Oʻzbekiston Respublikasi Davlat mulki qoʻmitasi huzurida Xususiylashtirish, korporativ boshqaruvni va qimmatli qogʻozlar bozorini rivojlantirish muammolarini tadqiq etish markazini tashkil qilish toʻgʻrisida (113-son)

09.06.2006

Oʻzbekiston Respublikasi Vazirlar Mahkamasining

qarori

Xususiylashtirish, qimmatli qogʻozlar bozorini rivojlantirish, korporativ boshqaruvni takomillashtirish strategik yoʻnalishlarini amalga oshirishda iqtisodiyot fanining rolini oshirish, shuningdek, davlat mulkini boshqarishning samarali tizimini yaratish maqsadida Vazirlar Mahkamasi qaror qiladi:

1. Oʻzbekiston Respublikasi Davlat mulki qoʻmitasi huzuridagi Bozor islohotlarini chuqurlashtirish ilmiy-tadqiqot instituti negizida Oʻzbekiston Respublikasi Davlat mulki qoʻmitasi huzuridagi Xususiylashtirish, korporativ boshqaruvni va qimmatli qogʻozlar bozorini rivojlantirish muammolarini tadqiq etish markazi (keyingi oʻrinlarda Markaz deb ataladi) tashkil qilinsin.

Markaz Oʻzbekiston Respublikasi Davlat mulki qoʻmitasi huzuridagi Bozor islohotlarini chuqurlashtirish ilmiy-tadqiqot institutining shartnomalari va majburiyatlari boʻyicha huquqiy voris hisoblanadi.

2. Quyidagilar markazning asosiy vazifalari va faoliyati yoʻnalishlari etib belgilansin:

mulkiy munosabatlarni qayta oʻzgartirish jarayonlarini tahlil qilish, xususiy mulkni yanada rivojlantirishning asosiy yoʻnalishlarini belgilashga doir takliflar tayyorlash;

davlat tasarrufidan chiqarish va xususiylashtirish jarayonlarini chuqurlashtirish, xususiylashtirish jarayonlarining eng yuqori darajada soddalashtirilishini va oshkoraligini taʼminlash mexanizmlarini takomillashtirish boʻyicha ilmiy asoslangan takliflar tayyorlash;

davlat mulkini boshqarish, xususiylashtirilgan korxonalarni korporativ boshqarish institutlari va mexanizmlarini yanada rivojlantirish va takomillashtirish boʻyicha takliflar ishlab chiqish;

korxonalarni integratsiyalashtirilgan korporativ tuzilmalarga birlashtirish nazariyasi va amaliyotini oʻrganish, faoliyat koʻrsatayotgan xoʻjalik birlashmalarini isloh qilish va ularning yangilarini tashkil etish boʻyicha takliflar ishlab chiqish;

qimmatli qogʻozlar va koʻchmas mulk bozorlarini, ularning infratuzilmalarini rivojlantirishning ahvoli va tendensiyalarini tahlil qilish, ularning iqtisodiyotni erkinlashtirish sharoitlarida faoliyat koʻrsatishini takomillashtirish boʻyicha takliflar ishlab chiqish;

ilmiy ishlarni tayyorlash va nashr etish, shuningdek, Markaz faoliyati yoʻnalishlari boʻyicha normativ-huquqiy va metodik hujjatlar loyihalarini ishlab chiqish, Davlat mulki qoʻmitasi tizimi xodimlari malakasini oshirish.

3. Markazning ilovaga muvofiq tashkiliy tuzilmasi tasdiqlansin.

Markaz xodimlarining cheklangan soni 43 nafardan, shu jumladan ilmiy xodimlari soni 37 nafardan iborat etib belgilansin.

Markazning rahbar va ilmiy xodimlariga Oʻzbekiston Respublikasi Fanlar akademiyasi ilmiy-tadqiqot institutlari uchun amalda boʻlgan ish va mehnatga haq toʻlash shart-sharoitlari tatbiq etilsin.

Markaz direktoriga Oʻzbekiston Respublikasi Davlat mulki qoʻmitasi bilan kelishgan holda Markazning tashkiliy tuzilmasiga xodimlarning tasdiqlangan soni doirasida oʻzgartirishlar kiritish huquqi berilsin.

4. Quyidagilar Markazni mablagʻ bilan taʼminlashning asosiy manbalari etib belgilansin:

Oʻzbekiston Respublikasi Davlat mulki qoʻmitasi tomonidan fan va texnologiyalarni rivojlantirishning ustuvor yoʻnalishlarini amalga oshirish boʻyicha ilmiy-texnika dasturlari doirasida tadqiqot loyihalarini bajarish uchun tanlov asosida ajratiladigan mablagʻlar;

normativ-huquqiy loyihalarni, tahliliy qaydlarni tayyorlash va Markaz faoliyati ixtisosligi boʻyicha ilmiy-texnika dasturlari topshiriqlari roʻyxatiga kiritilmagan boshqa ishlarni bajarish uchun shartnoma asosida Oʻzbekiston Respublikasi Davlat mulki qoʻmitasi tomonidan ajratiladigan mablagʻlar;

xalqaro moliya tashkilotlari va donor tashkilotlarning grantlari;

chet tashkilotlar va korxonalar buyurtmasi boʻyicha bajarilgan ishlardan tushgan mablagʻlar.

Oʻzbekiston Respublikasi Davlat mulki qoʻmitasiga, zarurat boʻlganda, Markazning egallab turilgan maydonlar uchun foydalanish xizmatlari toʻlovi bilan bogʻliq xarajatlarini Xususiylashtirish davlat dasturini amalga oshirish xarajatlari uchun Davlat mulki qoʻmitasi ixtiyorida qoldiriladigan mablagʻlar hisobiga qoplashga ruxsat berilsin.

5. Oʻzbekiston Respublikasi Davlat mulki qoʻmitasi:

bir hafta muddatda Markaz ustavini tasdiqlasin;

Markazning rahbarlari va ilmiy xodimlari tarkibini xususiylashtirish, korporativ boshqaruv va qimmatli qogʻozlar bozori sohasidagi malakali kadrlar bilan mustahkamlasin.

6. Vazirlar Mahkamasining “Oʻzbekiston Respublikasi Davlat mulki qoʻmitasi huzurida Bozor islohotlarini chuqurlashtirish ilmiy-tadqiqot institutini tashkil etish toʻgʻrisida” 1997-yil 15-yanvardagi 27-son qarori (Oʻzbekiston Respublikasi QT, 1997-y., 1-son, 2-modda) oʻz kuchini yoʻqotgan deb hisoblansin.

7. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari R.S. Azimov zimmasiga yuklansin.

Oʻzbekiston Respublikasining Bosh vaziri Sh. MIRZIYOYEV

Toshkent sh.,

2006-yil 9-iyun,

113-son

Vazirlar Mahkamasining 2006-yil 9-iyundagi 113-son qaroriga ILOVA

Oʻzbekiston Respublikasi Davlat mulki qoʻmitasi huzuridagi Xususiylashtirish, korporativ boshqaruvni va qimmatli qogʻozlar bozorini rivojlantirish muammolarini tadqiq etish markazining

tashkiliy tuzilmasi