Oʻzbekiston Respublikasi Vazirlar Mahkamasi huzuridagi Davlat zaxiralarini boshqarish qoʻmitasi faoliyatini tashkil etish toʻgʻrisida (113-son)

09.03.2004

Oʻzbekiston Respublikasi Vazirlar Mahkamasining

qarori

[Koʻchirma]

Oʻzbekiston Respublikasi Prezidentining “Respublika davlat boshqaruvi organlari tizimini takomillashtirish toʻgʻrisida” 2003-yil 9-dekabrdagi PF-3358-son Farmonini bajarish yuzasidan va respublikaning safarbarlik tayyorgarligini yanada takomillashtirish, strategik va safarbarlik ahamiyatiga ega boʻlgan zaxiralar shakllanishi jarayonlarining davlat boshqaruvini maqbullashtirish yuzasidan yagona davlat siyosatini olib borish maqsadida Vazirlar Mahkamasi qaror qiladi:

1. Oʻzbekiston Respublikasi Prezidentining 2003-yil 9-dekabrdagi PF-3358-son Farmoniga muvofiq Oʻzbekiston Respublikasi Vazirlar Mahkamasi huzuridagi Davlat moddiy zaxiralari bosh boshqarmasi Oʻzbekiston Respublikasi Vazirlar Mahkamasi huzuridagi Davlat zaxiralarini boshqarish qoʻmitasi (“Oʻzdavzaxira” qoʻmitasi) etib qayta tashkil qilinganligi maʼlumot uchun qabul qilinsin.

2. Quyidagilar Oʻzbekiston Respublikasi Vazirlar Mahkamasi huzuridagi Davlat zaxiralarini boshqarish qoʻmitasining asosiy vazifalari etib belgilansin:

Oʻzbekiston Respublikasi Iqtisodiyot vazirligi bilan birgalikda davlat strategik zaxirasida moddiy boyliklar toʻplanishi, yangilanishi, almashtirilishi, chiqarilishining yillik hajmlarini aniqlash;

davlat strategik va safarbarlik zaxiralari shakllantirilishini, shu jumladan ularning toʻplanishi, saqlanishi va yangilanishini taʼminlash;

vazirliklar, idoralar, mahalliy davlat hokimiyati organlari, xoʻjalik birlashmalari, korxonalar va tashkilotlar tomonidan davlat strategik va safarbarlik zaxiralari shakllantirilishi (toʻplanishi, yangilanishi, almashtirilishi, chiqarilishi), shuningdek qarz olingan tovarlar va mahsulotlarning sifatli va miqdoriy saqlanishi va oʻz vaqtida qaytarilishi taʼminlanishi boʻyicha topshiriqlar bajarilishini doimiy nazorat qilish;

davlat strategik va safarbarlik zaxiralaridan belgilangan tartibda tezkor foydalanishga doimiy tayyorlikni taʼminlash.

3. Quyidagilar:

Oʻzbekiston Respublikasi Vazirlar Mahkamasi huzuridagi Davlat zaxiralarini boshqarish qoʻmitasi toʻgʻrisidagi nizom 3-ilovaga muvofiq tasdiqlansin;

“Oʻzdavzaxira” qoʻmitasi raisiga bir nafar oʻrinbosarga va yetti kishidan iborat tarkibda hayʼatga ega boʻlishga ruxsat berilsin;

“Oʻzdavzaxira” qoʻmitasi raisiga markaziy apparat tuzilmasiga xodimlarning cheklangan belgilangan soni va mehnatga haq toʻlash fondi doirasida oʻzgartirishlar kiritish huquqi berilsin.

4. Belgilab qoʻyilsinki, “Oʻzdavzaxira” qoʻmitasi Oʻzbekiston Respublikasi Vazirlar Mahkamasi huzuridagi Davlat moddiy zaxiralari bosh boshqarmasining shartnomalari va majburiyatlari boʻyicha huquqiy voris hisoblanadi.

“Oʻzdavzaxira” qoʻmitasi va unga qarashli tashkilotlar ixtiyorida mavjud asosiy vositalar, shu jumladan ular egallab turgan yer uchastkalari bilan birgalikda binolar va inshootlar saqlab qolinsin.

