Oʻzbekiston Respublikasi Vazirlar Mahkamasi huzuridagi Yirik investitsiya loyihalarini ekspertizadan oʻtkazish byurosida maqsadli dasturlar, konsepsiyalar va investitsiya loyihalarini ekspertizadan oʻtkazish va tavsiyalar tayyorlash tartibi toʻgʻrisidagi nizomni tasdiqlash haqida (91-son)

22.05.2006

Oʻzbekiston Respublikasi Vazirlar Mahkamasining

qarori

Oʻzbekiston Respublikasi Prezidentining “Oʻzbekiston Respublikasi Vazirlar Mahkamasi huzuridagi Yirik investitsiya loyihalarini ekspertizadan oʻtkazish byurosini tashkil etish toʻgʻrisida” 2006-yil 3-apreldagi PQ–316-son qarorini bajarish yuzasidan hamda Oʻzbekiston Respublikasi Prezidentining Farmoni yoki qarori, shuningdek Hukumat qarori bilan tasdiqlanishi lozim boʻlgan maqsadli dasturlar, konsepsiyalar va investitsiya loyihalarini amalga oshirish mumkinligi toʻgʻrisida qarorlar qabul qilish uchun ularni ekspertizadan oʻtkazish va tavsiyalar tayyorlash tartibini belgilash maqsadida Vazirlar Mahkamasi qaror qiladi:

1. Belgilab qoʻyilsinki, Oʻzbekiston Respublikasi Vazirlar Mahkamasi huzuridagi Yirik investitsiya loyihalarini ekspertizadan oʻtkazish byurosi (keyingi oʻrinlarda Byuro deb ataladi):

iqtisodiyotning bazaviy tarmoqlari — neft-gaz sanoati, geologiya, energetika, kimyo, metallurgiya, mashinasozlik korxonalarini, shuningdek yirik obyektlar va gidrotexnika inshootlarini qurish, rekonstruksiya qilish va zamonaviylashtirish bilan bogʻliq boʻlgan maqsadli dasturlar, konsepsiyalar va investitsiya loyihalarini Oʻzbekiston Respublikasi Prezidentining 2006-yil 3-apreldagi PQ–316-son qarorida belgilangan baholash mezonlari va talablar asosida ekspertizadan oʻtkazadi;

maqsadli dasturlar, konsepsiyalar va investitsiya loyihalarini amalga oshirishning maqsadga muvofiqligi va texnik jihatdan mumkinligi toʻgʻrisida belgilangan tartibda qaror qabul qilish imkonini beruvchi asoslangan tavsiyalar tayyorlaydi.

2. Byuro direktori va ekspertlari loyihalarning oʻz vaqtida, sifatli va toʻliq iqtisodiy, moliyaviy va huquqiy ekspertizadan oʻtkazilishi hamda ular yuzasidan kiritilgan tavsiyalarning asoslanganligi uchun shaxsan javob beradilar.

3. Oʻzbekiston Respublikasi Vazirlar Mahkamasi huzuridagi Yirik investitsiya loyihalarini ekspertizadan oʻtkazish byurosida maqsadli dasturlar, konsepsiyalar va investitsiya loyihalarini ekspertizadan oʻtkazish va tavsiyalar tayyorlash tartibi toʻgʻrisidagi nizom 1-ilovaga muvofiq tasdiqlansin.

4. Oʻzbekiston Respublikasi Vazirlar Mahkamasining 2005-yil 15-noyabrdagi 251-son qarori (Oʻzbekiston Respublikasi QT, 2006-y., 11-son, 61-modda) bilan tasdiqlangan Investitsiya loyihalari hujjatlarini ishlab chiqish, ekspertizadan oʻtkazish va tasdiqlash tartibi toʻgʻrisidagi nizomga 2-ilovaga muvofiq qoʻshimcha kiritilsin.

5. Oʻzbekiston Respublikasi Adliya vazirligi manfaatdor vazirliklar va idoralar bilan birgalikda ikki oy muddatda vazirliklar va idoralar tomonidan amaldagi normativ-huquqiy hujjatlar mazkur qarorga muvofiqlashtirilishini taʼminlasin.

