Oʻzbekiston Respublikasi Mudofaa ishlari vazirligi masalalari (269-son)

25.10.1991

Oʻzbekiston Respublikasi Prezidenti huzuridagi Vazirlar Mahkamasining

qarori

Oʻzbekiston Respublikasi Prezidentining “Oʻzbekiston Respublikasi Mudofaa ishlari vazirligini tuzish toʻgʻrisida” 1991-yil 6-sentabrdagi Farmoniga muvofiq Vazirlar Mahkamasi qaror qiladi:

1. Ilova qilinayotgan Oʻzbekiston Respublikasi Mudofaa ishlari vazirligi toʻgʻrisidagi nizom tasdiqlansin.

2. Oʻzbekiston Respublikasi harbiy komissarligi, Fuqaro mudofaasi shtabi, DOSAAF Markaziy Qoʻmitasi (1991-yil 17-oktabrda SSSR Mudofaa vazirligi bilan kelishilgan), Oʻzbekiston Respublikasi Vazirlar Mahkamasi huzuridagi Armiya safidan tashqari xizmatlar boʻyicha maxsus boshqarmasining mavjud tuzilmalari va ularning quyi boʻlinmalari negizida Oʻzbekiston Respublikasi Mudofaa ishlari vazirligi tuzilishi munosabati bilan koʻrsatilgan organlarning shtatdagi xodimlari soni, ish haqi fondlari va moddiy bazasi Oʻzbekiston Respublikasi Mudofaa ishlari vazirligiga berilsin.

3. Oʻzbekiston Respublikasi Mudofaa ishlari vazirligi markaziy apparatining tashkiliy-shtat tuzilishi ilovaga muvofiq tasdiqlansin.

Vazirlik apparati eng koʻp xodimlari soni 268 nafar kishidan (Muqobil xizmat boshqarmasi va xizmat koʻrsatuvchi xodimlardan tashqari) iborat qilib, shundan 156 nafari Oʻzbekiston Respublikasi Fuqaro mudofaasi shtabini, 80 nafari Oʻzbekiston Respublikasi harbiy komissarligini tugatish hisobiga belgilansin.

Koʻrsatilgan xodimlarni saqlash maqsadida 1991-yilning IV choragi uchun mehnatga haq toʻlash fondi 708 ming soʻm miqdorida belgilansin.

Vazirlik shtatiga vazirning bir nafar birinchi oʻrinbosari va uch nafar oʻrinbosari kiritilsin.

Oʻzbekiston Respublikasi Mudofaa ishlari vaziriga belgilangan xodimlar soni va ajratilgan mehnatga haq toʻlash fondlaridan kelib chiqqan holda tashkiliy-shtat tuzilishiga oʻzgartishlar kiritishga, shtatlarni ishlab chiqishga, tasdiqlashga ruxsat berilsin.

4. Maʼlumot uchun qabul qilinsinki, SSSR Mudofaa vaziri tomonidan Oʻzbekiston Respublikasi Mudofaa ishlari vazirligining kadrlarda turuvchi harbiy xizmatchilari, shuningdek, ishchilari va xizmatchilari uchun amaldagi qonunlarga muvofiq belgilangan barcha huquqlar, imtiyozlar va yengilliklar saqlab qolinadi.

5. Oʻzbekiston Respublikasi Mudofaa ishlari vazirligi va xalq deputatlari Toshkent shahar Kengashining vazirlik markaziy apparatini Namoyishlar xiyoboni, 5-uydagi Oʻzbekiston Respublikasi Fuqaro mudofaasi shtabi binosiga joylashtirish haqidagi taklifi qabul qilinsin.

6. Oʻzbekiston Respublikasi Mudofaa ishlari vazirligi Oʻzbekiston Respublikasi Adliya vazirligi va boshqa manfaatdor tashkilotlar bilan birgalikda bir oy muddat ichida, harbiy komissarlikning qayta tuzilganligi va vazirlik tuzilganligi munosabati bilan qonun aktlariga kiritiladigan tegishli oʻzgartishlar va qoʻshimchalarni belgilangan tartibda Oʻzbekiston Respublikasi Oliy Kengashining koʻrib chiqishi uchun kiritsin.

7. Mavjud harbiy komissarliklar, fuqaro mudofaasi shtablari negizida Qoraqalpogʻiston Respublikasida, viloyatlarda, shaharlar va nohiyalarda — mudofaa ishlari boshqarmalari (boʻlimlari) tuzilsin, ularga tegishli xodimlar va budjet mablagʻlari berilsin.

8. Oʻzbekiston Respublikasi Iqtisodiyot qoʻmitasi, Moddiy-texnika taʼminoti davlat-kooperativ qoʻmitasi, Savdo vazirligi belgilangan tartibda 1992-yilda Oʻzbekiston Respublikasi Mudofaa ishlari vazirligiga biriktirilgan nomenklatura boʻyicha moddiy-texnika resurslari ajratishni nazarda tutsinlar.