5. Belgilansinki, “Oʻzdavzaxira” qoʻmitasining oʻz vakolatlari doirasida qabul qilgan qarorlari vazirliklar, idoralar, mahalliy davlat hokimiyati organlari, xoʻjalik birlashmalari, mulkchilik shakllaridan va idoraviy mansubliligidan qatʼi nazar korxonalar va tashkilotlar tomonidan bajarilishi majburiy hisoblanadi.

6. Oʻzbekiston Respublikasi Vazirlar Mahkamasining “Oʻzbekiston Respublikasi Vazirlar Mahkamasi huzurida Davlat moddiy rezervlar Bosh boshqarmasi (“Oʻzdavrezerv”)ni tashkil etish toʻgʻrisida” 1992-yil 4-fevraldagi 43-son qarori oʻz kuchini yoʻqotgan deb hisoblansin.

7. Oʻzbekiston Respublikasi Hukumatining 4-ilovaga muvofiq ayrim qarorlariga oʻzgartirishlar kiritilsin.

8. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari Oʻ.T. Sultonov zimmasiga yuklansin.

Vazirlar Mahkamasining Raisi I. KARIMOV

Toshkent sh.,

2004-yil 9-mart,

113-son

Vazirlar Mahkamasining 2004-yil 9-martdagi 113-son qaroriga 3-ILOVA

Oʻzbekiston Respublikasi Vazirlar Mahkamasi huzuridagi Davlat zaxiralarini boshqarish qoʻmitasi toʻgʻrisida

NIZOM

I. Umumiy qoidalar

1. Oʻzbekiston Respublikasi Vazirlar Mahkamasi huzuridagi Davlat zaxiralarini boshqarish qoʻmitasi (keyingi oʻrinlarda matnda qoʻmita deb yuritiladi) davlat strategik va safarbarlik zaxiralarini (keyingi oʻrinlarda matnda davlat zaxirasi deb yuritiladi) shakllantirish, saqlash va zaxiralarga xizmat koʻrsatishni boshqarish va nazorat qilishni taʼminlash sohasidagi vazifalarni hal etish uchun maxsus vakil qilingan Oʻzbekiston Respublikasi davlat boshqaruvi organi hisoblanadi.

Qoʻmita oʻz faoliyatida Oʻzbekiston Respublikasi Vazirlar Mahkamasiga hisobot beradi.

2. Qoʻmita tizimiga unga qarashli quyidagi tashkilotlar kiradi: “Magnit” kombinati (Toshkent viloyati, Ohangaron shahri), “Markaziy” kombinati (Toshkent shahri), “Ilgʻor” kombinati (Samarqand viloyati, Juma shahri), “Ozodlik” kombinati (“Samarqand viloyati, Bulungʻur shahri), “Imkon” DUK (Toshkent shahri).

3. Qoʻmita oʻz faoliyatida Oʻzbekiston Respublikasi Konstitutsiyasi va qonunlariga, Oʻzbekiston Respublikasi Oliy Majlisining qarorlari va boshqa hujjatlariga, Oʻzbekiston Respublikasi Prezidentining farmonlari va farmoyishlariga, Oʻzbekiston Respublikasi Vazirlar Mahkamasining qarorlari va farmoyishlariga hamda mazkur Nizomga amal qiladi.

4. Qoʻmita oʻz faoliyatini davlat boshqaruvining boshqa organlari, mahalliy davlat hokimiyati organlari, xoʻjalik birlashmalari, mulkchilik shakllari va idoraviy mansubligidan qatʼi nazar korxonalar va tashkilotlar bilan oʻzaro hamkorlikda amalga oshiradi.

5. Qoʻmita va unga qarashli davlat strategik zaxirasining moddiy boyliklarini saqlash tashkilotlari safarbarlik organlariga tegishlidir hamda xavfsizligi qonunchilikda belgilangan tartibda taʼminlanadigan, muhimligiga koʻra toifalashtirilgan obyektlar roʻyxatiga kiradi.

6. Qoʻmita va unga qarashli tashkilotlarning moddiy-texnika taʼminoti, shuningdek qoʻmita tizimi xodimlari mehnatiga haq toʻlash qoʻmitaga ajratiladigan mablagʻlar doirasida davlat budjetidan va qonunchilikda taqiqlanmagan budjetdan tashqari manbalardan amalga oshiradi.