6. Mazkur qarorning bajarilishini nazorat qilish Byuro direktori — Oʻzbekiston Respublikasi Bosh vazirining maslahatchisi Oʻ.T. Sultonov zimmasiga yuklansin.

Oʻzbekiston Respublikasining Bosh vaziri Sh. MIRZIYOYEV

Toshkent sh.,

2006-yil 22-may,

91-son

Vazirlar Mahkamasining 2006-yil 22-maydagi 91-son qaroriga 1-ILOVA

Oʻzbekiston Respublikasi Vazirlar Mahkamasi huzuridagi Yirik investitsiya loyihalarini ekspertizadan oʻtkazish byurosida maqsadli dasturlar, konsepsiyalar va investitsiya loyihalarini ekspertizadan oʻtkazish va tavsiyalar tayyorlash tartibi toʻgʻrisida

NIZOM

I. Umumiy qoidalar

1. Mazkur Nizom Byuroda Oʻzbekiston Respublikasi Prezidentining Farmoni yoki qarori, shuningdek Hukumat qarori bilan tasdiqlanishi lozim boʻlgan maqsadli dasturlar, konsepsiyalar va investitsiya loyihalarini amalga oshirish mumkinligi toʻgʻrisida qarorlar qabul qilish uchun ularni ekspertizadan oʻtkazishni tashkil etish va tavsiyalar tayyorlash tartibini belgilab beradi.

2. Iqtisodiyotning bazaviy tarmoqlari:

neft-gaz sanoati, geologiya, energetika, kimyo, metallurgiya, mashinasozlik korxonalarini, shuningdek yirik obyektlar va gidrotexnika inshootlarini qurish, rekonstruksiya qilish va zamonaviylashtirish bilan bogʻliq boʻlgan;

maqsadli davlat dasturlari va konsepsiyalarga kiritilgan;

ular boʻyicha Oʻzbekiston Respublikasi Prezidentining alohida qarorlari asosida soliqlar va boshqa majburiy toʻlovlar boʻyicha imtiyozlar berilishi nazarda tutiladigan;

markazlashtirilgan manbalar resurslari hisobiga yoki Oʻzbekiston Respublikasi Hukumatining kafolati ostida xorijiy kreditlar jalb etilgan holda amalga oshiriladigan;

mahsulot taqsimoti toʻgʻrisidagi bitimga muvofiq amalga oshiriladigan maqsadli dasturlar, konsepsiyalar va investitsiya loyihalari Byuroda ekspertizadan oʻtkazilishi shart.

3. Byuro ekspertizani amalga oshirishda Oʻzbekiston Respublikasi Konstitutsiyasiga, Oʻzbekiston Respublikasi qonunlariga, Oʻzbekiston Respublikasi Oliy Majlisi palatalarining qarorlariga, Oʻzbekiston Respublikasi Prezidentining farmonlari, qarorlari va farmoyishlariga, Hukumat qarorlariga, shuningdek ekspertizaning kompleksliligi, xolisligi, mustaqilligi prinsiplariga va mazkur Nizomga amal qiladi.

II. Maqsadli dasturlar, konsepsiyalar loyihalari va investitsiya takliflari boʻyicha Byuroga hujjatlarni (Oʻzbekiston Respublikasi Prezidentining hujjatlari va Hukumat qarorlari loyihalari) va materiallarni (hisoblash, asoslash) taqdim etish tartibi

1. Iqtisodiyotning bazaviy tarmoqlarida dasturlar, konsepsiyalar loyihalari va investitsiya loyihalari amaldagi qonun hujjatlari talablariga, Oʻzbekiston Respublikasi Prezidentining hujjatlari va Hukumat qarorlariga, shuningdek Oʻzbekiston Respublikasi Vazirlar Mahkamasi Ish tartibiga qatʼiy muvofiq ravishda belgilangan muddatlarda bajaruvchi — asosiy ishlab chiquvchi (komissiya, guruh, vazirlik yoki idora, Vazirlar Mahkamasining Axborot-tahlil departamenti) tomonidan puxta va har tomonlama ishlab chiqilgandan keyin Byuroga ekspertizadan oʻtkazish uchun kiritiladi.

