitar sohalardagi integratsiyalashuvni chuqurlashtirish toʻgʻrisidagi Shartnomada qatnashuvchi davlatlar hududlarida televideniye va radio dasturlarini tarqatish uchun qulay shart-sharoitlar yaratish haqida 1999-yil 26-fevralda Moskva shahrida imzolangan Bitimga;
Yevroosiyo iqtisodiy hamjamiyati doirasida sugʻurta sohasida hamkorlik qilish toʻgʻrisidagi 2003-yil 27-aprelda Dushanbe shahrida imzolangan Bitimga;
Yevroosiyo iqtisodiy hamjamiyatiga aʼzo davlatlarning kutubxona ishi sohasidagi hamkorligi toʻgʻrisida 2003-yil 28-oktabrda Moskva shahrida imzolangan Bitimga qoʻshilsin.
2. Oʻzbekiston Respublikasi Tashqi ishlar vazirligi Oʻzbekiston Respublikasi mazkur xalqaro shartnomalar kuchga kirishi uchun zarur boʻlgan ichki davlat tartib-qoidalarini bajargani toʻgʻrisida depozitariyga tegishli bildirishnoma yoʻllasin.
3. Mazkur xalqaro shartnomalar Oʻzbekiston Respublikasi uchun kuchga kirgandan soʻng:
Oʻzbekiston Respublikasi Bosh vaziri oʻrinbosarlari hamda tegishli vazirlik va idoralarning rahbarlari belgilangan tartibda Oʻzbekiston Respublikasi majburiyatlari ijrosi ustidan nazoratni taʼminlasinlar;
Oʻzbekiston Respublikasi Adliya vazirligi manfaatdor vazirliklar va idoralar bilan birgalikda qonun hujjatlariga ushbu xalqaro shartnomalardan kelib chiqadigan oʻzgartish va qoʻshimchalar toʻgʻrisida Oʻzbekiston Respublikasi Vazirlar Mahkamasiga takliflar kiritsin.
4. Mazkur qarorning ijrosini nazorat qilish Oʻzbekiston Respublikasi Bosh vaziri Sh.M. Mirziyoyev zimmasiga yuklansin.
Oʻzbekiston Respublikasi Prezidenti I. KARIMOV
Toshkent sh.,
2006-yil 4-avgust,
PQ-435-son