Yogʻ-moy va oziq-ovqat sanoatini boshqarishni tashkil etishni yanada takomillashtirish toʻgʻrisida (PQ-359-son)

30.05.2006

Oʻzbekiston Respublikasi Prezidentining

Qarori

[Koʻchirma]

Respublikaning yogʻ-moy va oziq-ovqat sanoatini boshqarishni yanada takomillashtirish, soha korxonalarini modernizatsiyalash va texnik qayta jihozlash uchun toʻgʻridan toʻgʻrixorijiy investitsiyalarni keng jalb etish, ishlab chiqariladigan mahsulotni sotishning bozor mexanizmlarini rivojlantirish maqsadida:

1. “Yogʻmoytamakisanoat” va “Oziqovqatsanoat” uyushmalari muassislarining umumiy majlisi tomonidan mazkur uyushmalarni birlashtirish hamda Yogʻ-moy va oziq-ovqat sanoati uyushmasini tashkil etish toʻgʻrisida qaror chiqarilgani maʼlumot uchun qabul qilinsin.

Yogʻ-moy va oziq-ovqat sanoati uyushmasi muassislarining 1-ilovaga* muvofiq tarkibiga rozilik berilsin.

* 1-ilova rus tilidagi matnda berilgan.

2. Quyidagilar Yogʻ-moy va oziq-ovqat sanoati uyushmasi faoliyatining asosiy vazifalari va yoʻnalishlari etib belgilansin:

yogʻ-moy va oziq-ovqat sanoati mahsulotlari ichki hamda tashqi bozorlarining marketing tadqiqotlarini oʻtkazish, sohani rivojlantirishning oʻrta va uzoq muddatli dasturlarini ilgʻor xalqaro tajribani hisobga olgan holda ishlab chiqish hamda amalga oshirishda ishtirok etish;

yogʻ-moy va oziq-ovqat sanoati korxonalariga ishlab chiqarishni modernizatsiyalash va texnik qayta jihozlashda, ushbu maqsadlarga xorijiy investitsiyalarni keng jalb etishda, mahsulotning raqobatbardoshligini oshirish va eksport hajmlarini kengaytirishda koʻmaklashish;

yogʻ-moy sanoati korxonalarining chigit ishlab chiqaruvchilar bilan, jumladan, chigitni qabul qilish, qatʼiy hisobga olish hamda ularning sifati ustidan taʼsirchan nazorat oʻrnatish masalalarida oʻzaro munosabatlarni izchillik bilan takomillashtirish;

soha korxonalari tomonidan paxta yogʻi chiqishining belgilangan meʼyorlariga rioya etilishi, shuningdek, ishlab chiqariladigan mahsulotni sotishda tegishli tartibga amal qilinishini taʼminlash;

soha korxonalariga axborot xizmatlarini koʻrsatish, kadrlar tayyorlash, qayta tayyorlash va malakasini oshirishni tashkil etish.

3. Yogʻ-moy va oziq-ovqat sanoati uyushmasining tashkiliy tuzilmasi 2-ilovaga* muvofiq maʼqullansin.

* 2-ilova rus tilidagi matnda berilgan.

Belgilansinki:

korxona va tashkilotlar Uyushmaga erkin aʼzo boʻlish hamda uning tarkibidan chiqish huquqiga egadirlar;

Uyushma oʻz tarkibiga kiruvchi korxonalar va tashkilotlarning ixtiyoriy ajratmalari hamda qonun hujjatlarida taqiqlanmagan boshqa mablagʻlar hisobiga faoliyat yuritadi.

4. Yogʻ-moy va oziq-ovqat sanoati uyushmasi bir oy muddatda muassislar umumiy yigʻilishini oʻtkazsin, oʻz nizomini tasdiqlasin hamda Oʻzbekiston Respublikasi Adliya vazirligiga davlat roʻyxatidan oʻtkazish uchun taqdim etsin.

9. Oʻzbekiston Respublikasi Iqtisodiyot vazirligi, Moliya vazirligi, Monopoliyadan chiqarish, raqobat va tadbirkorlikni qoʻllab-quvvatlash davlat qoʻmitasi bir oy muddatda aksiz soligʻi olinadigan mahsulot ishlab chiqaradigan tamaki sanoati korxonalari faoliyatini tartibga solish va muvofiqlashtirish boʻyicha takliflarni Vazirlar Mahkamasiga kiritsin.

10. Yogʻ-moy va oziq-ovqat sanoati uyushmasi ijroiya apparati Toshkent shahar, Nukus koʻchasi, 73“a”-uy manzilida joylashtirilsin.

Oʻzbekiston aloqa va axborotlashtirish agentligi Uyushmani aloqa, shu jumladan hukumat aloqa vositalari bilan taʼminlasin.

11. Oʻzbekiston Respublikasi Vazirlar Mahkamasining “Yogʻmoytamakisanoat” yogʻ-moy va tamaki sanoati korxonalari uyushmasini tashkil etish va uning faoliyati masalalari toʻgʻrisida” 1994-yil 26-sentabrdagi 482-sonli va “Oziqovqatsanoat” qandolatchilik, choy va pivo-alkogolsiz ichimliklar sanoati korxonalari uyushmasini tashkil etish va uning faoliyati toʻgʻrisida” 1994-yil 26-sentabrdagi 483-sonli qarorlari oʻz kuchini yoʻqotgan deb hisoblansin.

12. Mazkur qarorning ijrosini nazorat qilish Oʻzbekiston Respublikasi Bosh vaziri Sh.M. Mirziyoyev zimmasiga yuklansin.

Oʻzbekiston Respublikasi Prezidenti I. KARIMOV

Toshkent sh.,

2006-yil 30-may,

PQ-359-son