Komplekt boʻlmagan va normativ talablarga javob bermaydigan hujjatlar va materiallar ekspertizadan oʻtkazilmaydi, bu haqda Byuroning direktori uch kun muddatdan kechikmasdan ekspertizani amalga oshirish rad etilishining aniq sabablarini asoslagan holda loyihaning asosiy ishlab chiquvchisini yozma ravishda xabardor qiladi.

2. Ekspertizadan oʻtkazish uchun asosiy ishlab chiquvchi tomonidan Byuroga quyidagi asosiy hujjatlar taqdim etiladi:

maqsadli dastur, konsepsiya loyihasi va investitsiya loyihasi unga muvofiq ishlab chiqilgan hujjatning nusxasi;

maqsadli dastur, konsepsiya loyihasi va investitsiya loyihasi (taklifi) loyihasi;

zarur hisoblab chiqilgan asoslashlar;

tushuntirish xati;

iqtisodiy, moliyaviy va huquqiy ekspertiza vakolatli organlarining xulosasi;

Oʻzbekiston Respublikasi Prezidentining tegishli Farmoni, Qarori, Farmoyishi yoki Hukumat qarori loyihasi;

loyihani tegishli vazirliklar va idoralar bilan kelishish varaqasi.

Yuqorida koʻrsatib oʻtilgan hujjatlar bilan birgalikda Byuroga Oʻzbekiston Respublikasi Bosh vazirining mutasaddilik qiluvchi oʻrinbosari imzosi bilan Vazirlar Mahkamasining tegishli kompleksining loyiha boʻyicha xulosasi ham taqdim etiladi.

3. Zaruriyat boʻlganda, Byuro tarmoq xususiyatini va loyihaning murakkabligini hisobga olgan holda koʻrib chiqilayotgan hujjatlarga tegishli qoʻshimcha maʼlumotlarni soʻrashga haqlidir.

4. 2-bandda koʻrsatilgan hujjatlar asosiy ishlab chiquvchi tomonidan Oʻzbekiston Respublikasi Vazirlar Mahkamasiga ikki nusxada:

bir nusxasi Oʻzbekiston Respublikasi Vazirlar Mahkamasining Ish tartibiga muvofiq puxta ishlab chiqish uchun tegishli Axborot-tahlil departamentiga, ikkinchi nusxasi mazkur Nizomga muvofiq ekspertizani amalga oshirish uchun Byuroga taqdim etiladi.

5. Tegishli Axborot-tahlil departamentida va Byuroda kiritilgan hujjatlarni koʻrib chiqish, puxta ishlash va ekspertizadan oʻtkazishda ekspertizaning mustaqilligi va xolisligi prinsiplariga qatʼiy rioya qilinadi.

III. Maqsadli dasturlar, konsepsiyalar loyihalari va investitsiya takliflarini ekspertizadan oʻtkazish va ular boʻyicha tavsiyalar tayyorlash tartibi

1. Byuroda maqsadli dasturlar va konsepsiyalar loyihalarini ekspertizadan oʻtkazish mazkur Nizomga ilova qilingan Sxemada belgilangan tartibda amalga oshiriladi.

2. Investitsiya loyihalarini (takliflarini) ekspertizadan oʻtkazish Oʻzbekiston Respublikasi Vazirlar Mahkamasining 2005-yil 15-noyabrdagi 251-son qarori bilan tasdiqlangan Investitsiya loyihalari hujjatlarini ishlab chiqish, ekspertizadan oʻtkazish va tasdiqlash tartibi toʻgʻrisidagi nizom talablariga va mazkur qarorga 2-ilovaga qatʼiy muvofiq ravishda amalga oshiriladi.