9. Oʻzbekiston Respublikasi Moliya vazirligi Oʻzbekiston Respublikasi Mudofaa ishlari vazirligi va uning sistemasini taqdim qilingan hisob-kitoblarga muvofiq saqlash xarajatlarini belgilasin, shuningdek, 5 ta yengil avtomobilni saqlash limitini ajratsin.

Oʻzbekiston Respublikasi Avtomobil transporti vazirligi Oʻzbekiston Respublikasi Mudofaa ishlari vazirligiga xizmat koʻrsatish uchun yengil avtomobillar ajratsin.

10. Oʻzbekiston SSR Vazirlar Mahkamasi huzuridagi Armiya safidan tashqari xizmatlar boʻyicha maxsus boshqarmasi Oʻzbekiston Respublikasi Mudofaa ishlari vazirligi huzuridagi muqobil xizmat boshqarmasiga aylantirilsin.

11. Oʻzbekiston Respublikasi Neft mahsulotlari bilan taʼminlash davlat qoʻmitasi Mudofaa ishlari vazirligiga belgilangan tartibda yoqilgʻi-moylash materiallari ajratishni taʼminlasin.

12. Oʻzbekiston Respublikasi Aloqa vazirligi Oʻzbekiston Respublikasi Mudofaa ishlari vazirligi boshqarmalari, boʻlimlari va xizmatlarini telefonlashtirishni taʼminlasin, vazirga va uning oʻrinbosarlariga hukumat ATSi apparatlarini oʻrnatsin,

13. Oʻzbekiston yengil sanoat tovarlarini ishlab chiqarish davlat uyushmasi Oʻzbekiston Respublikasi Mudofaa ishlari vazirligining talabnomalariga koʻra milliy gvardiya harbiy xizmatchilari va muqobil xizmat shaxsiy tarkibi uchun kiyim-bosh formasini tayyorlasin.

Oʻzbekiston Respublikasi Vazirlar Mahkamasi huzuridagi xomashyo va yengil sanoat mahsulotlari taʼminoti va savdosi bosh boshqarmasi Oʻzbekiston yengil sanoat tovarlarini ishlab chiqarish davlat uyushmasining talabnomalariga koʻra koʻrsatilgan kiyim-bosh formasini tikish uchun xomashyo bilan taʼminlasin.

Vazirlar Mahkamasining Raisi I. Karimov

Toshkent sh.,

1991-yil 25-oktabr,

269-son

Vazirlar Mahkamasining 1991-yil 25-oktabrdagi 269-son qarori bilan TASDIQLANGAN

Oʻzbekiston Respublikasi Mudofaa ishlari vazirligi toʻgʻrisida

NIZOM

1. Oʻzbekiston Respublikasi Mudofaa ishlari vazirligi “Oʻzbekiston Respublikasi davlat mustaqilligi asoslari toʻgʻrisida”gi Qonunga muvofiq respublikaning davlat mustaqilligini va hududiy yaxlitligini, fuqarolarning konstitutsiyaviy huquqlari va erkinliklarini himoya qilish maqsadida tuzilgan. Mudofaa ishlari vazirligi Oʻzbekiston Respublikasi harbiy komissarligi, Oʻzbekiston Respublikasi Fuqaro mudofaasi shtabi, Oʻzbekiston Respublikasi DOSAAF Markaziy Qoʻmitasi va Oʻzbekiston Respublikasi Vazirlar Mahkamasi huzuridagi Armiya safidan tashqari xizmatlar boʻyicha maxsus boshqarmasi negizida tuzilgan.

Mudofaa ishlari vazirligi respublika hududida joylashgan SSSR Mudofaa vazirligi va ichki qoʻshinlar harbiy qismlarini, qoʻshilmalarini tuzishda va ularga rahbarlik qilishda ishtirok etadi, kollektiv xavfsizlikni yaratishda va SSR Ittifoqining strategik qoʻshinlarini saqlashda ishtirok etishni taʼminlaydi.

Milliy gvardiyani butlash, chaqiriladigan yoshlarni tayyorlash, Oʻzbekiston Respublikasi fuqarolarini harbiy xizmatga chaqirish va oʻtash, ularning ijtimoiy va huquqiy himoyalanganligi, zaxiradagi harbiy xizmatga majbur kishilarni oʻqitish, muqobil xizmatni tashkil etish, fuqaro mudofaasiga rahbarlik qilish masalalari uning huquq doirasiga kiradi.