7. Qoʻmita va unga qarashli tashkilotlar yuridik shaxslar hisoblanadi, mustaqil balansga, bank muassasalarida hisob raqamlariga (shu jumladan valyuta hisob raqamlariga), Oʻzbekiston Respublikasi Davlat gerbi tasviri tushirilgan va oʻz nomi yozilgan muhrga ega boʻladi.

II. Qoʻmitaning vazifalari va funksiyalari

8. Quyidagilar Qoʻmitaning asosiy vazifalari hisoblanadi:

Oʻzbekiston Respublikasi Iqtisodiyot vazirligi bilan birgalikda davlat strategik zaxirasida moddiy boyliklar toʻplanishi, yangilanishi, almashtirilishi, chiqarilishining yillik hajmlarini aniqlash;

davlat strategik va safarbarlik zaxiralari shakllantirilishini, shu jumladan ularning toʻplanishi, saqlanishi va yangilanishini taʼminlash;

vazirliklar, idoralar, mahalliy davlat hokimiyati organlari, xoʻjalik birlashmalari, korxonalar va tashkilotlar tomonidan davlat strategik va safarbarlik zaxiralari shakllantirilishi (toʻplanishi, yangilanishi, almashtirilishi, chiqarilishi), shuningdek qarz olingan tovarlar va mahsulotlarning sifatli va miqdoriy saqlanishi va oʻz vaqtida qaytarilishi taʼminlanishi boʻyicha topshiriqlar bajarilishini doimiy nazorat qilish;

davlat strategik va safarbarlik zaxiralaridan belgilangan tartibda tezkor foydalanishga doimiy tayyorlikni taʼminlash.

9. Qoʻmita oʻziga yuklangan vazifalarni bajarish uchun quyidagi funksiyalarni amalga oshiradi:

davlat strategik zaxirasida moddiy boyliklar harakatining (toʻplash, yangilash, almashtirish, chiqarish) yillik hajmlarini shakllantirishga doir takliflarni ishlab chiqadi va koʻrib chiqish uchun Oʻzbekiston Respublikasi Iqtisodiyot vazirligiga kiritadi;

davlat strategik zaxirasi tovarlari va mahsulotlari toʻplanishi, joylashtirilishi, saqlanishi va chiqarilishini belgilangan tartibda taʼminlaydi;

vazirliklar, idoralar, mahalliy davlat hokimiyati organlari, xoʻjalik birlashmalari, korxonalar va tashkilotlar tomonidan davlat strategik va safarbarlik zaxiralari shakllantirilishi (toʻplanishi, yangilanishi, almashtirilishi, chiqarilishi), shuningdek qarz olingan tovarlar va mahsulotlarning sifatli va miqdoriy saqlanishi va oʻz vaqtida qaytarilishi taʼminlanishi boʻyicha topshiriqlar bajarilishini nazorat qiladi;

davlat strategik va safarbarlik zaxiralari moddiy boyliklari bilan ishlashda qonun buzilishlari aniqlanganda qonunchilikda nazarda tutilgan chora-tadbirlarni qoʻllaydi;

respublika budjetidan ajratilgan mablagʻlar doirasida vazirliklar, idoralar, mahalliy davlat hokimiyati organlari, xoʻjalik birlashmalari, korxonalar va tashkilotlarning davlat strategik va safarbarlik zaxiralarini shakllantirish boʻyicha xarajatlari moliyalashtirilishini, shuningdek qoʻmita tarkibiy boʻlinmalari faoliyati moliyalashtirilishini belgilangan tartibda amalga oshiradi;

Vazirlar Mahkamasiga va Oʻzbekiston Respublikasi Iqtisodiyot vazirligiga davlat strategik va safarbarlik zaxiralaridagi moddiy boyliklar toʻgʻrisidagi yigʻma hisobotlarni, ularni toʻplashga doir topshiriqlar bajarilishi hamda davlat strategik va safarbarlik zaxirasiga qaytarilishi toʻgʻrisidagi maʼlumotlarni taqdim etadi;

Vazirlar Mahkamasining topshirigʻiga koʻra davlat zaxiralari masalalari boʻyicha xalqaro hamkorlikni belgilangan tartibda amalga oshiradi.