3. Loyihalarni Byuroda ekspertizadan oʻtkazish:

loyiha boʻyicha investitsiya xarajatlarining amalga oshiriladigan ishlarga muvofiqligini, taklif etilayotgan ishlab chiqarish texnologiyasining asoslanganligini va ishlab chiqarish siklining yaxlitligini va tugallanganligini baholash asosida, vatanimizdagi va xorijdagi eng yaxshi ana shunday loyihalar bilan qiyoslash asosida;

har tomonlama asoslangan zamonaviy texnologiya tanlanganligini, mahalliylashtirish va butlovchi buyumlar, yoqilgʻi-energetika, xomashyo va tabiiy resurslar bilan taʼminlanganlik darajasini baholash, ularni oqilona sarflash talablariga rioya qilinishi hisobga olingan holda;

talab etiladigan, shu jumladan import boʻyicha olinadigan sanoat qurilmalari, asbob-uskunalar, mashina va mexanizmlar roʻyxatining texnik darajaga va taklif etilayotgan texnologiyaga muvofiqligini baholash;

ishlab chiqarish uchun taklif etilayotgan mahsulotning narx va sifat tavsiflari boʻyicha raqobatbardoshligi darajasini baholash, mahsulotni sotishning uzoq muddatli bozorini chuqur ishlab chiqish;

mahsulot taqsimotiga oid bitimlar loyihalarini baholash, shuningdek konlar yoki yer osti uchastkalaridan foydalanish huquqiga litsenziya olish uchun talablar asosida amalga oshiriladi.

4. Byuroning loyiha boʻyicha tavsiyalarini tayyorlash ekspertiza natijalarini umumlashtirish asosida va Oʻzbekiston Respublikasi Vazirlar Mahkamasining tegishli kompleksi xulosasi hisobga olingan holda amalga oshiriladi.

5. Ekspertizaning tavsiyalari:

iqtisodiyotning tegishli bazaviy tarmoqlarida fan va texnologiyani rivojlantirish istiqbollarini, fan-texnika taraqqiyotining eng soʻnggi yutuqlarini qoʻllash darajasini, moddiy-texnika, energetika resurslari va resurslarning boshqa turlaridan maqbul foydalanish darajasini hisobga olishi;

tavsiyalarda texnik, texnologik va tashkiliy loyiha yechimlarining iqtisodiy samaradorligi, foydalanishning ishonchliligi baholangan boʻlishi;

import xomashyodan foydalanish bilan bogʻliq yangi quvvatlarni tashkil etishning ehtimol tutilgan oqibatlarini va mahsulot isteʼmoli bozorlari konyunkturasining oʻzgarishini hisobga olishi;

markazlashtirilgan (budjet) manbalar yoki Hukumat kafolati ostida xorijiy kreditlarni, shuningdek korxonalarning oʻz mablagʻlarini jalb etish hisobiga loyiha tashabbuskori tomonidan qoʻyilayotgan resurslarning samaradorligi toʻgʻrisida vakolatli moliya va bank organlarining xulosalariga muvofiq moliyaviy va iqtisodiy hisob-kitoblarning ishonchliligini (har xil variantlar asosida), investitsiya qilinadigan mablagʻlarning oʻz vaqtida qaytarilishi kafolatlari asoslanganligini, loyihaning qoplanuvchanligini (ishlab chiqariladigan mahsulotning sifati va uning mamlakat ichida va eksportga sotilishi shartligi) va barqaror foyda olinishini tasdiqlashi;

ekspertiza natijalari boʻyicha loyihani tasdiqlash maqsadga muvofiqligi asoslangan yoki qoʻyiladigan talablarga muvofiq emasligi tufayli loyihani rad etish toʻgʻrisidagi xulosalarni oʻz ichiga olishi kerak, unda loyiha yechimlarini qayta ishlash boʻyicha takliflar koʻrsatilishi lozim.

6. Zaruriyat boʻlganda Byuro oʻz vakolatiga kiradigan baholash mezonlari asosida aniq bir loyihaning maqsadlari va vazifalariga eng maqbul va samarali erishilishini taʼminlaydigan muqobil takliflarni ishlab chiqadi.