2. Oʻzbekiston Respublikasi Mudofaa ishlari vazirligi oʻz faoliyatida Oʻzbekiston Respublikasining Konstitutsiyasiga, Oʻzbekiston Respublikasining qonunlariga, respublika Oliy Kengashining boshqa aktlariga, Oʻzbekiston Respublikasi Prezidentining farmonlari va farmoyishlariga, Oʻzbekiston Respublikasi Vazirlar Mahkamasining qarorlari va farmoyishlariga amal qiladi.

Vazirlik mudofaa masalalari boʻyicha amaldagi qonunlarning toʻgʻri qoʻllanilishini taʼminlaydi, uni takomillashtirishga oid takliflarni ishlab chiqadi hamda belgilangan tartibda ularni Oʻzbekiston Respublikasi Oliy Kengashi va Vazirlar Mahkamasining koʻrib chiqishi uchun kiritadi. Respublika hududida qoʻshinlarning (kuchlarning) boʻlishi toʻgʻrisida kelishuvlar boʻyicha takliflar ishlab chiqadi.

3. Mudofaa ishlari vazirligi oʻz asosiy vazifalarini bajarish uchun:

respublika hududida qoʻshin safarbarligini oʻtkazishga tayyorgarlikni, respublika va SSR Ittifoqi mudofaasi manfaatlari yoʻlida kishi va xalq xoʻjaligi resurslarini hisobga olishni, respublika xalq xoʻjaligi uchun kadrlarni band qilishni taʼminlaydi;

milliy gvardiyani butlaydi, uni oʻqitishni va jangovar tayyorgarlikni taʼminlashni tashkil etadi;

tinchlik va urush davrida respublikada fuqaro mudofaasi boʻyicha prognozlar loyihalarini ishlab chiqadi, fuqaro mudofaasi moddiy-texnika bazasining koʻpayishi va rivojlanishini, tinchlik va urush davrida favqulodda holatlarda fuqaro mudofaasining harakatga tayyor holda turishini taʼminlaydi;

harbiy bilim yurtlarini butlash bilan shugʻullanadi, oliy oʻquv yurtlari harbiy kafedralarining, harbiy tayyorgarlik kuchaytirilgan maktablarning faoliyatini yoʻnaltirib boradi;

muqobil xizmatni tashkil etish masalalarini hal qiladi;

urush qatnashchilariga, Qurolli Kuchlar faxriylariga, baynalmilalchi jangchilarga imtiyozlar berish ustidan nazorat olib boradi;

respublikada turgan harbiy qismlar, harbiy idoralar va muassasalarni joylashtirishga, tartibga keltirishga yordam beradi;

respublikada joylashadigan harbiy qismlardagi shaxsiy sostavning xizmat va jangovar tayyorgarligining hamda intizomining yuksak darajada boʻlishini taʼminlashda ishtirok etadi;

fuqarolarni haqiqiy xizmatga chaqirish, SSSR Mudofaa vazirligi bilan chaqiriluvchilar soni boʻyicha bitimlar tuzish bilan bogʻliq masalalarni hal qiladi;

respublika hududida mashqlar, manyovrlar oʻtkazish, harbiy qismlar va harbiy inshootlarni qayta joylashtirish va joylashtirish masalalarini kelishib oladi;

chaqiriqni rejalashtiradi hamda chaqiriluvchilarni qoʻshin turlari va xillari boʻyicha taqsimlaydi;

Qurolli Kuchlar saflariga fuqarolarni chaqirishni tashkil etishda chaqiruv komissiyalariga yordam beradi va nazoratni amalga oshiradi;

harbiy xizmatchilarni huquqiy va ijtimoiy himoya qilishni, ularga va ularning oila aʼzolariga imtiyozlar berish ustidan nazoratni taʼminlaydi;

Qurolli Kuchlar uchun maxsus kishilarni tayyorlash boʻyicha ishlarni yoʻnaltirib boradi;

harbiy taʼlim olgan resurslarning toʻplanishini, harbiy xizmatga majbur zaxiradagilarni oʻqitishni va qayta tayyorlashni tashkil etadi;

respublika oʻquv yurtlarida yoshlarni boshlangʻich harbiy tayyorlashga rahbarlik qiladi;

aholini, ayniqsa yoshlarni harbiy-vatanparvarlik ruhida tarbiyalash boʻyicha ishlarni tashkil etadi;

harbiy qismlardagi hodisalar toʻgʻrisidagi xabarlar va maʼlumotlarni joylarda koʻrib chiqishda bevosita qatnashadi;

harbiy qismlar bilan otaliq aloqalarini tashkil etadi.

4. Oʻzbekiston Respublikasi Mudofaa ishlari vazirligiga Oʻzbekiston Respublikasi Konstitutsiyasiga muvofiq Oʻzbekiston Respublikasi Prezidenti tayinlaydigan, keyinchalik Oʻzbekiston Respublikasi Oliy Kengashi tasdigʻiga kiritiladigan vazir boshchilik qiladi.