10. Qoʻmita oʻziga yuklangan vazifalar va funksiyalarni bevosita hamda oʻziga qarashli tashkilotlar orqali hal etadi.

III. Qoʻmitaning huquqlari va javobgarligi

11. Qoʻmita oʻziga yuklangan vazifalar va funksiyalarni bajarish uchun quyidagi huquqlarga ega:

oʻz vakolatlari doirasida vazirliklar, idoralar, mahalliy davlat hokimiyati organlari, xoʻjalik birlashmalari, mulkchilik shakllari va idoraviy mansubligidan qatʼi nazar korxonalar va tashkilotlar tomonidan bajarilishi majburiy boʻlgan normativ-huquqiy hujjatlar qabul qilish;

davlat strategik va safarbarlik zaxiralari hajmlariga va ularni saqlash uchun joylashtirish joylariga belgilangan tartibda oʻzgartirishlar kiritish;

mustaqil ravishda yoki oʻziga qarashli tashkilotlar orqali, shuningdek vazirliklar, idoralar, mahalliy davlat hokimiyati organlari, xoʻjalik birlashmalari, korxonalar va tashkilotlar orqali davlat strategik va safarbarlik zaxiralari tovarlari va mahsulotlarini xarid qilishni (import ham shu jumlaga kiradi) va realizatsiya qilishni (eksport ham shu jumlaga kiradi) belgilangan tartibda amalga oshirish;

vazirliklar, idoralar, mahalliy davlat hokimiyati organlari, xoʻjalik birlashmalari, mulkchilik shakllari va idoraviy mansubligidan qatʼi nazar korxonalar va tashkilotlarda davlat strategik va safarbarlik zaxiralari moddiy boyliklarining hisobi toʻgʻri yuritilishi, toʻplanishi, saqlash sharoitlari taʼminlanishi, ularning sifatli va miqdoriy saqlanishi va ulardan foydalanish taʼminlanishi yuzasidan belgilangan tartibda tekshirishlar oʻtkazish;

davlat strategik va safarbarlik zaxiralari korxonalarda masʼuliyatli saqlanishini tekshirish uchun zarurat boʻlganda, belgilangan tartibda vazirliklar, idoralar, ixtisoslashtirilgan tashkilotlarning mutaxassislarini (shu jumladan pulli asosda) jalb etish;

yangilanishi kerak boʻlgan mahsulotlar oʻz vaqtida chiqarilishi (shu jumladan qayta ishlanishi) chora-tadbirlarini koʻrish;

12. Qoʻmita oʻziga yuklangan vazifalarning samarali bajarilishi uchun javob beradi.

IV. Qoʻmita faoliyatini tashkil etish

13. Qoʻmitaga Oʻzbekiston Respublikasi Prezidenti tomonidan lavozimga tayinlanadigan va lavozimdan ozod etiladigan rais boshchilik qiladi.

Qoʻmita raisining bir nafar oʻrinbosari boʻladi belgilangan tartibda Oʻzbekiston Respublikasi Vazirlar Mahkamasi tomonidan lavozimga tayinlanadigan va lavozimdan ozod qilinadigan.

Qoʻmita raisi mehnatga haq toʻlash, tibbiy va maishiy xizmat koʻrsatish shart-sharoitlariga koʻra vazirning birinchi oʻrinbosariga, rais oʻrinbosari esa — vazir oʻrinbosariga tenglashtiriladi.

14. Qoʻmita raisi:

qoʻmita faoliyatiga umumiy rahbarlik qiladi hamda qoʻmitaga yuklangan vazifalar va funksiyalarning bajarilishi uchun shaxsan javob beradi;

xodimlarning belgilangan soni doirasida qoʻmita tuzilmasiga oʻzgartirishlar kiritadi, uning markaziy apparati shtat jadvalini, shuningdek qoʻmita markaziy apparati va unga qarashli tashkilotlarning xarajatlari smetasini tasdiqlaydi;

qoʻmitaga qarashli tashkilotlarning tuzilmasini va ular toʻgʻrisidagi nizomni belgilangan tartibda tasdiqlaydi;

qoʻmita markaziy apparati xodimlarini, qoʻmita tizimiga kiradigan unga qarashli tashkilotlar rahbarlarini belgilangan tartibda lavozimga tayinlaydi va lavozimdan ozod qiladi.

Qoʻmita qonunchilikka muvofiq boshqa vakolatlarni amalga oshiradi.