IV. Byuroning maqsadli dasturlar, konsepsiyalar va investitsiya takliflari loyihalariga oid tavsiyalarini koʻrib chiqish tartibi

1. Tayyorlangan tavsiyalar toʻgʻrisida Oʻzbekiston Respublikasining Bosh vaziriga koʻrib chiqish va qaror qabul qilish uchun Byuro direktori tomonidan yozma ravishda axborot beriladi.

Shu bilan bir paytda Vazirlar Mahkamasi tegishli kompleksining xulosasi ham koʻrib chiqiladi.

2. Oʻzbekiston Respublikasining Bosh vaziri tomonidan qabul qilingan qarorga muvofiq, qaror ijobiy boʻlgan taqdirda — Oʻzbekiston Respublikasi Prezidentining Farmoni, Qarori va Farmoyishi yoki Hukumat qarori loyihasi mazkur Nizom II bobining 2-bandida koʻrsatib oʻtilgan barcha zarur hujjatlar hamda Byuro tavsiyalari bilan birgalikda belgilangan tartibda Oʻzbekiston Respublikasi Prezidentining tegishli Davlat maslahatchisi xizmatiga taqdim etiladi yoxud qaror salbiy boʻlgan taqdirda — loyihani puxta ishlab chiqish uchun Bosh vazir oʻrinbosari — kompleks rahbariga va loyihaning asosiy ishlab chiquvchisiga qaytariladi.

3. Byuroda tavsiyalar tayyorlangan maqsadli dasturlar, konsepsiyalar va investitsiya takliflari loyihalari boʻyicha tizimli asosda maʼlumotlar banki yigʻib boriladi.

Oʻzbekiston Respublikasi Vazirlar Mahkamasi huzuridagi Yirik investitsiya loyihalarini ekspertizadan oʻtkazish byurosida maqsadli dasturlar, konsepsiyalar va investitsiya loyihalarini ekspertizadan oʻtkazish va tavsiyalar tayyorlash tartibi toʻgʻrisidagi nizomga ILOVA

Oʻzbekiston Respublikasi Vazirlar Mahkamasi huzuridagi Yirik investitsiya loyihalarini ekspertizadan oʻtkazish byurosida maqsadli dasturlar, konsepsiyalarni ekspertizadan oʻtkazish

SXEMASI

Vazirlar Mahkamasining 2006-yil 22-maydagi 91-son qaroriga 2-ILOVA

Vazirlar Mahkamasining 2005-yil 15-noyabrdagi 251-son qarori bilan tasdiqlangan Investitsiya loyihalari hujjatlarini ishlab chiqish, ekspertizadan oʻtkazish va tasdiqlash tartibi toʻgʻrisidagi nizomga kiritilayotgan qoʻshimcha

1-band quyidagi tahrirdagi xatboshilar bilan toʻldirilsin:

“Quyidagilar:

a) maqsadli davlat dasturlari, konsepsiyalarga kiritilgan hamda qonun hujjatlariga muvofiq Oʻzbekiston Respublikasi Prezidentining Farmoni yoki Qarori, shuningdek Hukumat qarori qabul qilinishini talab etadigan investitsiya loyihalari;

b) Oʻzbekiston Respublikasi Prezidentining alohida qarorlari asosida soliqlar va boshqa majburiy toʻlovlar boʻyicha imtiyozlar berilishi nazarda tutiladigan investitsiya loyihalari;

v) markazlashtirilgan manbalar resurslari hisobiga yoki Oʻzbekiston Respublikasi Hukumati kafolati ostida xorijiy kreditlar jalb qilingan holda amalga oshiriladigan investitsiya loyihalari;

g) mahsulot taqsimotiga oid bitimlarga muvofiq amalga oshiriladigan investitsiya loyihalari Vazirlar Mahkamasi tomonidan belgilanadigan tartibda bir vaqtning oʻzida Vazirlar Mahkamasi huzuridagi Yirik investitsiya loyihalarini ekspertizadan oʻtkazish byurosida ekspertizadan oʻtkaziladi”.