Jondor tumanidagi aholining ijtimoiy ehtiyojmand toifalarini 2027-yilda ishga joylashtirish uchun ish oʻrinlarining eng kam sonini belgilash va zaxiraga qoʻyish toʻgʻrisida (VII-33-90-2-35-K/26-son)
02.11.2026
XALQ DEPUTATLARI JONDOR TUMANI KENGASHINING
qarori
“Aholi bandligi toʻgʻrisida”gi Oʻzbekiston Respublikasi Qonunining 9-bobi, Vazirlar Mahkamasining 2017-yil 5-dekabrdagi 965-sonli qarori bilan tasdiqlangan “Ijtimoiy muhofazaga muhtoj, ish topishda qiynalayotgan va mehnat bozorida teng shartlarda raqobatlasha olmaydigan shaxslarni ishga joylashtirish uchun ish oʻrinlarining eng kam sonini belgilash va zaxiraga qoʻyish tartibi toʻgʻrisida”gi nizom hamda Oʻzbekiston Respublikasi Prezidentining 2025-yil 4-avgustdagi PF-126-sonli Farmoniga muvofiq, 2027-yilda aholining ijtimoiy ehtiyojmand toifalarini ish bilan taʼminlash uchun ish oʻrinlarini zaxiraga qoʻyish maqsadida, Jondor tumani kambagʻallikni qisqartirish va bandlikka koʻmaklashish boʻlimining 2026-yil 30-sentabrdagi 488-sonli xatini inobatga olib, “Mahalliy davlat hokimiyati toʻgʻrisida”gi Oʻzbekiston Respublikasi Qonunining 6 va 24-moddalariga asosan Хalq deputatlari Jondor tumani Kengashi qaror qiladi:
1. Jondor tumani kambagʻallikni qisqartirish va bandlikka koʻmaklashish boʻlimining 2026-yil 30-sentabrdagi 488-sonli xati maʼlumot uchun olinsin.
2. Oʻzbekiston Respublikasi Prezidentining 2025-yil 23-iyundagi PF-98-sonli Farmoniga muvofiq ijtimoiy ehtiyojmand shaxslarni ishga joylashtirish uchun ish oʻrinlarining eng kam sonini belgilash va zaxiraga qoʻyish vakolatlari Хalq deputatlari mahalliy Kengashlariga oʻtkazilganligi;
Oʻzbekiston Respublikasi Prezidentining 2025-yil 4-avgustdagi PF-126-sonli Farmoniga muvofiq xoʻjalik yurituvchi subyektlar faqat nogironligi boʻlgan shaxslar, oilaviy (maishiy) zoʻravonlikdan jabrlangan shaxslar, kambagʻal oilalar reyestridagi oilalarning aʼzolari, muqobil joylashtirish shakllarida tarbiyalangan yetim shaxslar, ota-ona qaramogʻidan mahrum boʻlgan shaxslar uchun ish oʻrinlarining majburiy zaxiralari shakllantirilishi, bunda majburiy zaxiralash xodimlar umumiy sonining 3 foizidan oshmasligi hamda xodimlari soni 100 nafardan ortiq boʻlgan tashkilotlarga nisbatan qoʻllanilishi;
byudjet tashkilotlari va davlat ulushi 50 foizdan yuqori boʻlgan korxonalar faqat nogironligi boʻlgan shaxslar, oilaviy (maishiy) zoʻravonlikdan jabrlangan shaxslar, kambagʻal oilalar reyestridagi oilalarning aʼzolari, muqobil joylashtirish shakllarida tarbiyalangan yetim shaxslar, ota-ona qaramogʻidan mahrum boʻlgan shaxslar, jazoni ijro etish muassasalaridan ozod qilingan hamda odam savdosidan jabrlangan shaxslar uchun ish oʻrinlarining majburiy zaxiralari shakllantirilishi, bunda majburiy zaxiralash xodimlar umumiy sonining 7 foizidan oshmasligi hamda xodimlari soni 20 nafardan ortiq boʻlgan tashkilotlarga nisbatan tatbiq etilishi belgilanganligi ijro uchun qabul qilinsin.
3. Jondor tumani kambagʻallikni qisqartirish va bandlikka koʻmaklashish boʻlimi hamda “Inson” ijtimoiy xizmatlar markazining takliflari maʼqullansin va 2027-yilda aholining ijtimoiy ehtiyojmand toifalari uchun jami 676 ta ish oʻrni zaxiraga qoʻyilsin, jumladan:
nogironligi boʻlgan shaxslar uchun 318 kishi;
oilaviy (maishiy) zoʻravonlikdan jabrlangan shaxslar uchun 4 kishi;
ijtimoiy reyestrdagi oilalarning aʼzolari uchun 352 kishi;
muqobil joylashtirish shakllarida tarbiyalangan yetim hamda ota- ona qaramogʻidan mahrum boʻlgan shaxslar uchun 2 kishi;
jazoni ijro etish muassasalaridan ozod qilingan shaxslar uchun 0 kishi; odam savdosidan jabrlangan shaxslar uchun 0 kishi.