15. Qoʻmitada rais (hayʼat raisi), uning oʻrinbosari, shuningdek Qoʻmita faoliyatining asosiy yoʻnalishlarini muvofiqlashtiruvchi tarkibiy boʻlinmalari rahbarlaridan iborat tarkibda hayʼat tashkil etiladi.

Hayʼatning aʼzolari soni va shaxsiy tarkibi Qoʻmita raisining taqdimnomasiga binoan Oʻzbekiston Respublikasi Vazirlar Mahkamasi tomonidan tasdiqlanadi.

Hayʼat quyidagilar bilan bogʻliq masalalarni koʻrib chiqadi:

Qoʻmita faoliyatining davlat strategik va safarbarlik zaxiralarini shakllantirish, saqlash va ularga xizmat koʻrsatishni boshqarish va nazorat qilishni taʼminlashni davom ettirish boʻyicha ushbu Nizomda belgilangan asosiy yoʻnalishlarini tayyorlash va amalga oshirish;

Qoʻmita nomenklaturasiga kiradigan lavozimlarga kadrlarni tanlash, joy-joyiga qoʻyish, tayyorlash va qayta tayyorlash;

Oʻzbekiston Respublikasi Prezidentining farmonlari, qarorlari va farmoyishlarida, Oʻzbekiston Respublikasi Vazirlar Mahkamasi qarorlari va farmoyishlarida belgilangan vazifalarni amalga oshirish boʻyicha ijro intizomini mustahkamlash, ularning oʻz vaqtida va sifatli amalga oshirilishini taʼminlash uchun Qoʻmita rahbarlari va xodimlarining shaxsiy javobgarligini oshirish.

Hayʼat Qoʻmita vakolatiga taalluqli boshqa masalalarni ham koʻrib chiqish huquqiga ega.

Hayʼat majlisiga Qoʻmita vakolatiga kiradigan masalalar boʻyicha boshqa vazirliklar, davlat qoʻmitalari, idoralar, mahalliy davlat hokimiyati organlari, korxonalar, muassasalar, tashkilotlar rahbarlari taklif etilishi mumkin.

Hayʼat uning majlisida tarkibining yarmidan koʻpi qatnashgan taqdirda vakolatli boʻladi. Koʻrib chiqilayotgan masalalar boʻyicha qarorlar oddiy koʻpchilik ovoz bilan qabul qilinadi.

Hayʼat qarorlari Qoʻmitaning qarorlari va raisning buyruqlari bilan amalga oshiriladi. Rais va hayʼat aʼzolari oʻrtasida kelishmovchiliklar paydo boʻlgan taqdirda rais paydo boʻlgan kelishmovchiliklar toʻgʻrisida Oʻzbekiston Respublikasi Vazirlar Mahkamasiga axborot bergan holda mustaqil ravishda qaror qabul qiladi. Hayʼat aʼzolari ham oʻz fikr-mulohazalarini Oʻzbekiston Respublikasi Vazirlar Mahkamasiga xabar qilishlari mumkin.

Hayʼat faoliyati tartibi uning hayʼat tasdiqlaydigan reglamentida belgilanadi.

16. Qoʻmita qonunchilikda belgilangan tartibda qayta tashkil etiladi va tugatiladi.

Vazirlar Mahkamasining 2004-yil 9-martdagi 113-son qaroriga 4-ILOVA

Oʻzbekiston Respublikasi Hukumatining ayrim qarorlariga kiritilayotgan oʻzgartirishlar

2. Vazirlar Mahkamasining “Davlat ehtiyojlari uchun asosiy oziq-ovqat turlarini xarid qilish tizimini takomillashtirish toʻgʻrisida” 1997-yil 14-avgustdagi 397-son qarorining 1 va 5-bandlaridagi “Oʻzdavrezerv” soʻzi “Oʻzdavzaxira” qoʻmitasi” soʻzlari bilan almashtirilsin.

3. Vazirlar Mahkamasining “2004-yil uchun Oʻzbekiston Respublikasining Investitsiya dasturi toʻgʻrisida” 2003-yil 11-noyabrdagi 500-son qaroriga 3-ilovadagi “Oʻzdavrezerv” soʻzi “Oʻzdavzaxira” qoʻmitasi” soʻzlari bilan almashtirilsin.