Vazir oʻrinbosarlarini Oʻzbekiston Respublikasi Prezidenti huzuridagi Vazirlar Mahkamasi tayinlaydi.

Oʻzbekiston Respublikasi Mudofaa ishlari vazirligi tizimida xizmatni oʻtovchi soldatlar, serjantlar, ofitserlar, generallar va admirallar SSSR Qurolli Kuchlari harbiy xizmatchilarining barcha huquqlari va imtiyozlaridan foydalanadilar.

5. Mudofaa ishlari vaziri:

oʻziga boʻysunadigan tuzilma boʻlinmalarining barcha faoliyatiga rahbarlik qiladi;

Mudofaa ishlari vaziri oʻz huquqi doirasida amaldagi qonunlar asosida va ularni bajarish uchun buyruqlar, direktivalar, farmoyishlar va koʻrsatmalar chiqaradi va ularning bajarilishini nazorat qilishni tashkil etadi;

vazirlik tarkibiga kiruvchi boshqarmalar va boʻlimlar haqidagi nizomlarni tasdiqlaydi, apparat xodimlarini belgilangan tartibda ishga tayinlaydi va ishdan boʻshatadi;

tuzilma boʻlinmalari rahbar xodimlarining javobgarlik darajasini belgilaydi, belgilangan tartibda ragʻbatlantirish va jazo choralarini qoʻllaydi;

mazkur Nizomda nazarda tutilgan huquqlarni amalga oshiradi, barcha davlat va jamoat tashkilotlarida vazirlik nomidan ish koʻradi, Mudofaa ishlari vazirligining faoliyat doirasiga kiruvchi barcha ishlarni bajaradi.

6. Mudofaa ishlari vazirligida vazir (rais), uning oʻrinbosarlari, tuzilma boʻlinmalarining rahbar komandir kadrlaridan va Turkiston harbiy okrugi qoʻmondonligi vakilidan iborat tarkibda hayʼat tuziladi.

Hayʼat aʼzolarini vazirning taqdimnomasiga koʻra Oʻzbekiston Respublikasi Prezidenti huzuridagi Vazirlar Mahkamasi tasdiqlaydi.

Hayʼat oʻtkaziladigan majlislarda harbiy boshqaruv organlari faoliyatini takomillashtirish, buyruqlar ijrosini nazorat qilish, kadrlarni tanlash, vazirlik apparati ishini yaxshilash masalalarini koʻrib chiqadi, rahbar xodimlarning hisobotlarini eshitadi.

Hayʼat qarorlari vazirning buyruqlari bilan hayotga tatbiq qilinadi.

7. Mudofaa ishlari vazirligi markaziy apparatining tuzilishini va xodimlar sonini Oʻzbekiston Respublikasi Prezidenti huzuridagi Vazirlar Mahkamasi tasdiqlaydi, vazirlikni moliyaviy taʼminlash respublikaning, SSSR Mudofaa vazirligi va SSSR Ichki ishlar vazirligi mablagʻlari hisobiga amalga oshiriladi.

8. Mudofaa ishlari vazirligi yuridik shaxs hisoblanadi, Oʻzbekiston Respublikasi Davlat gerbi aks ettirilgan hamda oʻz nomi oʻzbek va rus tillarida yozilgan muhrga ega boʻladi.

Vazirlar Mahkamasining 1991-yil 25-oktabrdagi 269-son qaroriga ILOVA

Oʻzbekiston Respublikasi Mudofaa ishlari vazirligining tashkiliy-shtat tuzilishi

I. Vazirlik markaziy apparatining tuzilishi

1. Rahbariyat

2. Shtab

3. Tezkor boshqarma

4. Aloqa boʻlimi

5. Sakkizinchi boʻlim

6. Maxfiy qism

7. Birlashgan komanda punkti (aloqa tarmogʻi)

8. Chaqiriq, safarbarlik resurslarini tayyorlash va harbiy xizmatchilarni ijtimoiy himoya qilish boshqarmasi

9. Fuqaro mudofaasi va favqulodda holatlar boshqarmasi

10. Oliy oʻquv yurtlari va chaqiriqqacha tayyorgarlik boshqarmasi

11. Muqobil xizmat boshqarmasi

12. Kadrlar boshqarmasi

13. Moliya-reja boshqarmasi

14. Moddiy-texnika va maxsus taʼminot boshqarmasi

15. Ishlar boshqarmasi

II. Respublika jamoatchilik mudofaa tashkilotlari

Armiya, Aviatsiya va Flotga yordam berish koʻngilli jamiyati (Oʻzbekiston Respublikasi DOSAAFi)

III.

Qoraqalpogʻiston Respublikasida, viloyatlarda va Toshkent shahrida — mudofaa ishlari boshqarmalari

IV.

Shaharlarda va nohiyalarda—mudofaa ishlari boʻlimlari