4. 2027-yilda zaxiraga qoʻyiladigan ish oʻrinlarining:
davlat tashkilotlari (budjet tashkilotlari va davlat ulushi 50 foizdan yuqori boʻlgan korxonalar) boʻyicha manzilli roʻyxati 1-ilovaga;
xodimlarining roʻyxatdagi oʻrtacha yillik soni 100 nafardan ortiq boʻlgan xoʻjalik yurituvchi subyektlar (davlat ulushi 50 foizdan yuqori boʻlgan korxonalar bundan mustasno) boʻyicha manzilli roʻyxati 2-ilovaga muvofiq tasdiqlansin.
5. Barcha korxonalar, tashkilotlar va muassasalar, xoʻjalik yurituvchi subyektlar rahbarlariga:
zaxiraga qoʻyiladigan ish oʻrinlari umumiy sonining kamida 25 foizini kalendar yil boshlanishidan oldin 10 kundan kechiktirmay tayyor holga keltirsinlar hamda bu haqda Jondor tumani kambagʻallikni qisqartirish va bandlikka koʻmaklashish boʻlimiga axborot taqdim etsinlar;
ish oʻrinlarining qolgan qismini kalendar yilning birinchi choragi davomida zaxiraga qoʻysinlar hamda birinchi chorak tugaganidan keyin 10 kun ichida bu haqda axborot taqdim etsinlar;
ishga joylashtirilgan fuqarolar toʻgʻrisidagi maʼlumotlarni har oy hisobot oyidan keyingi oyning 5-sanasiga qadar taqdim etib borish vazifasi yuklatilsin.
Ish oʻrinlarini zaxirada saqlash “Aholi bandligi toʻgʻrisida”gi Qonunning 40-moddasiga muvofiq amalga oshiriladi.
6. Oʻzbekiston Respublikasi Prezidentining 2025-yil 14-fevraldagi 64-sonli qaroriga muvofiq, aholining ijtimoiy ehtiyojmand toifalariga mansub shaxslarni belgilangan eng kam sondan ortiq miqdorda ishga qabul qilgan ish beruvchilar subsidiya olish huquqiga ega ekanligi maʼlumot uchun qabul qilinsin.
7. “Aholi bandligi toʻgʻrisida”gi Qonunning 3, 13, 34, 38, 39, 40 va 41-moddalariga muvofiq mazkur qaror talablarini bajarmagan ish beruvchilar qonunchilikda belgilangan tartibda javobgar boʻladilar. Jarima qoʻllanilishi ish beruvchini zaxiraga qoʻyilishi lozim boʻlgan ish oʻrinlarini yaratish majburiyatidan ozod etmaydi.
8. Jondor tumani kambagʻallikni qisqartirish va bandlikka koʻmaklashish boʻlimi boshligʻi (Sh. Boboyev) besh kun muddatda ushbu qaror nusxasini “Bandlik xizmati” axborot tizimi orqali ish beruvchining “YaMMT” IDAKdagi shaxsiy kabinetiga yuborsin;
qaror ijrosi ustidan doimiy monitoring va nazoratni amalga oshirsin;
qaror talablarini bajarmagan yoki fuqarolarni ishga qabul qilishni asossiz ravishda rad etgan mansabdor shaxslarga nisbatan qonunchilikda belgilangan tartibda choralar koʻrilishini taʼminlasin.
9. Tuman hokimligi matbuot kotibi (S. Shomurodov)ga мazkur qarorni ommaviy axborot vositalarida eʼlon qilsin hamda tuman hokimligining rasmiy veb-saytiga joylashtirsin.
10. Mazkur qarorni ijrosini taʼminlash tuman hokimining birinchi oʻrinbosari (U. Fayzulloyev) zimmasiga yuklatilsin.
11. Mazkur qaror bajarilishini nazorat qilish Xalq deputatlari tuman Kengashining Mahalliy byudjet, tadbirkorlikni rivojlantirish va iqtisodiy islohotlar boʻyicha doimiy komissiyasi raisi (Q. Safarov) zimmasiga yuklatilsin.
12. Mazkur qaror qabul qilingan kundan eʼtiboran kuchga kiradi.
Kengash raisi L. BEHBUDOVA
Buxoro viloyati, Jondor tumani,
2026-yil 2-noyabr,
VII-33-90-2-35-K/26-son
Hujjatni ilovasi bilan PDF shaklida tanishish mumkin.
